Not in Laud (E).
Her Æþelstan cyning forð ferde on ·vi· kł NŌV'. ymbe ·xli· wintra butan anre niht þæs þe Ælfred cyning forþ ferde; ⁊ Eadmund æþeling feng to rice. ⁊ he wæs þa ·xviii· wintre. ⁊ Æþelstan cyning rixade ·xiiii· gear ⁊ ·x· wucan. [þa was Wulfelm arceƀiscop on Cañt.]
Her Eadmund cyning, Engla þeoden, maga mundbora, Myrce ge eode, dyre dæd fruma, swa Dor scadeþ, Hwítan wylles geat. ⁊ Humbra éa, brada brim stream; burga fife, Ligora ceaster · ⁊ Lindcylene, ⁊ Snotingaham, swylce Stanford eác · [⁊] Deora by, Dæne wæran ær, under Norðmannum, nyde gebegde ón hæþenra hæfte clommum, lange þraga; oþ hie alysde eft, for his weorþscipe, wiggendra hleo, afera Eadweardes · Eadmund cyning ónfeng Ānlafe cyninge æt fulluhte. ⁊ þy ylecan geare ymb tela micel fæc he ónfeng Rægenolde cyninge æt bisceopes handa . . . . . . . . [arcebisceop.]
Her Anlaf cyning forðferde. Et Ricardus uetus suscepit regnum. et regnauit añ ·lii·
Not in Laud (E).
[[Her Eadmund cing S. Dunstane Glæs] tingeberig be tæhte ðær he syððan ærest abbud wearð.]
Her Eadmund cyning ge eode eal Norþhymbra land him to ge wealdan, ⁊ aflymde ut twegen cyningas, Ānlaf Syhtrices sunu, ⁊ Rægenald Guðferþes sunu.
Her Ædmund cyning ge eode ealle Norðhymbre. ⁊ 'ut aflymde twegen cyneborene mæn Anlaf ⁊ Regnald.
Her Eadmund cyning ofer hergode eal Cumbra land. ⁊ hit let to eal Malculme Scotta cyninge. ón ꝥ gerad ꝥ he wære his midwyrhta ægþer ge ón sæ ge ón lande.
Her Ædmund cyning oferhergode eall Cumbra land.
Not in Laud (E).
Her Eadmund cyning forðferde ón Sc̃s Agustinus mæsse dæge. ⁊ he hæfde rice seofoþe healf gear; ⁊ þa feng Ead red æþeling his broþor to rice, ⁊ gerad eal Norþhymbra land him to ge wealde. ⁊ Scottas him aþas sealdan, ꝥ hie woldan eal ꝥ he wolde.
Not in Parker (A).
Her Ædmund cyning wearð ofstungen. ⁊ feng Ædred his broðor to rice. ⁊ he sona gerád eall Norðhymbra land him to ge wealde. ⁊ Scottas him aðas sworon ꝥ hi eall wolden ꝥ he wolde.
Not in Parker (A).
Her com Anlaf Cwiran on Norðhymbra land.
Not in Laud (E).
Her forþferde Ælfheah Wintan ceastres bisc̃ on Sc̃e Gregories mæsse dæg.
Not in Parker (A).
Her Norðhymbre fordrifan Anlaf cyning. ⁊ under fengon Yric Haroldes sunu.
Not in Parker (A).
Her Norðhymbre fordrifon Yric. ⁊ Ædred feng to Norðhymbra rice.
Her forþ ferde Eadred cining. on Sc̃e Clementes mæsse dæg ón Frome, ⁊ he rixsade teoþe healf gear; ⁊ þa feng Eadwig to rice. Eadmundes sunu cinges.
Her Ædred cyning forðferde. ⁊ feng Eadwig to rice Eadmundes sunu.
[⁊ aflæmde Sc̃e Dunstan ut oflande.]
Her forðferde Wulstan arceb.
Not in Laud (E).
Her forðferde Eadwig cyng on kł Octobr̃. ⁊ Eadgar his broðor feng to rice:.
[Her he sæn'te efter Sc̃e Dunstane. ⁊ gæf him ðrice on Wigracæstre, ⁊ ðær æfter ꝥ ð rice on Lundene.]
Her Eadwig cyning forðferde. ⁊ feng Eadgar his broðor to rice.
