Bókastaðir

Hēr gefōr Ælfrēd Aþulfing, syx nihtum ǣr ealra hāligra mæssan; Se wæs cyning ofer eall Ongelcyn būtan ðǣm dǣle þe under Dena onwalde wæs, ⁊ hē hēold þæt rīce ōþrum healfum lǣs þe ·xxx· wintra. ⁊ þā fēng Ēadweard his sunu tō rīce.

Þā gerād Æðelwald his fædran sunu. þone hām æt Winburnan, ⁊ æt Twēoxnēam būtan ðæs cyninges lēafe ⁊ his witena. Þā rād se cyning mid firde ð hē gewīcode æt Baddanbyrig wið Winburnan, ⁊ Æðelwald sæt binnan þǣm hām mid þǣm monnum þe him tōgebugon, ⁊ hæfde ealle þā geatu forworht intō him, ⁊ sǣde þæt hē wolde ōðer oððe þǣr libban oððe þǣr licgan. Þā under þǣm þā bestæl hē hine on niht on weg, ⁊ gesōhte þone here on Norðhymbrum, ⁊ se cyng hēt rīdan æfter, ⁊ þā ne mehte hine mon of rīdan; Þā berād mon þæt wīf þæt hē hæfde ǣr genumen būtan cynges lēafe ⁊ ofer þāra biscopa gebod, forðon ðe hēo wæs ǣr tō nunnan gehālgod. ⁊ on þys ilcan gēre forð fērde Æþerēd. wæs on Defenum ealdormon, fēower wucum ǣr Ælfrēd cyning.

Hēr gefōr Ælfrēd cyning ·vii· kl NOVEmB. ⁊ hē hēold þet rīce ·xxviii· wintra ⁊ healf gēar. ⁊ þā fēng Ǣdward his sunu [tō] rīce.

Not in Laud (E).

Hēr gefōr Aþulf ealdormon Ealhswīðe brōðor ⁊ Uirgilius abbud of Scottum. ⁊ Grimbald mæsse prēost. [viii idus Iulii.]

Not in Laud (E).

Hēr cōm Æðelwald hider ofer sǣ mid þǣm flotan þe hē mid wæs on Ēast Sexe.

Not in Laud (E).

Hēr āspōn Æðelwald þone here on Ēast Englum tō unfriðe, þæt hīe hergodon ofer Mercnaland oð hīe cōmon tō Creccagelāde, ⁊ fōron þǣr ofer Temese, ⁊ nāmon ǣgðer ge on Bradene ge ðǣr ymbūtan eall þæt hīe gehentan mehton, ⁊ wendan ðā eft hāmweard; Þā fōr Ēadweard cyning æfter, swā hē raðost mehte his fird gegadrian, ⁊ oferhergade eall hira land betwuh dīcum ⁊ Wusan. eall oð ðā fennas norð; Þā hē ðā eft þonan ūt faran wolde, þā hēt hē bēodan ofer ealle þā fird þæt hīe fōron ealle ūt æt somne. Þā æt sǣton ðā Centiscan þǣr be æftan ofer his bebod, ⁊ seofon ǣrend racan hē him hæfde tō āsend. Þā 'be'fōr se here hīe ðǣr, ⁊ hīe ðǣr gefuhton, ⁊ þǣr wearð Sigulf ealdormon ofslægen, ⁊ Sigelm ealdormon, ⁊ Ēadwold cynges ðegen, ⁊ Cēnulf abbod, ⁊ Sigebreht Sigulfes sunu, ⁊ Ēadwald Accan sunu, ⁊ monige ēac him, þēh ic ðā ge ðungnestan nemde. ⁊ on ðāra Deniscena healfe wearð ofslægen Eohric hira cyng, ⁊ Æðelwald æðeling ðe hine tō þǣm unfriðe ge spōn, ⁊ Byrht sige Beornōðes sunu æðelinges. ⁊ Ysopa hold, ⁊ Ōs cytel hold, ⁊ swīðe monige ēac him, þe wē nū genemnan ne magon; ⁊ þǣr wæs on gehwæðre hond micel wæl ge slægen, ⁊ þāra Deniscena þǣr wearð mā ofslægen, þēh hīe wæl stōwe gewald āhton.

