Bókastaðir

Eigi ero bvar scylldir at bera vm huetvetna. vm engi mal eigo þeir at scilia þav er erlendis hava gerz eða firir avstan mitt haf þott her se sótt. Eigi eigo bvar en at bera vm þat hvat log ero alandi her. Ef bvar ero quaddir vm þat er nv var talit oc þeir atto eigi vm at scilia þa scolo þeir ganga til doms oc nefna ser vatta. at þvi at þeir lata þat standa fyrir quiðburð sinom at þeir ero vm þat mal quaddir er þeir eigo eigi vm at scilia. oc sva ef þar ero ix. bvar quaddir er v. bvar atto at vera. Eða sva v. bvar þar er .ix. ætti eþa eigi .xii. quiðr at scilia þat mal er bvar ero vm quaddir. þa scolo bvar ganga til doms oc nefna ser vatta. at þvi at þeir láta þat standa fyrir quiðburði sinom. at þeir ero ix. quaddir til þess er .v. eigo at scilia. eða þar v. er ix. ætti at vera. eða ero þeir vm þat mal quaddir er xii. quiðr kømr til. Ef goði er quaddr xii. quiðar vm þat er hann á eigi at scilia. þa scal hann ganga til doms oc nefna ser vatta. at þvi at hann er um þat mal quaddr goða quiðar er bva quiðr eða vattorð átti at scilia. Hvervetna þess er manne verðr sva mioc mistekit til gagna sem nv var tint. þa varðar ecki þótt gögnom se haldit enda er onytt málit hvart sem þat er sócn eða vörn.