Bókastaðir

Ef menn feria þan man ut hingat er sama sumar varð secr scoggangs maðr oc varðar þat scog gang. ef þeir visso eigi at hann var secr oc varþar þeim þa eigi. nema þeir hafe hann iii. nætr siþan er þeir spurþo. oc varðar þa scog gang. Nv feria menn ut hingat þan man er fyr varð secr scogar maðr anat sumar. þa scolo þeir gera anattuegia at drepa hann eða at føra hann þeim er hann secþi a þeim hálfom manaðe er þeir spyria at hann varð secr. Nv vilia þeir hvarki þeirra þa varðar þeim scog gang.

Ef maðr handsalar manne sátt slíca sem hann vill gerva hafa oc scilia þeir þat mál eigi gor en sva. Þa ma hann eigi gera secþ hans ne eina oc a enga a hann at queða gripe hans ef þat var eigi scilit. til ihandsale þeirra. Fe sátt scal hann gera slíca er hann vill. oc queða á avra hue marga hann scal giallda eða hue stora eða hue margir avrar scolo i gripum eða hue margir fríðir. Ef maðr gorir a anan veg þa sátt er sva er fyrir mælt en nv er tint. hvart sem hann gorir secþ hans eða þat at hann scyli land sitt giallda eða goðorð eða queðr hann a gripe hans nockora oc scal þat enugi hallda. þat a allt isattar gerð at hafa er þeir sciloðo fyrir váttom til. ef hann vill oc a þat allt at hallda.

Ef manne er stefnt fyrir fardaga at logheimile sino. vm þat lögheimile scal queðia bva þott vm alþingi se quatt. oc þa menn er þa bua næstir þeim stað er vm er quatt. Ef sa bui ber quið en annan dag viko kømr til varþings. þa verðr þat at sacar spelli.

Þat sagði ulfheðin lög ef maðr vill søkia vm scogar manz biorg eða fiorbavgs manz er farning er mælt. ef þeir leita eigi við brott fór sem mælt er ilögom. heiman scal stefna manne vm biorg þeirra til alþingis oc til fiorðungs doms. telia fiorbavgs garð varða. Söc scal fram segia sva scapaða sem stefnt var. oc bera stefno vætte. þat vætte scal næst er nefnt var at ferans domi, er domr dømþi hann scogangs man ferianda oc sva vandhæfan sem fiorbavgs man. oc eiga eigi utquæmt ef sva var mælt. Ef maðr søkir vm fiorbavgs manz biorg þa scal fylgia stefno vætte söc en þvi næst þat vætte er at vættino var nefnt i ferans domi. hver secþ hans var dømþ. i domi þeim er hann varð fiorbavgs maðr. þat scal et þriðia vætte er sagt var til secþar hans at lögbergi vel lavst oc brec lavst slicrar sem hann var dømþr eða slicrar sem sáttar maðr gerþi a hond honom. þa scal þat vætte bera er at þvi var nefnt at ferans domr var attr eptir hann. Vlfheðin sagði þat lög at ferans domr scyli døma afall secþar þeirrar sem honom var dømþ eða gör. Tolptar quiðar scal queðia goða þan er sa er i þingi er sottr er. hvart sa maðr hafðe verit samvistom við scogar man eða eigi oc i þvi biorg veitta. Sva morg vætte scal bera sem þeir voro at nefndir.

Sva scal meta sem af se borin quiðr. ef sa duelr er quadde vnz sol kømr aþingvöll. Ef menn leifa nokot orð i quiðvm eða i vettom þat er mále sciptir. oc er þa sem haldit se quiðnom eða vettom.