⁊ Ealh swīð gefōr þȳ ilcan gēare.

Hēr on þys gēare gefōr Ælfrēd, wæs æt Baðum gerēfa. ⁊ on þǣm ilcan gēre mon fæstnode þone frið æt Yttinga forda, swā swā Ēadweard cyng gerǣdde, ǣgðer wið Ēast Engle ge wið Norð hymbre.

Hēr ge festnode Ēadward cyng for nēode frið ǣgðer ge wið ĒastEngla here. ge wið Norðhymbre.

Not in Laud (E).

Hēr gefōr Denulf, se wæs on Winte ceastre biscop;

Hēr fēng Friðestān tō biscop dōme on Winte ceastre, ⁊ Asser biscop gefōr æfter ðǣm, se wæs æt Scīre burnan biscop. ⁊ þȳ ilcan gēre sende Ēadweard cyng firde ǣgðer ge of West Seaxum ge of Mercum, ⁊ hēo gehergade swīðe micel on þǣm norð here, ǣgðer ge on mannum ge on gehwelces cynnes yrfe, ⁊ manega men ofslōgon þāra Deniscena. ⁊ þǣr wǣron fīf wucan inne.

Hēr Engle here ⁊ Dene ge fuhton æt Teotanheale. ⁊ Æþerēd Myrcena ealdor forð fērde. ⁊ Ēadward cyng fēng tō Lunden byrig. ⁊ tō Oxnaforda. ⁊ tō ealle þām landum þe þǣr tō gebyredon. ⁊ mycel sciphere hider cōm sūþan of Lidwicum. ⁊ hergedon swīðe be Sefærn. ac hī þǣr mǣst ealle siððan forfōron.

Not in Laud (E).

Hēr bræc se here on Norð hymbrum þone frið, ⁊ forsāwon ǣlc frið þe Ēadweard cyng ⁊ his witan him budon. ⁊ hergodon ofer Mercna lond; ⁊ se cyng hæfde gegadrod sum hund scipa. ⁊ wæs þā on Cent, ⁊ þā scipu fōran be sūðan ēast andlang sǣ tōgēnes him. þā wēnde se here þæt his fultumes se mǣsta dǣl wǣre on þǣm scipum, ⁊ þæt hīe mehten faran unbe fohtene þǣr þǣr hīe wolden. þā geāscade se cyng þæt þæt hīe ūt on hergað fōron, þā sende hē his fird ǣgðer ge of West Seaxum ge of Mercum, ⁊ hīe offōron ðone here hindan, þā hē hām weard wæs, ⁊ him þā wiþ gefuhton, ⁊ þone here geflīemdon, ⁊ his fela þūsenda ofslōgon, ⁊ þǣr wæs Ecwils cyng ofslægen.

Not in Laud (E).

Hēr gefōr Æðerēd ealdormon on Mercum; ⁊ Ēadweard cyng fēng tō Lundenbyrg ⁊ tō Oxnaforda, ⁊ tō ðǣm landum eallum þe þǣr tō hīerdon.

Not in Laud (E).

Hēr on þys gēare ymb Martines mæssan hēt Ēadweard cyning ātimbran þā norðran burg æt Heorotforda betwēox Memeran ⁊ Beneficcan ⁊ Lygean; ⁊ þā æfter þām þæs on sumera. betwēox gangdagum ⁊ middum sumera, þā fōr Ēadweard cyning mid sumum his fultume on Ēast Seaxe tō Mǣldune. ⁊ wīcode þǣr þā hwīle þe man þā burg worhte ⁊ getimbrede æt Witham; ⁊ him bēag gōd dǣl þæs folces tō þe ǣr under Deniscra manna anwalde wǣron, ⁊ sum his fultum worhte þā burg þā hwīle æt Heorotforda on sūþ healfe Lygean.

