Bókastaðir

Her Cynewulf benam Sigebryht his rices ⁊ West Seaxna wiotan for unryhtum dædum, buton Ham tun scire; ⁊ he hæfde þa oþ he ofslog þone aldormon þe him lengest wunode; ⁊ hiene þa Cynewulf on Andred adræfde, ⁊ he þær wunade oþ þæt hiene an swan ofstang æt Pryfetes flodan; ⁊ he wræc þone aldormon Cumbran; ⁊ se Cynewulf oft miclum gefeohtum feaht uuiþ Bretwalum; ⁊ ymb ·xxxi· wiñt þæs þe he rice hæfde, he wolde adræfan anne æþeling se was Cyneheard haten, ⁊ se Cyneheard wæs þæs Sigebryhtes broþur; ⁊ þa geascode he þone cyning lytle werode on wifcyþþe on Merantune, ⁊ hine þær berad, ⁊ þone bur utan beeode ær hine þa men onfunden þe mid þam kyninge wærun; ⁊ þa ongeat se cyning þæt, ⁊ he on þa duru eode, ⁊ þa un heanlice hine werede, oþ he on þone æþeling locude, ⁊ þa utræsde on hine, ⁊ hine miclum gewundode. ⁊ hie alle on þone Cyning wærun feohtende oþ þæt hie hine ofslægenne hæfdon; ⁊ þa on þæs wifes gebærum onfundon þæs cyninges þegnas þa unstilnesse, ⁊ þa þider urnon swahwelc swa þonne gearo wearþ ⁊ radost; ⁊ hiera se æþeling gehwelcum feoh ⁊ feorh gebead, ⁊ hiera nænig hit geþicgean nolde. Ac hie simle feohtende wæran oþ hie alle lægon butan anum Bryttiscum gisle, ⁊ se swiþe gewundad wæs. Ða on morgenne gehierdun þæt þæs cyninges þegnas þe him be æftan wærun þæt se cyning ofslægen wæs, þa ridon hie þider, ⁊ his aldormon Osric, ⁊ Wiferþ his þegn, ⁊ þa men þe he be æftan him læfde ær, ⁊ þone æþeling on þære byrig metton þær se cyning ofslægen læg, ⁊ þa gatu him to belocen hæfdon ⁊ þa þær to eodon; ⁊ þa gebead he him hiera agenne dóm feos ⁊ londes gif hie him þæs rices uþon, ⁊ him cyþdon þæt hiera mægas him mid wæron þa þe him from noldon; ⁊ þa cuædon hie þæt him nænig mæg leofra nære þonne hiera hlaford, ⁊ hie næfre his banan folgian noldon, ⁊ þa budon hie hiera mægum þæt hie gesunde from eodon; ⁊ hie cuædon þæt tæt ilce hiera geferum geboden wære, þe ær mid þam cyninge wærun; þa cuædon hie þæt hie 'hie' þæs ne onmunden þon ma þe eowre geferan þe mid þam cyninge ofslægene wærun. ⁊ hie þa ymb þa gatu feohtende wæron oþþæt hie þær inne fulgon, ⁊ þone æþeling ofslogon, ⁊ þa men þe him mid wærun alle butan anum, se wæs þæs aldor monnes god sunu, ⁊ he his feorh generede ⁊ þeah he wæs oft gewundad.

⁊ se Cynewulf ricsode ·xxxi· wint. ⁊ his lic liþ æt Wintanceastre, ⁊ þæs æþelinges æt Ascan mynster, ⁊ hiera ryht fæder [en] cyn gæþ to Cerdice; ⁊ þy ilcan geare mon ofslog Æþelbald Miercna cyning on Seccandune, ⁊ his lic liþ on Hreopadune; ⁊ Beornræd feng to rice, ⁊ lytle hwile heold ⁊ ungefealice; ⁊ þy ilcan geare Offa feng to rice, ⁊ heold ·xxxviiii· wint. ⁊ his sunu Egfer [ꝥ] heold ·xli· daga ⁊ c · daga. Se Offa wæs þincg ferþing, þincgferþ Eanwulfing, Eanwulf Osmoding, Osmod Eawing, Eawa Pybing, Pybba Creoding, Creoda Cynewalding, Cynewald Cnebing, Cnebba Iceling, Icel Eomæring, Eomær Angelþowing, Angel þeow Offing, Offa Wærmunding, Wærmund Wyhtlæging, Wihtlæg Wodening:

