Hēr Eanulf aldor man gefeah't' mid Sumur sǣtum, ⁊ Ealch stān bisc̄ ⁊ Ōsrīc aldorman mid Dorn sǣtum gefuhton æt Pedridan mūþan wiþ Deniscne here, ⁊ þǣr micel wæl geslōgon ⁊ sige nāmon.
Hēr Earnulf dux mid Sumorsǣton. ⁊ Ealchstān ƀ. ⁊ Ōsrīc dux mid Dorsǣton gefuhton æt Pedredan mūþan wið Denisc [n] e here. ⁊ þǣr mycel wæl geslōgon, ⁊ sige nāmon.
Hēr Ceorl aldor mon gefeaht wiþ hǣþene men mid Defena scīre æt Wicgan beorge, ⁊ þǣr micel wæl geslōgon, ⁊ sige nāmon; ⁊ þȳ ilcan gēare Æþelstān cyning, ⁊ Ealchere dux micelne here ofslōgon æt Sondwīc on Cent. ⁊ ix. scipu gefēngun, ⁊ þā ōþre geflīemdon; ⁊ hǣþne men ǣrest ofer winter sǣton; ⁊ þȳ ilcan gēare cuōm fēo'rðe' healf hund scipa on Temese mūþan, ⁊ brǣcon Cont wara burg, ⁊ Lunden burg, ⁊ geflīemdon Beorhtwulf Miercna cyning mid his fierde, ⁊ fōron þā sūþ ofer Temese on Sūþrige, ⁊ him gefeaht wiþ Æþelwulf cyning ⁊ Æþelbald his sunu æt Āclēa mid West Seaxna fierde, ⁊ þǣr þæt mǣste wæl geslōgon on hǣþnum herige þe wē secgan hīerdon oþ þisne ⁊ weardan dæg, ⁊ þǣr sige nāmon.
Hēr Ceorl ealdorman gefeaht wið hēðene men mid Defenescīre æt Wicgeanbeorge. ⁊ þǣr mycel wæl geslōgon. ⁊ sige nāmon. ⁊ hǣðene men on Tenet ofer winter gesǣton. ⁊ þȳ ilcan gēare cōm fēorþe healf hund scipa on Temesemūþan. ⁊ brǣcon Cantwareburh. ⁊ geflȳmdon Brihtwulf Myrcena cining mid his fyrde. ⁊ fōran þā sūð ofer Temese on Sūðrige. ⁊ him gefeaht wið Æðelwulf cining. ⁊ Æðelbald his sunu æt Āclēa mid WæstSæxna fyrde. ⁊ þǣr 'ꝥ' mǣste wæl geslōgon on hǣðene here þe wē ǣfre gesecgan hērdon. ⁊ þǣr sige nāmon. And þȳ ilcan gēare Æðelstān cining. and Ealhere dux gefuhton on scipum. ⁊ mycelne here ofslōgon æt Sandwīc. ⁊ ·ix· scipu gefēngon. ⁊ þā ōðre geflȳmdon.
Not in Parker (A).
Her on þis tima leot Ceolred aƀƀ of Medeshamstede ⁊ þa munecas Wulfrede to hande þet land of Sempigaham, to ꝥ forewearde ꝥ æfter his dæi scolde ꝥ land into þe minstre. ⁊ Wulfred scolde gifen ꝥ land of Sliowaforda into Medeshamstede. ⁊ he scolde gife ilca gear into þe minstre sixtiga foðra wuda. ⁊ twælf foður græfan. ⁊ sex foður gearda. ⁊ twa tunnan fulle hlutres aloð. ⁊ twa slæg næt. ⁊ sex hund hlafes. ⁊ ten mittan Wælsces aloð. ⁊ ilca gear an hors ⁊ þrittiga scillinga. ⁊ ane næht gefeormige. Her wæs wið se cining Burhred. ⁊ Ceolred ærceƀ. and Tunberht ƀ. ⁊ Cenred ƀ. ⁊ Alhhun ƀ. ⁊ Berhtred ƀ. ⁊ Wihtred aƀƀ. ⁊ Werhtherd aƀƀ. Æðelheard ealdorman. Hunberht ealdorman. ⁊ feola oðre.
Hēr Burhrēd Myrcene cyning underðēodde him Norð Wealas mid Æþelwulfes cininge fultume. ⁊ þȳ ilcan gēare Ealhhere mid Cantwarum. ⁊ Huda mid Sūðrigum gefuhton on Tenet wið hǣðene here. ⁊ þǣr wǣron feala ofslægene. ⁊ ādruncen on ǣgðre hand. ⁊ þā ealdormen bēge dǣde. ⁊ Burhrēd Myrcene cining fēng tō Æðelwulfes dohtor WestSeaxna cininges.
Not in Laud (E).
