Not in Parker (A).
Her on þisum geare wæs mycel eorð styrung wide on Engla lande; ⁊ on þam ylcan geare man ge hergode Sandwic. ⁊ Wiht. ⁊ ofslohan þa betsta men þe þar wæron. ⁊ Eadward cining ⁊ þa eorlas foran æfter þam út mid heora scypun; ⁊ on þam ylcan geare Siward ƀ for let ꝥ bisceop rice for his untrumnysse, ⁊ for to Abbandune, ⁊ Eadsige arceƀ feng eft to þam bisceoprice. ⁊ he forð ferde þæs binnan ·viii· wucan on ·x· kl Nouembris.
Not in Parker (A).
Her on þisum geare se casere gaderode unarimedlice fyrde ongean Baldewine of Brycge, þurh ꝥ ꝥ he bræc þæne palant æt Neomagan, ⁊ eac fela oðra un þanca þe he him dyde. seo fyrd wæs unatellendlic þe he gegaderod hæfde. Ðær wæs 'Leo' se papa of Rôme. ⁊ fela mærra manna of manegan þeod scipan · He sende eac to Eadwerde cing'ce' ⁊ bæd hine scip fultumes. ꝥ he ne geþafode ꝥ he him on wætere ne æt burste. ⁊ he fór ða to Sandwic, ⁊ þær læg mid myclan scyp here. forð ꝥ se casere hæfde of Baldwine eall ꝥ he wolde. east to Baldewines land. ⁊ sealdon þær þet hi ge hergod hæfdon. ⁊ ferdon heom syððon east þanon þe hi ær comon.
1046. Her on þisum geare wæs se myccla synoð æt Sce Remei. Ðær wæs on Leo se papa. ⁊ se arceb of Burgundia. ⁊ se arceb of Bysincun. ⁊ se arceb of Treueris. ⁊ se arceb of Remis. ⁊ manig mann þær to ge hadode ge læwede. ⁊ Edward cyng sende þider Dudocc b. ⁊ Wlfric abb of Sce Augustine. ⁊ Elfwine abb. ꝥ hi sceolden þam cynge cyðan hwæt þær to Xþendome gecoren wære. ⁊ on þis ylcan geare ferde Eadward cyng út to Sandwic mid mycclan sciphere. ⁊ com Swegn eorl in mid ·vii· scipon to Bosenham. ⁊ griðode wið þone cyng. ⁊ behet man him ꝥ he moste wurðe [beon] ælc þæra þinga þe he ær ahte. Ða wiðlæg Harold eorl his broðor ⁊ Beorn eorl, ꝥ he ne moste beon 'nan' þæra þinga wurðe þe se cyng him ge unnen hæfde. ac sette man him ·iiii· nihta grið to his scipon. Ða wearð hit under þam þet þam cynge com word ꝥ únufrið scipa lægen be westan and hergodon. Ða ge [wende] Godwine eorl west onbuton mid þes cynges ·ii· scipum. þam anan steorde Harold eorl. ⁊ þam oðran Tostig his broðor. ⁊ landes manna scipa ·xlii· þa scyfte man Harold eorl úp þæs cynges scipe þe Harold eorl ær steorde. þa gewendon hi west to Peuenesea. ⁊ lægen þær weder feste. Þa þes binnon ·ii· dagum. þa com Swegen eorl þider. ⁊ spec wið his feder ⁊ wið Beorn eorl. ⁊ bed Beorn ꝥ he sceolde faran mid him to ðam cynge to Sandwic. ⁊ fylstan him to þæs cynges freondscipe. ⁊ he þæs tiðode. ge wendon heom þa swylce hi woldon to ðam cynge. Ða amang þam þe hi ridon. þa bæd Swegen hine þet he sceolde faran mid him to his scipon. tealde ꝥ his sciperes woldon wændon fram him buton he þe raðor come. Hi ge wendon þa begen þær his scipu lægen. þa hi þyder comon. þa bæd Swegen eorl hine ꝥ he sceolde ge wendon mid him to sci'pe. he forweornde swiðe. swa lange oð his sciperes ge fengon hine. ⁊ wurpon hine on þone bát. ⁊ bundon hine. ⁊ reowan to scipe. ⁊ dydon hine þær ón. tugon þa up heora segel. ⁊ urnon west to Axamuðan. ⁊ hæfdon hine mid heom. oð þet hi ofslogon hine. ⁊ namon þone lichaman. ⁊ be byrgedon innan anre cyrican. ⁊ comon þa his freond ⁊ litsmen of Lundene. ⁊ namon hine úp. ⁊ feredon hine to Win ceastre to
Ealdan mynstre. ⁊ he is þær byrged wið Cnut cyng his eam. ⁊ Swegen ge wende þa east to Baldewines lande. ⁊ sæt þær ealne winter on Brycge mid his fullan griðe.