On his dagum hit godode georne. ⁊ God him geuðe, ꝥ he wunode on sibbe, þa hwile þe he leofode. ⁊ he dyde, swa him þearf wes, earnode þes georne. He arerde Godes lof wide. ⁊ Godes lage lufode. ⁊ folces frið bette, swiðost þara cyninga, þe ær him gewurde, be manna gemynde. ⁊ God him eac fylste, ꝥ ciningas ⁊ eorlas georne him to bugon. ⁊ wurden under þeodde to þam þe he wolde. ⁊ butan gefeohte eal he gewilde, þet he sylf wolde.
He wearð wide, geond þeodland, swiðe geweorðad, forþam þe he weorðode Godes naman georne. ⁊ Godes lage smeade, oft ⁊ gelome. ⁊ Godes lof rærde, wide ⁊ side. ⁊ wislice rædde, oftost á simle, for Gode. ⁊ for worulde, eall his þeode. Ane misdæda he dyde þeah to swiðe. ꝥ he ælþeodige un sida lufode. ⁊ hæðene þeawas, innan þysan lande, gebrohte tofæste. ⁊ ut lændisce hider in tihte. ⁊ deoriende leoda bespeon to þysan earde. Ac God him ge unne, ꝥ his gode dæda swyðran wearðan, þonne misdæda. his sawle to gescyl'd'nesse on langsuman syðe.
Not in Laud (E).
Her gewat Odo arceƀ, ⁊ Sce Dunstan feng to arceƀrice.
Not in Laud (E).
Her forðferde Ælfgar cinges mæg on Defenum, ⁊ his lic rest on Wiltune. ⁊ Sigferð cyning hine offeoll, ⁊ his lic ligð æt Wimburnan. ⁊ þa on geare wæs swiðe micel man cwealm, ⁊ se micela man bryne wæs on Lundene, ⁊ Paules mynster forbarn. ⁊ þy ilcan geare wearð eft gestaþelad:,
On þys ilcan geare for Aþelmod mæsse preost to Rome, ⁊ þær forð ferde. xviii kł Septemƀ:,
Her forðferde Wulfstan diacon on Cilda mæssedæge, ⁊ æfter þon forð ferde Gyric mæsse preost:,
On þys ilcan geare feng Aþelwold abbod to þæm bisceoprice to Wintanceastre. ⁊ hine mon gehalgode IN UIGILIA Scī Andree. wæs sunnan dæg on dæg:,
Her 'fram' Eadgar cyning to ðe biscopdome on Wintanceastra wes gecoren Sce Aðelwold. ⁊ þe arcbiscop of Cantwarbyrig Sce Dunstan him gehalgod to biscop on þe fyrste sunnondæg of Aduent. ꝥ wæs on ·iii· kl Decemb. On þes oðer gear syþþon he wæs gehalgod. þa makode he feola minstra. ⁊ draf út þa clerca of þe biscoprice, forþan ꝥ hi noldon nan regul healden. ⁊ sætta þær muneca. He macode þær twa abbotrice. an of muneca oðer of nunna. ꝥ wæs eall wið innan Wintanceastra. Syððan þa com he to se cyng Eadgar. bed him þet he scolde him giuen ealle þa minstre þa hæðene men hæfden ær to brocon. forði þet he hit wolde ge eadnewion. ⁊ se kyng hit bliþelice tyðode. And se biscop com þa fyrst to Élig. þær S. Æðeldriðliðgeoslot macen þone mynstre. geaf hit þa his án munac Brihtnoð wæs gehaten. halgode him þa abbot, ⁊ sætte þær munecas Gode to þewian. þær hwilon wæron nun. bohte þa feola cotlif æt se king. ⁊ macode hit swyðe rice. Syððon com se biscop Aðelwold to þære mynstre þe wæs Burch. gehaten Medeshamstede, ðe hwilon wæs fordon fra heðene folce. ne fand þær nan þing buton ealde weallas ⁊ wilde wuda. fand þa hidde in þa ealde wealle writes þet Headda abb heafde ær gewriton, hu Wulfhere kyng ⁊ Æðelred his broðor