Not in Parker (A).
Hēr on þisum gēare Ēadward cyng ge sette Rodbyrd on Lundene tō arceƀ tō Cantwara byrig on Lengtene. ⁊ þæs sylfan Lentenes hē fōr tō Rōme æfter his pallium. ⁊ se cyng geaf þet biscoprīce on Lundene Sparhafoc abbot of Abbandūne. ⁊ se cyng geaf [ꝥ] abbotrīce Roðulfe ƀ his mǣge. Ðā cōm se arceƀ fram Rōme āne dæge ǣr sc̃s Petrus mæsse ǣfene. ⁊ ge sæt his arceƀ stōl æt Xp̄escyrcean on sc̃s Petrus mæsse dæg. ⁊ sōna þæs tō þām cyng gewænde. Ðā cōm Sparhafoc aƀƀ be weg [e] tō him mid þæs cynges gewrite ⁊ insegle. tō þan þet hē hine hādian sceolde tō ƀ intō Lundene. þā wið cweð se arceƀ. ⁊ cwæð þet se pāpa hit him forboden hæfde. þā gewende se aƀƀ ongēan þone arceƀ eft tō ðām, ⁊ þǣr þes biscophādes gernde. ⁊ se arceƀ him ānrǣdlīce forwernde. ⁊ cwæð þet se pāpa hit him forboden hæfde. Ðā gewende se aƀƀ tō Lundene. ⁊ sæt on þām biscoprīce þe se cyng him ǣr geunnan hæfde be his fulre lēafe ealne þone sumor ⁊ þone hærfest.
⁊ cōm þā Eustatius fram geondan sǣ sōna æfter þām biscop. ⁊ gewende tō ðām cynge. ⁊ spæc wið hine ꝥ ꝥ hē þā wolde. ⁊ gewende þā hāmweard. Þā hē cōm tō Cantwarbyrig ēast þā snǣdde hē þǣr ⁊ his menn. ⁊ tō Dofran gewende. Ðā hē wæs sume mīla oððe māre behēonan Dofran. þā dyde hē on his byrnan. ⁊ his gefēran ealle. ⁊ fōran tō Dofran. Þā hī þider cōmon. þā woldon hī innian hī þǣr heom sylfan gelīcode. þā cōm ān his manna. ⁊ wolde wīcian æt ānes bundan hūse his unðances. ⁊ gewundode þone hūsbundon. ⁊ se hūsbunda ofslōh þone ōðerne. Ðā wearð Eustatius uppon his horse. ⁊ his gefēoran uppon heora. ⁊ fērdon tō þām hūsbundon. ⁊ of slōgon hine binnan his āgenan heorðæ. ⁊ wendon him þā up tō þǣre burge weard. ⁊ ofslōgon ǣgðer ge wið innan ge wið ūtan. mā þanne ·xx· manna. ⁊ þā burh men ofslōgon ·xix· menn on ōðre healfe. ⁊ ge wundoden ꝥ hī nystan hū fela. ⁊ Eustatius æt bærst mid fēawum mannum. ⁊ ge wende ongēan tō þām cynge. ⁊ cȳdde be dǣle hū hī ge faren hæfdon. ⁊ wearð se cyng swīþe gram wið þā burhware. ⁊ of sænde se cyng Godwine eorl. ⁊ bæd hine faran in tō Cent mid unfriða tō Dofran. for þan Eustatius hæfde ge cȳdd þām cynge þet hit sceolde bēon māre gylt þǣre burhwaru þonne his. ac 'hit' næs nā swā. ⁊ se eorl nolde nā ge ðwǣrian þǣre infare. for þan him wæs lāð tō āmyrrene his āgenne folgað.