⁊ on þam ylcan geare forðferde Eadnoð ƀ benorðan. ⁊ sette man Ulf to biscop.
1047. Her on þisum geare wæs mycel ge mot on Lundene to midfestene. ⁊ man sette ut ·ix· lits manna scipa. ⁊ fif belifan wið æftan.
⁊ on þysum ilcan geare com Swegen eorl in to Engla lande.
⁊ on þysum ilcan geare wæs se mycele sinoð on Rome. ⁊ Eadward cyng sende þider Hereman ƀ. ⁊ Ealdred ƀ. ⁊ hi comon þyder on Easter æfen. ⁊ eft se papa hæfde sinoð on Uercel. ⁊ Vlf ƀ com þær to. ⁊ for neah man sceolde to brecan his stef, gif he ne sealde þe mare gersuman. forðan he ne cuðe don his ge rihte swa wel swa he sceolde. ⁊ on þisum geare forðferde Eadsige arceƀ ·iiii· kl Novemƀ.
1048. Her on þisum geare Eadward cyng ge sette Rodbyrd on Lundene to arceƀ to Cantwara byrig on Lengtene. ⁊ þæs sylfan Lentenes he for to Rome æfter his pallium. ⁊ se cyng geaf þet biscoprice on Lundene Sparhafoc abbot of Abbandune. ⁊ se cyng geaf [ꝥ] abbotrice Roðulfe ƀ his mæge. Ða com se arceƀ fram Rome ane dæge ær sc̃s Petrus mæsse æfene. ⁊ ge sæt his arceƀ stol æt Xp̄escyrcean on sc̃s Petrus mæsse dæg. ⁊ sona þæs to þam cyng gewænde. Ða com Sparhafoc aƀƀ be weg [e] to him mid þæs cynges gewrite ⁊ insegle. to þan þet he hine hadian sceolde to ƀ into Lundene. þa wið cweð se arceƀ. ⁊ cwæð þet se papa hit him forboden hæfde. þa gewende se aƀƀ ongean þone arceƀ eft to ðam, ⁊ þær þes biscophades gernde. ⁊ se arceƀ him anrædlice forwernde. ⁊ cwæð þet se papa hit him forboden hæfde. Ða gewende se aƀƀ to Lundene. ⁊ sæt on þam biscoprice þe se cyng him ær geunnan hæfde be his fulre leafe ealne þone sumor ⁊ þone hærfest.
⁊ com þa Eustatius fram geondan sæ sona æfter þam biscop. ⁊ gewende to ðam cynge. ⁊ spæc wið hine ꝥ ꝥ he þa wolde. ⁊ gewende þa hamweard. þa he com to Cantwarbyrig east þa snædde he þær ⁊ his menn. ⁊ to Dofran gewende. Ða he wæs sume mila oððe mare beheonan Dofran. þa dyde he on his byrnan. ⁊ his geferan ealle. ⁊ foran to Dofran. þa hi þider comon. þa woldon hi innian hi þær heom sylfan gelicode. þa com an his manna. ⁊ wolde wician æt anes bundan huse his unðances. ⁊ gewundode þone husbundon. ⁊ se husbunda ofsloh þone oðerne. Ða wearð Eustatius uppon his horse. ⁊ his gefeoran uppon heora. ⁊ ferdon to þam husbundon. ⁊ of slogon hine binnan his agenan heorðæ. ⁊ wendon him þa up to þære burge weard. ⁊ ofslogon ægðer ge wið innan ge wið utan. ma þanne ·xx· manna. ⁊ þa burh men ofslogon ·xix· menn on oðre healfe. ⁊ ge wundoden ꝥ hi nystan hú fela. ⁊ Eustatius æt bærst mid feawum mannum. ⁊ ge wende ongean to þam cynge. ⁊ cydde be dæle hu hi ge faren hæfdon. ⁊ wearð se cyng swiþe gram wið þa burhware. ⁊ of sænde se cyng Godwine eorl. ⁊ bæd hine faran in to Cent mid unfriða to Dofran. for þan Eustatius hæfde ge cydd þam cynge þet hit sceolde beon mare gylt þære burhwaru þonne his. ac 'hit' næs na swa. ⁊ se eorl nolde na ge ðwærian þære infare. for þan him wæs lað to amyrrene his agenne folgað.
