Not in Laud (E).
Hēr Æþelstān cyning forð fērde on ·vi· kł NŌV'. ymbe ·xli· wintra būtan ānre niht þæs þe Ælfrēd cyning forþ fērde; ⁊ Ēadmund æþeling fēng tō rīce. ⁊ hē wæs þā ·xviii· wintre. ⁊ Æþelstān cyning rīxade ·xiiii· gēar ⁊ ·x· wucan. [þā was Wulfelm arcebiscop on Cañt.]
Hēr Ēadmund cyning, Engla þēoden, māga mundbora, Myrce ge ēode, dȳre dǣd fruma, swā Dor scādeþ, Hwītan wylles geat. ⁊ Humbra ēa, brāda brim strēam; burga fīfe, Ligora ceaster · ⁊ Lindcylene, ⁊ Snotingahām, swylce Stānford ēac · [⁊] Dēora by, Dæne wǣran ǣr, under Norðmannum, nȳde gebēgde on hǣþenra hæfte clommum, lange þrāga; oþ hīe ālȳsde eft, for his weorþscipe, wīggendra hlēo, afera Ēadweardes · Ēadmund cyning onfēng Anlafe cyninge æt fulluhte. ⁊ þȳ ylecan gēare ymb tela micel fæc hē onfēng Rægenolde cyninge æt bisceopes handa . . . . . . . . [arcebisceop.]
Hēr Anlaf cyning forðfērde. Et Ricardus uetus suscepit regnum. et regnauit añ ·lii·
Not in Laud (E).
[[Hēr Ēadmund cing S. Dunstāne Glæs] tingeberig be tǣhte ðǣr hē syððan ǣrest abbud wearð.]
Hēr Ēadmund cyning ge ēode eal Norþhymbra land him tō ge wealdan, ⁊ āflȳmde ūt twēgen cyningas, Anlaf Syhtrices sunu, ⁊ Rægenald Guðferþes sunu.
Hēr Ǣdmund cyning ge ēode ealle Norðhymbre. ⁊ 'ūt āflȳmde twēgen cyneborene mæn Anlaf ⁊ Regnald.
Hēr Ēadmund cyning ofer hergode eal Cumbra land. ⁊ hit lēt tō eal Malculme Scotta cyninge. on ꝥ gerād ꝥ hē wǣre his midwyrhta ǣgþer ge on sǣ ge on lande.
Hēr Ǣdmund cyning oferhergode eall Cumbra land.
Not in Laud (E).
Hēr Ēadmund cyning forðfērde on Sc̃s Agustinus mæsse dæge. ⁊ hē hæfde rīce seofoþe healf gēar; ⁊ þā fēng Ēad rēd æþeling his brōþor tō rīce, ⁊ gerād eal Norþhymbra land him tō ge wealde. ⁊ Scottas him āþas sealdan, ꝥ hīe woldan eal ꝥ hē wolde.
Not in Parker (A).
Hēr Ǣdmund cyning wearð ofstungen. ⁊ fēng Ǣdrēd his brōðor tō rīce. ⁊ hē sōna gerād eall Norðhymbra land him tō ge wealde. ⁊ Scottas him āðas swōron ꝥ hī eall wolden ꝥ hē wolde.
Not in Parker (A).
Hēr cōm Anlaf Cwiran on Norðhymbra land.
Not in Laud (E).
Hēr forþfērde Ælfhēah Wintan ceastres bisc̃ on Sc̃e Gregories mæsse dæg.
Not in Parker (A).
Hēr Norðhymbre fordrifan Anlaf cyning. ⁊ under fēngon Yric Haroldes sunu.
Not in Parker (A).
Hēr Norðhymbre fordrifon Yric. ⁊ Ǣdrēd fēng tō Norðhymbra rīce.
Hēr forþ fērde Ēadrēd cining. on Sc̃e Clementes mæsse dæg on Frome, ⁊ hē rīxsade tēoþe healf gēar; ⁊ þā fēng Ēadwīg tō rīce. Ēadmundes sunu cinges.
Hēr Ǣdrēd cyning forðfērde. ⁊ fēng Ēadwīg tō rīce Ēadmundes sunu.
