Bókastaðir

Not in Parker (A).

Hēr on ðissum gēare cōm se fore sprecenda here ofer Ēastron tō [Ēast] Englum. ⁊ wendon up æt Gipeswīc. ⁊ ēodon an reces þǣr hī geāxodon Ulfcytel mid his fyrde. Ðis wæs on þām dæg prima ascensio Dñi. ⁊ þā sōna flugon ĒastEngla. þā stōd Grantabrycgscīr fæstlīce ongēan. þǣr wæs ofslægen Æðelstān þes cynges āðum. ⁊ Ōswi ⁊ his sunu. ⁊ Wulfrīc Lēofwines sunu. ⁊ Ēadwīg Æfices brōðor. ⁊ feala ōðra gōdra þegna. ⁊ folces unge rīm. þone flēam ǣrest āstealde Þurcytel Myranhēafod. ⁊ þā Dæniscan āhton wælstōwe geweald. ⁊ þǣr wurdon gehorsode. ⁊ syððon āhton ĒastEngle geweald. ⁊ þone eard ·iii· mōnþas hergodon ⁊ bærndon. gefurðon on þā wildan fennas hī fērdon. ⁊ menn ⁊ yrfe hī slōgon. ⁊ bærndon geond þā feonnas. ⁊ Þēodford forbærndon. ⁊ Grantabrycge. ⁊ syððon wendon eft sūðweard in tō Temese. ⁊ ridon þā gehorsedan menn ongēan þā scipo. ⁊ syððon hrædlīce wendon westweard on Oxnafordscīre. ⁊ þanon tō Bucinghamscīre. ⁊ swā andlang Ūsan. oð hī cōmon tō Bedanforda ⁊ swā forð oð Temesanford. ⁊ ā bærndon swā hī gefērdon. wendon þā eft tō scipon mid heora herehūðe.

⁊ þone hī tō scipon streddon. þonne sceolde fyrd ūt eft ongēan ꝥ hī up woldon. þonne fērde sēo fyrd hām. ⁊ þonne hī wǣron be ēaston. þonne hēold man fyrde be westan. ⁊ þonne hī wǣron be sūðan. þonne wæs ūre fyrd be norðan. Ðonne bēad man ealle witan tō cynge. ⁊ man þonne rǣdan scolde hū man þisne eard werian sceolde. Ac þēah man hwæt þonne rǣdde. ꝥ ne stōd furðon ǣnne mōnað. æt nȳxtan næs nān hēafod man ꝥ fyrde gaderian wolde. ac ǣlc flēah swā hē mǣst myhte. Ne furðon nān scīr nolde ōðre gelǣstan æt nȳxtan.

Þā æt foran sc̄s Andreas mæssan. ðā cōm se here tō Hamtūne. ⁊ þone port sōna forbærndon. ⁊ þǣr nāmon ābūton swā mycel swā hī woldon sylfe. ⁊ þanon wendon ofer Temese in tō West Seaxum. ⁊ swā wið Caningan mærsces. ⁊ ꝥ eall forbærndon. Þā hī swā fēor ge gān hæfdon swā hī þā woldon. þā cōmon hī tō ðām middan wintra tō scipon.

Not in Parker (A).

Hēr on þissum gēare sende se cyng ⁊ his witan tō ðām here. ⁊ georndon friðes. ⁊ him gafol ⁊ metsunga behētan. wið þām þe hī heora hergunga ge swicon.

Hī heafdon þā ofergān ĒastEngla ·i· and Ēast Seaxe ·ii· ⁊ Middel Seaxe ·iii· ⁊ Oxena ford scīre ·iiii· ⁊ Grantabrycge scīre ·v· ⁊ Heortford scīre ·vi· ⁊ Bucingaham scīre ·vii· ⁊ Bedanford scīre ·viii· ⁊ healfe Huntadūn scīre ·x· ⁊ be sūðan Temese ealle Centingas. ⁊ Sūð Seaxe. ⁊ Hǣstingas. ⁊ Sūðrig. ⁊ Bearruc scīre. ⁊ Hamtūn scīre. ⁊ micel on Wiltūn scīre.

