Fiorir ero lavgbávgar. Ein er þrimerkingr. Anar tuitog avre. Þriði tuimerkingr. Fiorðe tolf eyringr. Hofuð bavge fylgia vi. avrar bavgþac. oc þueite viii. ens fimtatigar. Tuitog aura fylgia half morc bavgþac oc þueite ii. ens fiorða tegar. Tuimerkingi fylgia iii. avrar bavgþac. oc þveite .xxiiii. Tolf eyringi fylgia ii. aurar bavgþac oc þveite xvi. At enom mesta bavgæ ero iii. menn bæðe bavgbøtendr oc bavgþygiendr faðir. oc sonr. oc bróþir. At xx. avra ero iiii. menn bæðe bavgbøtendr oc bavg þigiendr foðor faðir. oc sonar sonr. moþor faðir. oc dottor sonr. At tuimerkingi ero en iiii. menn bæðe bavgbætendr oc bavgþigiendr. foþor broþir oc broþor sonr. moþor broþir. oc systor sonr. Tolf eyring scolo taca brøðrungar. oc systkina sønir. oc systrungar. oc sva giallda. þar ero bavgar farnir. Þeir menn er enom vegna manne ero firnare en brøðrungar eða systkina sønir eða systrungar scolo taca morc af iafn nanom frændom vegandans. Næsta brøðrar vegandans scolo bøta næsta brøðrom ens vegna ørtog ens vi. eyris. Þeir menn er ero mane firnare veganda en næsta brøþra scolo gialda halfan fiorða eyre. iafn nánom frændom ens vegna. Anara brøðra ens vegna scolo taca ørtog ens iii. a eyris af anara brøðrom veganda. Þeir menn er ero manne firnare veganda en sva. scolo bøta hálfom avðrom eyre iafn nánom frændom ens vegna. Þriðia brøðra ens vegna scolo taca i. eyri af þriðia brøðrom veganda. þar fellr sac tala. En þær ero allar lyrit næmar sacir er eyris bót kömr til eða meire. Ef o hælgir menn ero vegnir oc vm telrat þar til sac bóta. Nu hafa fleire menn at vigi verit en einn. þa scal søkiande kiosa mann til veganda at domi eða at sött fyrir sættar monnom. þan er hann vill þeirra manna er at vigi voro oc scal hann iþess ætt telia tit sac bota. En ef hann ger eigi kiosa man til oc vm telrat þá til sac bóta. Ef vig sacar aðile sættiz a víg fyrir alþingis lof fram. þa a hann ecci at hafa at niðgiolldom við aðra frændr. þviat eins scal vigsacar aðili bavg taca ef hann a eigi vigs bøtr at taca. oc sva ef hann tecr eigi fe til meire sycno vegandanom en sa se fiorbavgs maðr þa á hann at hafa bavgbót. Aþilin ræðr sic af bavg bótom. ef hann førir vigsöcena miðr til laga eða til mini sáttar en þa mundi hann. ef hann scyldi feet hafa oc berr þat quiðr. Ef yngri maðr vegr man en .xii. vetra gamall enda verðe engi anar maðr saðr at raðom. þa á aðilin ein öll niðgioldin. Ef vig verðr olyst eða ranglyst oc er þo iófn heímting til sac bóta oc sva þot vig sokin verðe onýt ef engar metaz ohælgis varnir. Nu verðr vegande secr eða drepin oc er þo slíc heimting þa til niðgiallda sem aðr. Bavgar allir scolo uppi vera huegi margir er bøtendr ero eða huegi er margir við takendr ero. oc scal engi maðr meirom bavgom böta en taca. Enn mesta bavg scal taca faðir. oc sonr. oc broþir ens vegna manz oc taca af föðor oc søne. oc broþor veganda. oc scal morc taca hvar þeirra or bavginom oc ii. avra þacs oc þveite .xvi. enda scal sva huerr hinna gialda. ef þeir ero allir til huarirtuegio. Nu er ein sonr ens vegna manz en brøþr margir. oc scolo brøðr þo eina morc taca. oc i. sønir þott þeir se margir. en broþir .i. enda scolo veganda frændr sva scipta gialdeno með ser þótt eigi se iafn margir brøðr sem sønir. Ef bæðe lifir samfeðri bróþir oc anar sammøþri broðir ens vegna þa scal sammöðri broþir taca or morkine .ii. lute en samfeðre iii. enda scal hann ein hafa þak oc þveite. faþir scal taca ii. a lute bavgs ef eigi er sonr til. oc sonr .ii. lute ef eigi er faþir til. Nv lifir