Ða sende se cyng æfter eallon his witan. ⁊ bead heom cuman to Gleaweceastre neh þære æftre sc̄a Maria mæssan. Þa hæfdon þa welisce menn ge wroht ænne castel on Herefordscire on Swegenes eorles folgoðe. ⁊ wrohten ælc þæra harme. ⁊ bismere þæs cynges mannan þær abutan þe hi mihton. Ða com Godwine eorl ⁊ Swegen eorl ⁊ Harold eorl togædere æt Byferes stane. ⁊ manig mann mid heom. to ðon ꝥ hi woldon faran to heora cyne hlaforde. ⁊ to þam witan eallon þe mid him ge gaderode wæron. ꝥ hi þæs cynges ræd hæfdon ⁊ his fultum. ⁊ ealra witena. hu hi mihton þæs cynges bismer awrecan ⁊ ealles þeodscipes. Ða wæron þa wælisce men æt foran mid þam cynge. ⁊ for wregdon ða eorlas. þet hi ne moston cuman on his eagon ge sihðe. Forðan hi sædon ꝥ hi woldon cuman þider for þes cynges swicdome. Wæs þær cuman Siward eorl ⁊ Leofric eorl. ⁊ mycel folc mid heom norþan to þam cynge. ⁊ wæs þam eorle Godwine ⁊ his sunan ge cydd ꝥ se cyng ⁊ þa menn þe mid him wæron. woldon rædon on hi. ⁊ hi trymedon hi fæstlice ongean. þæh him lað wære ꝥ hi ongean heora cyne hlaford standan sceoldan. Ða ge rædden þa witan on ægðer halfe ꝥ man ða ælces yfeles ge swác. ⁊ geaf se cyng Godes grið ⁊ his fulne freondscipe on ægðre healfe.
Ða ge rædde se cyning ⁊ his witan ꝥ man sceolde oðre syðan habban ealra ge witena ge mot on Lundene to hærfestes emnihte. ⁊ het se cyning bannan út here. ægðer ge be suðan Temese ge be norðan eall ꝥ æfre betst wæs. Ða cwæð man Swegen eorl ut lah. ⁊ stefnode man Godwine eorle ⁊ Harolde eorle to þon ge mote swa raðe swa hi hit ge faran mihton. Þa hi þider ut comon. þa stefnede heom man to ge mote. þa gyrnde he griðes ⁊ gisla. þet he moste unswican into ge mote cuman. ⁊ út of ge mote. Ða gyrnde se cyng ealra þæra þegna þe þa eorlas ær hæfdon. ⁊ hi letan hi ealle him to handa. Þa sende se cyng eft to heom. ⁊ bead heom ꝥ hi comon mid ·xii· mannum into þæs cynges ræde. Þa geornde se eorl eft griðes ⁊ gisla. ꝥ he moste hine betellan æt ælc þæra þinga þe him man on lede. Þa wyrnde him mann ðera geferana. ⁊ micel hearm þær gedón wæs on ægðre healfe mid horse ⁊ eac mid wæpnum. oð ꝥ folc gegaderede. ⁊ hi þa æt flugon ꝥ hi comon to þam cynge to Gleawcestre. ⁊ he heom gryð sealde. Þa under nam Godwine eorl swyðe ꝥ on his eorl dome sceolde swilc ge weorðan. ongan þa gadrian folc ofer eall his eorl dóm. ⁊ Swein eorl his sunu ofer his. ⁊ Harold his oðer sunu ofer his eorldom. ⁊ hi gegaderedan ealle on Gleawcester scire æt Langatreo mycel fyrd ⁊ unarimedlic. ealle gearwe to wige ongean þone cyng. buton man ageafe Eustatsius ⁊ his men heom to handsceofe. ⁊ eac þa Frencyscan þe on þan castelle