Her Cynewulf benam Sigebrihte his mæge his rice. ⁊ WæstSeaxna witan for unrihtum dædum buton Hamtun scyre. ⁊ he hafde þa oð he ofsloh ðone ealdor man þe him lengs [t] wunode. ⁊ hine þa Cynewulf on Andred adrefede. ⁊ he þær wunode oþ ꝥ an swan hine ofstang æt Pryftes flodan. sæ swan wræc ðone ealdorman Cumbran. ⁊ se Cynewulf oft feaht mycclum ge feahtum wið Britwealas. ⁊ ymb ·xvi· wintra þæs þe he rice hæfde. he wolde adræfan ænne æðeling se wæs Cyneheard gehaten. se Cyneheard wes þæs Sigebrihtes broðor. ⁊ þa acsode he þone cining lyt wyrede on wif cyððan on Meran tune. ⁊ hine þær beráð. ⁊ þone bur uto'n' be eodon. ær hine þa men afundan þe mid þam cyninge wæron. ⁊ þa ongeat se cyning ꝥ. ⁊ he on ða duru eode, ⁊ þa unheanlice hine werode. oð he on þone æþeling locade. ⁊ þa ut resde on hine. ⁊ hine mycclum gewundode. ⁊ he ealle on ðone cining feohtende wæron. oð þet hig hine ofslægen hæfdon. ⁊ þa on ðæs wifes ge bæron onfundon þæs ciningas þegnas þa unstilnessa. ⁊ þa þider urnon. swa hwilc swa ðonne gearo wearð hraðost. ⁊ se æðeling gehwilcan feoh. ⁊ feorh bead, ⁊ heo nænig þicgan noldan. ac heo symle feohtende wæron. oþ hig ealle ofslagene wæron. buton anum Brytwyliscum gisle. ⁊ se swyðe 'ge'wundod wæs. þa on morgen gehyrdon ꝥ þes ciniges þegnas þe him bæfton wæron ꝥ se cining ofslagen wæs. þa ridon [hi] þider ⁊ his ealdorman Osric. ⁊ Wiferð his þegn. ⁊ þa men þe he him beæfton læfde ær. ⁊ þone æðeling on þære byrig ge metton þær se cining ofslagen læg. ⁊ heo þa gatu heom to belocen hæfdon. ⁊ ða ðer to eodon. ⁊ þa bead he heom heora agene dom feos. ⁊ landes gif heo him þæs rices uðon. ⁊ heom cydde ꝥ heora maga him mid wæron ða þe him fram noldon. ⁊ þa cweðon hig. ꝥ heom nænig mæg leofra nære þone heora hlaford. ⁊ heo næfre his banan folgian noldon. ⁊ þa budon hi heora magon ꝥ hi heom ge sunde fram eodon. ⁊ hi cwædon ꝥ ꝥ ilce heora geferum geboden wære þe ær mid þam cininge wæron. Ða cwædon hi ꝥ ꝥ hi þæs ne gemundon þonne ma þe heora geferen þe mid þam cininge wæron ofslagene. hi þa ymb ða gatu feohtende wæron oð hi þær in flugon. ⁊ þone æþeling ofslogon. ⁊ þa men ðe mid him wæron ealle buton anum. se wæs þes ealdormannes godsunu. ⁊ he his feorh generede. ⁊ he wæs oft gewundod. ⁊ se Cynewulf rixade ·xxxi· wintra. ⁊ his lic ligð on Wintan ceastre. ⁊ þæs æðelingas on Axan mynster. ⁊ heora riht fæderan cyn gæð to Certice. ⁊ þy ilcan geare man ofsloh Æðelbald Myrcene cining on Secan dune. ⁊ his lic restað on Reopandune. ⁊ he rixade ·xli· wintra. ⁊ þa feng Beornred to rice. ⁊ litle hwile heold ⁊ unge fealice. ⁊ þa ilcan geare Offa geflymde Beornred ⁊ feng to þam rice. ⁊ heold ·xxxix· wintra. ⁊ his sunu Ecgferð heold ·xli· daga. ⁊ ·c· daga. se Offa wæs þingc ferþing.