Not in Laud (E).

Hēr on þys gēre rād se here ūt ofer Ēastron of Ham tūne, ⁊ of Ligera ceastre. ⁊ brǣcon þone friþ. ⁊ slōgon monige men æt Hōc nera tūne, ⁊ þǣr onbūtan; ⁊ þā swīðe raþe æfter þǣm, swā þā ōþre hām cōmon, þā fundon hīe ōþre floc rāde, þæt rād ūt wið Lygtūnes, ⁊ þā wurdon þā land lēode his ware, ⁊ him wiþ gefuhton, ⁊ ge brōhton hīe on fullum flēame, ⁊ ā hreddon eall þæt hīe ge numen hæfdon, ⁊ ēac hira horsa ⁊ hira wǣpna micelne dǣl:

Hēr on þysum gēare cōm micel sciphere hider ofer sūþan of Lidwiccum, ⁊ twēgen eorlas mid, Ōhtor ⁊ Hroald, ⁊ fōron west on būtan þæt hīe gedydon innan Sæferne mūþan, ⁊ hergodon on Norþ Wealas ǣghwǣr be þām sǣ, þǣr hīe þonne on hagode; ⁊ ge fēngon Cameleac biscop on Ircinga felda, ⁊ lǣddon hine mid him tō scipum, ⁊ þā ālīesde Ēadweard cyning hine eft mid ·xl· pundum. Þā æfter þām fōr se here eall up, ⁊ wolde faran þā gīet on he'r'gaþ wið Ircinga feldes; þā gemētton þā men hīe of Here forda ⁊ of Glēaweceastre. ⁊ of þām nīeh's'tum burgum, ⁊ him wið gefuhton, ⁊ hīe ge flīemdon; ⁊ ofslōgon þone eorl Hroald ⁊ þæs ōþres eorles brōþor Ōhteres, ⁊ micel þæs heres. ⁊ be drifon hīe on ānne pearruc, ⁊ be sǣton hīe þǣr ūtan, oþþe hīe him sealdon gīslas, þæt hīe of Ēadweardes cyninges anwalde āfaran woldon;

⁊ se cyng hæfde funden þæt him mon sæt wiþ on sūþ healfe Sæfern mūþan, westan from Wealum, ēast oþ Afene mūþan, þæt hīe ne dorston þæt land nāwer ge sēcan on þā healfe; Þā be stǣlon hīe hīe þēah nihtes upp æt sumum twām cirron, æt ōþrum cierre be ēastan Wæced, ⁊ æt ōþrum cierre æt Port locan; Þā slōg hīe mon æt ǣghþrum cirre, þæt hira fēawa on weg cōmon, būton þā āne þe þǣr ūt æt swummon tō þām scipum, ⁊ þā sǣton hīe ūte on þām īglande æt Brādan Relice, oþ þone first þe hīe wurdon swīþe mete lēase, ⁊ monige men hungre ā cwǣlon, forþon hīe ne meahton nānne mete gerǣcan; fōran þā þonan tō Deomodum, ⁊ þā ūt tō Īrlande. ⁊ þis wæs on hærfest;

⁊ þā æfter þām on þām ilcan gēre foran tō Martines mæssan, ðā fōr Ēadweard cyning tō Buccinga'hamme' mid his firde, ⁊ sæt þǣr fēower wucan, ⁊ ge worhte þā burga būta on ǣgþere healfe ēas ǣr hē þonon fōre; ⁊ Þurcytel eorl hine ge sōhte him tō hlāforde, ⁊ þā holdas ealle, ⁊ þā ieldstan men ealle mǣste ðe tō Bedan forda hīerdon, ⁊ ēac monige þāra þe tō Hamtūne hīerdon.

Hēr Æðelflǣd forðfērde Myrcena hlǣfdige.

Not in Laud (E).

