Bókastaðir

Not in Parker (A).

Hēr on þissum gēare cōm Cnut cyning mid his here ·clx· scipa. ⁊ Ēadrīc ealdormann mid him ofer Temese intō Myrcan æt Cræcilāde. ⁊ wendon þā tō Wæring scīre innon þǣre midde wintres tīde. ⁊ hergodon ⁊ bærndon ⁊ slōgon eall ꝥ hī tō cōmon. Ðā ongan se æðeling Ēadmund tō gadrienne fyrde. Þā se [o] fyrd ge somnod wæs. þā ne on hagode him būton se cyng þǣre wǣre. ⁊ hī hæfdon þǣre burh ware fultum of Lundene. ge swicon þā þǣre fyrding. ⁊ fǣrde ǣlc mann him hām. Ðā æfter þǣre tīde þā bēad mann eft fyrde be fullum wīte. ꝥ ǣlc mann þe feor wǣre forð ge wende. ⁊ mann sende tō þām cyninge tō Lundene. ⁊ bǣdon hine ꝥ hē cōme ongēan þā fyrde mid þām fultume þe hē gegaderian mihte. Ðā hī ealle tō somne cōmon. þā ne behēold hit nāht þe mā þe hit oftor ǣr dyde. Þā cȳdde mann þām cyninge ꝥ hine mann beswicon wolde. þā þe him on fultume bēon sceolden. Forlēt ðā þā fyrde. ⁊ cyrde him eft tō Lundene.

Ðā rād se æþeling Ēadmund tō Norðhymbran tō Vhtrēde eorl. ⁊ wǣnde ǣlc mann ꝥ hī woldon fyrde somnian ongēan Cnut cyng. Þā fērdon hī in tō Stæfford scīre. ⁊ intō Scrobbes byrig. ⁊ tō Lēgeceastre. ⁊ hergodon hī on heora h'e'alfe ⁊ Cnut on his. ⁊ wende him þā ūt þurh Buccinga ham scīre in tō Beadaford scīre. ⁊ þanon tō Huntandūn scīre. ⁊ lang fennes tō Stānforda. ⁊ ðā in tō Lincolne scīre. þanon tō Snotingahām scīre. ⁊ swā tō Norðhymbran tō Eoforwīc weard. Ðā Ūhtrēd ge āxode þis. ðā forlēt hē his hergunga ⁊ efeste norðweard. ⁊ bēah þā for nēde. ⁊ ealle Norðhymbran mid him. ⁊ hē gīslode. ⁊ hine man ðēah hwæðere of slōh. ⁊ Þurcytel Nafanan sunu mid him. ⁊ þā æfter þām se cyng Cnut ge sætte Yric in tō Norðhymbran tō eorle. eall swā Ūhtrēd wæs. ⁊ syððan wendon him sūðweard ōðres weges. eall be westan. ⁊ cōm þā eall se here tō foran þām Ēastron tō scipon. ⁊ se æþeling Ǣdmund wende tō Lundene tō his fæder. ⁊ þā æfter Ēastron wende se cyng Cnut mid eallum his scipum tō Lundene weard.

Ðā ge lamp hit þet se cyng Æðelrēd forðfērde ǣr ðā scipu cōmon. hē ge endode his dagas on sc̃s Georius mæsse dæge æfter mycclum ge swince. ⁊ earfoðnissum his līfes. ⁊ 'þā' æfter his ende. ealle þā witan þe on Lundene wǣron ⁊ se burhwaru ge curon Ēadmund tō cynge. ⁊ his rīce hē heardlīce werode þā hwīle þe his tīma wæs.

