Bókastaðir

Þat er mælt þar er menn vinaz á a alþingi. oc scal þar queðia bvða quiðar iþær búþir iii. er næstar ero þeirra er iii. menn se réttir or huerre at tengðum. eigi scal queðia isutara buþir. ne suerþ scriþa búþir. En þa menn scal fyrst queðia er buðir eigo ef þeir ero réttir i quoð. oc scal þa fyrst queðia er mest eigo ibuð ef eigi þarf alla. þa scal boendr aðra queðia ef eigendr ero eigi réttir eða sva ef fleiri þarf. en ef eigi viðr ella þa scal queðia grið menn. Vm averc oll oc vm frumhlavp oc vm röð. oc þa laga lösto alla er menn gera a alþingi aþeim vetvangi er menn fa þar sör oc scal þar buða quiðr vm scilia. en frumhlavp oc averc þav er verða með monnom a alþingi scal at logbergi lysa. Þa er menn verða quaddir buða quiðar a alþingi oc hafe eigi af hendi leystan. oc ero þeir scyldir et næsta sumar eptir at fara til alþingis. iafnt sem þeir se heiman quaddir. Ef maðr deyr or þeim sárom er hann fecc þar. oc er costr at lysa fyrir bvom v. þeim er næstir bva þar er hann andaz.

Ef maðr drepr man eða særir a þingom. [eða aleiðum helgaðum. oc varðar þat scog gang enda eykz þar réttr manz hálfo. Nu vill maðr hefna sin en hin er a honom hevir unit er lavpin i búð in oc standa menn þar fyrir honom. þa scolo þeir er eptir sökia beiða þess at þeir megi ganga in i buðina. Nu vilia hinir þat eigi oc standa fyrir oc varðar þat fior bavgs garð ef eigi er a vétvangi. en scog gang ella enda er búðin oheilog nema þeir villdi sva scilia þa at sa hafðe lavpit er þa er vanlute. Þa scal bva queðia er þar bua næstir þingino ef eigi ero þeim averk kend. Nu drepaz menn eða særaz eða vegaz a alþingi. oc eykz þa hálfo réttr þeirra manna er a er unit enda varðar eigi at menn stande þar fyrir monnom].

Nv verða þa averc með monnom a alþingi er ny mæli ero upsögð. oc er eigi þa scyllt at föra doma ut oc scal bva þa queðia til vm þat mál er næstir bva þing velli þeirra er rettir se at sculdleicom. oc at hreýrom. Ef maðr verðr vegin eða verðr hann omale eða ovite af a vercom a alþingi. oc er sa socnar aðile er a þingi er scyllztr karl manna.

Ef maðr verðr secr vm vig þat er hann vegr a alþingi þa er sa maðr gilldr iii. morcom lögavra. Sa maðr er oc anar sva gilldr er hann brenir menn ine. En inn þriðe þræll sa er vegr at drottne sinom eða at drottningo eða born þeirra eða fostr. iiii. er morð vargr. En aðrir scogar menn allir þa ero gilldir viii. avrom.

Þar er menn verða secir vm vig þa scal sokiande kiosa man til veganda at domi eða at sött fyrir sattar monnom. þan er hann vill þeirra manna er at vige voro. oc scal hann iþes átt telia til sac bóta oc sva a hann við þan man hruðningar. en ef hann gor eigi kiosa. oc of telrat hann til sac bóta þa ne til hruðninga.

Þat er mælt. at maðr scal stefna vm morð oc queðia til xii. quiðar goða þan er sa er iþingi með er sóttr er. Costr er at queðia heimilis bva ix. heiman. þess manz er sottr er oc lysa söcena aþingi þvi er hann quaddi bva til. Sa er in iii. costr at hrævm fundnom at queðia bva fra hreum oc lysa söc a þingi. Sacar þessar allar er her ero talþar þær scal lysa aþingi en quedia bva heiman enda er rétt at lysa þær sacir allar er heiman ero quaddir bvar vm. enda er rett at stefna hvar þess er rétt er at lysa.