[⁊ āflǣmde Sc̃e Dunstān ūt oflande.]
Hēr forðfērde Wulstān arc̃ƀ.
Not in Laud (E).
Hēr forðfērde Ēadwīg cyng on kł Octobr̃. ⁊ Ēadgār his brōðor fēng tō rīce:,
[Hēr hē sæ'n'te efter Sc̃e Dunstāne. ⁊ gæf him ƀrice on Wigracæstre, ⁊ ðǣr æfter ꝥ ƀ rīce on Lundene.]
Hēr Ēadwīg cyning forðfērde. ⁊ fēng Ēadgār his brōðor tō rīce.
On his dagum hit gōdode georne. ⁊ God him geūðe, ꝥ hē wunode on sibbe, þā hwīle þe hē leofode. ⁊ hē dyde, swā him þearf wes, earnode þes georne. Hē ārērde Godes lof wīde. ⁊ Godes lage lufode. ⁊ folces frið bētte, swīðost þāra cyninga, þe ǣr him gewurde, be manna gemynde. ⁊ God him ēac fylste, ꝥ ciningas ⁊ eorlas georne him tō bugon. ⁊ wurden under þēodde tō þām þe hē wolde. ⁊ būtan gefeohte eal hē gewilde, þet hē sylf wolde.
Hē wearð wīde, geond þēodland, swīðe geweorðad, forþām þe hē weorðode Godes naman georne. ⁊ Godes lage smēade, oft ⁊ gelōme. ⁊ Godes lof rǣrde, wīde ⁊ sīde. ⁊ wīslīce rǣdde, oftost ā simle, for Gode. ⁊ for worulde, eall his þēode. Āne misdǣda hē dyde þēah tō swīðe. ꝥ hē ælþēodige un sida lufode. ⁊ hǣðene þēawas, innan þysan lande, gebrōhte tofæste. ⁊ ūt lændisce hider in tihte. ⁊ deoriende lēoda bespēon tō þysan earde. Ac God him ge unne, ꝥ his gōde dǣda swȳðran wearðan, þonne misdǣda. his sāwle tō gescyl'd'nesse on langsuman sȳðe.
Not in Laud (E).
[Hēr gewāt Odo arceƀ, ⁊ Sc̃e Dunstān fēng tō arceƀrice].
Not in Laud (E).
Hēr forðfērde Ælfgār cinges mǣg on Defenum, ⁊ his līc rest on Wiltūne. ⁊ Sigferð cyning hine offēoll, ⁊ his līc ligð æt Wimburnan. ⁊ þā on gēare wæs swīðe micel man cwealm, ⁊ se micela man bryne wæs on Lundene, ⁊ Paules mynster forbarn. ⁊ þȳ ilcan gēare wearð eft gestaþelad:,
On þys ilcan gēare fōr Aþelmōd mæsse prēost tō Rōme, ⁊ þǣr forð fērde. xviii kł Septemƀ:,
Hēr forðfērde Wulfstān diacon on Cilda mæssedæge, ⁊ æfter þon forð fērde Gyric mæsse prēost:,
On þys ilcan gēare fēng Aþelwold abbod tō þǣm bisceoprīce tō Wintanceastre. ⁊ hine mon gehālgode IN UIGILIA Scī Andree. wæs sunnan dæg on dæg:,
Her 'fram' Eadgar cyning to ðe biscopdome on Wintanceastra wes gecoren Sce Aðelwold. ⁊ þe arc̃biscop of Cantwarbyrig Sce Dunstan him gehalgod to biscop on þe fyrste sunnondæg of Aduent. ꝥ wæs on ·iii· kl Decemb.