Not in Parker (A).

Her Eadberht Norðhymbra cining feng to scære. ⁊ Osulf his sunu feng to þam rice. ⁊ rixade ·i· gear. ⁊ hine ofslogon his hiwan on ·ix· kł Augusti.

Her Cuþbryht arceƀisc̄ forþ ferde:

Her Cuðbriht arceb forðferde.

Her Bregowine wæs to erce bisc̄ gehadod to Sc̄e Michaeles tide:

Her Bregowine wæs to arceb gehalgod to sce Michaeles tyde. ⁊ Moll Æðelwold feng to rice on Norð hymbrum. ⁊ rixade ·vi· winter. ⁊ hit þa forlet.

Her Æþelbryht Cantwara cyning forþferde: [se was Wihtredes sunu cing [es].]

Her Æðelbriht Cantwara cining forðferde. ⁊ Ceolwulf eac forðferde.

Her wæs se mycla winter:

Her wæs se myccla winter. ⁊ Moll Norþhymbra cining ofsloh Oswine æt Ædwines clife. on octauo idus Augusti.

Not in Parker (A).

Her Ianbe [r] ht wæs gehadod to arceb on ðon ·xl· dæg ofer midewinter ⁊ Friðewald biscop æt Witerne forðferde on nō Mai. se wæs gehalgod on Ceastrum on ·xviii· k Sept. þam ·vi· wintra Ceolwulfes rices. ⁊ he wæs b ·xxix· wintra; þa man gehalgode Pyhtwine to b æt Ælfetee on ·xvi· k Aug' to Hwiterne.

Not in Laud (E).

Her Ianbryht wæs gehadod to ærce bisc̄ on þone feowertegan dæg ofer midne winter:

Not in Laud (E).

Her Iaenbryht ærce bisc̄ onfeng pallium:

Not in Parker (A).

Her feng Alhred to Norðhymbra rice. ⁊ rixade eahta winter.

Not in Parker (A).

Her forðferde Ecgberht arceb. in Eoferwic on ·xiii· kł Decemb. se wæs b ·xxxvi· wintra. ⁊ Friðeberht in Hagustaldes eé. se wæs biscop ·xxxiii· wintra. ⁊ man gehalgode Æðelberht to Eoferwic. ⁊ Ealhmund to Hagustaldesee.

[Her forþferde Eadberht 'Eating' cing.]

Her forðferde Eadberht Eating on ·xiiii· kł Septembris.

Not in Parker (A).

Initium regni Karoli regis.

Her Milred bisc̄ forþ ferde:

Her Mildred b forðferde.

Not in Laud (E).

Her oþ iewde read Cristes mæl on hefenum æfter sunnan setl gonge; ⁊ þy geare gefuhton Mierce ⁊ Cantware æt Ottan forda; ⁊ wu'n'derleca nædran wæron gesewene on Suþ Seaxna londe.

Not in Parker (A).

Her Norðhymbra fordrifon heora cining Alhred of Eoferwic on Eastertid. ⁊ genamon Æðelred Molles sunu heom to hlaforde. ⁊ se rixade ·iiii· gear. ⁊ men gesegon read Cristes mel on heofenum æfter sunnan setlangange. on þy geare gefuhton Myrce ⁊ Cantwara æt Ottanforda. ⁊ wundorlice nædran wæron geseogene on Suðseaxna lande.

Not in Parker (A).

Her forðferde Pehtwine biscop on ·xiii· k Octob. se wæs b ·xiiii· wintra.

Her Cynewulf ⁊ Offa gefuhton ymb Benesing tún ⁊ Offa nam þone tuun:

Her Cynewulf ⁊ Offa geflyton ymb Benesingtun. ⁊ Offa genam þone tun. ⁊ þy ilcan geare man gehalgode Æðelberht to biscope to Hwiterne in Eoferwic on ·xvii· kł Iulii.