Hēr 'bæd' Burgrēd Miercna cyning ⁊ his wiotan Æþelwulf cyning þæt hē him gefultumade þæt him Norþ Walas gehīersumade; Hē þā swā dyde, ⁊ mid fierde fōr ofer Mierce on Norþ Walas, ⁊ hīe him alle gehīersume dydon; ⁊ þȳ ilcan gēare sende Æþelwulf cyning Ælfrēd his sunu tō Rōme. Þā was domne Leo pāpa on Rōme, ⁊ hē hine tō cyninge gehālgode, ⁊ hiene him tō biscep suna nam; 'Þā' þȳ ilcan gēare Ealhere mid Cantwarum, ⁊ Huda mid Sūþrigium gefuhton on Tenet wiþ hǣþnum herige, ⁊ ǣrest sige nāmon, ⁊ þǣr wearþ monig mon ofslægen, ⁊ ādruncen on ge hwæþere hond. Ond þæs ofer Ēastron geaf Æþelwulf cyning his dohtor Burgrēde cyninge of Wesseaxum on Merce
Hēr hǣþne men ǣrest on Scēapīge ofer winter sǣtun; ⁊ þȳ ilcan gēare gebōcude Æþelwulf cyning tēoþan dǣl his londes ofer al his rīce Go [de] tō lofe, ⁊ him selfum tō ēcere hǣlo; ⁊ þȳ ilcan gēare fērde tō Rōme mid micelre weorþnesse, ⁊ þǣr was ·xii· mōnaþ wuniende, ⁊ þā him hām weard fōr, ⁊ him þā Carl Francna cyning his dohtor geaf him tō cuēne, ⁊ æfter þām tō his lēodum cuōm, ⁊ hīe þæs ge fægene wǣrun. ⁊ ymb ·ii· gēar þæs ðe hē on Francum cōm hē gefōr. ⁊ his līc līþ æt Wintan ceastre, ⁊ hē rīcsode nigon tēoþe healf gēar.
Ond se Æþelwulf wæs Ecgbrehtin'g', Ecgbryht Ealhmunding, Ealhmund Eafing, Eafa Eopping, Eoppa Ingilding; Ingild wæs Ines brōþur West Seaxna cyninges, þæs þe eft fērde tō Sc̄e Petre ⁊ þǣr eft his feorh ge sealde; ⁊ hīe wǣron Cēnrēdes suna, Cēnrēd wæs Cēolwalding, Cēolwald Cūþaing, Cūþa Cūþwining, Cūþ'wine' Ceaulining, Ceawlin Cynrīcing, Cynrīc Cerdicing, Cerdic Elesing, Elesa Esling, Esla Giwising, Giwis Wīging, Wīg Frēawining, Frēawine Friþogāring, Friþogār Bronding, Brond Bældæging, Bældæg Wōdening, Wōden Friþowalding, Friþuwald Frēawining, Frēa lāf Friþuwulfing, Friþuwulf Finning, Fin Godwulfing, God wulf Gēating, Gēat Tætwaing, Tætwa Bēawing, Bēaw Sceldwaing, Sceldwea Heremōding, Heremōd Itermoning, Itermon Hraþraing, se wæs geboren in þǣre earce; Noe, Lamach, Matusalem, Enoh, Iacred, Maleel, Camon, Enos, Sed, Adam. primus homo et pater n̄r est Xp̄s, Amen
Ond þā fēng'on' Æþelwulfes suna twēgen tō rīce, Æþelbald tō Wesseaxna rīce, ⁊ Æþelbryht tō Cantwara rīce, ⁊ tō Ēast Seaxna rīce, ⁊ tō Sūþ rigea, ⁊ tō Sūþ Seaxna rīce; ⁊ þā rīcsode Æþelbald ·v· gēar
Hēr hǣþene men ǣrest on Scēapēge ofer winter sǣton. ⁊ þȳ ilcan gēare gebōcade Æðelwulf cining tēoðan dǣl his landes ofer eal his rīce Gode tō lofe. ⁊ him selfum ēcre hǣle. And þȳ ilcan gēare fērde tō Rōme mid mycclum wurðscipe. ⁊ þǣr wunade ·xii· mōnað. ⁊ hē fēng tō Karles dohter Francna cining þā hē hāmweard wæs. ⁊ gesund hām cōm. ⁊ þæs ymbe ·ii· gēar forðfērde. ⁊ his lic līð on Wintanceastre. ⁊ hē rīxade ·ix· gēar. Hē wæs Ecgbrihting. ⁊ þā fēngon his ·ii· sunu tō rīce. Æðelbald tō WestSeaxna rīce. and tō Sūðrigean. ⁊ hē rīxade ·v· gēar.
Hēr Æþelbald cyng forþfērde, ⁊ his līc līþ æt Scīra burnan, ⁊ fēng Æþelbryht tō allum þām rīce his brōþur, ⁊ hē hit hēold on gōdre ge þuǣrnesse ⁊ on micelre sibsumnesse; ⁊ on his dæge cuōm micel sciphere 'up ⁊ ābrǣcon Wintanceastre'. ⁊ wiþ þone here gefuhton Ōsrīc aldor man mid Ham tūn scīre, ⁊ Æþelwulf aldormon mid Bearruc scīre, ⁊ þone here ge flīemdon, ⁊ wæl stōwe gewald āhton; ⁊ se Æþelbryht rīcsode ·v· gēar, ⁊ his līc līþ æt Scīre burnan.
Hēr Æðelbald cining forðfērde. ⁊ his lic līð æt Scīreburnan. ⁊ fēng Æðelbriht tō eallum þām rīce his brōðor. ⁊ on his dæge cōm mycel sciphere up. ⁊ ābrǣcon Wintanceastre. ⁊ wið þone here fuhton Ōsrīc ealdorman mid Hamtūnescīre. ⁊ Æðelwulf ealdorman mid Barrucscīre, ⁊ þone here ge flȳmdon. ⁊ wælstōwe geweald āhton. ⁊ se Æðelbriht rīxade ·v· gēar. ⁊ his lic līð æt Scīrburnan.
Hēr sæt hǣþen here on Tenet, ⁊ genāmon friþ wiþ Cant warum, ⁊ Cantware him feoh gehēton wiþ þām friþe, ⁊ under þām friþe ⁊ þām feoh ge hāte se here hiene on niht up bestæl, ⁊ oferhergeade alle Cent ēastewearde;
Hēr sæt se hǣðene here on Tenet, ⁊ genam frið wið Cantwarum. ⁊ Cantware heom feoh behēton wið ðām friðe. ⁊ on þām feoh behāte se here hine on niht up bestæl. ⁊ ofer hergode ealle Cent ēastewarde.
