Bókastaðir

Hēr forðfērde Sigerīc arcebisceop. ⁊ fēng Ælfrīc Wiltūnscīre bisceop tō ðām arcebisceop rīce.

Hēr on þisum gēare cōm Anlaf ⁊ Swegen tō Lunden byrig on Nativitas sc̄e Marie mid ·iiii· ⁊ hundnigontigum scipum. ⁊ hī ðā on ðā burh festlīce feohtende wǣron. ⁊ ēac hī mid fȳre ontendan woldon. ac hī þār ge fēordon māran hearm ⁊ yfel þonne hī ǣfre wēndon. ꝥ heom ǣnig burhwaru ge dōn sceolde. Ac se hālige Godes mōdor on ðām hire mildheortnisse þǣre burhware ge cȳðde. ⁊ hī āhredde wið heora fēondum. ⁊ hī þanon fērdon. ⁊ wrohton ꝥ mǣste yfel þe ǣfre ǣnig here dōn mihte on bærnette ⁊ hergunge ⁊ on manslihtum ǣgðer be ðām sǣ riman on ĒastSeaxum, ⁊ on Cent lande. ⁊ on SūðSeaxum. ⁊ on Hamtūn scīre. ⁊ æt nȳxtan nāman heom hors. ⁊ ridon swā wīde swā hī woldon. ⁊ un āsecgendlice yfel wircende wǣron. Þā ge rǣdde se cyng ⁊ his witan ꝥ him man tō sende. ⁊ him gafol be hēte ⁊ metsunge wið þon þe hī þǣre hergunge ge swicon. ⁊ hī þā þet under fēngon. ⁊ cōm þā eall se here tō Hamtūne. ⁊ þǣr winter setle nāmon. ⁊ hī man þǣr fǣdde geond eall West Seaxna rīce. ⁊ him man geald ·xvi· þūsend punda. Þā sende se cyn [g] æfter Anlafe cyninge. Ælfēach ƀ ⁊ Æðelward ealdorman. ⁊ man gīslade þā hwīle in tō þām scipum. ⁊ hī þā lǣddan Anlaf mid mycclum wurðscipe tō þām cynge tō Andeferan. ⁊ se cyng Æðelrēd his anfēng æt ƀes handa. ⁊ him cynelīce gifode. ⁊ him þā Anlaf behēt swā hē hit ēac gelǣste. ꝥ hē nǣfre eft tō Angel cynne mid unfriðe cumon nolde. Hic Ricardus uetus obiit. et Ricardus filius eius suscepit regnum. et regnauit ·xxxi· añ.

Not in Parker (A).

Hēr on þissum gēare ætēowde cometa se steorra. ⁊ Sīrīc arcƀ forðfērde.

Not in Parker (A).

Hēr on þissum gēare wæs Ælfrīc ge hālgod tō arcƀe tō Xp̄es cyrcean.

Not in Parker (A).

Hēr on þissum gēare fērde se here ābūtan Defnan scīre in tō Sæfern mūðon. ⁊ þǣr ge hergodon ǣgðer on Cornwealum ge on Norðwalum. ⁊ on Defenan. ⁊ ēodon him þā up æt Wecedport. ⁊ þǣr mycel yfel wrohtan on bærnette. ⁊ on manslihtum. ⁊ æfter þām wendon eft ābūtan Penwihtsteort on ðā sūðhealfe. and wendon þā in tō Tamermūðan. ⁊ ēodo'n' þā up oð ꝥ hī cōmon tō Hlidaforda. ⁊ ǣlc þing bærndon ⁊ slōgon ꝥ hī ge mētton. ⁊ Ordulfes mynster æt Tefingstoce forbærndon. ⁊ un āsecgendlice here hūðe mid him tō scipa brohtan.

Not in Parker (A).