Ealle þās unge sǣlða ūs ge lumpon þurh unrǣdes. ꝥ mann nolde him tō tīman gafol bēdan. ac þonne hī mǣst tō yfele ge dōn hæfdon. þonne nam man grið. ⁊ frið wið hī. ⁊ naðe lǣs for eallum þisum griðe ⁊ friðe ⁊ gafole. hī fērdon ǣghwider folc mǣlum. ⁊ hergodon. ⁊ ūre earme folcrǣpton ⁊ slōgon.

⁊ On þissum gēare betwix Natiuit' sc̄e Marie ⁊ sc̄e Michaeles mæssan hī ymbe sǣtan Cantwara burh. ⁊ hī þǣr in tō cōmon þurh syre wrenceas. forþon Ælmǣr hī be cyrde Cantwara burh. þe se arc̄ƀ Ælfēah ǣr ge nerede his līfe. ⁊ hī þǣr þā ge nāman þone arc̄ƀ Ælfēah. ⁊ Ælfword þæs cynges gerēfan. ⁊ Lēofwine aƀƀ. ⁊ Godwine ƀ. ⁊ Ælmǣr aƀƀ hī lǣtan āweg. ⁊ hī þǣr ge nāman inne ealle þā ge hādode menn. ⁊ weras. ⁊ wīf. ꝥ wæs un āsecgendlic ǣnigum menn hū mycel þæs folces wæs. ⁊ on þǣre byrig siððon wǣron swā lange swā hī woldon. ⁊ þā hī hæfdon þā burh ealle āsmēade. wendon him þā tō scipon. ⁊ lǣddon þone arc̄ƀ mid him;

Wæs ðārǣpling. se þe ǣr wæs Angel cynnes hēafod. ⁊ Xpēndomes. þǣr man mihte þā ge sēon earmðe þǣr man ǣr ge seah blisse on þǣre ærman byrig. þanon ūs cōm ǣrest Xpēndom. ⁊ blisse for Gode. ⁊ for worulde.

⁊ hī heafdon þone arc̄ƀ mid him swā lange oð þone tīman þe hī hine ge martyredon.

Not in Parker (A).

Hēr on þissum gēare cōm Ēadrīc ealdorman. ⁊ ealle þā yldestan witan ge hādode ⁊ lēawede Angel cynnes tō Lunden byrig tō foran þām Ēastron. wæs Ǣster dæg þā on ðām datarum idus Apr̄. ⁊ hī þǣra ðā swā lange wǣron oð ꝥ gafol wæs eall ge lǣst ofer Ēastran. ꝥ wæs ·viii· þūsend punda. Þā on þone Sæternes dæg wearð swīðe ge stired se here on gēan þone biscop. forþan þe hē nolde heom nān feoh be hāten. ⁊ forbēad ꝥ man nān þing wið him syllan ne mōste. wǣron hī ēac swȳðe druncene. forþām þǣr wæs ge brōht wīn sūðan. ge nāmon þā þone ƀ'. lēaddon hine tō heora hūstinga on þone Sunnan ēfen octabas Paschæ. ⁊ hine þā þǣr oftorfodon mid bānum. ⁊ mid hrȳðera hēafdum. ⁊ slōh hine þā ān heora mid ānre æxe yre on þet hēafod. þet hē mid þām dynte niðer āsāh. ⁊ his hālige blōd on ðā eorðan fēoll. ⁊ his þā hāligan sāwle tō Godes rīce āsende. ⁊ þā biscopas Ēadnōð ⁊ Ælfhūn. ⁊ sēo burhwaru under fēngon þone hāligan līchaman on mergen ⁊ feredon hine tō Lundene mid ealre ārwurðnisse. ⁊ hine be byrigdon on sc̄s Paulus mynstre. ⁊ þǣr nū God swutelað þæs hālgan martires mihta. Ðā þet gafol ge lēst wæs. ⁊ þā frið āðas ge sworene. þā tō ferde se here wīde swā hē ǣr ge gaderod wæs. Ðā bugon tō þām cyninge of þām here ·xlv· scipa. ⁊ him be hēton þet hī woldon þisne eard healdan. ⁊ hē hī fēdan scolde ⁊ scrȳdan.

Not in Parker (A).