Þā cōmon þā scipo tō Grēnawīc tō þām gandagum. ⁊ binnon lȳtlum fæce wendon tō Lundene. ⁊ dulfon þā āne mycele dīc on ðā sūðhealfe ⁊ drōgon heora scipa on west healfe þǣre brycge. ⁊ be dīcodon syððon þā burh ūton ꝥ nān mann ne mihte ne inn ne ūt. ⁊ oft rǣdlīce on ðā burh fuhton. ac hī heom heardlīce wið stōdon. Þā wæs Ēadmund cyng ǣr þām ge wend ūt. ⁊ ge rād þā West Seaxan. ⁊ him bēah eall folc tō. ⁊ raðe æfter þām hē ge feaht wið þone here æt Peonnan wið Gillinga. ⁊ ōðer ge feoht hē ge feaht æfter middan sumera æt Sceorstāne. ⁊ þǣr mycel wæll fēoll on ǣgðre healfe. ⁊ þā heres him sylfe tō ēodon on ðām ge feohte. ⁊ Ēadrīc ealdorman ⁊ Ælmǣr Dēorlingc wǣron þām here on fultume ongēan Ēadmund cyng. ⁊ þā ge gaderode hē ·iii· sīðe fyrde ⁊ fērde tō Lundene. ⁊ þā burhware āhredde. ⁊ þone here āflȳmde tō scipon. ⁊ þā wæs ymbe twā niht ꝥ se cyning ge wende ofer æt Brent forda. ⁊ þā wið þone here ge feaht ⁊ hine āflȳmde. ⁊ þǣr ādranc mycel Æn [g] li [s] ces folces on heora āgenre gȳmelēaste. þā ðe fērdon beforan þǣre fyrde. ⁊ fang woldon fōn. ⁊ se cyning wende æfter þām tō West Seaxan. ⁊ his fyrde ge somnode. Ðā ge wende se here sōna tō Lundene. ⁊ þā burh ūtone be sǣton. ⁊ hire stranglīce wið feaht ge be wætere ge be lande. ac se ælmihtiga God hī āhredde.

Se here ge wende þā æfter þām fram Lundene mid heora scipum intō Arwan. ⁊ þār up fōran. ⁊ fēordon on Myrcean. ⁊ slōgon ⁊ bærndon swā hwæt swā hī ofer fōron. swā heora ge wuna wæs. ⁊ heom metes tilodon. ⁊ hī drifon ǣgðer ge scipa. ge heora drafa in tō Medewæge. Ðā ge somnode Ēadmund cyng ·iiii· sīþe ealle Engla þēode. ⁊ fērde ofer Temese tō Brent forda. ⁊ fērde innan Cent. ⁊ se here him flēah be foran mid hira horsa in tō Scēapīge. ⁊ se cyng ofslōh heora swā feala swā hē of faran mihte. ⁊ Ēadrīc ealdormann gewende þā ðæne cyng ongēan æt Ægeles forda. næs nān māre unrǣd gerēd þonne se wæs.

Se here gewende eft up on Ēast Seaxan. ⁊ fērde in tō Myrcean. ⁊ fordydon eall ꝥ hē ofer fērde. Ðā se cyng ge āxode ꝥ se here uppe wæs. ðā ge somnode hē ·v· sīðe ealle Engla þēode. ⁊ fērde him æt hindan. ⁊ offērde hī innan Ēast Seaxan æt þēre dūne þe mann hǣt Assandūn. ⁊ þǣr tōgædere heardlīce fēngon. Ðā dyde Ēadrīc ealdormann swā hē oftor ǣr dyde. āstealde þone flēam ǣrest mid Mage sǣton. ⁊ swā āswāc his cynehlāforde. ⁊ ealle þēode. þǣr hæfde Cnut sige. ⁊ ge feaht him eall Engla land. þǣr wearð of slagen Ēadnōð. ⁊ Wulsige aƀƀ. ⁊ Ælfrīc ealdorman. ⁊ Godwine ealdorman. and Ulfcytel of Ēast Englan. ⁊ Æðelward Æðelsiges sunu ealdormannes. ⁊ eall se dugoð on Angel cinne.

Ðā æfter þisum ge feohte wende Cnut cing upp mid his here tō Glēawe ceastre scīre. þǣr hē ge hērde secgan þet se cyng wæs Ēadmund. Ðā ge rǣdde Ēadrīc ealdor mann ⁊ þā witan þe ðǣr wǣron ꝥ þā cyningas seht nāmon heom betwēonan. ⁊ hī gīslas sealdon heom be twēonan. ⁊ þā cyningas cōmon tō gædere æt Olanīge. ⁊ heora frēondscipe þǣr ge fæstnodon. ge mid wedde ge mid āðe. ⁊ ꝥ gyld setton wið þone here. ⁊ hī tō hwurfon þā mid þisum sehte. ⁊ fēng Ēadmund cing tō Weast Seaxan ⁊ Cnut tō Myrcean.

Se here ge wende þā tō scipon mid þām þingum þe hī ge fangen hæfdon. ⁊ Lundene waru griðede wið þone here. ⁊ heom frið ge bōhtan. ⁊ se he [re] ge brōhton heora scipa on Lundene. ⁊ heom winter setle þǣr inne nāmon.