On þes oðer gear syþþon he wæs gehalgod. þa makode he feola minstra. ⁊ draf út þa clerca of þe biscoprice, forþan ꝥ hi noldon nan regul healden. ⁊ sætta þær muneca. He macode þær twa abbotrice. an of muneca oðer of nunna. ꝥ wæs eall wið innan Wintanceastra. Syððan þa com he to se cyng Eadgar. bed him þet he scolde him giuen ealle þa minstre þa hæðene men hæfden ær to brocon. forði þet he hit wolde ge eadnewion. ⁊ se kyng hit bliþelice tyðode. And se biscop com þa fyrst to Élig. þær S. Æðeldrið lið. ⁊ leot macen þone mynstre. geaf hit þa his án munac Brihtnoð wæs gehaten. halgode him þa abbot, ⁊ sætte þær munecas Gode to þewian. þær hwilon wæron nun. bohte þa feola cotlif æt se king. ⁊ macode hit swyðe rice.
Syððon cōm se biscop Aðelwold tō þǣre mynstre þe wæs gehāten Medeshamstede, ðe hwīlon wæs fordōn fra hēðene folce. ne fand þǣr nān þing būton ealde weallas ⁊ wilde wuda. fand þā hīdde in þā ealde wealle writes þet Headda abb heafde ǣr gewriton, hū Wulfhere kyng ⁊ Æðelrēd his brōðor hit heafden wroht. ⁊ hu hi hit freodon wið king, ⁊ wið ƀ, ⁊ wið ealle weoruld þeudom. ⁊ hu se papa Agatho hit feostnode mid his write. ⁊ se arc̃ƀ Deus dedit. Leot wircen þa ꝥ mynstre. ⁊ sætte þær abbot se wæs gehaten Aldulf. macede þær munecas þær ær ne wæs nan þing. Com þa to þe cyng, ⁊ leot him locon þa gewrite þe ær wæron gefunden. and se kyng andswerode þa ⁊ cwed.
Ic Ædgar geate ⁊ gife todæi toforen Gode ⁊ toforen þone ærceƀ Dunstan freodom Sce Petres mynstre Medeshamstede of kyng, ⁊ of ƀ. ⁊ ealle þa þorpes þe ðærtolin. ꝥ is Æstfeld. ⁊ Dodesthorp. ⁊ Ege. ⁊ Pastun. ⁊ swa ic hit freo þet nan biscop ne haue þær nane hæse, buton se abbot of þone minstre. And ic gife þone tun þe man cleopað Vndela, mid eall þet þærtolið, ꝥ is þet man cleoped Eahtehundred. ⁊ market ⁊ toll, swa freolice ꝥ ne king ne ƀ ne eorl ne sc [y] rreue ne haue þær nane hæse. ne nan man buton se abbot ane, ⁊ þam þe he þærto sæt. And ic gife Crist ⁊ Sce Peter, ⁊ þurh þes ƀ bene Aðelwold. þas land. ꝥ is Barwe. Wermi'gtun. Æsctun. Ketering. Castra. Egleswurðe. Waltun. Wiðringtun. Ege. Thorp. ⁊ an myneter in Stanforð. Ðas land ⁊ ealla þa oðre þe lin into þe mynstre þa cwede ic scyr. þ [æt is] saca ⁊ socne. toll ⁊ team ⁊ infangenþef. Þas rihting ⁊ ealle oðre ða cweðe ic scyr Crist ⁊ S. Peter. And ic gife þa twa dæl of Witlesmere mid watres ⁊ mid wæres ⁊ feonnes. ⁊ swa þurh Merelade on an to ꝥ wæter ꝥ man cleoped Nen. ⁊ swa eastweard to Cynges dælf. And ic wille ꝥ markete beo in þe selue tun. ⁊ ꝥ nan oþer ne betwix Stanford ⁊ Huntandune. ⁊ ic wille þet þus be gifen se toll. fyrst fra Witlesmære eall to þe cinges toll of Norðmannes cros hundred. ⁊ eft ongeanward fra Witles mære þurh Merelade onan to Nen. ⁊ swa swa ꝥ wæter reonneð to Crulande. ⁊ fra Crulande to Must. ⁊ fra Must to Cynges dælf ⁊ to Witles mære. And ic wille ꝥ ealle þa freodom ⁊ ealle þa forgiuenesse þe mine forgengles geafen þet hit stande. ⁊ ic write ⁊ feostnige mid Cristes rodetacne. +.
