Ǫll skulu kaup haldask með mǫnnum váttlaust nema fjǫgur, ef maðr kaupir land eða goðorð eða hafskip eða fastnar sér konu. Fjǫrbaugsgarð varðar ef maðr bregðr þeim málum, en þriggja marka útlegð um ǫnnur kaup hvarvetna þess er búar bera at keypt var eða váttar.
Ef maðr fiðr fé fyrir ofan jǫrð í sínu landi ok skal hann segja til þrjú sumur á alþingi, þá ef eigi verðr eigandi at et þriðja sumar þá eignask hann fét. Ef maðr fiðr fé í jǫrðu sinni ok skal hann segja til um sinn á alþingi, ef eigi verðr eigandi at, ok eignask hann þá. Því at eins verðr at réttu eigandi at ef sá verðr til er þat fé hefir frá verit stolit eða hans erfingjar ella.
Ef maðr grefr fé sitt í jǫrð til hirzlu gull eða silfr ok varðar þat fjǫrbaugsgarð. Sá á sǫk þá er sœkja vill. Þar skal kveðja heimilisbúa níu á þingi þess er sóttr er.