Sacar þessar allar er aðilin hefir spurt þa er iiii. vicor ero af sumri eda fyr oc scal hann stefnt hafa miðvico dag þan et siðarsta er vi. vicor ero af sumre en næsta dag eptir. en bvar scolo quaddir vera lavgar dagin þan eptir á eni vii. ° vico. En ef hann spyr siðar söcena aðilen eda gerezc honom siðar en sva oc fyrir far dag in efsta. þa er rétt at stefna alt til þess er vii. vicor ero af sumre et siðarsta. en bvar scolo quaddir vera er viii. vicor ero af sumre. En þar er gagn quoð komr til oc hafe aðrir quatt fyrir fardaga en aðrir vili queðia eptir far daga. oc scolo þeir ena sömo bva þo queðia. En ef bvar hafa fört heimile sítt a þui mele oc scolo þeir þar quedia þa sem þa átto þeir heimili er en fyre var quoðin. En sa er eptir fardaga hefr upp bva quoð scal quedia bva þa er næstir scolo bva þav missere þeim stað er hann queðr vm. Ef maþr spyr söc þa er hann er aðili at drottins dag ifardögom eda siðar. oc a hann cost at bva soc þa eigi til sócnar a þvi sumre. Enda er costr at søkia a eno næsta alþingi. oc ef sv soc er. er heiman scal quedia bva til oc scal hann stefnt hafa ef hann hygr en v. ta dag vico et siðarsta er viii. vicor ero af sumre oc sva quadda bva. anat tuegia scal alla bva quedia þa er bvet hafa fyrir en v. ta dag ifardögom eda eptir fardaga. Sacar þær allar er siðar coma vpp en viii. vicor ero af sumre þa er sva mælt ef eigi er heiman quoð til oc sva þær allar er sva siðarla coma upp þótt heiman quoð comi til. at hann mætti eigi fa quadda bva þa er viii. vicor ero af sumre. þa scal þeim söcom stefna sva nær alþingi sem hann vill. ef hann vill þo a eno næsta al þingi søkia. En ef heiman quoð keme til saca ef fyr hefðe upp comit. oc scal hann queðia til þa bva ix. aþingi er næstir bva þa þeim stað er hann átti vm at queðia ef hann quadde heiman til enar sömo sacar. nymæli. Ef aðili spyr sva siðarla vig söc.

Ef aðile er utan fiorðungs. oc er honom rétt at hafa þan til buning at lysa aþingi oc queðia bva heiman oc queðia vetvangs bva ix. aþingi. Ef sva nær er alþingi at utanfiorðungs monnom þickir eigi ráðrúm til at coma at bva mal til sócnar a þvi sumre hvatki er at þrýtr. oc er rétt at hann lýse at þinglavsnom til socnar anat sumar ef hann vill. enda scal hann queðia bva hvart sem hann vill heiman eða a þingi.

Ef menn hlavpaz til eða særaz eða verða men vegnir iþingför oc er rétt at lysa fyrir ix. bvom ef þeir ero þar sva til eða fleíre þeim er hann hygr at eigi mone laga lestir kendir aþeim vetvangi. enda er rétt at lýsa fyrir .v. vetvangs bvom þeim er réttir se at leiþar lengð allir i ix. bva quið. En sa er in þriði costr at þingi helgoðo at lysa at logbergi ef sva ner er alþingi at hann getr þar lyst fyrir iii. ° sól. Þeirre söc scal stefna heiman at heimili þess er sottr er eða ella þar er hann heyri a sialfr oc queðia til ix. vetvangs bva aþingi enda er rétt at maðr stefni þar fyr en hann lysi frumhlavp eða averc. Rétt er at lysa þa söc a þingi oc søkia et sama sumar. oc queðia vetvangs bva aþingi ef raðrúm er at þvi fyr en domar fare ut. Ef lyst ero averc ahönd manne at lög bergi þav er iþingforini gerþuz oc þo at hann se þa aþingi. oc a hann eigi alengr þingvært. oc scal hann samdegris fara af þingi er lyst er ahond honom.