Ðā tō sc̄s Andreas mæssan forðfērde se cyng Ēadmund. ⁊ is byrged mid his ealdan fæder Ēadgāre on Glæstinga byrig. ⁊ on þām ilcan gēare forðfērde Wulfgār aƀƀ on Abbandūne. ⁊ fēng Æðelsige tō.

Hēr Cnut wearð ge coran tō kinge.

Hēr on þisum gēare fēng Cnut cyning tō eall Angel cynnes rīce. ⁊ hit tō dǣld on fōwer. him sylfum West Seaxan. ⁊ Þurcylle Ēast Englan. ⁊ Ēadrīce Myrcean. ⁊ Yrice Norðhymbran. ⁊ on þisum gēare wæs Ēadrīc ealdormann of slagen. ⁊ Norðman Lēofwines sunu ealdormannes. ⁊ Æðelword Æðelmǣres sunu þæs grǣtan. ⁊ Brihtrīc Ælfgētes sunu on Dæfenan scīre. ⁊ Cnut cyng āflȳmde ūt Ǣdwīg æðeling. ⁊ Ēadwīg ceorla cyng. ⁊ þā tō foran kl Aug hēt se cyng feccan him Æðelrēdes lāfe þes ōðres cynges him tō cwēne Ricardes dohtor.

Not in Parker (A).

On þisum gēare wæs ꝥ gafol ge lǣst ofer eall Angel cynn. ꝥ wæs ealles ·lxxii· þūsend punda. būton þām þe sēo burhwaru on Lundene guldon ·xi· þūsend punda. ⁊ se here fērde þā sum tō Denmea'rcon. ⁊ ·xl· scipo belāf mid þām cyninge Cnute. ⁊ Dene ⁊ Engle wurdon sam mǣle æt Oxna forda. ⁊ hēr Æðelsige aƀƀ forðfērde on Abbandūne. ⁊ fēng Æðelwine tō.

Not in Parker (A).

Hēr ge wende Cnut cyng tō Denmearcon. ⁊ þǣr wunode ealne winter.

Not in Parker (A).

Hēr cōm Cnut cyng tō Engla lande. ⁊ þā on Ēastron wæs mycel ge mōt on Cyrn ceastre. þā ge ūt lagode mann Æðelword ealdor man. ⁊ on þissum gēare se cyng fōr tō Assandūne. ⁊ Līuing arcƀ forðfērde. ⁊ Æðelnōð munuc ⁊ decanus æt Xp̄es cyrcan wæs þe ilcan gēare þār tō ge hādod tō biscop.

Not in Parker (A).

Hēr on þysum gēare Cnut cyng tō Martinus mæssan ge ūt lagode Þurkil eorl.

Not in Parker (A).

Hēr Cnut cyng fōr ūt mid his scipum tō Wiht. ⁊ Æðelnōð biscop fōr tō Rōme. ⁊ wæs under fangen þǣr fram Benedicte þām pāpan myd mycclum wurðscipe. ⁊ mid his āgenum handum him his pallium on sette. ⁊ tō arc̃ƀ ārwurðlīce gehālgode. ⁊ hē syððan mid þām pallium þǣr mæssode swā se pāpa him gewissode. ⁊ hē hine gereordode æfter þām mid þām pāpan. ⁊ syððon mid fulre blētsunge hām gewende. ⁊ Lēofwine aƀƀ se wæs unrihtlīce of Ēlig ādrǣfed wæs his gefēra. ⁊ hine þǣr ǣlces þinges geclǣnsode þe him mann on sǣde. swā se pāpa him tǣhte on þes arc̃ƀes gewitnesse. ⁊ on ealles þæs ge fērscipes þe him mid wæs.

Not in Parker (A).

Hēr forðfērde Wulfstān arc̃ƀ. ⁊ fēng Ælfrīc tō. ⁊ þæs ilcan gēares Æðelnōð arc̃biscop ferede sc̃e Ælfēges arc̃ƀ reliquias tō Cantwarbyrig of Lundene.

Not in Parker (A).

Hic Ricardus secundus obiit. Ricardus filius eius regnauit prope uno anno. et post eum regnauit Rodbertus frater eius viii annis.

Not in Parker (A).