Hēr fēng Æþerēd Æþelbryhtes brōþur tō Wesseaxna rīce; ⁊ þȳ ilcan gēare cuōm micel here on Angel cynnes lond, ⁊ winter setl nāmon on Ēast Englum, ⁊ þǣr gehorsude wurdon, ⁊ hīe him friþ [wiþ] nāmon.
Hēr fēng Æðe'l'rēd Æðelbrihtes brōðor tō WestSeaxna rīce. And þȳ ilcan gēare cōm mycel hǣðen here on Angel cynnes land. ⁊ wintersetle nāmon æt ĒastEnglum. ⁊ þǣr ge horsade wurdon. ⁊ hī heom wið frið genāmon.
Hēr fōr se here of Ēast Englum ofer Humbre mūþan tō Eoforwīc ceastre on Norþhymbre, ⁊ þǣr wæs micel un 'ge' þuǣrnes þǣre þēode betwēo'x' him selfum, ⁊ hīe hæfdun hiera cyning āworpenne Ōsbryht, ⁊ ungecyndne cyning underfēngon Ællan; ⁊ hīe late on gēare tō þām gecirdon þæt hīe wiþ þone here winnende wǣrun, ⁊ hīe þēah micle fierd gegadrodon, ⁊ þone here sōhton æt Eoforwīc ceastre, ⁊ on þā ceastre brǣcon, ⁊ hīe sume inne wurdon, ⁊ þǣr was ungemetlic wæl geslægen Norþan hymbra, sume binnan, sume būtan; ⁊ þā cyningas bēgen ofslægene, ⁊ sīo lāf wiþ þone here friþ nam; ⁊ þȳ ilcan gēare gefōr Ealchstān bisc̄, ⁊ hē hæfde þæt bisc̄ rīce ·l· wiñt æt Scīre burnan, ⁊ his līc līþ þǣr on tūne.
Hēr fōr se here of ĒastEnglum ofer Humbre mūðan. tō Eoferwīcceastre on Norðanhymbre. ⁊ þǣr wæs mycel un ðwǣrnesse ðēre þēode betwux heom sylfum. ⁊ hī hæfdon heora cining āworpene Ōsbriht. ⁊ ungecynde cining under fēngon Ællan. ⁊ hī late on gēare tō þām gecyrdon. ꝥ hī wið þone here winnende wǣron. ⁊ hī ðēah myccle fyrd ge gadorodan. ⁊ þone here sōhton æt Eoferwīcceastre. ⁊ þā ceastre brǣcon. ⁊ hī sume inne wurdon. ⁊ þǣr wæs ungemet wæl geslægen Norðanhymbra, sume binnan, sume būtan. ⁊ þā ciningas bǣgen ofslægene. ⁊ sēo lāfe wið þone here fryð nam. ⁊ þȳ ilcan gēare gefōr Ealhstān ƀ. ⁊ hē hæfde ꝥ biscoprīce æt Scīreburnan ·L· winter. ⁊ his lic līð þǣr ontūne.
Hēr fōr se ilca here innan Mierce tō Snotengahām, ⁊ þǣr winter setl nāmon; ⁊ Burgrǣd Miercna cyning ⁊ his wiotan bǣdon Æþerēd West Seaxna cyning ⁊ Ælfrēd his brōþur þæt hīe him gefultumadon, þæt hīe wiþ þone here gefuhton; ⁊ þā fērdon hīe mid Wesseaxna fierde innan Mierce oþ Snotenga hām, ⁊ þone here þǣr mētton on þām ge weorce, ⁊ þǣr nān hefelic gefeoht ne wearþ, ⁊ Mierce friþ nāmon wiþ þone here;
Hēr fōr se ilca here innan Myrce tō Snotinghām ⁊ þǣr wintersetle nāmon. and Burhcrēd Myrcena cining and his witan bǣdon Æðe'l'rēd WestSeaxna cining ⁊ Ælfrēd his brōðor þet hī him fultumedon. þæt hī wið þone here gefuhton. ⁊ þā fǣrdon hī mid WæstSæxa fyrde in on Myrcene oþ Snotingahām. ⁊ þone here mētton þǣr on þām geweorce. ⁊ hine inne besetton. ⁊ þǣr nān hefilic gefeaht ne wearð. ⁊ Myrce frið nāmon wið þone here.
Hēr fōr se here eft tō Eoforwīcceastre, ⁊ þǣr sæt ·i· gēar.
Hēr fōr se here eft tō Eoferwīc ceastre. ⁊ þǣr sæt ān gēar.
Hēr rād se here ofer Mierce innan Ēast Engle ⁊ winter setl nāmon. æt Þēodforda, ⁊ þȳ wintre Ēadmund cyning him wiþ feaht, ⁊ þā Deniscan sige nāmon, ⁊ þone cyning ofslōgon, ⁊ þæt lond all ge ēodon; ⁊ þȳ gēare gefōr Cēolnōþ ærce bisc̄ [⁊ Æþerēd Wiltūnscīre biscop wearþ gecoren tō ærcebiscpe tō Cantuare beri.]
Hēr fōr se here ofer Myrce innon Ēast Ængle. ⁊ winter setle nāman æt Ðēodforda. ⁊ on þām gēare sce Ǣdmund cining him wið gefeaht. ⁊ þā Deniscan sige nāman. ⁊ þone cining ofslōgon. ⁊ ꝥ land eall geeodon. ⁊ fordiden ealle þa mynstre þa hi to comen. on þa ilcan tima þa comon hi to Medeshamstede, beorndon ⁊ bræcon. slogon abbot ⁊ munecas. ⁊ eall ꝥ hi þær fundon. macedon hit þa ꝥ ær wæs ful rice. þa hit wearð to nan þing. ⁊ þȳ gēare gefōr Cēolnōþ arcebiscop.