Hēr gewende se here eft ēastweard intō Frommūðan. ⁊ þǣr ǣghwǣr up ēodon swā wīde swā hī woldon intō Dorsǣtan. ⁊ man oft fyrde ongēan hī gegaderode. ac sōna swā hī tō gædere gān sceoldan. þonne wearð þǣr ǣfre þurh sum þing flēam āstiht. ⁊ ǣfre hī æt ende sige āhton. ⁊ þonne ōðre hwīle lagen heom on Wihtlande. ⁊ ēoton heom þā hwīle of Hamtūnscīre. ⁊ of Sūðseaxum.

Not in Parker (A).

Hēr cōm se here eft ābūton in tō Temese. ⁊ wendon þā up andlang Medewægan tō Hrofeceastre. ⁊ cōm þā sēo Centisce fyrde þǣr ongēan. ⁊ hī þǣr fæste tō gedere fēngon. ac wālā ꝥ hī tō hraðe bugon. ⁊ flugon. for þām þe hī næfdon fultum þe hī habban sceoldan. þā āhton þā Dæniscan wælstōwe geweald ⁊ nāman þā hors. ⁊ ridan swā wīde swā hī woldon sylf. ⁊ fornǣh ealle Weast Centingas fordydon. ⁊ forhergodan. Ðā rǣdde se cyng wið his witan ꝥ man sceolde mid scipfyrde. ⁊ ēac mid landfyrde him ongēan faran. ac ðā þāscipu gearwe wǣron. þā elkede man fram dæge tō dæge. ⁊ swencte ꝥ earme folc þe on ðām scipon lagon. ⁊ ā swā hit forðwearde bēon scolde. swā hit lætre wæs fram ānre tȳde tō ōðre. ⁊ ā hī lēton heora fēonda wærod wexan. ⁊ ā man rȳmde fram þǣre sǣ. ⁊ hī fērdon ǣfre forð æfter. ⁊ þonne æt þām ende ne behēold hit nān þing sēo scipfyrding. būton folces geswinc. ⁊ fēos spilling. ⁊ heora fēonda forðbylding.

Not in Parker (A).

Hēr on ðissum gēare se cyng fērde in tō Cumerlande. ⁊ hit swīðe nēah eall forhergode. ⁊ his scipu wendon ūt ābūton Lēgceastre. and sceoldan cumon ongēan hine. ac hī ne mihton. þā gehergodon hī Mænige. ⁊ sēo unfriðflota wæs þæs sumeres gewend tō Ricardesrīce.

Hēr on þysum gēare wæs micel unfrið on Angel cynnes londe þurh scip here, ⁊ wel gehwǣr hergedon ⁊ bær [n] don, swā ꝥ hȳ upp āsetton on ǣnne sīþ ꝥ hȳ cōman tō Æþelinga dene. ⁊ þā cōm þǣr tō gēanes Hamtūn scīr, ⁊ him wið gefuhton. ⁊ ðǣr wearð Æþelweard cinges hēah gerēfa ofslegen. ⁊ Lēofrīc æt Hwītciricean, ⁊ Lēofwine cinges hēah gerēfa, ⁊ Wulfhere bisceopes ðegn, ⁊ Godwine æt Worðige, Ælfsiges bisceopes sunu. ⁊ ealra manna ān ⁊ hund eahtatig. ⁊ þǣr wearð þāra Denescra micle mā ofslegenra. þēah ðe hīe wælstōwe geweald āhtan.

⁊ fōran ðā þanon west oþ ꝥ hȳ cōman tō Defenan, ⁊ him þǣr tō gēanes cōm Pallig mid þan scipan ðe hē gegaderian mihte, forþām þe hē āsceacen wæs fram Æðelrēde cyncge ofer ealle ðā ge trȳwða ðe hē him geseald hæfde, ⁊ ēac se cyng him wel gegifod hæfde on hāmon, ⁊ on golde ⁊ seolfre. ⁊ for bærndon Tegntūn, ⁊ ēac fela ōðra gōdra hāma þe wē genemnan ne cunnan, ⁊ heom man syððan þǣr frið wið nam. ⁊ hȳ fōran þā þanon tō Exan mūðan, swā ꝥ hȳ āsettan him upp on ǣnne sīð oð hȳ cōman tō Peon hō, ⁊ þǣr wæs Kola ðæs cyninges hēah gerēfa. ⁊ Ēadsige þæs cynincges gerēfa tō gēanes him mid ðǣre fyrde ðe hȳ gegaderian mihtan, ⁊ hȳ þǣr ā flȳmede wurdon, ⁊ ðǣr wearð fela ofslegenra, ⁊ ðā Denescean āhtan wæl stōwe geweald; ⁊ ðæs on mergen forbærndon þone hām æt Peon hō, ⁊ æt Glistūne, ⁊ ēac fela gōdra hāma þe wē genemnan nā cunnan, ⁊ fōran ðā eft ēast ongēan oð hȳ cōman tō Wiht; ⁊ þæs on mergen forbærndon ðone hām æt Wealthām. ⁊ ōðra cotlīfa fela. [⁊ heom man raþe þæs wiðþingode. ⁊ hȳ nāmon frið.]