i. scap þiggiande at hofuð bavge hvergi þeirra er er oc scal hann fullan bavg taca með þake oc þveitum. Nu lifir hvárki ens vegna manz faðir ne sonr oc lifa þo brøðr bæðe samfeðra oc sammøðra. sumir. þa scolo sammøðra brøðr taca ii. lute bavgs en samfeðra brøðr iii. lute enda scolo þeir hafa þac oc þveiten öll. Nu lifir faðir eða sonr oc sa ein broþir er sammøðri er. þa scal hann taca af bavginom fullan broþor luta sva sem hann se samfeðri ef anar ein er þeirra til. En ef bæðe er til faðir oc sonr oc sa .i. broðir er sammøðri er. þa scal broðir taca af bavgenom hálfom vegnom peningi miðr en halfan .vi. eyri oc einn eyri þacs oc þveite viii. Nu er engi scapþiciande til at havfuð bavge nema broðir sammøþri. þa scal hann taca bavgin fullan oc þac. en engi þveiten. En ef eigi ero scapbøtendr til havfuð bavgs. þa scolo viðtakendr allir iafnt missa af iofno fe. sva a valt sem þeir ero til talþir. Anar bavgr er tuitög avre en þan bavg scal taca foðor faþir. oc sonar sonr. moðor faðir. oc dottor sonr ens vegna. oc taca af iiii. monnom þeim er iafn nanir ero veganda. þan bavg scal v. deila með þeim oc scal foðor faðir oc sonar sonr hafa iii. lute bavgs oc þoken oc þveiten öll. en moðor faðir oc dottor sonr ii. lute. Nu ef anar ein er til foðor faðir eða sonar sonr. en hinir baþir. oc sva þótt anar ein se þeirra til moðor faðir eþa dottor sonr en þesir báþir þa scal þo sva bavgenom til scipta sem aðr var um tínt enda heita þat bavgilde er þeir menn taca er karlsift ero comnir. En þat heita nef gilde er þeir menn taca er kuensift ero comnir. þótt allmargir se sonar synir eða dóttor synir oc takat þeir þa meira lut bavgsens enn aðr. oc sva þar er aðrir bavgþiciendr ero þa scal iafnt hverfa i alla kneruna. þott i. maðr se or öðrom kne runi en or öðrom all margir ef þeir ero hvarirtvegio or nef gilde eða hvarir tuegio or bavgilde. Nu ero engir scapþiciendr at .xx. avra nema foðor faðir. eða sonar sonr oc scal hann fullan bavg taca. með þake oc þveitom. En ef engir ero til nema moðor faðir eþa dottor sonr þa scolo þeir þo taca fullan bavg oc þacþan en engi þveite. Tui merking ens vegna foðor broðir oc broþor sonr. moðor broðir oc systor sonr scolo taca af þeim monnom iiii. er iafn nánir ero veganda oc scal moðor broðir oc systor sonr hafa ii. lute bavgs. enn foðor broðir oc broðor sonr iii. lute. enda scolo þeir hafa þac oc þueíte. Nv ef foðor broðir eþa broðor sonr er til bavgs einn. þa scal hann þo bavg taca fullan með þake oc þveitom. En ef moðor broðir eða systor sonr er ein til bavgs. þa scal hann þo fullan bavg taca oc þactan enn þveite engi. At þvi hofe scal þeim bavg scipta inefgilde sem xx. tog avra. Tólf eyring scolo taca brøðrungar oc systkina sønir. oc systrungar ens vegna. oc taca af þeim monnom öllom er iafn nánir ero veganda. þan bavg scal en v. deila með þeim oc scolo brøðrungar taca iii. lute bavgs oc þac oc þveite. en systrungar oc systkina synir ii. lute bavgs. þott ein se brøðrungr en all margir systrungar. eða systkina synir þa scal hann þo taca allan brøðrungs lut. Nu er systrungr ein en all margir brøðrungar oc scal hann hafa allan systrunga lut. Jáfn micit scolo systkina synir taca af þvi nef gilde sem systrvngar. En ef engi er til nema brøðrungr i. oc scal hann þo taca bavg fullan með þake oc þveitom. Nu er engi þeirra til nema systrungr i. þa scal hann þo taca bavg fullan oc þac með oc þveiten engi. Nv ero engir scapþiciendr til at þrimerkingi en scapbøtendr se til. þa scal foðor faðir oc sonar sonr. moðor