Hēr cuōm se here tō Rēadingum on West Seaxe, ⁊ þæs ymb ·iii· niht ridon ·ii· eorlas up; Þā gemētte hīe Æþelwulf aldorman on Engla felda, ⁊ him þǣr wiþ gefeaht ⁊ sige nam; Þæs ymb ·iiii· niht Æþerēd cyning ⁊ Ælfrēd his brōþur þǣr micle fierd tō Rēadingum gelǣddon, ⁊ wiþ þone here gefuhton, ⁊ þǣr wæs micel wæl geslægen on gehwæþre hond, ⁊ Æþelwulf aldormon wearþ ofslægen, ⁊ þā Deniscan āhton wæl stōwe gewald; ⁊ þæs ymb ·iiii· niht gefeaht Æþerēd cyning ⁊ Ælfrēd his brōþur wiþ alne þone here on Æsces dūne, ⁊ hīe wǣrun on twǣm gefylcum, on ōþrum wæs Bachsecg ⁊ Halfdene þā hǣþnan cyningas, ⁊ on ōþrum wǣron þā eorlas; ⁊ þā gefeaht se cyning Æþerēd wiþ þāra cyninga getruman, ⁊ þǣr wearþ se cyning Bagsecg ofslægen; ⁊ Ælfrēd his brōþur wiþ þāra eorla getruman, ⁊ þǣr wearþ Sidroc eorl ofslægen se alda, ⁊ Sidroc 'eorl' se gioncga, ⁊ Ōsbearn eorl, ⁊ Fræna eorl, ⁊ Hareld eorl, ⁊ þā hergas bēgen geflīemde, ⁊ fela þūsenda ofslægenra, ⁊ onfeohtende wǣron oþ niht. ⁊ þæs ymb ·xiiii· niht gefeah't' Æþerēd cyning ⁊ Ælfrēd his brōður wiþ þone here æt Basengum, ⁊ þǣr þā Deniscan sige nāmon; ⁊ þæs ymb ·ii· mōnaþ gefeaht Æþerēd cyning ⁊ Ælfrēd his brōþur wiþ þone here æt Mere tūne, ⁊ hīe wǣrun on tuǣm gefylcium, ⁊ hīe būtu geflīemdon, ⁊ longe on dæg sige āhton, ⁊ þǣr wearþ micel wæl sliht on gehwæþere hond, ⁊ þā Deniscan āhton wæl stōwe gewald; ⁊ þǣr wearþ Hēahmund bisc̄ ofslægen, ⁊ fela gōdra monna; ⁊ æfter þissum gefeohte cuōm micel sumorlida; ⁊ þæs ofer Ēastron gefōr Æþerēd cyning, ⁊ hē rīcsode ·v· gēar, ⁊ his līc līþ æt Winburnan:
Þā fēng Ælfrēd Æþelwulfing his brōþur tō Wesseaxna rīce; ⁊ þæs ymb ānne mōnaþ gefeaht Ælfrēd cyning wiþ alne þone here lȳtle werede æt Wiltūne, ⁊ hine longe on dæg geflīemde, ⁊ þā Deniscan āhton wæl stōwe gewald; ⁊ þæs gēares wurdon ·viiii· folc gefeoht gefohten wiþ þone here on þȳ cynerīce be sūþan Temese, ⁊ būtan þām þe him Ælfrēd þæs cyninges brōþur, ⁊ ānlīpig aldormon, ⁊ cyninges þegnas oft rāde onridon þe mon nā ne rīmde, ⁊ þæs gēares wǣrun ofslægene ·viiii· eorlas ⁊ ān cyning; ⁊ þȳ gēare nāmon West Seaxe friþ wiþ þone here:
Hēr rād se here tō Rēadingum on Westseaxe. ⁊ þes ymb ·iii· niht ridon twēgen eorlas up. þā gemētte Æðelwulf ealdorman hīe on Engla felda. ⁊ heom þǣr wið gefeaht ⁊ sige nam. ⁊ wearð þǣr se ōþer ofslægen. þæs nama wæs Sidrac. Ðā ymb ·iiii· niht Æðelrēd cining. ⁊ Ælfrēd his brōðor þǣr mycle fyrd tō Rǣdingum gelǣddon. ⁊ wið þone here gefuhton. ⁊ þǣr wæs mycel wæl geslægen on gehwaðere hand. ⁊ Æðelwulf ealdorman wearð ofslægen. ⁊ þā Deniscan āhton wælstōwe geweald. And ymb ·iiii· niht gefeaht Æðerēd cining. ⁊ Ælfrēd his brōðor wið ealne ðone here on Æsces dūne. ⁊ hī wǣron on twām gefylcum. on ōðrum wes Basecg ⁊ Halfdene ðā hǣðene ciningas. ⁊ on ōðrum wǣron þā eorlas. ⁊ þā feaht se cining Æðerēd wið ðāra cininga getruman. ⁊ þǣr wearð se cining Bagsecg ofslægen. ⁊ Ælfrēd his brōðor wið þāra eorla getruman, ⁊ þǣr wearð Sidrac eorl ofslægen se ealda. ⁊ Sidrac se geonga, ⁊ Ōsbearn eorl. ⁊ Fræna eorl. ⁊ Harold eorl. ⁊ þā hergas bēgen geflȳmde. ⁊ feala þūsenda ofslagenra. ⁊ on feohtende wǣron oð niht. ⁊ Ðæs ymb ·xiiii· niht gefeaht Æðerēd cining. ⁊ Ælfrēd his brōðor wið þone here æt Basingum. ⁊ þār þā Deniscan sige genāmon. ⁊ þæs ymb twǣgen mōnðas gefeaht Æðerēd ⁊ Ælfrēd his brōðor wið þone here æt Mæredune. ⁊ hī wǣron on twām gefylcum. ⁊ hī būtu geflȳmdon. ⁊ lange on dæg sige āhton. ⁊ þār wearð mycel wælsliht on hwæðre hand. ⁊ þā Dæniscan āhton wealstōwe geweald. ⁊ þǣr [wearð] Hǣhmund biscop ofslagen ⁊ feala gōdra manna. ⁊ æfter þisum gefeohte cōm mycel sumerlida tō Rēadingum. ⁊ þæs æfter Ēastron gefōr Æðerēd cining. ⁊ hē rīxade ·v· gēar. ⁊ his lic līð æt Winburnan mynster.