Hēr cōm se here tō Exanmūðan. ⁊ up ðā ēodan tō ðēre byrig. ⁊ þǣr fæstlīce feohtende wǣron. ac him man swȳðe fæstlīce wið stōd. ⁊ heardlīce. Ðā gewendon hī geond ꝥ land. ⁊ dydon eall swā hī bewuna wǣron. slōgon ⁊ beorndon. þā gesomnode man þǣr ormǣte fyrde of De'fe'nisces folces. ⁊ Sumorsǣtisces. ⁊ hī ðā tōsomne cōmon æt Peonnhō. ⁊ sōna swā hī tōgædere fēngon. þā bēah sēo Englisce fyrd. ⁊ hī þǣr mycel wæl ofslōgon. ⁊ ridan þā ofer ꝥ land. ⁊ wæs ǣfre heora æftra sȳð wyrse þonne se ǣrra. ⁊ mid him þā mycele herehūðe tō scipon brōhton. ⁊ þanon wendon in Wihtland. ⁊ þǣr him fērdon on būton swā swā hī sylf woldon. ⁊ him nān þing ne wið stōd. ne him tō ne dorste scip here on sǣ. ne landfyrd. ne codon hī swā feor up. Wæs hit þā on ǣlce wīsan hefig tȳma. forðām þe hī nǣfre heora yfeles geswicon.

Not in Parker (A).

Hēr on þissum gēare se cyng gerǣdde ⁊ his witan. ꝥ man sceolde gafol gyldon þām flotan. ⁊ frið wið hī geniman wið þon þe hī heora yfeles geswīcan sceoldan. Ðā sende se cyng tō þām flotan Lēofsig ealdorman. ⁊ hē þā þæs cynges worde ⁊ his witena grið wið hī gesætte. ⁊ þet hī tō metsunge fēngon ⁊ tō gafle. ⁊ hī þā ꝥ underfēngon. ⁊ him man þā geald ·xxiiii· þūsend punda. Ðā on gemang þysum ofslōh Lēofsig ealdorman Æfic þæs cynges hēah ge rēfan. ⁊ se cyng hine ðā ge ūtode of earde. And þā on þām ilcan lengtene cōm sēo hlǣfdige Ricardes dohtor hider tō lande. On ðām ilcan sumera Ealdulf arcƀ forðfērde. ⁊ on ðām gēare se cyng hēt ofslēan ealle ðā Deniscan men þe on Angel cynne wǣron on Bricius messe dæg. forþon þām cynge wæs ge cȳdd ꝥ hī woldon hine besyrewian æt his līfe. ⁊ syððan ealle his witan. ⁊ habban syþðan his rīce.

Not in Parker (A).

