Bókastaðir

Hēr fōr se here up þurh þā brycge æt Paris, ⁊ þā up andlang Sigene oþ Mæterne, oþ Cariei; ⁊ þā sǣton þāra ⁊ innan Ionan tū winter on þām twām stedum; ⁊ þȳ ilcan gēare forþfērde Karl Francna cyning, ⁊ Earnulf his brōþur sunu hine ·vi· wicum ǣr hē forþfērde berǣdde æt þām rīce, ⁊ þā wearþ þæt rīce tōdǣled on ·v· ⁊ ·v· kyningas tō gehālgode. þæt wæs þēah mid Earnulfes geþafunge, ⁊ hī cuǣdon þæt hīe þæt tō his honda healdan sceoldon. forþǣm hira nān næs on fædren healfe tō geboren. būton him ānum. Earnulf þā wunode on þǣm londe be ēastan Rīn, ⁊ Roþulf þā fēng tō þǣm middel rīce, ⁊ Oda tō þǣm west dǣle, ⁊ Beorngār ⁊ Wiþa tō Longbeardna londe, ⁊ tō þǣm londum on þā healfe muntes, ⁊ þæt hēoldun mid micelre unsibbe, ⁊ tū folc gefeoht gefuhton, ⁊ þæt lond oft ⁊ gelōme forhergodon, ⁊ ǣghwæþer ōþerne oftrǣdlīce ūt drǣfde; ⁊ þȳ ilcan gēare þe se here fōrforþ up ofer þā brycge æt Paris. Æþelhelm aldormon lǣdde Wesseaxna ælmessan ' ⁊ ' Ælfrēdes cyninges tō Rōme.

Hēr fōr se here up þurh ðā brycge æt Paris. ⁊ þā up andlang Sigene oð Mæterne. ⁊ þā up on Mæterne oð Caziei. ⁊ þā sǣton þār innan Ionan twā winter on ðām twām stedum. ⁊ þȳ ilcan gēare forðfērde Carl Francena cyng. ⁊ Earnulf his brōðor sunu hine ·vi· wucan ǣr hē forðfērde be rǣdde æt þām rīce. ⁊ þā wearð þet rīce tō dǣled on ·v· ⁊ fīf cyningas tō ge hālgode. þet weas þǣh mid Earnulfes þafunge. ⁊ hī cwǣðon ꝥ hī him þet tō handa healdan scoldan. forðan þet heora nān næs of fædren halfe geboren būtan him ānum. Earnulf wunode on þām lande be ǣstan Rīne. ⁊ Hroðulf þā fēng tō þām middel rīce. ⁊ [Oþa] þā tō þām weast dǣle. ⁊ Beorngar ⁊ Wiða tō Langbeardna lande. ⁊ tō þām landum on þā healfe muntes. ⁊ þet hēoldan mid mycel un sibbe. ⁊ twā folc gefeoht ge fuhton. ⁊ ꝥ land oft ⁊ ge lōme for hergodon. ⁊ ǣghweðer ōðerne oft rǣdlīce ūt ādrǣfde. ⁊ þȳ ilcan gēare þe se here fōr forð up ofer þā brycge æt Paris. Æðelhelm ealdorman lǣdde Weast Seaxna ælmessan ⁊ Ælfrēdes cyninges tō Rōme.

Hēr lǣdde Beocca aldormon Wesseaxna ælmessan ⁊ Ælfrēdes cyninges tō Rōme. ⁊ Æþelswīþ cuēn, sīo wæs Ælfrēdes sweostor cyninges, forþfērde, ⁊ hire līc līþ æt Pafian; ⁊ þȳ ilcan gēare Æþe'l'rēd ercebisc̄ ⁊ Æþelwold aldor mon. forþfērdon on ānum mōnþe:

Hēr lǣdde Beocca ealdor man West Seaxna ælmessan ⁊ Ælfrēdes cyninges tō Rōme. ⁊ Æðelswīð cwǣn sēo wæs Ælfrēdes swustor cyninges. ⁊ hēo for'ð'fērde. ⁊ hire lic līð æt Pauian. ⁊ þȳ ilcan gēare Æðerēd arcebiscop. ⁊ Aþewold ealdor man forðfērdon on ānum mōnþe.