faðir oc dottor sonr taca höfuð bavg scerðan hálfri mörc oc scal þeim bavg sva scipta inefgilde sem xx. tog avra. Sin bavg scolo þeir taca með þake oc þveitom. en aldregi scal skerþom bavge þac fylgia. ne þveite. Nv ero engir til nanare bavgþiggiendr en foðor broðir oc brøðor sonr oc systor sonr þa scolo þeir taca iii. bavga. Sin bavg scolo þeir taca með þveitom fullan oc þacþan. en höfuð bavg skerþan mörc en xx. tog avra scerðan hálfre morc. þa ero allir bavgar tuimerkingar. þviat eins scolo þeir sva taca ef nockorir ero scapbøtendr at hveriom bavge. enda scolo þeir iafnt taca þott nefgilldingar einir se til. tokonar. eða sva til giallzens. En ef engir lifa ibavggillde ens vegna nema brøðrungar eða systrungar eða systkina synir en scapbøtendr se til iöllom stoðom þa scolo þeir taca iiii. bavga. Sin bavg scolo þeir taca fullan oc þac með oc þveite. þeir scolo oc taca hofuð bavg scerðan hálfo. þa verðr þar enn meste bavgr at minzta bavge. þeir scolo en taca xii. avra at foðor foðor bavge xii. avra. at broþor sonar bavge. Þa er xx. tog avre scerþr morc. en tuimerkingr hálfre mörc. Engom bavge scal þac ne þveite fylgia nema brøðrunga bavge. þa bavga alla scal v. deila oc scolo iii. lutir huerfa undir brøðrunga en ii. lutir inefgillde. Nu er systrungr i. til en engir brøðrungar oc scal hann þo taca alla bavga. Ef engir lifa bavgþiggiendr nema faðir eþa sonr eþa broðir. en allir se til veganda frændr þeir er bavgom scolo bøta. En þa er sem allir se til ef nokorir ero scap bøtendr at hveriom bavge oc scal þa faðir oc sonr oc broðir taca alla bavga fulla hvart sem þeir ero allir til eða ein þeirra. þeir scolo sva scipta oðrom bavgom með ser sem sinom bavge. oc scal hofuð bavge .i. þac oc þveite fylgia. Nu er brøðrungr ein til en engvir systrungar ne systkina synir þa scal hann þo taca alla bavga sem aðr. Nu lifa engir menn ibavgildi ens davþa nema foðor faðir eþa sonar sonr. moðor faðir eþa dottor sonr. En allir lifa i bavgilde veganda. þa scolo þeir hvart sem þeir ero allir til eþa .i. taca alla bavga fulla nema höfuð bavg .i. hann scal fella halfri mörc. engom bavge scal þac ne þveite fylgia nema xx. tog avra. Nu lifa engir ibavg gillde ens vegna nema foðor broþir eða broðor sonr. moðor broðir eða systor sonr. En bøtendr ero til i öllom stöðom. þa scolo þeir taca alla bavga. hvart sem þeir ero allir til eða sumir. hofuð bavg scolo þeir taca scerþan mörc en xx. avra hafa hálfri mörc. Sin bavg scolo þeir fullan taca oc sva brøðrunga bavg. Engom bavge scal þac ne þveite fylgia nema tui merkingi. En ef engir ero nánare bavgþiggiendr til en brøðrungar. þa scal fara sem fyr var vm tínt. Nu ero viðtakendr til at hofuðbavge oc at tuimerkingi en engir at xx. tog avra. þa scal hann hverfa með mesta bavge ef bøtendr ero til. En ef sa bavgr er nockor er hvarke se til scapbøtendr ne scapþiggiendr oc fellr sa bavgr þa niðr. Frændr veganda ero bavgs scapbøtendr. oc sva at hueriom bavge sem þeir ero til talþir. Bavg gilldis menn veganda scolo þeim mun meira lut reiða bavgs hvers helldr en nef gildis menn. sem þeir taca meira lut. er bavg gilldis menn ero ens davða heldr enn nef gildis menn. Oc sva scolo þeir þvi gialde öllo scipta með ser er frændr ero veganda hvart sem þeir ero til bavgs hvers fleire eða færi. oc slícom lut halda up at öllom reizlom. þott nef gilldingar einir se scapbøtendr ens vegna. Frændr scolo scipta viðtökoni með ser i öllom stöðom. Nv ero engir scapbøtendr til hofuð bavgs en við takendr ero til. þa scal vegande bøta hofuð bavge fullom með þake oc þveitom. ef hann er sýcn oc samlendr. enda scalat hann fleirom bavgom bøta.