Hēr wæs Eaxeceaster ābrocen þurh þone Frenciscan ceorl Hugon þe sēo hlēfdige heafde hire gesett tō gerēfan. ⁊ se here þā burh mid ealle fordyde. ⁊ mycele here hūðe þǣr genamen. Ðā gegaderode man swīðe mycele fyrde of Wiltūnscīre ⁊ of Hamtūnscīre. ⁊ swīðe ānrǣdlīce wið þæs heres weard wǣron. Ðā sceolde se ealdorman Ælfrīc lǣdan þā fyrde. ac hē tēah forð þā his ealdan wrenceas. Sōna swā hī wǣron swā ge hende þet ǣgðer heora on ōðer hāwede. þā ge bræd hē hine sēocne. ⁊ ongan hine brecan tō spīwenne. ⁊ cweð þet hē ge siclod wǣre. ⁊ swā ꝥ folc beswāc ꝥ hē lǣdan sceolde swā hit gecweðen is. Ðonne se heretoga wācað þonne bið eall se here swīðe gehindred. Ðā Swegen geseah ꝥ hī ānrǣde nǣron. ⁊ ealle tō hwurfon. þā lǣdde hē his here intō Wiltūne. ⁊ hī ðā burh gehergodon ⁊ forbærndon. ⁊ ēodon þā tō Searbyrig. ⁊ þanon eft tō sǣ. fērde þǣr hē wiste his ȳð hengestas.

Not in Parker (A).

Hēr cōm Swegen mid his flotan tō Norðwīc. ⁊ þā burh ealle gehergade. ⁊ forbærndon. Þā gerǣdde Ulfkytel wið þā witan on ĒastEnglum. ꝥ him bætere wēron ꝥ man wið þone here friðes cēapode. ǣr hī tō mycelne hearm on þām earde gedydon. forþām þe hī unwares cōmon. ⁊ hē fyrst næfde ꝥ hē his fyrde gegadrian mihte. Ðā under þām griðe þe heom betwēonan bēon sceolde. þā besteal se here up fram scipon. ⁊ wendan heora fore tō Þēodforda. Ðā Ulfcytel ꝥ under geat. þā seonde hē ꝥ man sceolde þā scipu tō hēawan. ac hī ābruðon þā ðe hē tō þōhte. ⁊ hē þā gegaderode his fyrde dīglīce swā hē swȳðost muhte. ⁊ se here cōm þā tō Þēodforda binnon ·iii· wuca þæs þe hī ǣr gehergodon Norðwīc. ⁊ þǣr binnon āne niht wǣron. ⁊ þā burh hergodon ⁊ forbærndon. þā on morgen þā hī tō scipu [m] woldon. þā cōm Ulfcytel mid his werode. ⁊ hī þǣr tōgædere feastlīce fēngon. ⁊ mycel wæl þǣr on ǣgðære hand gefēoll. Ðǣr wærð Ēast Engla folces sēo yld ofslagen. ac gif þet fulle mægen þǣre wǣre. ne ēodan hī nǣfre eft tō scipon. swā hī sylfe sǣdon.

Hēr Ælfrīcus arceƀ forðfērde.

Hēr on þyssum gēare wæs se mycla hungor geond Angel cynn swilce nān man ǣr ne gemunde swā grimne. ⁊ se flota þæs gēares gewende of þissum earde tō Dænemearcon. and lītelne fyrst lēt. þet hē eft ne cōm.

Hēr mann hālgode Ælfēhg tō arce biscope.

Hēr forðfērde Ælfrīc arceƀ. ⁊ Ælfēah biscop fēng æfter him tō ðām ærce stōle. ⁊ Brihtwold ƀ fēng tō þām rīce on Wiltūn scīre. ⁊ Wulfgēate wæs eall his āre ofgenumen. ⁊ Wulfēah ⁊ Ufegēat wǣron āblende. ⁊ Ælfelm ealdor man wearð ofslagen. ⁊ Kēnulf biscop forðfērde. ⁊ þā ofer þone midne sumor cōm þā se Denisca flota tō Sandwīc. ⁊ dydon eall swā hī ǣr gewuna wǣron, hergodon ⁊ bærndon. ⁊ slōgon swā swā hī fērdon. þā hēt se cyng ābannan ūt ealne ðēodscipe of Westseaxum. ⁊ of Myrcean. ⁊ hī lagon ūte þā ealne þone herfest on fyrdinge ongēan þone here. ac hit nāht ne behēold þe mā þe hit oftor ǣr dyde. Ac for eallum þissum se here fērde swā hē sylf wolde. ⁊ se fyrdinge dyde þǣre land lēode ǣlcne hearm. þet him nāðor ne dohte ne innhere ne ūthere.

