Eigi eru búar skyldir at bera um hvetvetna. Um engi mál eigu þeir at skilja þau er erlendis hafa gerzk eða fyrir austan mitt haf, þótt hér sé sótt. Eigi eigu búar enn at bera um þat hvat lǫg eru á landi hér.
Ef búar eru kvaddir um þat er nú var talit ok þeir áttu eigi um at skilja þá skulu þeir ganga til dóms ok nefna sér vátta, at því at þeir láta þat standa fyrir kviðburð sínum at þeir eru um þat mál kvaddir er þeir eigu eigi um at skilja, ok svá ef þar eru níu búar kvaddir er fimm búar áttu at vera. Eða svá fimm búar þar er níu ætti eða eigi tylftarkviðr at skilja þat mál er búar eru um kvaddir, þá skulu búar ganga til dóms ok nefna sér vátta, at því at þeir láta þat standa fyrir kviðburði sínum, at þeir eru níu kvaddir til þess er fimm eigu at skilja, eða þar fimm er níu ætti at vera, eða eru þeir um þat mál kvaddir er tylftarkviðr kømr til.
Ef goði er kvaddr tylftarkviðar um þat er hann á eigi at skilja, þá skal hann ganga til dóms ok nefna sér vátta, at því at hann er um þat mál kvaddr goðakviðar er búakviðr eða váttorð átti at skilja. Hvervetna þess er manni verðr svá mjǫk mistekit til gagna sem nú var tínt, þá varðar ekki þótt gǫgnum sé haldit, enda er ónýtt málit hvárt sem þat er sókn eða vǫrn.