Ðā fēng Ælfrēd Æðelwulfing his brōðor 'tō' West Seaxna rīce. ⁊ þæs ymb ·i· mōnað gefeaht Ælfrēd cining wið ealne þone here lītle werede æt Wi [l] tūne. ⁊ hine lange on dæg geflȳmde. ⁊ þā Deniscan āhton wælstōwe geweald. ⁊ þes gēares wurdon ·ix· folc gefeoht gefohten wið þone here on þām cinerīce besūðan Temese. būtan þām þe hī [m] Ælfrēd þes cinges brōðer. ⁊ ealdor men. ⁊ ciningas þægnas oft rāda on riden þe man nāne rīmde, ⁊ þæs gēares wǣron ofslagene ·ix· eorlas. ⁊ ān cyning. ⁊ þȳ gēare nāmon West Seaxa friðwið þone here.
Hēr fōr se here tō Lundenbyrig from Rēadingum, ⁊ þǣr wintersetl nam, ⁊ þā nāmon Mierce friþ wiþ þone here:
Hēr fōr se here tō Lundenbyrig fram Rēdingum. ⁊ þǣr nam wintersetle. ⁊ þā nāman Myrce frið wið þone here.
Hēr fōr se here on Norþhymbre, ⁊ hē nam wintersetl on Lindesse æt Tureces īege, ⁊ þā nāmon Mierce friþ wiþ þone here:
Hēr nam se here winter setle. æt Turcesīge.
Hēr fōr se here from Lindesse tō Hrēopedūne, ⁊ þǣr wintersetl nam, ⁊ þone cyning Burgrǣd ofer sǣ ādrǣfdon ymb ·xxii· wiñt þæs þe hē rīce hæfde, ⁊ þæt lond all geēodon; ⁊ hē fōr tō Rōme ⁊ þǣr gesæt ⁊ his līc līþ on Sc̃a Marian ciricean on Angel cynnes scōle; ⁊ þȳ ilcan gēare hīe sealdon ānum unwīsum cyninges þegne Miercna rīce tō haldanne, ⁊ hē him āþas swōr ⁊ gīslas salde, þæt hē him gearo wǣre swā hwelce dæge swā hīe hit habban wolden, ⁊ hē gearo wǣre mid him selfum, ⁊ on allum þām þe him lǣstan woldon. tō þæs heres þearfe:
Hēr fōr se here of Lindesse tō Hrēopedūne. ⁊ þǣr wintersetle nam. ⁊ þone cining Burgrēd ofersǣ ādrēfdon ymb ·xxii· wintra þæs þe hē rīce hæfde. ⁊ þet land eall geeodan. ⁊ hē fōr tō Rōme ⁊ þǣr sæt. ⁊ his lic liðon sca Marian cyrican on Angelcynnes scōle. ⁊ þȳ ilcan gēare hī sealdon Cēolwulfe ānum unwīsum cynges þegne Myrcena rīce tō healdenne. ⁊ hē him āðas swōr ⁊ gīslas sealde. þet hit him georo wǣre swā hwilce dæge swā hī hit habban woldon. ⁊ hē geare wǣre mid him sylfum. ⁊ mid eallum þām þe him gelǣstan wolden tō þæs heres þærfe.
Hēr fōr se here from Hrēopedūne, ⁊ Healfdene fōr mid sumum þām here on Norþhymbre. ⁊ nam wintersetl be Tīnan þǣre ēa, ⁊ se here þæt lond ge ēode. ⁊ oft hergade on Peohtas, ⁊ on Stræcled Walas; ⁊ fōr Godrum ⁊ Ōscytel ⁊ Anwynd. þā ·iii· cyningas, of Hrēopedūne tō Grante brycge mid micle here, ⁊ sǣton þǣr ān gēar; ⁊ þȳ sumera fōr Ælfrēd cyning ūt on sǣ mid sciphere, ⁊ gefeaht wiþ ·vii· scip'h'læstas, ⁊ hiera ān gefēng. ⁊ þā ōþru geflīemde.
Hēr fōr se here fram Hrēopedūne. ⁊ Healfdene fōr mid sumum þām here on Norðanhymbre. ⁊ nam winter setle be Tīnan þǣre ēa. ⁊ se here þet land geeode. ⁊ oft gehergode on Pehtas. ⁊ on Strætlæd Wealas. ⁊ fōr Godrum. ⁊ Ōscytel. ⁊ Anwend. þā þrȳ ciningas of Hrēope dūne tō Grantan brycge. myd mycclum here. ⁊ sǣton þǣr ān gēar. ⁊ þȳ sumera fōr Ælfrēd cyning ūt on sǣ mid scip here. ⁊ gefeaht wið ·vii· scip hlesta. ⁊ heora ān ge fēng. ⁊ þā ōðre ge flȳmde.