Hēr on þys gēre Ēadweard cyng fōr mid fierde tō Bedan forda foran tō Martines mæssan, ⁊ beget þā burg, ⁊ him cirdon tō mǣst ealle þā burgware þe hīe ǣr būdon, ⁊ hē sæt þǣr fēower wucan, ⁊ hēt ātimbran þā burg on sūþ healfe þǣre ēas ǣr hē þonan fōre:

Not in Laud (E).

Hēr on þys gēre foran tō middum sumera fōr Ēadweard cyning tō Mǣldune, ⁊ getimbrede þā burg ⁊ ge staðolode ǣr hē þonon fōre; ⁊ þȳ ilcan gēare fōr Þurcytel eorl ofer sǣ on Froncland. mid þām mannum þe him ge lǣstan woldon. mid Ēadweardes cynges friþe ⁊ fultume.

Hēr on þysum gēre foran tō Ēastron Ēadweard cyning hēt gefaran þā burg æt Tofeceastre. ⁊ hīe getimbran; ⁊ þā eft æfter þām on þām ilcan gēare tō gangdagum hē hēt ātimbran þā burg æt Wigingamere;

Þȳ ilcan sumera be twix hlāfmæssan ⁊ middum sumera se here bræc þone friþ of Hamtūne, ⁊ of Ligeraceastre, ⁊ þonan norþan, ⁊ fōron tō Tofeceastre, ⁊ fuhton on þā burg ealne dæg, ⁊ þōhton þæt hīe hīe sceolden ābrecan; ac hīe þēah āwerede þæt folc þe þǣr binnan wæs oþ him māra fultum tōcōm, ⁊ hīe forlēton þā þā burg, ⁊ fōron āweg; ⁊ þā eft swīðe raþe æfter þām hīe fōron eft ūt mid stælherge nihtes, ⁊ cōmon on ungearwe men, ' ⁊ ' genōmon un lȳtel, ǣgþer ge on mannum, ge on ierfe. betwēox Byrnewuda ⁊ Æglesbyrig.

Þȳ ilcan sīþe fōr se here of Huntandūne, ⁊ of Ēast Englum, ⁊ worhton þæt geweorc æt Tæmeseforda, ⁊ hit būdon ⁊ bytledon, ⁊ forlēton þæt ōþer æt Huntandūne, ⁊ þōhton þæt hīe sceoldon þanon of mid gewinne ⁊ mid un friðe eft þæs landes māre gerǣcan; ⁊ fōran þæt hīe gedydon æt Bedanforda, ⁊ þā fōran þā men ūt ongēan þe þǣr binnan wǣron, ⁊ him wiþ gefuhton, ⁊ hīe geflīemdon, ⁊ hira gōdne dǣl ofslōgon.

Þā eft æfter þām þā gīet gegadorode micel here hine of Ēast Englum ⁊ of Mercnalande, ⁊ fōran tō þǣre byrig æt Wigingamere, ⁊ ymbsǣton hīe ūtan, ⁊ fuhton lange on dæg on, ⁊ nāmon þone cēap on būtan; ⁊ þā men āweredon þēah þā burg þe þǣr binnan wǣron, ⁊ þā forlēton hīe þā burg ⁊ fōron āweg.

Þā æfter þām þæs ilcan sumeres ge gadorode micel folc hit on Ēadweardes cynges anwalde. of þām nīehstum burgum, þe hit ðā gefaran mehte, ⁊ fōron tō Tæmese forda. ⁊ besǣton ðā burg. ⁊ fuhton ðǣr on oð hī hīe ābrǣcon, ⁊ ofslōgon þone cyning, ⁊ Toglos eorl, ⁊ Mannan eorl his sunu, ⁊ his brōþor, ⁊ ealle þā þe þǣr binnan wǣron, ⁊ hīe wergan woldon, ⁊ nāmon þā ōþre ⁊ eal þæt þǣr binnan wæs.