hit heafden wroht. ⁊ hu hi hit freodon wið king, ⁊ wið ƀ, ⁊ wið ealle weoruld þeudom. ⁊ hu se papa Agatho hit feostnode mid his write. ⁊ se arceƀ Deus dedit. Leot wircen þa ꝥ mynstre. ⁊ sætte þær abbot se wæs gehaten Aldulf. macede þær munecas þær ær ne wæs nan þing. Com þa to þe cyng, ⁊ leot him locon þa gewrite þe ær wæron gefunden. and se kyng andswerode þa ⁊ cwed. Ic Ædgar geate ⁊ gife todæi toforen Gode ⁊ toforen þone ærceƀ Dunstan freodom Sce Petres mynstre Medeshamstede of kyng, ⁊ of ƀ. ⁊ ealle þa þorpes þe ðærtolin. ꝥ is Æstfeld. ⁊ Dodesthorp. ⁊ Ege. ⁊ Pastun. ⁊ swa ic hit freo þet nan biscop ne haue þær nane hæse, buton se abbot of þone minstre. And ic gife þone tun þe man cleopað Vndela, mid eall þet þærtolið, ꝥ is þet man cleoped Eahtehundred. ⁊ market ⁊ toll, swa freolice ꝥ ne king ne ƀ ne eorl ne sc [y] rreue ne haue þær nane hæse. ne nan man buton se abbot ane, ⁊ þam þe he þærto sæt. And ic gife Crist ⁊ Sce Peter, ⁊ þurh þes ƀ bene Aðelwold. þas land. ꝥ is Barwe. Wermi'gtun. Æsctun. Ketering. Castra. Egleswurðe. Waltun. Wiðringtun. Ege. Thorp. ⁊ an myneter in Stanforð. Ðas land ⁊ ealla þa oðre þe lin into þe mynstre þa cwede ic scyr. ꝥ [æt is] saca ⁊ socne. toll ⁊ team ⁊ infangenþef. Þas rihting ⁊ ealle oðre ða cweðe ic scyr Crist ⁊ S. Peter. And ic gife þa twa dæl of Witlesmere mid watres ⁊ mid wæres ⁊ feonnes. ⁊ swa þurh Merelade on an to ꝥ wæter ꝥ man cleoped Nen. ⁊ swa eastweard to Cynges dælf. And ic wille ꝥ markete beo in þe selue tun. ⁊ ꝥ nan oþer ne betwix Stanford ⁊ Huntandune. ⁊ ic wille þet þus be gifen se toll. fyrst fra Witlesmære eall to þe cinges toll of Norðmannes cros hundred. ⁊ eft ongeanward fra Witles mære þurh Merelade onan to Nen. ⁊ swa swa ꝥ wæter neð to Crulande. ⁊ fra Crulande to Must. ⁊ fra Must to Cynges dælf ⁊ to Witles mære. And ic wille ꝥ ealle þa freodom ⁊ ealle þa forgiuenesse þe mine forgengles geafen þet hit stande. ⁊ ic write ⁊ feostnige mid Cristes rodetacne. +.
Ð' a' andswerade se arcebiscop Dunstan of Cantwarbyrig ⁊ sæide. Ic tyðe ꝥ ealle þa þing þe her is gifen ⁊ sprecon. ⁊ ealle þa þing þe þin forgengles ⁊ min geatton. þa wille ic ꝥ hit stande. ⁊ swahwaswa hit tobrecoð. þa gife ic him Godes curs ⁊ ealra halgan ⁊ eallre hadede heafde ⁊ min. buton he cume to dædbote. ⁊ ic gife tocnawlece Sce Peter min messe hacel, ⁊ min stol, ⁊ min ræf, Criste to þeuwian. Ic Oswald arcebiscop of Eoferwic geate ealle þas worde. þurh þa halgorode þet Crist wæs on þrowod. +. Ic Aðelwold biscop blætsige ealle þe þis healdon. ⁊ ic amansumie ealle þe þis to bræcon. buton he cume to dædbote. Her wæs Ælf's'tan biscop. Apulf ƀ. ⁊ Escwi abbot. ⁊ Osgar aƀƀ. ⁊ Æþelgar aƀƀ. ⁊ Ælfere ealdorman. Æðelwine ealdorman. Brihtnoþ. Oslac ealdorman. ⁊ feola oðre rice men. ⁊ ealle hit geatton. ⁊ ealle hit writen mid Cristes mæl. +. Ðis wæs gedon syððon ure Drihtnes acennednesse ·dcccc· lxxii · þes kinges ·xvi· gear.