On þissum gēare næs nān færeld tō Rōme, būton tuēgen hlēaperas Ælfrēd cyning sende mid gewritum:

On þissum gēare næs nān færeld tō Rōme, būton twēgen hlēaperes Ælfrēd cyng sende mid gewritum.

Hēr lǣdde Beornhelm aƀƀ West Seaxna ælmessan tō Rōme ⁊ Ælfrēdes cyninges; ⁊ Godrum se norþerna cyning forþfērde, þæs fulluht nama wæs Æþelstān, se wæs Ælfrēdes cyninges god sunu, ⁊ hē būde on Ēast Englum, ⁊ þæt lond ǣrest gesæt; ⁊ þȳ ilcan gēare fōr se here of Sigene tō Sant Laudan, þæt is butuēoh Brettum ⁊ Francum, ⁊ Brettas him wiþ gefuhton, ⁊ hæfdon sige, ⁊ hīe bedrifon ūt on āne ēa, ⁊ monige ādre'n'cton: [Hēr wæs Plegemund ge coron of Gode ⁊ of eallen his hālechen.]

Hēr lǣdde Beornhelm aƀƀ WestSeaxna ælmessan tō Rōme. ⁊ Ælfrēdes cynges; ⁊ Godrum se norðerne cyning forðfērde. þæs fulluht nama wæs Æðelstān, se wæs Ælfrēdes godsune cyninges. ⁊ hē būde on ĒastEnglum. ⁊ ꝥ land ǣrest gesæt. ⁊ þȳ ilcan gēare fōr se here of Sigene tō Scandlaudan. þet is betwix Bryttum ⁊ Francum. ⁊ Bryttas him wiðge fuhton. ⁊ hæfdon sige. ⁊ hī bedrifon ūt on āne ēa. ⁊ manige ādrencton. Hic Plegemundus archiepiscopus a Deo et omni populo electus est.

Not in Laud (E).

Hēr fōr se here ēast. ⁊ Earnulf cyning gefeaht wið ðǣm rǣde here ǣr þā scipu cuōmon, mid Ēast Francum, ⁊ Seaxum, ⁊ Bægerum. ⁊ hine geflīemde; ⁊ þrīe Scottas cōmon tō Ælfrēde cyninge, on ānum bāte būtan ǣlcum gerēþrum of Hibernia, þonon hī hī bestǣlon forþon þe hī woldon for Godes lufan on elþīodignesse bēon, hī ne rōhton hwǣr. Se bāt wæs geworht of þriddan healfre hȳde þe hī on fōron, ⁊ hī nāmon mid him þæt hī hæfdun tō seofon nihtum mete; ⁊ þā cōmon hīe ymb ·vii· niht tō londe on Cornwalum. ⁊ fōron þā sōna tō Ælfrēde cyninge; þus hīe wǣron genemnde, Dubslane ⁊ Macc bethu. ⁊ Maelinmun. ⁊ Swifneh se betsta lārēow þe on Scottum wæs gefōr:

⁊ þȳ ilcan gēare ofer Ēastron. ymbe 'gang' dagas oþþe ǣr, ætēowde se steorra þe mon on bōc lǣden hǣt cometa, same men cweþaþ on Englisc þæt hit sīe feaxede steorra. forþǣm þǣr stent lang lēoma of, hwīlum on āne healfe, hwīlum on ǣlce healfe:,