Hēr fōr Cnut cyng tō Denmearcon mid scipon tō þām holme æt ēa þǣre hālgan. ⁊ þǣr cōmon ongēan Vlf ⁊ Eglaf. ⁊ swīðe mycel here ǣgðer ge landhere ge sciphere of Swaðēode. ⁊ þǣr wæs swīðe feala manna forfaren on Cnutes cynges healfe. ǣgðer ge Deniscra manna ge Engliscra. ⁊ þā Swēon heafdon weallstōwe geweald.

Not in Parker (A).

Hēr fōr Cnut cyng of Englalande mid fīftig scipum tō Norwegum. ⁊ ādrāf Olaf cyning of þām lande. ⁊ geāhnode him þet land.

Not in Parker (A).

Hēr cōm Cnut cyng eft hām tō Englalande.

Not in Parker (A).

Hēr cōm Olaf cyng eft intō Norwegum. ⁊ þet folc gegaderode him tōgēanes. ⁊ him wið gefuhton. ⁊ hē wearð þǣr ofslagen.

Hēr cōm Cnut a [gan tō Engla lande.] Sōna swā hē be cōm tō Engla lande. hē geaf in tō Xp̄es cyrican on Cantware byri þā hæfenan on Sandwīc. ⁊ ealla þā gerihta þe þǣr of ārīsaþ of ǣiðre healfe ðāre hæfene. swā ꝥ lōc whenne ꝥ flōd byþ ealra hēhst ⁊ ealra fullost 'bēo' ān scip flotigende swā nēh þan lande swā hit nȳxt mæge. ⁊ þār bēo ān mann stande on þan scipe ⁊ habbe āne taper æx on his hande . . .

Hēr fōr Cnut cyng tō Rōme. ⁊ þȳ ilcan gēare hē fōr tō Scotlande. ⁊ Scotta cyng him tō bēah Mælcolm. ⁊ twēgen ōðre cyningas. Mælbæþe. ⁊ Iehmarc. Rodbertus comes obiit in peregrinatione. et successit rex Willelmus in puerili ætate.

Not in Parker (A).

Hēr on þissum gēare ātȳwde ꝥ wildefȳr. ðe nān mann ǣror nān swylc ne gemunde. ⁊ ge hwǣr hit derode ēac on manegum stōwum. ⁊ on þām ilcan gēare forðfērde Ælfsige biscop on Win ceastre. ⁊ Ælfwine þæs cynges prēost fēng þǣr tō.

Not in Parker (A).

Hēr on þisum gēare forðfērde Merehwīt ƀ on Sumersǣton. ⁊ hē is bebyrged on Glæstinga byrig.

Not in Parker (A).

Hēr forðfērde Æðerīc ƀ.

Not in Parker (A).

Hēr forðfērde Cnut cyng æt Sceaftes byrig. ⁊ hē is be byrged on Winceastre on Ealdan mynstre. ⁊ hē wæs cyng ofer eall Engla land swȳðe nēh ·xx· wintra. ⁊ sōna æfter his forsīðe wæs ealra witena gemōt on Oxna forda. ⁊ Lēofrīc eorl ⁊ mǣst ealle þā þegenas benorðan Temese. ⁊ þā līðsmen on Lunden. ge curon Harold tō healdes ealles Engla landes. him ⁊ his brōðer Hardacnute þe wæs on Denemearcon. ⁊ Godwine eorl. ⁊ ealle þā yldestan menn on West Seaxon. lagon ongēan swā hī lengost mihton. ac hī ne mihton nān þing ongēan wealcan. ⁊ man gerǣdde þā ꝥ Ælfgifu Hardacnutes mōdor sǣte on Win ceastre mid þæs cynges hūscarlum hyra suna. ⁊ hēoldan ealle West Seaxan him tō handa. ⁊ Godwine eorl wæs heora healdest mann. Sume men sǣdon be Harolde ꝥ hē wǣre Cnutes sunu cynges. ⁊ Ælfgiue Ælfelmes dohtor ealdormannes. ac hit þūhte swīðe ungelēaflic manegum mannum. ⁊ hē wæs þǣh full cyng ofer eall Engla land.

Not in Parker (A).

Hēr man drǣfde ūt Ælfgife Cnutes cynges lāfe. sēo wæs Hardacnutes cynges mōdor. ⁊ hēo ge sōhte þā Baldewines grið be sūðan sǣ. ⁊ hē geaf hire wununge on Bricge. ⁊ hē hī mundode. ⁊ hēold þā hwīle þe hēo þǣr wæs.