Ða bohte se abbot Aldulf landes feola ⁊ manega. ⁊ godede þa ꝥ mynstre swiðe mid ealle. ⁊ wæs þær þa swa lange ꝥ se arcebiscop Oswald of Eoforwic wæs forð gewiton. ⁊ man cæs him þa to erceƀ. ⁊ man cæs þa sona oðer abbot of þe sylfe mynstre, Kenulf wæs gehaten. se wæs syððon biscop in Wintanceastre. ⁊ he macode fyrst þa wealle abutan þone mynstre. geaf hit þa 'to' nama Burch. þe ær het Medeshamstede. wæs þær swa lange ꝥ man sette him tobiscop on Wintanceastre. Þa cæs man oðer abbot of þe silue minstre. þe wæs gehaten Ælfsi. se Ælfsi wæs þa abbot syððon fiftig wintre. He nam úp Sc̃a Kyneburh ⁊ S. Kynesuið þe lægen in Castra. and S. Tibba þe læi in Rihala. ⁊ brohte heom to Burch. and offrede heom eall S. Peter on an dæi. ⁊ heold þa hwile þe he þær wæs.
Not in Laud (E).
Her dræfde Eadgar cyng þa preostas on Ceastre of Ealdan mynstre, ⁊ of Niwan mynstre. ⁊ of Ceortesige. ⁊ of Middeltune. ⁊ sette hy mid munecan. ⁊ he sette Æþelgar abbod to Niwan mynstre to abbode. ⁊ Ordbirht to Ceortesige. ⁊ Cyneweard to Middel tune.
Not in Parker (A).
Her þored Gunneres sunu forhergode West moringa land. ⁊ þi ilcan geare Oslac feng to ealdor dome.
Not in Parker (A).
Her on þissum geare Eadgar cyng het ofer hergian eall Tenet land.
Not in Parker (A).
Her forðferde Eadmund æþeling.
Not in Laud (E).
[Her forðferde Eadmund æðeling. ⁊ his lic lið æt Rumesige.]
Not in Parker (A).
Her wæs Eadgar eþeling gehalgod to cyninge on Pentecoste mæssedæi on ·v· idus Mai: þe ·xiii· geare þe he to rice feng. æt Hatabaðum. ⁊ 'he' wæs þa ana wana ·xxx· wintra. ⁊ sona æfter þam se cyng ge leadde ealle his scip here to Lægeceastre. ⁊ þær him comon ongean ·vi· cyningas. and ealle wið trywsodon ꝥ hi woldon efen wy [r] hton beon on sæ ⁊ on lande.
Not in Laud (E).
Her Eadgar wæs, Engla waldend, corðre micelre, to cyninge gehalgod. on ðære ealdan byrig, Acemannes ceastre. eac hi igbuend oðre worde beornas Baðan nemnaþ. þær wæs blis micel, on þam eadgan dæge. eallum geworden. þonne niða bearn. nemnað ⁊ cigað Pentecostenes dæg. þær wæs preosta heap. micel muneca ðreat. mine gefrege. gleawra ge gaderod. ⁊ ða agangen wæs tyn hund wintra, geteled rimes. fram gebyrd tide bremes cyninges, leohta hyrdes. buton ðær to lafe þa agan wæs winter geteles, þæs ðe gewritu secgað. seofon ⁊ twentig. swa neah wæs sigora frean. ðusend áurnen. ða þa ðis gelamp. ⁊ him Ead mundes eafora hæfde. nigon ⁊ xx. nið weorca heard. wintra on worulde. þis geworden wæs. ⁊ þa on ðam xxx · wæs ðeoden gehalgod:,
Her ge endode · eorðan dreamas · Eadgar Engla cyning · ceas him oðer leoht · wlitig ⁊ wynsum · ⁊ þis wace forlet · lif þis læne · Nemnað leoda bearn · men on moldan · þæne monað gehwær · in ðisse eðel tyrf · þa þe ær wæran · on rim cræfte · rihte ge togene · Iulius monoð · ꝥ se geonga gewât, on þone eahteðan dæg. Eadgar of life · beorna beah gyfa. ⁊ feng his bearn syððan · tó cyne rice · cild ûnweaxen, eorla ealdor · þam wæs Eadweard nama. ⁊ him tir fæst hæleð · tyn nihtum ær. of Brytene gewât. bisceop se goda. þurh ge cyndne cræft ðam wæs Cyneweard nama:
Ða wæs on Myrceon, mine gefræge, wide ⁊ wel hwær. Waldendes lôf. afylled on foldan. fela wearð tó dræfed. gleawra Godes ðeowa. ꝥ wæs gnornung micel þam þe on breostum wæg byrnende lufan Metodes ôn mode. þa wæs mærða Fruma. to swiðe forsewen. sigora Waldend. rodera Rædend; þa man his riht tó bræc. ⁊ þa wearð eac âdræfed, deormod hæleð, Oslac of earde. ofer yða gewealc. ofer ganotes bæð. gamol feax hæleð. wîs ⁊ word snotor. ofer wætera ge ðring · ofer hwæles eðel. hama bereafod. ⁊ þa wearð æt ywed. uppe on roderum. steorra on staðole. þone stiðferhþe. hæleð hige gleawe. hatað wide. cométa be naman. cræft gleawe men. wise soð boran. Wæs geond wer ðeode. Waldendes wracu. wide gefrege hungor ofer hrusan. ꝥ eft heofona Weard gebette, Brego engla, geaf eft blisse gehwæm. egbuendra · þurh eorðan westm:
Her Eadgar ge for Angla reccent West Seaxena wine ⁊ Myrcene mundbora.