Hēr fōr se myccla here þe wē ge fyrn ǣr ymb sprǣcon eft of þām ēast rīce weastward tō Bunan. ⁊ þǣr wurdon ge scipode swā ꝥ hī āsætton hī on ǣnne sīð ofer mid horsum mid ealle. ⁊ þā cōmon up on Limine mūðan mid þridde healf hund scipa. se mūða is on ēast warde Cent æt þes mycclan wuda ēast enda þe wē Andræd hātað. se wudu is west lang ⁊ ēast lang hund twelftig mīla lang. oððe lengre. ⁊ ·xxx· mīla brād. se ēa þe wē ǣr ymb sprǣcon. līð ūt of þām wealda; on þe ēa hī tugon up heora scipa oð ðone weald ·iiii· mīla fram þām mūþan ūtan weardum. ⁊ þǣr ābrǣcon ān geweorc; inne on ðām fæ [ste] nne sǣton fēawa cyrlisce men on. ⁊ wæs sāmworht. Þā sōna æfter þām cōm Hæsten mid ·lxxx· scipa up inne Tæmese mūþe, ⁊ worhte him geweorc æt Middel tūne. ⁊ sēo ōðer here æt Apuldre. Hic obiit Wulfhere Norðan hymbrorum archiepiscopus.

Not in Laud (E).

Hēr on þysum gēare fōr se micla here. þe wē gefyrn ymbe sprǣcon, eft of þǣm ēast rīce west weard tō Bunnan. ⁊ þǣr wurdon gescipode, swā þæt hīe āsettan him on ānne sīþ ofer mid horsum mid ealle, ⁊ þā cōmon up on Limene mūþan. mid ccl. hunde scipa. se mūþa is on ēaste weardre Cent. æt þæs miclan wuda ēast ende þe wē Andred hātað; se wudu is ēast lang ⁊ west lang hund twelf tiges mīla lang oþþe lengra, ⁊ þrītiges mīla brād; sēo ēa þe wē ǣr ymbe sprǣcon līð ūt of þǣm wealda; on þā ēa hī tugon up hiora scipu oþ þone weald. iiii · mīla fram þǣm mūþan ūte weardum. ⁊ þǣr ābrǣcon ān geweorc. inne on þǣm f [æst] enne sǣton fēawa cirlisce men on, ⁊ wæs sām worht.

Þā sōna æfter þǣm cōm Hæsten mid lxxx · scipa up on Temese mūðan, ⁊ worhte him geweorc æt Middeltūne, ⁊ se ōþer here æt Apuldre:.

Not in Laud (E).

On þys gēare, þæt wæs ymb twelf mōnað þæs þe hīe on þǣm ēast rīce geweorc geworht hæfdon, Norþ hymbre ⁊ Ēast Engle hæfdon Ælfrēde cyninge āþas geseald, ⁊ Ēast Engle fore gīsla ·vi· ⁊ þēh ofer þā trēowa, swā oft swā þā ōþre hergas mid ealle herige ūt fōron, þonne fōron hīe, oþþe mid, oþþe on heora healfe on. Þā gegaderade Ælfrēd cyning his fierd, ⁊ fōr þæt hē gewīcode betwuh þǣm twām hergum. þǣr þǣr hē nīehst rȳmet hæfde for wudu fæstenne, ond for wæter fæstenne, swā þæt hē mehte ǣgþerne gerǣcan gif hīe ǣnigne feld sēcan wolden; Þā fōron hīe siþþan æfter þǣm wealda hlōþum ⁊ floc rādum. bī swā hwaþerre efes swā hit þonne fierdlēas wæs. ⁊ him mon ēac mid ōþrum floccum sōhte mǣstra daga ǣlce, [oþþe on dæg] oþþe on niht. ge of þǣre fierde, ge ēac of þǣm burgum; hæfde se cyning his fierd on tū tō numen, swā þæt hīe wǣron simle healfe æt hām, healfe ūte, būtan þǣm monnum þe þā burg 'ā' healdan scolden. ne cōm se here oftor eall ūte of þǣm setum þonne tuwwa. ōþre sīþe þā hīe ǣrest tō londe cōmon, ǣr sīo fierd gesamnod wǣre, ōþre sīþe þā hīe of þǣm setum faran woldon; Þā hīe ge fēngon micle here hȳð, ⁊ þā woldon ferian norþ weardes ofer Temese in on Ēast Seaxe ongēan þā scipu.