On þām æftran gēare þe se arc̄ƀ wæs ge martyrod. se cyng ge sætte Līfing ƀ tō Cantwara byrig tō ðām arce stōle. ⁊ on þām ilcan gēare tō foran þām mōnðe Augustus cōm Swegen cyning mid his flotan tō Sandwīc. ⁊ wende swȳðe raðe ābūtan Ēast Englum. in tō Humbran mūðan. ⁊ swā upp weard andlang Trentan þet hē cōm tō Gegnes burh. ⁊ þā sōna ābēah Ūhtrēd eorl. ⁊ eall Norðhymbra tō him. ⁊ eall ꝥ folc on Lindesīge. ⁊ syððan þet folc of Fīf burhingan. ⁊ raðe þæs eall here be norðan Wætlinga strǣte. ⁊ him man sealde gīslas of ǣlcere scīre. Syððan hē undergeat þet eall folc him tō ge bogen wæs. þā bēad hē ꝥ man sceolde his here metian ⁊ horsian. ⁊ hē þā ge wende syððan sūðweard mid fulre fyrde. ⁊ betǣhte his scipa ⁊ þā gīslas Cnute his sunu. ⁊ syððan hē cōm ofer Wæclinga strǣte, hī wrohton ꝥ mǣste yfel þe ǣnig here dōn mihte. wende þā tō Oxna forda. ⁊ sēo burhwaru sōna ābēah ⁊ gīslode. ⁊ þanon tō Winceastre. ⁊ ꝥ ilce dydon. wendon þā þanon ēastward tō Lundene. ⁊ mycel his folces ādranc on Temese. forðām hī nā'n're brycge ne cēpton. Ðā hē tō þǣre byrig cōm. þā nold'e' sēo burhwaru ābūgan ac hēoldan mid fullan wīge ongēan. forðan þǣr wæs inne se cyning Æþelrēd. ⁊ Þurkil mid him. Þā wende Swegen cyning þanon tō Wealinga forda. ⁊ swā ofer Temese westweard tō Baðon. ⁊ sæt þǣr mid his fyrde. ⁊ cōm Æþelmēr ealdor man þider. ⁊ þā weasternan þægnas mid him. ⁊ bugon ealle tō Swegene. ⁊ gīslodon. Þā hē eall þus ge faren heafde. wende þā norðweard tō his scipon. ⁊ eall þēodscipe hine heafde for fullne cyning. ⁊ sēo burhwaru æfter þām on Lundene bēah ⁊ gīslode. forþām hī ondrēddon ꝥ hē hī fordōn wolde. bēad þā Swegen full gild ⁊ me't'sunga tō his here þone winter. ⁊ Þurcyl bēad ꝥ ilce tō þām here þe læg on Grēna wīc. ⁊ būton þām hī hergodan swā oft swā hī woldon.

Ðā ne duhte nāðor þisse þēoda ne sūðan. ne norðan. þā wæs se cyng sume hwīle mid þām flotan þe on Temese wǣron. ⁊ sēo hlāfdige wende þā ofer seo tō hire brōðor Ricarde. ⁊ Ælsige abbot of Burh mid hire. ⁊ se cyng sende Ælfūn ƀ mid þām æþelinge Ēadwarde. ⁊ Ælfrēde ofer sē. ꝥ hē hī be witan sceolde. ⁊ se cyng ge wende þā fram þām flotan tō ðām middan wintra tō Wiht lande. ⁊ wæs þǣr þā tīd. ⁊ æfter þǣre tīde ge wende þā ofer sǣ tō Ricarde. ⁊ wæs þǣr mid him oð ðone byre þe Swegen dēad wearð.

⁊ Ða hwile þe seo læfdige mid hire broþer wæs begondon sæ. Ælfsige aƀƀ of Burh þe þær wæs mid hire for to þone mynstre þe is gehaten Boneual þær sc̄e Florentines lichama læg. fand þær ærm stede. ærm abbot ⁊ ærme muneces, forþan þe hi forhergode wæron. bohte þa þær æt þone aƀƀ ⁊ æt þe muneces sc̄e Florentines lichaman eall buton þe heafod to ·v· hundred punda. ⁊ þa þe he ongean com þa offrede hit Crist ⁊ sc̄e Peter.

Not in Parker (A).