Ðā sende se cyng æfter eallon his witan. ⁊ bēad heom cuman tō Glēaweceastre nēh þǣre æftre sc̄a Maria mæssan. Þā hæfdon þā welisce menn ge wroht ǣnne castel on Herefordscīre on Swegenes eorles folgoðe. ⁊ wrohten ǣlc þǣra harme. ⁊ bismere þæs cynges mannan þǣr ābūtan þe hī mihton. Ðā cōm Godwine eorl ⁊ Swegen eorl ⁊ Harold eorl tōgædere æt Byferes stāne. ⁊ manig mann mid heom. tō ðon ꝥ hī woldon faran tō heora cyne hlāforde. ⁊ tō þām witan eallon þe mid him ge gaderode wǣron. ꝥ hī þæs cynges rǣd hæfdon ⁊ his fultum. ⁊ ealra witena. hū hī mihton þæs cynges bismer āwrecan ⁊ ealles þēodscipes. Ðā wǣron þā wælisce men æt foran mid þām cynge. ⁊ for wrēgdon ðā eorlas. þet hī ne mōston cuman on his ēagon ge sihðe. Forðan hī sǣdon ꝥ hī woldon cuman þider for þes cynges swicdōme. Wæs þǣr cuman Siward eorl ⁊ Lēofrīc eorl. ⁊ mycel folc mid heom norþan tō þām cynge. ⁊ wæs þām eorle Godwine ⁊ his sunan ge cȳdd ꝥ se cyng ⁊ þā menn þe mid him wǣron. woldon rǣdon on hī. ⁊ hī trymedon hī fæstlīce ongēan. þǣh him lāð wǣre ꝥ hī ongēan heora cyne hlāford standan sceoldan. Ðā ge rǣdden þā witan on ǣgðer halfe ꝥ man ðā ǣlces yfeles ge swāc. ⁊ geaf se cyng Godes grið ⁊ his fulne frēondscipe on ǣgðre healfe.
Ðā ge rǣdde se cyning ⁊ his witan ꝥ man sceolde ōðre syðan habban ealra ge witena ge mōt on Lundene tō hærfestes emnihte. ⁊ hēt se cyning bannan ūt here. ǣgðer ge be sūðan Temese ge be norðan eall ꝥ ǣfre betst wæs. Ðā cwæð man Swegen eorl ūt lah. ⁊ stefnode man Godwine eorle ⁊ Harolde eorle tō þon ge mōte swā raðe swā hī hit ge faran mihton. Þā hī þider ūt cōmon. þā stefnede heom man tō ge mōte. þā gyrnde hē griðes ⁊ gīsla. þet hē mōste unswican intō ge mōte cuman. ⁊ ūt of ge mōte. Ðā gyrnde se cyng ealra þǣra þegna þe þā eorlas ǣr hæfdon. ⁊ hī lētan hī ealle him tō handa. Þā sende se cyng eft tō heom. ⁊ bēad heom ꝥ hī cōmon mid ·xii· mannum intō þæs cynges rǣde. Þā geornde se eorl eft griðes ⁊ gīsla. ꝥ hē mōste hine betellan æt ǣlc þǣra þinga þe him man on lede. Þā wyrnde him mann ðēra gīsla. ⁊ scēawede him mann ·v· nihta grið ūt of lande tō farenne.
⁊ gewende þā Godwine eorl ⁊ Swegen eorl tō Bosenhām ⁊ scufon ūt heora scipu. ⁊ gewendon heom begeondan sǣ. ⁊ ge sōhton Baldewines grið. ⁊ wunodon þǣr ealne þone winter. ⁊ Harold eorl gewende west tō Ȳrlande. ⁊ wæs þǣr ealne þone winter on þes cynges griðe.
⁊ sōna þæs þe þis wæs. þā forlēt se cyng þā hlǣfdian. sēo wæs gehālgod him tō cwēne. ⁊ lēt niman of hire eall ꝥ hēo āhte. on lande. ⁊ on golde. ⁊ on seolfre ⁊ on eallon þingon. ⁊ betǣhte hȳ his swyster tō Hwerwillon.
⁊ Sparhafoc abb wearð ðā ādrifen ūt of þām biscoprīce on Lundene. ⁊ wes Willelm þæs cynges prēost ge hādod þǣr tō. ⁊ man sette þā Oddan tō eorle ofer Defena scīre. ⁊ ofer Sumer sǣton. ⁊ ofer Dorsēton. ⁊ ofer Wealas. ⁊ mann sette Ælfgār Lēofrīces sunu eorles ðane eorldōm on handa þe Harold ǣr āhte.