Þā for rād sīo fierd hīe foran, ⁊ him wið ge feaht æt Fearnhamme, ⁊ þone here ge flīemde, ⁊ þā here hȳþa āhreddon, ⁊ hīe flugon ofer Temese būton ǣlcum forda þā up be Colne on ānne īggað. Þā besæt sīo fierd hīe þǣr ūtan þā hwīle þe hīe þǣr lengest mete hæfdon. Ac hīe hæfdon þā heora stemn ge setenne, ⁊ hiora mete ge notudne, ⁊ wæs se cyng þā þider weardes on fære. mid þǣre scīre þe mid him fierdedon; Þā hē þā wæs þider weardes, ⁊ sīo ōþeru fierd wæs hām weardes, ⁊ ðā Deniscan sǣton þǣr be hindan, forþǣm hiora cyning wæs ge wundod on þǣm ge feohte, þæt hī hine ne mehton ferian;

Þā ge gaderedon þā þe in Norþ hymbrum būgeað, ⁊ on Ēast Englum, sum hund scipa, ⁊ fōron sūð ymb ūtan, ⁊ sum fēowertig scipa norþ ymb ūtan, ⁊ ymb sǣton ān ge weorc on Defna scīre be þǣre norþ sǣ; ⁊ þā þe sūð ymb ūtan fōron. ymb sǣton Exan cester. Þā se cyng þæt hīerde, þā wende hē hine west wið Exanceastres mid ealre þǣre fierde, būton swīþe ge waldenum dǣle ēaste weardes þæs folces.

Þā fōron forð oþþe hīe cōmon tō Lundenbyrg, ⁊ þā mid þǣm burg warum ⁊ þǣm fultume þe him westan cōm, fōron ēast tō Bēam flēote; wæs Hæsten þā þǣr cumen mid his herge, þe ǣr æt Middel tūne sæt. ⁊ ēac se micla here wæs þā þǣr tō cumen, þe ǣr on Limene mūþan sæt æt Apuldre; hæfde Hæsten ǣr ge worht þæt geweorc æt Bēam flēote, ⁊ wæs þā ūt āfaren on hergaþ, ⁊ wæs se micla here æt hām; Þā fōron hīe tō ⁊ ge flīemdon þone here, ⁊ þæt ge weorc ābrǣcon, ⁊ ge nāmon eal þæt þǣr binnan wæs, ge on fēo. ge on wīfum, ge ēac on bearnum, ⁊ brōhton eall in tō Lundenbyrig, ⁊ þā scipu eall oðþe tō brǣcon, oþþe for bærndon, oþþe tō Lunden byrig brōhton oþþe tō Hrofes ceastre. ⁊ Hæstenes wīf ⁊ his suna twēgen mon brōhte tō þǣm cyninge, ⁊ hē hī him eft āgeaf, forþǣm þe hiora wæs ōþer his godsunu, ōþer Æðerēdes ealdor monnes; hæfdon hī hiora on fangen ǣr Hæsten tō Bēam flēote cōme, ⁊ hē him 'hæfde' ge seald gīslas ⁊ āðas, ⁊ se cyng him ēac wel feoh sealde, ⁊ ēac swā þā hē þone cniht āgef ⁊ þæt wīf. ac sōna swā hīe tō Bleam flēote cōmon, ⁊ þæt geweorc geworc't' wæs. swā hergode hē 'on' his rīce þone ilcan ende þe Æþerēd his cum pæder healdan sceolde, ⁊ eft ōþre sīþe hē wæs on hergað gelend on þæt ilce rīce þāþā mon his geweorc ābræc.