Ð' a' andswerade se arcebiscop Dunstan of Cantwarbyrig ⁊ sæide. Ic tyðe ꝥ ealle þa þing þe her is gifen ⁊ sprecon. ⁊ ealle þa þing þe þin forgengles ⁊ min geatton. þa wille ic ꝥ hit stande. ⁊ swahwaswa hit tobrecoð. þa gife ic him Godes curs ⁊ ealra halgan ⁊ eallre hadede heafde ⁊ min. buton he cume to dædbote. ⁊ ic gife tocnawlece Sce Peter min messe hacel, ⁊ min stol, ⁊ min ræf, Criste to þeuwian. Ic Oswald arcebiscop of Eoferwic geate ealle þas worde. þurh þa halgorode þet Crist wæs on þrowod. +. Ic Aðelwold biscop blætsige ealle þe þis healdon. ⁊ ic amansumie ealle þe þis to bræcon. buton he cume to dædbote. Her wæs Ælf's'tan biscop. Aþulf ƀ. ⁊ Escwi abbot. ⁊ Osgar aƀƀ. ⁊ Æþelgar aƀƀ. ⁊ Ælfere ealdorman. Æðelwine ealdorman. Brihtnoþ. Oslac ealdorman. ⁊ feola oðre rice men. ⁊ ealle hit geatton. ⁊ ealle hit writen mid Cristes mæl. +. Ðis wæs gedon syððon ure Drihtnes acennednesse ·dcccc· lxxii · þes kinges ·xvi· gear.
Ða bohte se abbot Aldulf landes feola ⁊ manega. ⁊ godede þa ꝥ mynstre swiðe mid ealle. ⁊ wæs þær þa swa lange ꝥ se arcebiscop Oswald of Eoforwic wæs forð gewiton. ⁊ man cæs him þa to erceƀ. ⁊ man cæs þa sona oðer abbot of þe sylfe mynstre, Kenulf wæs gehaten. se wæs syððon biscop in Wintanceastre. ⁊ he macode fyrst þa wealle abutan þone mynstre. geaf hit þa 'to' nama Burch. þe ær het Medeshamstede. wæs þær swa lange ꝥ man sette him tobiscop on Wintanceastre. Þa cæs man oðer abbot of þe silue minstre. þe wæs gehaten Ælfsi. se Ælfsi wæs þa abbot syððon fiftig wintre. He nam úp Sc̃a Kyneburh ⁊ S. Kynesuið þe lægen in Castra. and S. Tibba þe læi in Rihala. ⁊ brohte heom to Burch. and offrede heom eall S. Peter on an dæi. ⁊ heold þa hwile þe he þær wæs.
Not in Laud (E).
Hēr drǣfde Ēadgār cyng þā prēostas on Ceastre of Ealdan mynstre, ⁊ of Nīwan mynstre. ⁊ of Ceortesīge. ⁊ of Middeltūne. ⁊ sette hȳ mid munecan. ⁊ hē sette Æþelgār abbod tō Nīwan mynstre tō abbode. ⁊ Ordbirht tō Ceortesīge. ⁊ Cyneweard tō Middel tūne:,
Not in Parker (A).
Hēr Þored Gunneres sunu forhergode West mōringa land. ⁊ þī ilcan gēare Ōslāc fēng tō ealdor dōme.
Not in Parker (A).
Hēr on þissum gēare Ēadgār cyng hēt ofer hergian eall Tenet land.
Not in Parker (A).
Hēr forðfērde Ēadmund æþeling.
Not in Laud (E).
[Hēr forðfērde Ēadmund æðeling. ⁊ his līc līð æt Rumesīge.]
Not in Parker (A).
Hēr wæs Ēadgār eþeling gehālgod tō cyninge on Pentecoste mæssedæi on ·v· idus Mai: þe ·xiii· gēare þe hē tō rīce fēng. æt Hātabaðum. ⁊ 'hē' wæs þā āna wana ·xxx· wintra. ⁊ sōna æfter þām se cyng ge lēadde ealle his scip here tō Lǣgeceastre. ⁊ þǣr him cōmon ongēan ·vi· cyningas. and ealle wið trȳwsodon ꝥ hī woldon efen wy [r] hton bēon on sǣ ⁊ on lande.