Not in Parker (A).

Hēr forðfērde Æðelnōd arceƀ on kl Nov.' ⁊ þæs ymbe lītel Æðelrīc ƀ on Sūð Seaxum. ⁊ þā tōforan Xp̄es mæssan Brihtēh ƀ on Wigra ceastre scīre. ⁊ raðe þæs Ælfrīc ƀ on Ēast Englum. ⁊ þā fēng Ēadsige ƀ tō þām arc̃ƀ rīce. ⁊ Grymcytel tō ðām on Sūð Sexum. ⁊ Līuing ƀ tō Wigra ceastre scīre. ⁊ tō Glēaw cestre scīre.

Not in Parker (A).

Hēr forðfērde Harold cyng on Oxna forda on ·xvi· k Apr. ⁊ hē wæs bebyrged æt West mynstre. ⁊ hē wēolde Engla landes ·iiii· gēar ⁊ ·xvi· wucan. ⁊ on his dagum man geald ·xvi· scipan æt ǣlcere hamulan ·viii· marc. eall swā man ǣr dyde on Cnutes cynges dagum. ⁊ on þis ilcan gēare cōm Hardacnut cyng tō Sandwīc ·vii· nihtum ǣr middan sumera. ⁊ hē wæs sōna under fangen ge fram Anglum ge fram Denum. þēah þe his rǣdes menn hit syððon strange forguldon. ðā hī gerǣdden þet man geald ·lxii· scipon æt ǣlcere hamelan ·viii· marc. ⁊ on þis ilcan gēare ēode se sæster hwǣtes tō ·lv· penega ⁊ ēac furðor.

Hēr Ēadsige arceƀ fōr tō Rōme. ⁊ Harold king forðfērde:

Hēr wæs þet here geold gelǣst. ꝥ wǣron ·xxi· þūsend punda. and ·xcix· punda. ⁊ mann geald syððan ·xxxii· scipon ·xi· þūsend punda ⁊ ·xlviii· punda. ⁊ On ðis ilcan gēare cōm Ēadward Æðelrēdes sunu cinges hider tō lande of Weallande. se wæs Hardacnutes cynges brōðor, hī wǣron bēgen Ælfgiues suna. sēo wæs Ricardes dohtor eorles.

Not in Parker (A).

Hēr forðfērde Hardacnut cyng æt Lamb hȳðe on ·vi· id' iun.' ⁊ hē wæs cyng ofer eall Engla land twā gēar būton ·x· nihtum. ⁊ hē is be byrged on Ealdan mynstre on Winceastre mid Cnute cynge his fæder. ⁊ ēar þan þe hē bebyrged wǣre. eall folc ge cēas Ēadward tō cynge on Lundene. healde þā hwīle þe him God unne. ⁊ eall ꝥ gēar wæs swīðe hefig tīme on manegum þingum. ⁊ mislicum. ge on unwæderum. ge on eorð wæstmum. ⁊ swā mycel orfes wæs þæs gēares forfaren. swā nān man ǣr ne gemunde. ǣgðer ge þurh mistlice coða ge þurh ungewyderu. On þis ilcan tyme forðferde Ælf [sine] abbot of Burh. ⁊ man ceas þa Arnwi munec to aƀƀ. forþan þe he wæs swiðe gód mán ⁊ swiðe bilehwit.

Hēr forðfērde Harðacnut king.

Hēr wæs Ǣðward ge hālgod tō cyng on Winceastre on Ǣster dæg mid mycclum wurðscipe. ⁊ þā wǣron Ēastron on ·iii· No Apr̃. Ēadsige arc̃ƀ hine hālgode. ⁊ foran eallum folce hine well lǣrde. ⁊ tō his āgenre nēode. ⁊ ealles folces well monude. ⁊ Stigand prēost wæs geblētsod tō biscope tō Ēast Englum. ⁊ raðe þæs se cing lēt gerīdan ealle þā land þe his mōdor āhte him tō handa. ⁊ nam of hire eall ꝥ hēo āhte on golde ⁊ on seolfre. ⁊ on unāsecgendlicum þingum. forþan hēo hit hēold tō feste wið hine.

Hēr wæs Ēduuard gehālgod tō kinge.