Þā se cyning hine þā west wende mid þǣre fierde wið Exan cestres. swā ic ǣr sǣde, ⁊ se here þā burg beseten hæfde; þā hē þǣr tōgefaren wæs, þā ēodon hīe tō hiora scipum.

Þā hē þā wið þone here þǣr wæst ābisgod wæs, ⁊ þā hergas wǣron þā gegaderode bēgen tō Sceobyrig on Ēast Seaxum, ⁊ þǣr geweorc worhtun. fōron bēgen ætgædere up be Temese, ⁊ him cōm micel ēaca tō. ǣgþer ge of Ēast Englum, ge of Norþhymbrum. Fōron þā up be Temese oþþæt hīe gedydon æt Sæferne, þā up be Sæferne.

Þā gegaderode Æþerēd ealdor mon, ⁊ Æþelm ealdor man. ⁊ Æþelnōþ ealdor man, ⁊ þā cinges þegnas þe þā æt hām æt þǣm geweorcum wǣron, of ǣlcre byrig be ēastan Pedredan, ge be westan Sealwuda ge be ēastan, ge ēac be norþan Temese, ⁊ be westan Sæfern, ge ēac sum dǣl þæs Norð Weal cynnes. Þā hīe þā ealle gegaderode wǣron, þā offōron hīe þone here hindan æt Buttingtūne. on Sæferne staþe, ⁊ hine þǣr ūtan besǣton on ǣlce healfe, on ānum fæstenne. Þā hīe ðā fela wucena sǣton on twā healfe þǣr [ē] ē, ⁊ se cyng wæs west on Defnum wiþ þone sciphere, þā wǣron hīe mid metelīste gewǣgde, ⁊ hæfdon miclne dǣl þāra horsa freten. ⁊ þā ōþre wǣron hungre ācwolen. Þā ēodon hīe ūt tō ðǣm monnum þe on ēast healfe þǣre ē wīcodon, ⁊ him wiþ gefuhton, ⁊ þā Crīstnan hæfdon sige; ⁊ þǣr wearð Ordhēh cyninges þegn ofslægen, ⁊ ēac monige ōþre cyninges þegnas, ⁊ þāra Deniscra þǣr wearð swīþe mycel wæl geslegen, ⁊ se dǣl þe þǣr āweg cōm wurdon on flēame ge nerede. Þā hīe on Ēast Seaxe cōmon tō hiora geweorce. ⁊ tō hiora scipum. þā gegaderade sīo lāf eft of Ēast Englum, ⁊ of Norð hymbrum micelne here onforan winter. ⁊ befæston hira wīf, ⁊ hira scipu, ⁊ hira feoh on Ēast Englum, ⁊ fōron ān streces dæges ⁊ nihtes, þæt hīe gedydon on ānre wēstre ceastre on Wirhealum, sēo is Lega ceaster gehāten; Þā ne mehte sēo fird hīe nā hindan of faran, ǣr hīe wǣron inne on þǣm geweorce; besǣton þēah þæt geweorc ūtan sume twēgen dagas, ⁊ genāmon cēapes eall þæt þǣr būton wæs, ⁊ þā men ofslōgon þe hīe foran forrīdan mehton būtan geweorce, ⁊ þæt corn eall forbærndon, ⁊ mid hira horsum fretton on ǣlcre efenēhðe. ⁊ þæt wæs ymb twelf mōnað þæs þe hīe ǣr hider ofer sǣ cōmon.

Not in Laud (E).

Ond þā sōna æfter þǣm on ðys gēre fōr se here of Wirheale in on Norð Wealas. forþǣm hīe ðǣr sittan ne mehton; þæt wæs forðȳ þe hīe wǣron benumene ǣgðer ge þæs cēapes, ge þæs cornes, ðe hīe gehergod hæfdon; Þā hīe ðā eft ūt of Norð Wealum wendon mid þǣre here hȳðe þe hīe ðǣr genumen hæfdon, þā fōron hīe ofer Norð hymbra lond ⁊ Ēast Engla, swā swā sīo fird hīe gerǣcan ne mehte, oþþæt hīe cōmon on Ēast Seaxna lond ēasteweard, on ān īgland þæt is ūte on þǣre sǣ, þæt is Meresīg hāten. ⁊ þā se here eft hām weard wende. þe Exanceaster beseten hæfde, þā hergodon hīe up on Sūð Seaxum nēah Cisseceastre, ⁊ þā burgware hīe geflīemdon, ⁊ hira monig hund ofslōgon, ⁊ hira scipu sumu genāmon.