Not in Laud (E).
Hēr Ēadgār wæs, Engla waldend, corðre micelre, tō cyninge gehālgod. on ðǣre ealdan byrig, Acemannes ceastre. ēac hī īgbūend ōðre worde beornas Baðan nemnaþ. þǣr wæs blis micel, on þām ēadgan dæge. eallum geworden. þonne nīða bearn. nemnað ⁊ cīgað Pentecostenes dæg. þǣr wæs prēosta hēap. micel muneca ðrēat. mīne gefrēge. glēawra ge gaderod. ⁊ ðā āgangen wæs tȳn hund wintra, geteled rīmes. fram gebyrd tīde brēmes cyninges, lēohta hyrdes. būton ðǣr tō lāfe þā āgān wæs winter geteles, þæs ðe gewritu secgað. seofon ⁊ twēntig. swā nēah wæs sigora frēan. ðūsend āurnen. ðā þā ðis gelamp. ⁊ him Ēad mundes eafora hæfde. nigon ⁊ xx. nīð weorca heard. wintra on worulde. þis geworden wæs. ⁊ þā on ðām xxx · wæs ðēoden gehālgod:,
Hēr ge endode · eorðan drēamas · Ēadgār Engla cyning · cēas him ōðer lēoht · wlitig ⁊ wynsum · ⁊ þis wāce forlēt · līf þis lǣne · Nemnað lēoda bearn · men on moldan · þæne mōnað gehwǣr · in ðisse ēðel tyrf · þā þe ǣr wǣran · on rīm cræfte · rihte ge togene · Iulius mōnoð · ꝥ se geonga gewāt, on þone eahteðan dæg. Ēadgār of līfe · beorna bēah gyfa. ⁊ fēng his bearn syððan · tō cyne rīce · cild unweaxen, eorla ealdor · þām wæs Ēadweard nama. ⁊ him tīr fæst hæleð · tȳn nihtum ǣr. of Brytene gewāt. bisceop se gōda. þurh ge cyndne cræft ðām wæs Cyneweard nama:,
Ðā wæs on Myrceon, mīne gefrǣge, wīde ⁊ wel hwǣr. Waldendes lôf. āfylled on foldan. fela wearð tō drǣfed. glēawra Godes ðēowa. ꝥ wæs gnornung micel þām þe on brēostum wæg byrnende lufan Metodes ôn mōde. þā wæs mǣrða Fruma. tō swīðe forsewen. sigora Waldend. rodera Rǣdend; þā man his riht tō bræc. ⁊ þā wearð ēac ādrǣfed, dēormōd hæleð, Ōslāc of earde. ofer ȳða gewealc. ofer ganotes bæð. gamol feax hæleð. wîs ⁊ word snotor. ofer wætera ge ðring · ofer hwæles ēðel. hāma berēafod. ⁊ þā wearð æt ȳwed. uppe on roderum. steorra on staðole. þone stīðferhþe. hæleð hige glēawe. hātað wīde. cometa be naman. cræft glēawe men. wīse sōð boran. Wæs geond wer ðēode. Waldendes wracu. wīde gefrēge hungor ofer hrūsan. ꝥ eft heofona Weard gebētte, Brego engla, geaf eft blisse gehwǣm. ēgbūendra · þurh eorðan westm:,
Hēr Ēadgār ge fōr Angla reccent West Seaxena wine ⁊ Myrcene mundbora.
Cūð wæs þet wīde geond feola þēoda · ꝥ aferan Ēadmund [es] ofer ganetes bað cyningas hine wīde wurðodon sīde bugon tō cyninge swā wæs him gecynde. Næs se flota swā rang. ne se here swā strang. ꝥ on Angel cynne ǣs him ge fetede. þā hwīle þe se æþela cyning cyne stōl ge rehte.
