Sakar aðili er bóandi konu ef er. Þá er sonr til arfs alinn, sextán vetra gamall. Þá er sá er dóttur hennar á til arfs alna. Þá er faðir. Þá er bróðir samfeðri. Þá er móðir. Þá er systir. Þá er bróðir sammœðri. Hinn skyldasti maðr skal sœkja legorðssǫk sem vígsǫk. Rétt er at gelda gǫngumenn ok varðar eigi við lǫg þóat þeir fái ørkuml af eða bana.
Ef kona klæðisk karlklæðum eða skerr sér skǫr eða ferr með vápn fyrir breytni sakir, þat varðar fjǫrbaugsgarð. Þat er stefnusǫk ok skal kveðja til búa fimm á þingi; sá á sǫk er vill. Slíkt er mælt um karla ef þeir klæðask kvenna klæðnaði.
Eigi skiptir skuldum til handa konu svá at aðrir menn eigi við hana heimting meðan bóandi hennar lifir, nema hon hafi ein við sik skuldir átt en heimilt verðr honum allt fé þeirra at hafa til skulda gjaldeyris.