Ðā þȳ ylcan gēre on foran winter þā Deniscan þe on Meresīge sǣton. tugon hira scipu up on Temese, ⁊ þā up on Lygan; þæt wæs ymb twā gēr þæs þe hīe hider ofer sǣ cōmon.

Not in Laud (E).

On þȳ ylcan gēre worhte se fore sprecena here geweorc be Lygan ·xx· mīla bufan Lunden byrig. Þā þæs on sumera fōron micel dǣl þāra burg wara, ⁊ ēac swā ōþres folces, þæt hīe gedydon æt þāra Deniscana ge weorce, ⁊ þǣr wurdon geflīemde, ⁊ sume fēower cyninges þegnas ofslægene. Þā þæs on hærfæste þā wīcode se cyng on nēaweste þāre byrig, þā hwīle þe hīe hira corn gerypon, þæt þā Deniscan him ne mehton þæs rīpes for wiernan. Þā sume dæge rād se cyng up be þǣre ēæ, ⁊ gehāwade hwǣr mon mehte þā ēa for wyrcan, þæt hīe ne mehton þā scipu ūt brengan. ⁊ hīe ðā swā dydon. worhton ðā tū geweorc. on twā healfe þǣre ēas. Þā hīe ðā þæt geweorc fur þum ongunnen hæfdon, ⁊ þǣr tō ge wīcod hæfdon. Þā onget se here þæt hīe ne mehton þā scypu ūt brengan; Þā forlēton hīe hīe, ⁊ ēodon ofer land þæt hīe gedydon æt Cwatbrycge be Sæfern, ⁊ þǣr gewerc worhton. Þā rād sēo fird west æfter þǣm herige, ⁊ þā men of Lunden byrig ge fetedon þā scipu, ⁊ þā ealle þe hīe ālǣdan ne mehton tōbrǣcon, ⁊ þā þe þǣr stælwyrðe wǣron binnan Lunden byrig gebrōhton; ⁊ þā Deniscan hæfdon hira wīf befæst innan Ēast Engle ǣr hīe ūt of þǣm ge weorce fōron; Þā sǣton hīe þone winter æt Cwatbrycge. Þæt wæs ymb þrēo gēr þæs þe hīe on Limene mūðan cōmon hider ofer sǣ.

Not in Laud (E).

Ðā þæs on sumera on ðysum gēre tōfōr se here, sum on Ēast Engle, sum on Norðhymbre, ⁊ þā þe feoh lēase wǣron him þǣr scipu begēton, ⁊ sūð ofer sǣ fōron tō Sigene.

Næfde se here, Godes þonces. Angel cyn ealles forswīðe gebrocod; Ac hīe wǣron micle swīþor gebrocede on þǣm þrīm gēarum mid cēapes cwilde ⁊ monna, ealles swīþost mid þǣm þæt manige þāra sēlestena cynges þēna þe þǣr on londe wǣron forð fērdon on þǣm þrīm gēarum; þāra wæs sum Swīðulf biscop on Hrofes ceastre, ⁊ Cēolmund ealdor mon on Cent, ⁊ Beorhtulf ealdormon on Ēast Seaxum, ⁊ Wulfrēd ealdormon on Ham tūn scīre, ⁊ Ealhheard biscop æt Dorce ceastre, ⁊ Ēadulf cynges þegn on Sūð Seaxum, ⁊ Beornulf wīc gefēra on Winte ceastre, ⁊ Ecgulf cynges hors þegn, ⁊ manige ēac him þēh ic ðā geðungnestan nemde.