Hēr hiene bestæl se here intō Werham Wesseaxna fierde, ⁊ wiþ þone here se cyning friþ nam, ⁊ him þā āþas swōron on þām hālgan bēage, þe hīe ǣr nānre þēode noldon, þæt hīe hrædlīce of his rīce fōren; ⁊ hīe þā under þām hīe nihtes bestǣlon þǣre fierde se gehorsoda here intō Escanceaster; ⁊ þȳ gēare Healfdene Norþanhymbra lond ge dǣlde. ⁊ ergende wǣron ⁊ hiera tilgende.
Hēr hine be stæl se here intō Wærham West Seaxna fyrde. ⁊ siððan wið þone here se cyning frið nam. ⁊ him þā gīslas sealdon þe on þām here weorþuste wǣron tō þām cyninge. ⁊ him þā āðas swōron on þām hālgan bēage, þe hī ǣr nānre þēode dōn noldon þet hī hredlīce of his rīce fōron. ⁊ hī þā under þām hī nihtes bestǣlon þǣre fyrde se gehorsade here intō Exan ceastre. ⁊ þȳ gēare Healfdene Norðanhymbra land gedǣlde. ⁊ hergende wēron. ⁊ heora tiligende wǣron. Rollo cum suis Normaniam penetrauit et regnauit annis · liii.
Hēr cuōm se here intō Escanceastre from Werham, ⁊ se sciphere sigelede west ymb ūtan, ⁊ þā mētte hīe micel yst on sǣ, ⁊ þǣr forwearþ ·cxx· scipa æt Swanawīc; ⁊ se cyning Ælfrēd æfter þām gehorsudan here mid fierde rād oþ Exanceaster, ⁊ hīe hindan ofrīdan ne meahte ǣr hīe on þām fæstene wǣron, þǣr him mon tō ne meahte; ⁊ hīe him þǣr fore gīslas saldon. swā fela swā hē habban wolde, ⁊ micle āþas swōron, ⁊ þā gōdne friþ hēoldon; ⁊ þā on hærfæste gefōr se here on Miercna lond, ⁊ hit gedǣldon sum, ⁊ sum Cēolwulfe saldon.
Hēr cōm se here tō Exanceastre fram Werham. ⁊ se scip here seglode west ymbūtan. ⁊ þā gemētte hī mycel ȳst on sǣ. ⁊ þēar forwearð ·cxx· scipa æt Swanawīc. ⁊ se cing Ælfrēd æfter þām gehorsedum here mid fyrde rād oð Exan ceastre. ⁊ hī hindan of rīdan ne mihte ǣr hī on þām feastene wǣron þǣr him man tō [ne] mihte. ⁊ hī him þār fore gīslas sealdon swā feala swā hē habban wolde. ⁊ mycele āðas swōron. ⁊ þā gōdne frið hēoldan. ⁊ þā on herfeste ge fōr se here on Myrcena land. ⁊ hit gedǣldon sum. and sum Cēolwulfe sealdon.
Hēr hiene bestæl se here on midne winter ofer tuel [f] tan niht tō Cippanhamme, ⁊ geridon Wesseaxna lond ⁊ gesǣton micel þæs folces ⁊ ofer sǣ ādrǣfdon, ⁊ þæs ōþres þone mǣstan dǣl hīe geridon, ⁊ him tō gecirdon būton þām cyninge Ælfrēde. ⁊ hē lȳtle werede unīeþelīce æfter wudum fōr, ⁊ on mōr fæstenum; ⁊ þæs ilcan wintra wæs Inwæres brōþur ⁊ Healfdenes on West Seaxum on Defena scīre mid ·xxiii· scipum, ⁊ hiene mon þǣr ofslōg, ⁊ dccc · monna mid him. ⁊ xl · monna his heres;
⁊ þæs on Ēastron worhte Ælfrēd cyning lȳtle werede geweorc æt Æþelinga ēigge, ⁊ of þām ge weorce was winnende wiþ þone here, ⁊ Sumur sǣtna se dǣl se þǣr nīehst wæs; Þā on þǣre seofoðan wiecan ofer Ēastron hē gerād tō Ecg'mon' bryhtes stāne be ēastan Sealwyda, ⁊ him tō cōm þǣr ongēn Sumor sǣte alle, ⁊ Wilsǣtan, ⁊ Hamtūn scīr se dǣl se hiere behinon sǣ was, ⁊ his gefægene wǣrun; ⁊ hē fōr ymb āne niht of þām wīcum tō Īglēa, ⁊ þæs ymb āne tō Ēþandūne, ⁊ þǣr gefeaht wiþ alne þone here, ⁊ hiene geflīemde, ⁊ him æfter rād oþ þæt geweorc, ⁊ þǣr sæt ·xiiii· niht; ⁊ þā salde se here him fore gīslas ⁊ micle āþas, þæt hīe of his rīce uuoldon, ⁊ him ēac gehēton þæt hiera kyning fulwihte onfōn wolde, ⁊ hīe þæt gelǣston swā; ⁊ þæs ymb ·iii· wiecan cōm se cyning tō him Godrum þrītiga sum þāra monna þe in þām here weorþuste wǣron æt Alre, ⁊ þæt is wiþ Æþelingga ēige; ⁊ his se cyning þǣr onfēng æt fulwihte, ⁊ his crismlīsing was æt Weþmōr, ⁊ hē was ·xii· niht mid þām cyninge, ⁊ hē hine miclum ⁊ his gefēran mid fēo weorðude:
Hēr hine be stæl se here on midne winter ofer twelftan niht tō Cippanhamme. ⁊ geridan West Seaxna land ⁊ ge setton. ⁊ mycel þæs folces ofer sǣ ādrǣfdon. ⁊ þæs ōðres þone mǣstan dǣl hige ridon būtan þām cynge Ælfrēde lītle werede unȳðelīce æfter wudum fōr. ⁊ on mōrfestenum. ⁊ þes ilcan wintra wæs Iweres brōðor ⁊ Healfdenes on West Sexum on Defenan scīre. ⁊ hine mon þǣr slōh. ⁊ dccc · manna mid him. ⁊ xl · manna his heres. ⁊ þār wæs se gūðfana ge numen þe hī ræfen hēton. ⁊ þæs on Ēastron wrohte Ælfrēd cyning lȳtle werede geweorc æt Æðelinga īge. ⁊ of þām geweorce wæs winnende wið þone here. ⁊ Sumer sǣtena se dēl þe þǣr nēhst wæs. þā on ðēre seofeðan wucan ofer Ēastron hē gerād tō Ecgbrihtes stāne be ēaston Wealwudu. ⁊ him cōmon þǣr ongēan Sumor sǣte ealle. ⁊ Willsǣte. ⁊ Hamtūnscȳr se dǣl þe hire behēonan sǣ wæs. ⁊ his ge fægene wǣron. ⁊ hē fōr ymb āne niht of þām wīcum tō Ǣglēa. ⁊ þæs ymb āne niht tō Ēðandūne. ⁊ þǣr gefeaht wið ealne here ⁊ hine geflȳmde. ⁊ him æfter rād oð þet geweorc. ⁊ þǣr sæt ·xiiii· niht. ⁊ þā sealde se here him gīslas. and mycele āðas. þet hī of his rīce woldon. ⁊ him ēac gehēton þet heora cyng fulwihte onfōn wolde. ⁊ hī ꝥ gelǣston. ⁊ þæs ymb ·iii· wucan cōm se cyn [g] Godrum. þrittigum sum. þāra manna þe in þām here weorðuste wǣron æt Alre. ⁊ ꝥ is wið Æðelinga īge. ⁊ his se cyng onfēng þǣr æt fulwihte. ⁊ his crism lȳsing wæs æt Wedmōr. ⁊ hē wes ·xii· niht mid þām cynge. ⁊ hē hine mycclum ⁊ his gefēran mid fēo weorðode.
Hēr fōr se here tō Cirenceastre of Cippan hamme. ⁊ sæt þǣr ān gēar; ⁊ þȳ gēare gegadrode on hlōþ wīcenga, ⁊ gesæt æt Fullan hamme be Temese; ⁊ þȳ ilcan gēare āþīestrode sīo sunne āne tīd dæges:
Hēr fōr se here tō Cirenceastre of Cippanhamme. ⁊ sæt þǣr ān winter. Þȳ gēare gegaderodon ān hlōð wīcinga. ⁊ gesæt æt Fullanhamme be Temese. ⁊ þȳ ilcan gēare ābȳstrode sēo sunne ān tīd dæges.
Hēr fōr se here of Cirenceastre on Ēast Engle, ⁊ gesæt þæt lond, ⁊ gedǣlde. ⁊ þȳ ilcan gēare fōr se here ofer sǣ þe ǣr on Fullan homme sæt on Fronc lond tō Gend, ⁊ sæt þǣr ān gēar:
Hēr fōr se here of Cirenceastre on ĒastEngle. ⁊ gesæt ꝥ land ⁊ gedǣlde. ⁊ þȳ ilcan gēare fōr se here ofer sǣ þe on Fullanhamme sæt on Frangland tō Gent. ⁊ sæt þǣr ān gēar.
Hēr fōr se here ufor on Fronc lond, ⁊ þā Francan him wiþ gefuhton, ⁊ þǣr 'þā' wearþ se here gehorsod æfter þām gefeohte:
Hēr fōr se here ufor on Frangland. ⁊ þā Francan him wið gefuhton. ⁊ þǣr þā warð se here horsad æfter þām gefeohte.
Hēr fōr se here up on long Mæse feor on Fronclond, ⁊ þǣr sæt ān gēar. ⁊ þȳ ilcan gēare fōr Ælfrēd cyning mid scipum ūt on sǣ. ⁊ gefeaht wiþ fēower scip hlæstas Deniscra monna, ⁊ þāra scipa tū genam, ⁊ þā men ofslægene wǣron þe ðǣr on wǣron, ⁊ tuēgen scip hlæstas him on hond ēodon, ⁊ þā wǣron miclum forslægene ⁊ forwundode ǣr hīe on hond ēodon.
Hēre fōr se here up andlang Mæse ofor on Frangland ⁊ þǣr sæt ān gēar. ⁊ þȳ ilcan gēare fōr Ælfrēd cyng mid scipum ūt on sǣ. ⁊ gefeaht wið ·iiii· sciphlæstas Deniscra manna. ⁊ þāra scipa twā ge nāmon. ⁊ þā men ofslōgon. ⁊ twā him on hand ēodon. ⁊ þā men wǣron myclum ofslagene ⁊ forwundode ǣr hī on hand ēodan.
Hēr fōr se here up on Scald tō Cundoþ, ⁊ þǣr sæt ān gēar.
Hēr fōr se here up on Scald tō Cundoð. ⁊ þǣr sæt ān gēar. ⁊ Marinus pāpa sende þā lignum dñi Ælfrēde cynge. ⁊ þȳ ilcan gēare lǣdde Sighelm. ⁊ Æðelstān þā ælmessan tō Rōme þe Ælfrēd cing gehēt þider. ⁊ ēac on Indea tō sce Thome. ⁊ tō sce Bartholomee. þā hī sǣton wið þone here æt Lundene. ⁊ hī þǣr Godes þances swȳðe bentigðe wǣron æfter þām gehātum.
Hēr fōr se here up on Sunnan tō Embenum, ⁊ þǣr sæt ān gēar.
Hēr fōr se here up on Sunnan tō Embenum. ⁊ þǣr sæt ān gēar.