Hēr Ēadsige arc̃ƀ forlēt þet biscop rīce for his untrumnisse. ⁊ blētsode þǣr tō Siward abbot of Abbandūne tō biscope be þæs cynges lǣfe ⁊ rǣda. ⁊ Godwines eorles. hit wæs elles fēawum mannum cūð ǣr hit gedōn wæs. forþan se arcebiscop wēnde ꝥ hit sum ōðer mann ābid'd'an wolde · oððe gebicgean. þe hē his wyrs trūwude and ūðe. gif hit mā manna wiste. ⁊ On þisum wæs swȳðe mycel hungor ofer Engla land.

⁊ corn swā dȳre swā nān mann ǣr ne gemunde. swā ꝥ se sester hwǣtes ēode tō ·lx· penega. ⁊ ēac furðor. ⁊ þæs ylcan gēares se cyng fōr ūt tō Sandwīc mid ·xxxv· scipon. ⁊ Æðelstān cyrice weard fēng tō ðām abbotrīce æt Abbandūne. ⁊ Stigand fēng tō his biscop rīce.

Hēr nam Ǣdward cyng Godwines dohtor eorles him tō cwēne. ⁊ on þis ilcan gēare forðfērde Brihtwold ƀ. ⁊ hē hēold þæs biscop rīces ·xxxviii· wintra. ⁊ Hereman þes cynges prēost fēng tō þām biscop rīce. ⁊ on þysum gēare man hālgode Wulfrīc tō aƀƀ æt Sc̄e Augustine tō Xp̄es mæssan on Stephanes mæsse dæg. be þes cynges ge lǣfan ⁊ Ælfstānes abbotes for his mycelre untrumnysse.

Not in Parker (A).

Hēr forðfērde Līuing ƀ on Defena scīre. ⁊ Lēofrīc fēng þǣr tō se wæs þæs cynges prēost. And on þisum ilcan gēare forðfērde Ælfstān abbot æt Sc̄e Augustine ·iii· No Ivln. ⁊ on þis ilcan gēare wearð āflēmed ūt Osgot Clapa.

Not in Parker (A).

Hēr forðfērde Grymkytel ƀ on Sūð Sexum. ⁊ fēng Heca ðes cynges prēost þǣr tō. And on þysum gēare for'ð'fērde Ælfwine biscop on Winceastre. on ·iiii· k Septemƀ. ⁊ fēng Stigand ƀ benorðan þǣr tō. ⁊ on ðām ilcan gēare fērde Swegen eorl ūt tō Baldewines lande tō Brycge, ⁊ wunode þǣr ealne winter. ⁊ wende þā tō sumere ūt.

Not in Parker (A).

Bellum apud Uallium Dunas. Hēr forðfērde Æþelstān abbot on Abbandūne. and fēng Spearhafoc munuc tō of Sc̃e Ēadmundes byrig. ⁊ on þis ilcan gēare forðfērde Siward biscop. ⁊ fēng Ēadsige arc̃ƀ eft tō eallum þām ƀ rīce. ⁊ on þis ilcan gēare cōmon tō Sandwīc. Loðen ⁊ Yrling mid ·xxv· scipon. ⁊ nāmon þǣr un āsecgendlice here hūðe. on mannum ⁊ on golde ⁊ on seolfre, þet nān man nyste hwæt þæs ealles wes. ⁊ wendon þā on būton Tenet. ⁊ woldon þǣr þet ilce dōn. ac þet land folc hardlīce wið stōdon. ⁊ for werndon heom ǣgðer ge up ganges ge wæteres. ⁊ āflȳmdon hī þanon mid ealle. ⁊ hī wendon heom þanon tō Ēast Seaxan. ⁊ hergodon þǣr ⁊ nāmon menn. ⁊ swā hwæt swā hī findan mihtan. ⁊ ge wendon him þā ēast tō Baldewines land. ⁊ sealdon þǣr þet hī ge hergod hæfdon. ⁊ fērdon heom syððon ēast þanon þe hī ǣr cōmon.