And hēr Ēadward Ēadgāres sunu fēng tō rīce. ⁊ þā sōna on þām ilcan gēare on herfeste ætē'o'wde cometa se steorra. ⁊ cōm þā on þām eaftran gēare swīðe mycel hungor. ⁊ swȳðe mænig fealde styrunga geond Angel cyn. ⁊ Ælfere ealdorman hēt tōwurpon swȳðe manig munuc līf þe Ēadgār cyng hēt ǣr þone hālgan biscop Aðelwold ge staðelian. ⁊ on þām tīman wæs ēac Ōslāc se mǣra eorl geūtod of Angelcynne.
Hēr wearð Ēadweard cyning ofslegen. On þis ylcan gēare fēng Æðelrēd æðeling his brōðor tō rīce.
Hēr on þissum gēare ealle þā yldestan Angel cynnes witan ge fēollan æt Calne of ānre up flōran. būtan se hālga Dunstān arcebiscop āna æt stōd uppon ānum bēame. ⁊ sume þǣr swīðe ge brocode wǣron. ⁊ sume hit ne ge dȳgdan mid þām līfe.
Not in Parker (A).
Hēr wæs Ēadward cyng of slagen on ǣfentīde æt Corfes geate on ·xv· ꝁ Apr̃. ⁊ hine man be byrigde æt Wærham būtan ǣlcum cyne licum wurðscipe.
Ne wearð Angel cynne nān wærsa dǣd ge dōn, þonne þēos wæs · syððon hī ǣrest Bryton land ge sōhton. Men hine of myrðrodon. ac God hine mǣrsode. Hē wæs on līfe eorðlic cing. hē is nū æfter dēaðe heofonlic sanct. Hine nolden his eorðlican māgas wrecan. ac hine hafað his heofonlica fæder swīðe ge wrecen. þā eorðlican banan woldon his ge mynd on erðan ādīlgian · Ac se uplica Wrecend · hafað his ge mynd · on heofenum. ⁊ on eorðan tō bræd. þā þe nolden ǣr tō his libbendum līchaman onbūgan. þā nū ēadmōdlīce · on cnēowum ābūgað tō his dǣdum bānum. Nū wē magon on gytan · ꝥ manna wīsdōm, ⁊ smēagunga, ⁊ heore rǣdas syndon nāhtlice on gēan Godes ge þeaht.
And hēr fēng Æðelrēd tō rīce. ⁊ hē wæs æfter þām swīðe hrædlīce mid mycclum gefēan Angel cynnes witon ge hālgod tō cyninge æt Cyningestūn.
Not in Parker (A).
Hēr on þisum gēare Ælfere ealdorman ge fette þes hālgan cyninges līchaman æt Wærham. ⁊ ge ferode hine mid mycclum wurðscipe tō Scæftesbyrig.
Not in Parker (A).
Hēr cōmon ǣrest þā ·vii· scipu and ge hergoden Hamtūn.
Hēr forðfērde Ælfhere ealdorman.
Hēr for'ð'fērde Ælfere ealdorman. ⁊ fēng Ælfrīc tō þām ilcan ealdordōme.
Hēr forðfērde se wellwillenda bisceop Aðelwold, ⁊ sēo hālgung þæs æfter filgendan bisceopes Ælfhēages, sēðe ōðran naman wæs gecīged Godwine. wæs xiiii · kł Nōū. ⁊ hē gesæt þone bisceopstōl an þāra twēgra apostola dæge Simonis ⁊ Iudæ. on Wintanceastre.
Hēr forðfērde se hālga biscop Aðelwold muneca fæder. ⁊ hēr wæs Ēadwine tō abƀ ge hālgod tō Abbandūne.
Not in Parker (A).
Hēr Ælfrīc ealdorman wæs ūt ādrǣfed.
Not in Parker (A).
Hēr se cyning fordyde þet biscoprīce æt Hrofeceastre. And hēr cōm ǣrest se myccla yrfcwalm on Angelcyn.
Not in Parker (A).
Hēr Wecedport wes ge hergod.
Not in Parker (A).
Hēr wæs Goda se Dæ [fe] nisca þægn ofslagen ⁊ mycel wæl mid him. ⁊ hēr Dunstān se hālga arcƀ forlēt þis līf. ⁊ gefērde ꝥ heofonlice. And Æðelgār ƀ fēng æfter him tō arcƀstol. ⁊ hē lītle hwīle æfter þām leofode, būtan ān gēar. ⁊ ·iii· mōnðas.