Ðā hit winter lēohte. þā fērde se fyrd hām. ⁊ se here cōm þā ofer Martinus messan tō his fryð stōle tò Wihtlande. ⁊ tilode him þǣr ǣghwēr þæs ðe hī behōfdan. ⁊ þā tō ðām middan wintran ēodon heom tō heora garwan feorme ūt þurh Hamtūn scīre in tō Barruc scīre tō Rǣdingan. and hī dydon heora gewuna, ātendon heora bēacna swā swā hī fērdon. ⁊ fērdon þā tō Wealinga forda. ⁊ þet eall forswēldon. ⁊ wæn'd'on him þā andlang Æscesdūne [tō Cwicelmes hlǣwe. ⁊ þǣr onbīdedon bēotra gylpa. forþon oft man cwæð. gif hī] Cwicchelmes hlǣwe gesōhton. þet hī nǣfre tō sǣ gān ne sceoldan. wendon þā ōðres wæges hāmweard. Þā wæs þǣr fyrd gesomnod æt Cynetan. ⁊ hī þǣr tō gædere fēngon. ⁊ sōna þet wærod on flēame gebrōhtan, ⁊ syððan hyra here hūðe tō sǣ færedon. þǣr mihton gesēon Winceastre lēodan rancne here. ⁊ unearhne. ꝥ hī be hyra gate tō sǣ ēodon. ⁊ mæte ⁊ mādmas ofer ·l· mīla him fram sǣ fættan.

Þā wæs se cyng gewend ofer Temese intō Scrobbesbyrig scīre. ⁊ nam þǣr his feorme in þǣre midde wintres tīde. þā wearð hit swā mycel æge fram þām here. þet man ne mihte ge þeoncean ne āsmægian hū man of earde hī gebringon sceolde. oððe þisne eard wið hī gehealdan. forþan þe hī hæfdon ǣlce scīre on West Sexum stīðe gemarcod mid bryne. ⁊ mid hergunge. Agan se cyng georne tō smēagenne wið his witan hwet heom eallum rǣdlicost þūhte. ꝥ man þisum earde gebeorgan mihte ǣr hē mid ealle fordōn wurðe. Ðā gerǣdde sēo cyng ⁊ his witan eallum þēodscipe tō þearfe. þēah hit him eallum lāð wǣre. ꝥ man nȳde mōste þām [here] gafol gyldan. Ðā sende se cyng tō þām here. ⁊ him cȳþan hēt ꝥ hē wolde ꝥ heom grið betwēonan bēon sceolde. ⁊ him man gafol and metsunge syllan sceolde. ⁊ hī ðā ealle ꝥ underfēngon. ⁊ him man metsod [e] geond Angel cyn.

Not in Parker (A).

Hēr on ðissum gēare wæs þet gafol ge lǣst þām unfriðe here. ꝥ wæs ·xxx· þūsend punda. ⁊ On ðissum gēare ēac wæs Ǣdrīc ge sett tō ealdorman on Myrcena rīce.

Not in Parker (A).

Hēr be bēad se cyng ꝥ man sceolde ofer eall Angel cynn scipu feastlīce wircean. ꝥ is þonne [of] þrym hund hīdum. ⁊ of ·x· hīdon ǣnne scēgð. ⁊ of ·viii· hīdum helm ⁊ byrnan.

Not in Parker (A).

Hēr on þissum gēare gewurdon þā scipu gearwe þe wē ǣr ymbe sprǣcon. ⁊ heora wæs swā feala swā nǣfre ǣr þes ðe ūs bēc secgað on Angel cynne ne gewurdon on nānes cynges dæg. ⁊ hī man þā ealle tō gædere ferode tō Sandwīc. ⁊ þǣr sceoldan licgan. ⁊ þisne eard healdan wið ǣlcne ūt here. ac wē gȳt næfdon þā gesēlða. ne þone wurðscipe ꝥ sēo scipfyrd nytt wǣre ðisum earde. þe mā þe hēo oftor ǣr wæs.