Hēr on þisum gēare wæs se myccla synoð æt Sc̃e Remei. Ðǣr wæs on Leo se pāpa. ⁊ se arc̃ƀ of Burgundia. ⁊ se arceƀ of Bysincun. ⁊ se arceƀ of Treueris. ⁊ se arceƀ of Remis. ⁊ manig mann þǣr tō ge hādode ge lǣwede. ⁊ Ēdward cyng sende þider Dudocc ƀ. ⁊ Wlfrīc aƀƀ of Sc̃e Augustine. ⁊ Elfwine aƀƀ. ꝥ hī sceolden þām cynge cȳðan hwæt þǣr tō Xp̃endome gecoren wǣre. ⁊ on þis ylcan gēare fērde Ēadward cyng ūt tō Sandwīc mid mycclan sciphere. ⁊ cōm Swegn eorl in mid ·vii· scipon tō Bosenhām. ⁊ griðode wið þone cyng. ⁊ behēt man him ꝥ hē mōste wurðe [bēon] ǣlc þǣra þinga þe hē ǣr āhte. Ðā wiðlæg Harold eorl his brōðor ⁊ Beorn eorl, ꝥ hē ne mōste bēon 'nān' þǣra þinga wurðe þe se cyng him ge unnen hæfde. ac sette man him ·iiii· nihta grið tō his scipon. Ðā wearð hit under þām þet þām cynge cōm word ꝥ unufrið scipa lǣgen be westan and hergodon. Ðā ge [wende] Godwine eorl west onbūton mid þes cynges ·ii· scipum. þām ānan stēorde Harold eorl. ⁊ þām ōðran Tostig his brōðor. ⁊ landes manna scipa ·xlii· Þā scyfte man Harold eorl up þæs cynges scipe þe Harold eorl ǣr stēorde. þā gewendon hī west tō Peuenesēa. ⁊ lǣgen þǣr weder feste. Þā þes binnon ·ii· dagum. þā cōm Swegen eorl þider. ⁊ spec wið his feder ⁊ wið Beorn eorl. ⁊ bed Beorn ꝥ hē sceolde faran mid him tō ðām cynge tō Sandwīc. ⁊ fylstan him tō þæs cynges frēondscipe. ⁊ hē þæs tīðode. ge wendon heom þā swylce hī woldon tō ðām cynge. Ðā amang þām þe hī ridon. þā bæd Swegen hine þet hē sceolde faran mid him tō his scipon. tealde ꝥ his sciperes woldon wændon fram him būton hē þe raðor cōme. Hī ge wendon þā bēgen þǣr his scipu lǣgen. þā hī þyder cōmon. þā bæd Swegen eorl hine ꝥ hē sceolde ge wendon mid him tō sc'i'pe. hē forweornde swīðe. swā lange oð his sciperes ge fēngon hine. ⁊ wurpon hine on þone bāt. ⁊ bundon hine. ⁊ rēowan tō scipe. ⁊ dydon hine þǣr on. tugon þā up heora segel. ⁊ urnon west tō Axamūðan. ⁊ hæfdon hine mid heom. oð þet hī ofslōgon hine. ⁊ nāmon þone līchaman. ⁊ be byrgedon innan ānre cyrican. ⁊ cōmon þā his frēond ⁊ lītsmen of Lundene. ⁊ nāmon hine up. ⁊ feredon hine tō Win ceastre tō Ealdan mynstre. ⁊ hē is þǣr byrged wið Cnut cyng his ēam. ⁊ Swegen ge wende þā ēast tō Baldewines lande. ⁊ sæt þǣr ealne winter on Brycge mid his fullan griðe.

⁊ on þām ylcan gēare forðfērde Ēadnōð ƀ benorðan. ⁊ sette man Ulf tō biscop.

Not in Parker (A).

Hēr on þisum gēare wæs mycel ge mōt on Lundene tō midfestene. ⁊ man sette ūt ·ix· līts manna scipa. ⁊ fīf belifan wið æftan.

⁊ on þysum ilcan gēare cōm Swegen eorl in tō Engla lande.

⁊ on þysum ilcan gēare wæs se mycele sinoð on Rōme. ⁊ Ēadward cyng sende þider Hereman ƀ. ⁊ Ealdrēd ƀ. ⁊ hī cōmon þyder on Ēaster ǣfen. ⁊ eft se pāpa hæfde sinoð on Uercel. ⁊ Vlf ƀ cōm þǣr tō. ⁊ for nēah man sceolde tō brecan his stef, gif hē ne sealde þe māre gersuman. forðan hē ne cūðe dōn his ge rihte swā wel swā hē sceolde. ⁊ on þisum gēare forðfērde Ēadsige arceƀ ·iiii· kl Novemƀ.