On þas kinges dæi Offa. wæs an abbot on Medeshamstede Beonne gehaten. se ilca Beonne þurh ealle þa muneke red of þere ministre þa let he Cuðbriht ealdorma [n] ·x· bonde land at Swinesheafde mid læswe ⁊ mid mædwe. ⁊ mid eal þet ðær to læi. ⁊ swa ꝥ seo Cuðbriht geaf þone abbote ·L· punde þær fore. ⁊ ilca gear anes nihtes feorme ouðer ·xxx· scyllinge penega. swa eac ꝥ eafter his dæi scolde seo land on gean in to þa mynstre. At þis gewitnesse wæs seo kining Offa. ⁊ seo kining Egferð. ⁊ seo ærceb Hygeberht. ⁊ Ceolwulf biscop. ⁊ Inwona b. ⁊ Beonna abbot. ⁊ feola oþre biscopes ⁊ abbotes. ⁊ feola oðre ricemen. On þes ilca Offa dæi. wæs an ealdorman Brordan wæs gehaten. he geornde at se kyning. ꝥ he scolde for his luuen freon his ane mynstre Wocingas het. forþi ðet he hit wolde giuen into Medeshamstede. ⁊ Sce Peter. ⁊ þone abbote þe þa was. he was Pusa gehaten; seo Pusa wæs æfter Beonna. and seo kining hine luuede swiðe. ⁊ seo kyning freode þa ꝥ mynstre Wocingas wið cining ⁊ wið biscop ⁊ wið eorl. ⁊ wið ealle men. swa ꝥ nan man ne hafde þær nan onsting. buton S. Peter ⁊ þone ab. Ðis wæs don on þe cininges tune Freoric burna hatte.

Not in Parker (A).

Her Æðebald ⁊ Hearberht of slogon ·iii· heah ge refan Ealdulf Bosing æt Cininges clife. ⁊ Cynewulf. ⁊ Ecgan æt Hela þyrnum on ·xi· kl Apr. ⁊ þa feng Alfwold to rice. ⁊ Æðelred bedraf on lande. ⁊ he rixade ·x· winter. Karolus in Hispanias intrauit. Karolus Saxoniam uenit. Karolus Pampileniam urbem destruxit, atque Cesar Augustam. exercitum suum coniunxit, et acceptis obsidibus, subiugatis Sarracenis, per Narbonam Wasconiam Franciam rediit.

Not in Parker (A).

Her Ealdseaxe ⁊ Francon gefuhton. ⁊ Norð hymbra heah ge refan forbearndon Beorn ealdorman on Sele tune on ·ix· k Ianr. ⁊ Æðelberht erceb forðferde in Ceastre. ⁊ on þæs stall Eanbald wæs gehalgod. ⁊ Cynebald b gesæt in Lindisfarna ee.

Her Ald Seaxe ⁊ Francan gefuhtun:

Her Alchmund biscop in Hagstd ee forðferde on ·vii· idus Sept'. ⁊ Tilberht man gehalgode on his steal on ·vi· No Octob. ⁊ Higbald man gehalgode to biscop æt Soccabyrig to Lindisfarna ee. and Ælfwold cining sende man æfter pallium to Rome ⁊ Eanbald dyde [to] ærceb.

Not in Parker (A).

Her forðferde Wærburh Ceolredes cwen. ⁊ Cynewulf b in Lindisfarna ee. ⁊ seonoð wæs æt Aclea.

Her Cyneheard ofslog Cynewulf cyning, ⁊ he þær wearþ ofslægen, ⁊ ·lxxxiiii· monna mid him; ⁊ þa onfeng Beorhtric Wesseaxna rices, ⁊ he ricsode ·xvi· gear, ⁊ his lic liþ æt Werham, ⁊ his ryht fædren cyn gæþ to Cerdice. [To þysan timan rixode Ealhmund cing innon Cent.]