Hēr tōdǣlde se foresprecena here on tū, ōþer dǣl ēast. ōþer dǣl tō Hrofesceastre; ⁊ ymbsǣton ðā ceastre, ⁊ worhton ōþer fæsten ymb hīe selfe. ⁊ hīe þēah þā ceastre āweredon oþþæt Ælfrēd cōm 'ūtan' mid fierde; þā ēode se here tō hiera scipum, ⁊ forlēt þæt geweorc. ⁊ hīe wurdon þǣr behorsude, ⁊ sōna þȳ ilcan sumere ofer sǣ gewiton; ⁊ þȳ ilcan gēare sende Ælfrēd cyning sciphere on Ēast Engle; sōna swā hīe cōmon on Stufemūþan, þā mētton hīe ·xvi· scipu wīcenga, ⁊ wiþ ðā gefuhton, ⁊ þā scipo alle gerǣhton, ⁊ þā men ofslōgon; þā hīe þā hām weard wendon mid þǣre herehȳþe, þā mētton hīe micelne sciphere wīcenga, ⁊ þā wiþ þā gefuhton þȳ ilcan dæge, ⁊ þā Deniscan āhton sige; Þȳ ilcan gēare ǣr middum wintra forþfērde Carl Francna cyning, ⁊ hiene ofslōg ān efor, ⁊ āne gēare ǣr his brōður forþfērde, se hæfde ēac þæt west rīce, ⁊ hīe wǣron bēgen Hloþwiges suna; se hæfde ēac þæt west rīce, ⁊ forþfērde þȳ gēare þe sīo sunne āþīestrode; se wæs Karles sunu þe Æþelwulf West Seaxna cyning his dohtor hæfde him tō cuēne; ⁊ þȳ ilcan gēare gegadrode micel sciphere on Ald Seaxum, ⁊ þǣr wearþ micel gefeoht. tua on gēare, ⁊ þā Seaxan hæfdun sige, ⁊ þǣr wǣron Frīsan mid; Þȳ ilcan gēare fēng Carl tō þām west rīce, ⁊ tō allum þām west rīce behienan Wendelsǣ, ⁊ begeondan þisse sǣ, swā hit his þridda fæder hæfde, būtan Lidwiccium; se Carl was Hloþwiges sunu, se Hloþwig was Carles brōþur, se wæs Iuþyttan fæder þe Æþelwulf cyning hæfde, ⁊ hīe wǣron Hloþwiges suna, se Hloþwig was þæs aldan Carles sunu, se Carl was Pippenes sunu; ⁊ þȳ ilcan gēare forþfērde se gōda pāpa Marinus, se gefrēode Ongel cynnes scōle be Ælfrēdes bēne West Seaxna cyninges, ⁊ hē sende him micla gifa, ⁊ þǣre rōde dǣl þe Crīst on þrōwude; ⁊ þȳ ilcan gēare se here on Ēast Englum bræc friþ wiþ Ælfrēd cyning.
Hēr tōdǣlde se forsprecena here on twā. ōðer ēast. ōðer dǣl tō Hrofeceastre. ⁊ ymbsǣton þā ceastre. ⁊ wrohton ōðer fæsten ymb hī sylfe. ⁊ hī þēah þā ceastre āweredan oððet Ælfrēd cyng cōm ūton mid fyrde. þā ēode se here tō heora scipum. ⁊ forlēton þet geweorc. ⁊ hī wurdon þǣr behorsade. ⁊ sōna þȳ ilcan sumera eft ofer sē gewiton. Ðȳ ilcan gēare sænde Ælfrēd cyng scip here of Cænt on Ēast Engle. sōna swā hī cōmon on Sturemūðan þā gemǣtton hī ·xvi· scipa wīcinga. ⁊ wiðða gefuhton. ⁊ þā scipa ealle gerǣhton. ⁊ þā men ofslōgen. þā hī þā hām weard wǣron mid þǣre here hūðe. þā gemētton hī mycelne sciphere wīcinga. ⁊ wið þā gefuhton þȳ ilcan dæge. ⁊ þā Deniscan āhton sige. ⁊ þȳ ilcan gēare ǣr middan wintra forðfērde Carl Francna cyng. ⁊ hine ofslōh ān eofor. ⁊ āne gēare ǣr his brōðor forðfērde. se heafde ēac ꝥ westrīce. se forðfērde þȳ gēare þe sēo sunne āðȳstrode; se wæs Carles sunu þe Aðelwulf WestSeaxna cyng his dohtor hæfde tō cwēne. Ðȳ ilcan gēare forðfērde se gōda pāpa Marinus. se ge frēode Angel cynnes scōle be Ælfrēdes bēne. West Seaxna cyninges. ⁊ hē sende him myccle gifa. ⁊ þǣre rōde dǣl þe Crīst on ðrōwode. ⁊ þȳ ilcan gēare fōr se here on Ēstenglum. ⁊ brec frið wið Ælfrēd cyning.
Hēr fōr se here eft west þe ǣr ēast gelende, ⁊ þā up on Sigene, ⁊ þǣr winter setl nāmon. Þȳ ilcan gēare gesette Ælfrēd cyning Lunden burg, ⁊ him all Angel cyn tō cirde, þæt būton Deniscra monna hæftnīede was, ⁊ hīe þā befæste þā burg Æþerēde aldormen tō haldonne.
Hēr fōr se here eft west þe ǣr ēast ge lende. ⁊ þā up on Sigene. ⁊ þǣr winter sætu nāmon æt Paris þǣre byrig. Ðȳ ilcan gēare ge sette Ælfrēd cyning Lunden burh. ⁊ him eall Angel cyn tō ge cyrde. ꝥ būtan Deniscra manna hæfnēde wes. ⁊ hē þā be feste þā burh Æþerēde ealdormen tō healdenne.