Ðā geweard hit on þisum ilcan tīman oððe lītle ǣr þet Brihtrīc Ēadrīces brōðor ealdormannes forwrēgde Wulfnōð cild þone Sūðseaxscian tō þām cyning. ⁊ hē þā ūt ge wende. ⁊ him þā tō āspēon þet hē heafde ·xx· scipa. ⁊ hē þā hergode ǣghwēr be ðām sūðriman. ⁊ ǣlc yfel wrohton. þā cȳdde man in tō þǣre scipfyrde. þet hī mann ēaðe befaran mihte. gif man ymbe bēon wolde. Ðā genam se Brihtrīc him tō hundeahtatig scipa. ⁊ þōhte ꝥ hē him myceles wordes wircean sceolde. ꝥ hē Wulfnōð cuconne oððe dēadne begytan sceolde. ac þā hī þyderweard wǣron. þā cōm him swilc wind ongēan swilce nān mann ǣr 'ne' gemunde. ⁊ þā scipo ðā ealle tō bēot. ⁊ tō þræsc. ⁊ on land wearp. ⁊ cōm se Wulfnōð sōna. ⁊ ðā scipo forbærnde. Ðā þis cūð wæs tō ðām ōðrum scipon þǣr se cyng wæs hū ðā ōðre ge fērdon. wæs þā swilc hit eall rǣdlēas wǣre. ⁊ fērde se cyng him hām. ⁊ þā ealdor menn. ⁊ þā hēah witan. ⁊ forlēton þā scipo þus lēohtlīce. ⁊ þet folc þā þe on ðām scipe wǣron færcodon ðā scipo eft tō Lundene. ⁊ lēton ealles ðēodscipes ge swincg þus lēohtlīce for wurðan. ⁊ næs se ege nā betera þe eall Angel cynn tō hopode.

Þā ðēos scip fyrd ðus ge endod wæs. þā cōm sōna æfter hlammessan se un ge metlica unfrið here tō Sandwīc. ⁊ sōna wendon heora fore tō Cantwarbyrig. ⁊ þā burh raðe ge ēodon. gif hī þe raðor tō him friðes tō ne girndon. ⁊ ealle Ēast Centingas wið þone here frið ge nāmon. ⁊ him ge sealdon ·iii· þūsend punda. ⁊ se here þā sōna æfter þām ge wende ābūton oð þet hī cōmon tō Wihtlande. ⁊ þǣr ǣghwēr on Sūðseaxum. ⁊ on Hamtūn scīre. ⁊ ēac on Bearruc scīre hergodon ⁊ bærndon swā heora ge wuna wæs. þā hēt se cyng ābannan ūt ealne þēodscipe þet mann on ǣlce healfe wið hī ge healden sceolde. ac þēah hweðere hī fērdon lōc hū hī woldon. Þā sum sīðe heafde se cyng hī fore begān mid ealre fyrde. þā hī tō scipan woldon. ⁊ eall folc gearu wæs heom on tō fōnne. ac hit wæs ðā þurh Ēadrīc ealdorman ge let swā hit þā ǣfre wæs. Ðā æfter sc̄s Martinus mæssan. þā fērdon hī eft ongēan tō Cent. ⁊ nāmon him winter settl on Temesan. ⁊ lifedon of Ēast Seaxum. ⁊ of ðām scīrum þe þǣr nȳxt wǣron on twām healfe Temese. ⁊ oft hī on þā burh Lundene ge fuhton. Ac sī Gode lof. þet hēo gȳt ge sund stent. ⁊ hī þǣr ǣfre yfel ge fērdon. Ðā æfter middan wintra hī nāmon þā ǣnne upgang 'ūt' þurh Ciltern. ⁊ swā tō Oxneforda. ⁊ þā burh forbærndon. ⁊ nāmon hit þā on twā healfe Temese tō scipan weard. þā gewarnode man hī ꝥ þǣr wæs fyrd æt Lundene ongēan. hī gewendon þā ofer æt Stāne. ⁊ þus fērdon ealne þone winter, ⁊ ðone lencten wǣron him on Cent. and bēttan heora scipa.