Her Cyneheard ofsloh Cynewulf cining. ⁊ he wærð þær ofslagen. ⁊ lxxxiiii · manna mid him. ⁊ þa onfeng Brihtric West Seaxna cining to rice. ⁊ he rixade ·xvi· gear. ⁊ his lic liðær Wærham. ⁊ his riht fædern cyn gæð to Certice.

Her wæs geflit fullic senoþ æt Cealchyþe, ⁊ Iaenbryht ærcebisc forlet sumne dæl his biscdomes, ⁊ from

Offan kyninge Hygebryht wæs gecoren, ⁊ Ecgferþ to cyninge gehalgod:

Her forðferde Botwine abbot in Hripum. ⁊ her wæs geflitfullic sinoð æt Ceale hyðe. ⁊ Ianberht erceb forlet sumne dæl his biscopdomes. ⁊ fram Offan cininge Hygebriht wes ge coren. ⁊ Ecgferð to cining ge halgode. ⁊ in ðas tid wæren ærendracen ge send of Rome fram Adrianum papan to Ængla lande to niwianne þone geleafan ⁊ þa sibbe ðe scs Gregorius us sende þurh þone ƀ Augustinum. ⁊ hi 'man' mid wurðscipe under feng.

Her nom Beorhtric cyning Offan dohtor Eadburge; ⁊ on his dagum cuomon ærest ·iii· scipu, ⁊ þa se gerefa þærto rad, ⁊ hie wolde drifan to þæs cyninges tune þy he nyste hwæt hie wæron; ⁊ hiene mon ofslog; þæt wæron þa ærestan scipu Deniscra monna þe Angel cynnes lond gesohton:

Her nam Breohtric cining Offan dohter Eadburge. ⁊ on his dagum comon æerest ·iii· scipu Norðmanna of Hereða lande. ⁊ þa se ge refa þær to rad. ⁊ he wolde drifan to ðes cininges tune þy he nyste hwæt hi wæron. ⁊ hine man ofsloh þa. Ðæt wæron þa erestan scipu Deniscra manna þe Angel cynnes land ge sohton.

Not in Parker (A).

Her wæs sinoð ge gaderod on Norðhymbra lande æt Pincanheale on · iii'i' · nō Sept'. ⁊ Aldberht abb forðferde. Karolus per Alemanniam uenit ad fines Bauuarie.

Not in Parker (A).

Her Alfwold Norðanhymbra cining wæs ofslagan fram Sigan on ·ix· kl Octobr. ⁊ heofenlic leoht wæs gelome seogen ðær þer he ofslagen wæs. ⁊ he wæs be byrged on Hagust'dee. innan þære cyrican. ⁊ sinoð wæs ge gaderod æt Aclea. ⁊ Osred Alchredes sunu feng to rice æfter him, se wæs his nefa.

Her Iaenbryht ærcebisc̄ forþferde, ⁊ þy ilcan geare wæs gecoren Æþelheard abbud to bisc̄:

Her Ianbriht arcebiscop forðferde. ⁊ þy ilcan geare wæs ge coren Æðelheard abb to arceb. ⁊ Osred Norðan hymbra cining wæs be swicen ⁊ of rice adrefed. ⁊ Æðelred Aðelwaldes sunu eft feng to rice.

Not in Parker (A).

Her wæs Baldwulf ge halgod to b to Hwiterne on ·xvi· kl Avg. fram Eanbalde arceb. ⁊ fram Æðelberhte biscope.

Her Offa Miercna cyning het Æþelbryhte rex þæt heafod ofaslean.

Her Offa Myrcena cining het Æðelbrihte ꝥ heafod ofslean. ⁊ Osred þe wæs Norþanhymbra cining æfter wræc siðe ham cumenum ge læht wæs. and ofslagen on ·xviii· kl Octobr. ⁊ his lic ligð æt Tinan muþe. ⁊ Æðelred cining feng to niwan wife. seo wæs Ælfled ge haten. on ·iii· k Octobr.

Not in Parker (A).