Not in Parker (A).
Hēr Ǣdwine abƀ forðfērde. ⁊ fēng Wul'f'gār tō. ⁊ hēr Sīrīc wæs gehādod tō arceƀ.
Not in Parker (A).
Hēr wæs G [ypes] wīc ge hergod. ⁊ æfter þām swīðe raðe wæs Brihtnōð ealdorman of slægen æt Mǣldūne. ⁊ on þām gēare man ge rǣdde ꝥ man geald ǣrest gafol Deniscan mannum. for þām mycclan brogan þe hī worhtan be þām sǣ riman. ꝥ wæs ǣrest ·x· þūsend punda. þæne rǣd ge rǣdde Sīrīc arceƀ.
Not in Parker (A).
Hēr Ōswald se ēadiga arceƀ forlēt þis līf. ⁊ ge fērde ꝥ heofonlice. ⁊ Æðelwine ealdorman ge fōr on þām ilcan gēare. Ðā ge rǣdde se cyng ⁊ ealle his witan ꝥ man ge gaderode þā scipu þe āhtes wǣron tō Lundenbyrig. ⁊ se cyng þā betǣhte þā fyrde tō lǣdene Ealfrīce ealdorman. ⁊ Þorode eorl. ⁊ Ælfstāne ƀ. ⁊ Æscwīge ƀ. ⁊ sceoldan cunnian gif hī muhton þone here āhwǣr ūtene betræppen. Ðā sende se ealdorman Ælfrīc. ⁊ hēt warnian þone here. ⁊ þā on þēre nihte ðe hī on ðone dæi tō gædere cumon sceoldon. ðā scēoc hē on niht fram þǣre fyrde him sylfum tō mycclum bismore. ⁊ se here þā æt bærst, būton ān scip þǣr man ofslōh. ⁊ þā ge mǣtte se here ðā scipu of ĒastEnglum ⁊ of Lunden. ⁊ hī ðǣr ofslōgon mycel wæl. ⁊ ꝥ scip ge nāmon eall ge wǣpnod ⁊ ge wǣdod þe se ealdorman on wæs. ⁊ Ðā æfter Ōswaldes arcƀ forð sīðe. fēng Ealdulf abƀ of Burch tō Eoferwīc stōle and tō Wigera ceastre. ⁊ Kēnulf tō þām abbotrīce æt Burch.
Hēr on ðissum gēare cōm Unlaf mid þrīm ⁊ hund nigentigon scipum tō Stāne, ⁊ forhergedon ꝥ on ȳtan, ⁊ fōr ðā ðanon tō Sandwīc, ⁊ swā ðanon tō Gipes wīc, ⁊ ꝥ eall ofer ēode, ⁊ swā tō Mǣldune; ⁊ him þǣr cōm tōgēanes Byrhtnōð ealdorman mid his fyrde, ⁊ him wið gefeaht. ⁊ hȳ þone ealdorman þǣr ofslōgon, ⁊ wælstōwe geweald āhtan. ⁊ him man nam syððan frið wið, ⁊ hine nam se cing syððan tō bisceopes handa. [ðurh Sīrīces lāre Cantware biscpes, ⁊ Ælfēages Wincæstre ƀ.]
Hēr on ðissum gēare wæs Bæbbanburh tō brocon. ⁊ mycel here hūðe þǣr ge numen, ⁊ æfter þām cōm tō Humbran mūðe se here. ⁊ þǣr mycel yfel ge wrohtan ǣgðer ge on Lindesīge ge on Norðhymbran. Þā ge gaderode man swīðe mycele fyrde. ⁊ þā hī tō gædere gān sceoldan. þā on stealdon þā heretogan ǣrest þone flēam. ꝥ wæs Fræna. ⁊ Godwine. ⁊ Friðegist. On þysum ilcan gēare hēt se cyng āblendan Ælfgār Ælfrīces sunu ealdormannes.