Hēr on þissum gēare Swegen ge endode his dagas tō candel mæssan ·iii· N° Febr̄. ⁊ se flota eall ge curon Cnut tō cyninge. Ðā ge rǣddan þā witan ealle ge hādode ge lǣwede ꝥ man æfter þām cyninge Æðelrēde sende. ⁊ cwǣdon ꝥ him nān lēofre hlāford nǣre þonne heora ge cynde hlāford. gif hē hī rihtlīcor healdan wolde þonne hē ǣr dyde. Ðā sende se cyng his sunu Ēadward mid his ǣrendracan hider. ⁊ hēt grētan ealne his lēodscipe. ⁊ cwæð þæt hē heom hold hlāford bēon wolde. ⁊ ǣlc þǣra þinga bētan þe hī ealle āscunedon. ⁊ ǣlc þǣra þinga forgifan bēon sceolde þe hī [m] ge dōn oððe ge cweðen wǣre. wið þām þe hī ealle ānrǣdlīce būton swicdōme tō him ge cyrdon. ⁊ man þā fullne frēondscipe ge fæstnode mid worde ⁊ mid wædde on ǣgðere healfe. ⁊ ǣfre ǣlcne Denisc [n] e cyning ūtlagede of Engla lande ge cwǣdon. Ðā cōm Æðelrēd cyning innan þām lenctene hām tō his āgenre ðēode. ⁊ hē glædlīce fram heom eallum onfangen wæs.

⁊ þā syððon Swegen dēad wæs. sætt Cnut mid his here on Gegnesburh oð ðā Ēastron. ⁊ ge wearð him ⁊ þām folce on Lindesīge ānes. ꝥ hī hine horsian sceoldan. ⁊ syððan ealle æt gædere faran ⁊ hergian. Ðā cōm se cyning Æðelrēd mid fulre fyrde þider ǣr hī gearwe wǣron tō Lindesīge. ⁊ mann þā hergode. ⁊ bærnde ⁊ slōh eall þet man cynn ꝥ man ārǣcan mihte. Se Cnut ge wende him ūt mid his flotan. ⁊ wearð þet earme folc þus be swican þurh hine. ⁊ wænde þā sūðweard oð ꝥ hē cōm tō Sandwīc. ⁊ lēt þǣr up þā gīslas þe his fæder ge sealde wǣron. ⁊ cearf of heora handa ⁊ heora nosa. ⁊ būton eallum þisum yfelum se cyning hēt gyldan þām here þe on Grēnewīc læg ·xxi· þūsend punda. ⁊ on þissum gēare on sc̄e Michæles mæsse ǣfan. cōm þet mycele sǣ flōd geond wīde þisne eard. ⁊ ærn swā fēor up swā nǣfre ǣr 'ne' dyde. ⁊ ādrencte feala tūna. ⁊ mann cynnes un ārīmædlice ge teall.

Not in Parker (A).

On þissum gēare wæs ꝥ mycele ge mōt on Oxonaforda. ⁊ þǣr Ēadrīc ealdorman beswāc Sigeferð ⁊ Morcǣr þā yldestan þægenas in tō Seofon burgum. be pǣhte hī in tō his būre. ⁊ hī man þǣr inne of slōh un ge risenlīce. ⁊ se cyng þā genam eall heora ǣhta. ⁊ hēt nimon Sigeferðes lāfe ⁊ gebringon binnon Mealdelmes byrig. þā æfter lītlum fece fērde Ēadmund æðeling tō. ⁊ ge nam ꝥ wīf ofer þes cynges willan. ⁊ heafde him tō wīfe. Ðā tō foran natiuitas sc̄e Mariæ fērde se æðeling wæston norð in tō Fīf burgum. ⁊ ge rād sōna ealle Sigeferðes āre ⁊ Morcares. ⁊ ꝥ folc eall him tō bēah. ⁊ þā on ðām ylcan tīman cōm Cnut cyng tō Sandwīc. ⁊ wende sōna ābūtan Cent land in tō West Seaxen oð hē cōm tō Fromūðan. ⁊ hergode þā on Dorsǣtum ⁊ on Wiltūn scīre. ⁊ on Sumær sǣton. þā læg se cyng sēoc æt Cosham. Ðā gaderode Ēadrīc ealdorman fyrde ⁊ se æðeling Ēadmund be norðan. Ðā hī tō gædere cōmon. þā wolde se ealdorman beswicon þone æþeling. ⁊ hī tō hwurfon þā būton ge feohte forþām. ⁊ rīmdon heora fēondum. ⁊ Ēadrīc ealdormann āspēon þā ·xl· scipa fram þām cyning. ⁊ bēah þā tō Cnute. ⁊ West Seaxe bugon ⁊ gīslodon. ⁊ horsodon þone here. ⁊ hē wæs þǣr þā oð midne winter.