En ef hann er eigi til. þa scolo þeir bøta bavgom ii. er talþir ero til xx. tog avra sinom bavge fullom oc hofuðbavge scerðom hálfri mörc. Nv ero engir nánare bøtendr en foðor broðir oc broþor sonr. moðor broðir oc systor sonr. þa scolo þeir bøta bavgom iii. Sinom bavge fullom oc ii. mörcom at þrimerkingi oc ii. mörcom at xx. tog avra. ef viðtakendr ero til. Ef engir ero nanare bavgbøtendr en brøðrungar þa scolo þeir bøta bavgom iiii. ef viðtakendr ero til oc xii. avrom at hveriom bavgi. Engom bavge scal þac fylgia ne þveite nema brøðrunga bavge. Nu lifa engir ibavg gillde nema faðir oc sonr oc broðir. þa scolo þeir bøta bavgom öllom fullom ef viðtakendr ero til oc scal höfuð bavg ein þekia. En ef engir ero bøtendr til nema foðor faðir oc sonar sonr. moðor faðir oc dottor sonr. þa scolo þeir bøta bavgom iiii. hofuð bavge scal bøta scerðom halfri morc enn iii. fullom oc þekia xx. tog avra ein ef viðtakendr ero til allra. Nv ero engir bøtendr til nema föðor broðir oc broþor sonr. moðor broðir oc systor sonr en allir lifa i bavg gillde ens vegna. þa scolo þeir böta bavgom .iiii. þeir scolo bøta ii. morcom at hofuð bavge oc ii. morcom at xx. aura en fullom sinom bavge. oc þekia þan ein. en xii. avra at minzta bavge. Nu lifa bøtendr at mesta bavge oc minzta. en viðtakendr ero eigi til iöllom stöðom. þa scal faðir oc sonr oc broðir bøta bavgom iii. fullom. höfuð bavge einom scal þac oc þveite fylgia. Nu er engi þeirra til nema broðir sammøðre. oc scal hann þa iafnt allre bót uphalda nema þueitom. Su er oc kona ein er bæðe scal bavge bøta oc bavg taca ef hon er einberne en su kona. heitir bavgrygr. En hon er dottir ens davða enda se eigi scapþiGiande til höfuð bavgs en bøtendr life þa scal hon taca þrimerking sem sonr. ef hon toc eigi full sætte at vigs bótom til þess er hon er gipt. enða scolo frændr a lengr taca. Nu er hon dóttir. veganda en engi er scapbøtande til höfuð bavgs en viðtakendr se til. þa scal hon bøta þrimerkingi sem sonr til þess er hon kömr ivers huilo en þa kastar hon giolldom i kne frændom. Þeir menn ero oc .v. er sac avkar heita. i. er sonr þy borin eða lavngetin. ii. er stiup sonr. enda ná magar .iii. Ef maðr a moðor ens vegna eða dóttor eða systor. þeir scolo taca allir saman xii. avra oc v. penninga vegna oc taca sva hvart sem er ein þeirra eða allir. oc iafn mikin lut huerr þeirra við anan oc taca af þeim monnom v. er iafn tengþir ero veganda oc iafn miclo scolo þeir þa bøta þott i. þeirra se til gialldzens sem allir. En ef þeir ero engir til aðrir tueGio þa fellr su sac bót niðr. En ef þeir menn ero engir til sac bóta er manne se firnare en brøðrungar enom vegna. þa scolo næsta brøðrungar taca þeirra lut oc þriþiungi mina enn hinir. en sin lut allan. Nu hvargi þess eptir bavga er engvir ero til at taca sac bót. þa scolo enir scyldri a vallt þeir er næstir ero hinom taca fullan þeirra lut. En ef þeir ero eigi til. þa scolo enir firnare oc taca hina lut þriþiunge scerðan at sins föðor bótom ef bøtendr ero til. Ef scapbøtendr nokorir ero eigi til eptir bavga. þa scolo enir scyldri böta allri bót. Nv ero engir enir scyldri. þa scolo enir firnari reiða þeirra bøtr er eigi voro til þriþiunge scerþan at sins føðor bótom. En niðr fellr su bót er hvergi ero til. iafnt scolo bøtr allar huerfa i alla kneruna þær er eptir bavga ero. Ef leysingr er vegin þa scolo .xii. avrar at mesta bavge en ii. avrar at bavg