Þā æfter þām þæs for hraþe gegadorode micel folc hit on hærfest, ǣgþer ge of Cent, ge of Sūþ rigum, ge of Ēast Seaxum, ge ǣghwonan of þām nīhstum burgum, ⁊ fōron tō Colne ceastre, ⁊ ymb sǣton þā burg, ⁊ þǣr on fuhton oþ hīe þā ge ēodon, ⁊ þæt folc eall of slōgon, ⁊ ge nāmon eal þæt þǣr binnan wæs, būton þām mannum þe þǣr oþ flugon ofer þone weall.

Þā æfter þām þā gī'et þæs ilcan hærfestes gegadorode micel here 'hine' of Ēast Englum. ǣgþer ge þæs land heres ge þāra wīcinga þe hīe him tō fultume āspanen hæfdon, ⁊ þōhton þæt hīe sceoldon ge wrecan hira tēonun, ⁊ fōron tō Mǣldune, ⁊ ymb sǣton þā burg, ⁊ fuhton þǣr on, oþ þām burg warum cōm māra fultum tō ūtan tō helpe, ⁊ forlēt se here þā burg, ⁊ fōr fram; ⁊ þā fōron þā men æfter ūt of þǣre byrig, ⁊ ēac þā þe him ūtan cōmon tō fultume, ⁊ geflīemdon þone here ⁊ ofslōgon hira monig hund, ǣgþer ge æsc manna ge ōþerra.

Þā þæs for hraþe þæs ilcan hærfestes fōr Ēadweard cyning mid West Sexna fierde tō Passan hamme, ⁊ sæt þǣr þā hwīle þe mon worhte þā burg æt Tofe ceastre mid stān wealle, ⁊ him cirde tō þurferþ eorl, ⁊ þā holdas, ⁊ eal se here þe tō Ham tūne hīerde norþ oþ Weolud, ⁊ sōhton hine him tō hlāforde ⁊ tō mund boran;

⁊ þā se fird stemn fōr hām, þā fōr ōþer ūt, ⁊ ge fōr þā burg æt Huntan dūne, ⁊ hīe ge bētte ⁊ ge ednēowade þǣr hēo ǣr tō brocen wæs, be 'Ē'ad weardes cyninges hǣse, ⁊ þæt folc eal þæt þǣr tō lāfe wæs þāra land lēoda bēag tō Ēad wearde cyninge, ⁊ sōhton his friþ ⁊ his mund byrde.

Þā gīet æfter þām þæs ilcan gēres foran tō Martines mæssan fōr Ēad wear'd' cyning mid West Sexna fierde tō Colneceastre, ⁊ ge bētte þā burg ⁊ ge ednēowade þǣr hēo ǣr tō brocen wæs, ⁊ him cirde micel folc tō, ǣgþer ge on Ēast Englum, ge on Ēast Seaxum, þe ǣr under Dena an walde wæs; ⁊ eal se here on Ēast Englum him swōr ānnesse, þæt hīe eal þæt woldon þæt hē wolde, ⁊ eall þæt friþian woldon þæt se cyng friþian wolde, ǣgþer ge on sǣ, ge on lande; ⁊ se here þe tō Grantan brycge hīerde hine ge cēs synder līce him tō hlāforde ⁊ tō mund boran, ⁊ þæt fæstnodon mid āþum. swā swā hē hit þā ārēd.

Hēr Sihtric cyng ofslōh Niel his brōþor.

Not in Laud (E).

Hēr on ðysum gēre betwēox gangdagum ⁊ mid'd'an sumera fōr Ēadweard cyng mid firde tō Stēan forda. ⁊ hēt gewyrcan ðā burg on sūð healfe ðǣre ēas, ⁊ ðæt folc eal ðe tō ðǣre nor þerran byrig hīerde. him bēah tō, ⁊ sōhtan hine him tō hlāforde.