Cuð wæs þet wide geond feola þeoda · ꝥ aferan Eadmund [es] ofer ganetes bað cyningas hine wide wurðodon side bugon to cyninge swa wæs him gecynde. Næs se flota swa rang. ne se here swa strang. ꝥ on Angel cynne æs him ge fetede. þa hwile þe se æþela cyning cyne stol ge rehte.
And her Eadward Eadgares sunu feng to rice. ⁊ þa sona on þam ilcan geare on herfeste æteowde cometa se steorra. ⁊ com þa on þam eaftran geare swiðe mycel hungor. ⁊ swyðe mænig fealde styrunga geond Angel cyn. * ⁊ Ælfere ealdorman het towurpon swyðe manig munuc lif þe Eadgar cyng het ær þone halgan biscop Aðelwold ge staðelian. ⁊ on þam timan wæs eac Oslac se mæra eorl geutod of Angelcynne.
Her wearð Eadweard cyning ofslegen. On þis ylcan geare feng Æðelred æðeling his broðor to rice.
Her on þissum geare ealle þa yldestan Angel cynnes witan ge feollan æt Cálne of anre up floran. butan se halga Dunstan arceƀiscop ana æt stod uppon anum beame. ⁊ sume þær swiðe ge brocode wæron. ⁊ sume hit ne ge dygdan mid þam life.
Not in Parker (A).
Her wæs Eadward cyng of slagen on æfentide æt Corfes geate on ·xv· k Aprr. ⁊ hine man be byrigde æt Wærham butan ælcum cyne licum wurðscipe.
Ne wearð Angel cynne nan wærsa dæd ge don, þonne þeos wæs · syððon hi ærest Bryton land ge sohton. Men hine of myrðrodon. ac God hine mærsode. He wæs on life eorðlic cing. he is nu æfter deaðe heofonlic sanct. Hine nolden his eorðlican magas wrecan. ac hine hafað his heofonlica fæder swiðe ge wrecen. þa eorðlican banan woldon his ge mynd on erðan adilgian · Ac se uplica Wrecend · hafað his ge mynd · on heofenum. ⁊ on eorðan to bræd. þa þe nolden ær to his libbendum lichaman onbugan. þa nu eadmodlice · on cneowum abugað to his dædum banum. Nu we magon on gytan · ꝥ manna wisdom, ⁊ smeagunga, ⁊ heore rædas syndon nahtlice on gean Godes ge þeaht.
And her feng Æðelred to rice. ⁊ he wæs æfter þam swiðe hrædlice mid mycclum gefean Angel cynnes witon ge halgod to cyninge æt Cyningestun.
Not in Parker (A).
Her on þisum geare Ælfere ealdorman ge fette þes halgan cyninges lichaman æt Wærham. ⁊ ge ferode hine mid mycclum wurðscipe to Scæftesbyrig.
Not in Parker (A).
Her comon ærest þa ·vii· scipu and ge hergoden Hamtun.
Her forðferde Ælfhere ealdorman.
Her forðferde Ælfere ealdorman. ⁊ feng Ælfric to þam ilcan ealdordome.
Her forðferde se wellwillenda bisceop Aðelwold, ⁊ seo halgung þæs æfter filgendan bisceopes Ælfheages, seðe oðran naman wæs geciged Godwine. wæs xiiii · kł Nov. ⁊ he gesæt þone bisceopstol an þara twegra apostola dæge Simonis ⁊ Iudæ. on Wintanceastre.