Þȳ ilcan gēare drehton þā hergas on Ēast Englum ⁊ on Norð hymbrum West Seaxna lond swīðe be þǣm sūð stæðe mid stæl hergum, ealra swīþust mid ðǣm æscum þe hīe fela gēara ǣr timbredon. Þā hēt Ælfrēd cyng timbran lang'e' scipu ongēn ðā æscas; þā wǣron fulnēah tū swā lang swā þā ōðru. sume hæfdon ·lx· āra. sume mā. þā wǣron ǣgðer ge swiftran ge un wealtran, ge ēac hīeran þonne þā ōðru. nǣron nāwðer ne on Frēsisc gescæpene ne on Denisc, būte swā him selfum ðūhte þæt hīe nyt wyrðoste bēon meahten.

Þā æt sumum cirre þæs ilcan gēares cōmon þǣr sex scipu tō Wiht, ⁊ þǣr mycel yfel gedydon, ǣgðer ge on Defenum ge wel hwǣr be ðǣm sǣ riman. Þā hēt se cyng faran mid nigonum tō þāra nīwena scipa, ⁊ for fōron him þone mūðan foran on ūter mere; þā fōron hīe mid þrīm scipum ūt ongēn hīe, ⁊ þrēo stōdon æt ufe weardum þǣm mūðan on drȳgum, wǣron þā men uppe on londe of āgāne, þā gefēngon hīe þāra þrēora scipa tū æt ðǣm mūðan ūteweardum, ⁊ þā men ofslōgon, ⁊ þæt ān oð wand; on þǣm wǣron ēac þā men ofslægene būton fīfum. þā cōmon forðȳ on weg ðe ðāra ōþerra scipu āsǣton, þā wurdon ēac swīðe un ēðelīce āseten. þrēo āsǣton on ðā healfe þæs dēopes ðe ðā Deniscan scipu āseten wǣron, ⁊ þā ōðru eall on ōþre healfe, þæt hira ne mehte nān tō ōðrum. Ac ðā þæt wæter wæs āhebbad fela furlanga from þǣm scipum. þā ēodan ðā Deniscan from þǣm þrīm scipum tō þǣm ōðrum þrīm þe on hira healfe beebbade wǣron, ⁊ 'hīe' þā þǣr gefuhton. þǣr wearð ofslægen Lucumon cynges gerēfa. ⁊ Wulfheard Frīesa. ⁊ Æbbe Frīesa, ⁊ Æðelhere Frīesa, ⁊ Æðelferð cynges genēat, ⁊ ealra monna Frēsiscra ⁊ Engliscra ·lxii· ⁊ þāra Deniscena ·cxx· þā cōm þǣm Deniscum scipum þēh ǣr flōd tō, ǣr þā Crīstnan mehten hira ūt ā scūfan, ⁊ hīe forðȳ ūt oð rēowon; þā wǣron hīe tō þǣm gesārgode. þæt hīe ne mehton Sūð Seaxnalond ūtan berōwan, ac hira þǣr tū sǣ on lond wearp. ⁊ þā men mon lǣdde tō Winteceastre tō þǣm cynge, ⁊ hē hīe ðǣr āhōn hēt. ⁊ þā men cōmon on Ēast Engle. þe on þǣm ānum scipe wǣron. swīðe forwundode. Þȳ ilcan sumera forwearð nōlǣs þonne ·xx· scipa mid monnum mid ealle. be þām sūðriman. Þȳ ilcan gēre forð fērde Wulfrīc cynges hors ðegn, se wæs ēac Wealh gefēra.

Not in Laud (E).

Hēr on þysum gēre gefōr Æðelm Wiltūnscīre ealdormon, nigon nihtum ǣr middum sumere. ⁊ hēr forð fērde Hēahstān, se wæs on Lundenne biscop.