⁊ þā on þǣm setle ðe hē þǣr sæt, þā ge fōr Æþelflǣd his swystar æt Tame worþige ·xii· nihtum ǣr middum sumera; ⁊ þā gerād hē þā burg æt Tame worþige, ⁊ him cierde tō eall se þēod scype on Myrcna lande þe Æþelflǣde ǣr under þēoded wæs; ⁊ þā cyningas on Norþ Wealum, Howel, ⁊ Cledauc, ⁊ Icoþwel, ⁊ eall Norþ Weall cyn hine sōhton him tō hlāforde. Þā fōr hē þonan tō Snotingahām ⁊ ge fōr þā burg, ⁊ hēt hīe ge bētan ⁊ ge settan. ǣgþer ge mid Engliscum mannum, ge mid Deniscum; ⁊ him cierde eall þæt folc tō þe on Mercna lande ge seten wæs, ǣgþer ge Denisc ge Englisce.

Hēr on þysum gēare fōr Ēadweard cyning mid fierde on ufan hærfest tō Þelwæle, ⁊ hēt ge wyrcan þā burg, ⁊ ge settan, ⁊ ge mannian; ⁊ hēt ōþre fierd ēac of Miercna þēode þā hwīle þe hē þǣr sæt ge faran Mame ceaster on Norþ hymbrum, ⁊ hīe ge bētan ' ⁊ ' ge mannian. [Hēr forþfērde Plegemund arcebisceop.]

Hēr Regnold cyng gewan Eoferwīc.

Hēr on þysum gēre foran tō middum sumera fōr Ēadweard cyning mid fierde tō Snotingahām, ⁊ hēt ge wyrcan þā burg on sūþ healfe þǣre ēas, ongēan þā ōþre, ⁊ þā brycge ofer Treontan betwix þām twām burgum; ⁊ fōr þā þonan on Pēaclond tō Badecan wiellon, ⁊ hēt ge wyrcan āne burg þǣr on nēaweste, ⁊ ge mannian; ⁊ hine ge cēs þā tō fæder ⁊ tō hlāforde Scotta cyning ⁊ eall Scotta þēod; ⁊ Rægnald, ⁊ Ēadulfes suna, ⁊ ealle þā þe on Norþ hymbrum būgeaþ, ǣgþer ge Englisce, ge Denisce, ge Norþ men, ge ōþre; ⁊ ēac Stræcled Weala cyning, ⁊ ealle Stræcled Wealas.

[Hēr Ǣdward cyning forðfērde. ⁊ Æþelstān his sunu fēng tō rīce].

Hēr Ēadweard cing forþ fērde, ⁊ Æþelstān his sunu fēng tō rīce. [⁊ Sc̄e Dunstān wearð ākænned. ⁊ Wulfelm fēng tō þan arcebiscoprice on Cantuarebyri.]

Hēr Wulfelm biscop wes gehālgod. ⁊ þȳ ilcan gēare Ǣdward cyning forðfērde.

Not in Parker (A).

Hēr Æþelstān cyning fordrāf Guðfrið cyng. ⁊ hēr Wulfelm ar̃cƀ fōr tō Rōm.

Not in Parker (A).

Willelm suscepit regnum. et ·xv· annis regnauit.

Not in Laud (E).

Hēr mon hādode Byrnstān bisceop tō Wintan ceastre ·iiii· k̃l iunii. ⁊ hē hēold þridde healf gēar b̃is dōm.

Not in Laud (E).

Hēr forþ fērde Fryþe stān bisceop.

Hēr fōr Æþelstān cyning in on Scotland, ǣgþer ge mid land here, ge mid scyp here, ⁊ his micel ofer hergade. ⁊ Byrnstān b̃isp forþ fērde on Wintan ceastre. tō Omnium Sc̃orum.

Hēr ādranc Ǣdwine æðeling on sǣ.

Hēr fēng Ælfhēah b̃isp. tō bisceopdōme.

Hēr fōr Æþelstān cyning on Scotland. ge mid land here. ge mid scip here. ⁊ his mycel ofer hergode.