þake. En at avðrom bavge x. avrar oc iiii. örtogar at bavgþace. En at iii. a bavge morc oc eyrir at bavgþake. En at minzta bavge vi. avrar en ii. örtogar at bavgþake. Þræl bavgar scolo þar vera er þrælar ero scap þiggiendr. Nv scal ina minzto bavga segia er þræll scal þræli bøta. þar ero þveite .xxiii. at hofuð bavge. en vii. þveite at bavgþace. En at föðor foðor bavge xx. þveite oc iii. at bavg þake. At foðor broðor bavge xv. þveite oc iii. at bavgþake. At brøðrunga bavge scolo xii. þveite oc ii. at bavgþake. Þar scolo oc vera at sacbótom eptir bavga viii. þveite. oc þriþiungr ens v. a þveites. oc halft iiii. a þveite. oc þriþiungr ens iii. a þveites oc hálft anat þveite. Eitt þveite scolo taca þriþia brøðra oc sva gíalda enda verþr su sac bót minzt. þar at eins scolo þrælar bøta er þeir hafa orkost til er bøta scolo. Þeir menn ero en iiii. er náir ero kallaþir þott lifi. Ef maðr er hengðr eða kyrcþr eða settr i grof. eþa i scer. eða heptr afialle. eða illeðar mále. Þar heitir gálg nár. oc graf nár. oc sker nár oc fiall nár. Þa menn alla scal iafnt aptr giallda niðgiolldom sem þeir se vegnir þott þeir lifi. Sua er mælt at þat sumar scal niðgialda heimting up hefia er vigsökin er sett eða sótt eða hana scyldi søkia. oc er þa rétt at lysa þegar til sócnar ahendr þeim monnom öllom er spurt hafa vigit. Søkiande scal at domi telia frændsemi með þeim er sottr er oc veganda oc með ser oc enom vegna.
Siþan scal hann nefna vatta. at þvi vætte. scal hann queða at ec leg þat undir þegnscap min at su er frændsemis tala sön oc rétt með oss hvaromtuegiom. er nv er talit. en þær sacir með orr. n. n. Hann scal oc hafa sanaðar menn ii. a þa er þat legi undir þegnscap sin at þeir hygi þa frændsemis tolo rétta. en fer vm þav mal at aðro sem vm onor fe víte. Rett er oc at stefna heiman til sac bóta. En ef sa telr anan iafn scyldan eða scyldra er sottr er. þa scal hann telia þa frændsemi fyrir sökianda oc vina eið at. enda scal þa doma slict a hond hveriom þeirra sem lög ber til. enda scolo trygðir coma huervetna at mote sac bótom. eigi verðr ella heimting til þeirra. Ef lyrit næmar sacar ero með monnom obottar. þa scal frænde veganda huergi deila samvisto við ens vegna frænda. nema þvi at eins ef hann hefir þar vist aðr eða gisting sva tekit at hann vissi eigi hins i þat sin þangat ván. En ef sa gerir eigi sva þa á hin cost at veria honom lyrite samvistona. En ef hann fer eigi abrott þa varðar honom fiorbavgs garð oc scal þeirre soc stefna heiman oc queðia til heimilis bva ix. a þingi þess er sottr er at bera vm þat hvart hann hafe hafða samvisto við hin siþan er lyrite var varet eða eigi oc scal þo sana frændsemi sem aðr var tínt. Ef maðr ryfr trygðir þar er bøtt er sac bótum þa eycz þar retr hvers manz hálfo. við þan þeirra er bøtto. enda scal a þav mál engi sættaz fyrir lof fram. Ef menn ero eigi fulltiða eða af landi farnir þeir er bötr eigo at taca. þa scolo þeir heimta sit at þeim er þeirra lut tóco. En ef þa var scerðom bótom bøtt oc scolo veganda frændr þat giallda er afurðe. Nu voro veganda frændr eigi fulltiða eða voro þeir erlendis þa er bavgom var bött þa scolo þeir gialda þat er til þeirra com. þa er þeir ero full tiða. eða coma ut oc scipta sva til sem nv var tint. Þat er silfr sac gilldt ibavgom oc sva iþavcom oc þveitum. er eigi se verra heldr en var logsilfr et forna þat er x. penningar gera eyri oc meire se silfrs litr á en messingar oc þole scor oc se iafnt utan sem inan. Enda er rett at giallda þat i lög avrom öllom.