Her forðferde se halga biscop Aðelwold muneca fæder. ⁊ her wæs Eadwine to abb ge halgod to Abbandune.
Not in Parker (A).
Her Ælfric ealdorman wæs ut adræfed.
Not in Parker (A).
Her se cyning fordyde þet biscoprice æt Hrofeceastre. And her com ærest se myccla yrfcwalm on Angelcyn.
Not in Parker (A).
Her Wecedport wes ge hergod.
Not in Parker (A).
Her wæs Goda se Dæ [fe] nisca þægn ofslagen ⁊ mycel wæl mid him. ⁊ her Dunstan se halga arcb forlet þis lif. ⁊ geferde ꝥ heofonlice. And Æðelgar b feng æfter him to arcbstol. ⁊ he litle hwile æfter þam leofode, butan an gear. ⁊ ·iii· monðas.
Not in Parker (A).
Her Ædwine abb forðferde. ⁊ feng Wulfgar to. ⁊ her Siric wæs gehadod to arceb.
Not in Parker (A).
Her wæs G [ypes] wic ge hergod. ⁊ æfter þam swiðe raðe wæs Brihtnoð ealdorman of slægen æt Mældune. ⁊ on þam geare man ge rædde ꝥ man geald ærest gafol Deniscan mannum. for þam mycclan brogan þe hi worhtan be þam sæ riman. ꝥ wæs ærest ·x· þusend punda. þæne ræd ge rædde Siric arceƀ.
Not in Parker (A).
Her Oswald se eadiga arceƀ forlet þis lif. ⁊ ge ferde ꝥ heofonlice. ⁊ Æðelwine ealdorman ge for on þam ilcan geare. Ða ge rædde se cyng ⁊ ealle his witan ꝥ man ge gaderode þa scipu þe ahtes wæron to Lundenbyrig. ⁊ se cyng þa betæhte þa fyrde to lædene Ealfrice ealdorman. ⁊ þorode eorl. ⁊ Ælfstane ƀ. ⁊ Æscwige ƀ. ⁊ sceoldan cunnian gif hi muhton þone here ahwær utene betræppen. Ða sende se ealdorman Ælfric. ⁊ het warnian þone here. ⁊ þa on þere nihte ðe hi on ðone dæi to gædere cumon sceoldon. ða sceoc he on niht fram þære fyrde him sylfum to mycclum bismore. ⁊ se here þa æt bærst, buton an scip þær man ofsloh. ⁊ þa ge mætte se here ða scipu of EastEnglum ⁊ of Lunden. ⁊ hi ðær ofslogon mycel wæl. ⁊ ꝥ scip ge namon eall ge wæpnod ⁊ ge wædod þe se ealdorman on wæs. ⁊ Ða æfter Oswaldes arcƀ forð siðe. feng Ealdulf abƀ of Burch to Eoferwic stole and to Wigera ceastre. ⁊ Kenulf to þam abbotrice æt Burch.
Her on ðissum geare com Unlaf mid þrim ⁊ hund nigentigon scipum to Stane, ⁊ forhergedon ꝥ ón ytan, ⁊ for ða ðanon to Sandwic, ⁊ swa ðanon to Gipes wic, ⁊ ꝥ eall ofer eode, ⁊ swa tó Mældune; ⁊ him þær com togeanes Byrhtnoð ealdorman mid his fyrde, ⁊ him wið gefeaht. ⁊ hy þone ealdorman þær ofslogon, ⁊ wælstowe geweald ahtan. ⁊ him man nam syððan frið wið, ⁊ hine nam se cing syððan to bisceopes handa. [ðurh Sirices lare Cantware biscpes, ⁊ Ælfeages Wincæstre ƀ.]
Her on ðissum geare wæs Bæbbanburh to brocon. ⁊ mycel here huðe þær ge numen, ⁊ æfter þam com to Humbran muðe se here. ⁊ þær mycel yfel ge wrohtan ægðer ge on Lindesige ge on Norðhymbran. Þa ge gaderode man swiðe mycele fyrde. ⁊ þa hi to gædere gan sceoldan. þa on stealdon þa heretogan ærest þone fleam. ꝥ wæs Fræna. ⁊ Godwine. ⁊ Friðegist. On þysum ilcan geare het se cyng ablendan Ælfgar Ælfrices sunu ealdormannes.