wæron. Þis wæs gedon ·vii· nihton ær þære lateran sca Maria mæssan. Þa wæs Eadward cyng on Gleawcestre sittende. Sende þa æfter Leofrice eorle ⁊ norð æfter Siwarde eorle. ⁊ bæd heora gencges. ⁊ hi him þa to comon ærest mid medemum fultume. ac siððan hy wiston hu hit þær be suðan wæs, þa sendon hi norð ofer ealne heora eorldom. ⁊ leton beodan mycele fyrde heora hlaforde to helpe. ⁊ Raulf eac ofer his eorldom, ⁊ comon ða ealle to Gleaweceastre þam cynge to helpe, þeah hit læt wære. Wurdan þa ealle swa anræde mid þam cynge. ꝥ hy woldon Godwines fyrde gesecan. gif se cyng ꝥ wolde. Þa leton hy sume ꝥ ꝥ mycel unræd wære. ꝥ hy to gedere comon, for þam þær wæs mæst ꝥ rotoste ꝥ wæs on Ængla lande on þam twam gefylcum. ⁊ leton ꝥ 'hi' urum feondum rymdon to lande. ⁊ betwyx us sylfum to mycclum forwyrde. Ge ræddon þa ꝥ man sealde gislas betweonan, ⁊ setton stefna ut to Lundene. ⁊ man bead þa folce þider ut ofer ealne þisne norðende. on Siwardes eorldome. ⁊ on Leofrices. ⁊ eac elles gehwær. ⁊ sceolde Godwine eorl. ⁊ his suna þær cuman to wiþer male. Þa comon hy to Suþgeweorce, ⁊ micel mænegeo mid heom of West Sæxum, ac his wered wanode æfre þe leng þe swiðor. ⁊ man borhfæste þam kyninge ealle þa þægnas þe wæron Haroldes eorles. his suna. ⁊ man utlagode þa Swægn eorl. his oðerne sunu. Þa ne onhagode him to cumenne to wiðermale ongean þone cyng ⁊ agean þone here þe him mid wæs. Fór ða on niht awæg. ⁊ se cyng hæfde þæs on morgen witenagemot, ⁊ cwæð hine utlage ⁊ eall here. hine ⁊ 'ealle' his suna; ⁊ he wende suð to þorneege, ⁊ his wif ⁊ Swegen his suna. ⁊ Tostig ⁊ his wif, Baldwines mage æt Brycge? ⁊ Gerð his suna; ⁊ Harold eorl ⁊ Leofwine foran to Brycg stowe on ꝥ scip þe Swegen eorl gisla. ⁊ sceawede him mann ·v· nihta grið út of lande to farenne.
⁊ gewende þa Godwine eorl ⁊ Swegen eorl to Bosenham ⁊ scufon út heora scipu. ⁊ gewendon heom begeondan sæ. ⁊ ge sohton Baldewines grið. ⁊ wunodon þær ealne þone winter. ⁊ Harold eorl gewende west to Yrlande. ⁊ wæs þær ealne þone winter on þes cynges griðe. ⁊ sona þæs þe þis wæs. þa forlet se cyng þa hlæfdian. seo wæs gehalgod him to cwene. ⁊ let niman of hire eall ꝥ heo ahte. on lande. ⁊ on golde. ⁊ on seolfre ⁊ on eallon þingon. ⁊ betæhte hy his swyster to Hwerwillon.
⁊ Sparhafoc abb wearð ðá adrifen út of þam biscoprice on Lundene. ⁊ wes Willelm þæs cynges preost ge hadod þær to. ⁊ man sette þa Oddan to eorle ofer Defena scire. ⁊ ofer Sumer sæton. ⁊ ofer Dorseton. ⁊ ofer Wealas. ⁊ mann sette Ælfgar Leofrices sunu eorles ðane eorldom on handa þe Harold ær ahte.
Not in Laud (E).
Her forðferde Eadsige arceƀ. ⁊ Rodbert feng to arceƀ rice.