Hēr Æþelstān cyning · eorla dryhten · beorna bēah gifa · ⁊ his brōþor ēac · Ēadmund æþeling. ealdor langne tīr. geslōgon æt sæcce. sweorda ecgum. ymbe Bru'n'nan burh · bord weal clufan · hēowan heaþo linde. hamora lāfan · afaran Ēadweardes. swā him ge æþele wæs · from cnēo mǣgum · ꝥ hī æt campe oft. wiþ lāþra gehwǣne · land ealgodon · hord ⁊ hāmas · hettend crungun · Sceotta lēoda. ⁊ scip flotan · fǣge fēollan. feld dænnede · secgas hwate. siðþan sunne up · on morgen tīd · mǣre tungol · glād ofer grundas · Godes condel beorht · ēces Drihtnes · oð sīo æþele gesceaft. sāh tō setle · Þǣr læg secg mænig · gārum āgēted · guma norþerna · ofer scild scoten. swilce Scittisc ēac · wērig wīges sæd · Wes Seaxe forð · ondlongne dæg · eorod cistum · on lāst legdun · lāþum þēodum · hēowan here flēman · hindan þearle · mēcum mylenscearpan · Myrce ne wyrndon · he eardes hond plegan · hæleþa nānum þǣ mid Anlafe · ofer ǣra gebland · on lides bōsme · land gesōhtun. fǣge tō gefeohte. fīfe lǣgun · on þām campstede. cyninges giunge. sweordum āswefede. swilce seofene ēac · eorlas Anlafes · unrīm heriges. flotan ⁊ Sceotta. Þǣr geflēmed wearð · Norð manna bregu · nēde gebēded · tō lides stefne · lītle weorode · crēad cnea ren flot. cyning ūt gewāt · on fealene flōd · feorh ge nerede ·

Swilce þǣr ēac se frōda · mid flēame cōm · on his cȳþþe norð. Costontinus · hār hilde ring · hrēman ne þorfte · mǣcan gemānan. hē wæs his mǣga sceard · frēonda gefylled · on folcstede · beslagen æt sæcce · ⁊ his sunu forlēt · on wæl stōwe wundun fer grunden · giungne æt gūðe. gelpan ne þorfte · beorn blanden feax · bil geslehtes. eald inwidda. ne Anlaf þȳ mā. mid heora here lāfum · hlehhan ne þorftun. ꝥ hēo beadu weorca · beteran wurdun · on camp stede [uel cumbel] cul bod ge hnādes · gār mittinge. gumena gemōtes · wǣpen gewrixles · þæs hī on wæl felda · wiþ Ēad weardes · afaran plegodan.

Gewitan him þā Nor'þ' men · nægled cnearrum. drēorig daraða lāf · on dinges mere · ofer dēop wæter. Difelin sēcan · ' ⁊ ' eft hira land · ǣwisc mōde.

Swilce þā ge brōþer. bēgen æt samne · cyning ⁊ æþeling · cȳþþe sōhton · Wesseaxena land · wīges hrāmige.

Lētan him be hindan · hrǣ bryttian. salu wig pādan · þone sweartan hræfn · hyrned nebban · ⁊ þane hasewan pādan · earn æftan hwīt · æses brūcan · grǣdigne gūð hafoc · ⁊ þæt grǣge dēor · wulf on wealde. Ne wearð wæl māre · on þis ēiglande · ǣfer gīeta · folces gefylled. beforan þissum · sweordes ecgum. þæs þe ūs secgað bēc · ealde ūð witan. siþþan ēastan hider · Engle ⁊ Seaxe · up becōman · ofer brād brimu · Brytene sōhtan · wlance wīg smiðas · Weealles ofer cōman · eorlas ār hwate. eard begēataN.

Hēr Æðelstān cyning lǣdde fyrde tō Brunanbyrig.

Not in Parker (A).

Hēr Æðelstān cyning forðfērde. ⁊ fēng Ǣdmund tō rīce his brōðor.