Her wæron reðe forebecna cumene ofer Norðanhymbra land. ⁊ ꝥ folc earmlice bregdon; ꝥ wæron ormete lig rescas, ⁊ wæron ge seowene fyrene dracan on þam lyfte fleogende. þam tacnum sona fyligde myccl hunger. ⁊ litel æfter þam þæs ilcan geares on ·vi· idus Iañr earmlice heðenra manna hergung adiligode Godes cyrican. in Lindisfarena ee. þurh reaflac. ⁊ man sleht. ⁊ Sicga forðferde on vii'i' k Mr̃.

Her Adrianus papa ⁊ Offa cyning forþferdon; ⁊ Æþelred Norþan hymbra cyning wæs of slægen from his agenre þeode, ⁊ Ceolwulf bisc̄ ⁊ Eadbald bisc̄ of þæm londe aforon; ⁊ Ecgferþ feng to Miercna rice. ⁊ þy ilcan geare forþferde; ⁊ Eadbryht onfeng rice on Cent. þam was oþer noma nemned Præn.

Her Adrianus papa ⁊ Offa cining forðferden. ⁊ Æðelred Norðanhymbra cining wæs of slagan fram his agenre þeode on ·xiii· k Mai. ⁊ Ceolwulf ƀ ⁊ Eadbald biscop of þan lande aforon. ⁊ Ecgferð feng to Myrcene rice. ⁊ þy ilcan geare forðferde. ⁊ Eadbriht onfeng rice on Cent þam wæs oðer nama nemned Præn. ⁊ Æðelheard ealdorman forðferde on k Aug'. ⁊ þa hæðenan on Norðhymbrum hergodon. ⁊ Ecgferðes mynster æt Done muþe berefodon. ⁊ þær heora heretogena sum of slægen wearð. ⁊ eac heora scipu sume þurh oferweder wurdon to brocene. ⁊ heora feala þær adruncon. ⁊ sume cuce to þam stæðe comon. ⁊ þa man sona of sloh æt ðære ea muðan.

Not in Parker (A).

Her wæs seo mona aðistrod be twux hancred. ⁊ dagunge on ·v· kł Apr̃. ⁊ Eardwulf feng to Norþanhymbran cine dome on ·ii· idus Mai. ⁊ he wæs syððan ge bletsod. ⁊ to his cine stole ahofen on ·vii· k Iunii on Eoferwic fram Eanbalde arceb. ⁊ Æðelberhte. ⁊ Higbalde. ⁊ Badewulfe.

Her Ceolwulf Miercna cyning oferhergeade Cantware oþ Mersc, ⁊ gefengun Praen hiera cyning, ⁊ gebundenne hine on Mierce læddon;

Her forðferde Offa Myrcena [cining] on ·iiii· idus Augusti. se rixode ·xl· wintra. ⁊ Eanbald arceb on ·iiii· idus Aug' þæs ilcan geares. ⁊ his lic ligð on Eoferwic. ⁊ þes ilcan geares forð ferde Ceolwulf ƀ. ⁊ man ge halgode oþer [ne Ean] bald on þæs oðres stal on ·xix· | kł Septe. ⁊ þy ilcan geare Ceolwulf Myrcena cining ofer hergode Cantware ⁊ Mersc ware. ⁊ ge fengon Præn heora cining. ⁊ ge bu'n'den [ne] hine læddon on Myrce.

Her Romane Leone þæm papan his tungon forcurfon, ⁊ his eagan astungon, ⁊ hine of his setle afliemdon; ⁊ þa sona eft Gode fultomiendum he meahte geseon ⁊ sprecan, ⁊ eft was papa swa he ær wæs.

Her Romane Leone þam papan his tungan forcurfan. ⁊ his eagan ut astungon. and hine of his setle aflymdon. ⁊ þa sona eft Gode ge fultumiendum he mihte ge seon ⁊ sprecan. ⁊ eft wæs papa swa he ær wæs. ⁊ Eanbald onfeng pallium on ·vi· idus Sept. ⁊ Æðelberht ƀ for [ð] ferde on [·xvii· k. Nouemb. ⁊ Heardred man gehalgode on his steal to biscop. on] ·iii· k nov.

Not in Parker (A).

Her wæs mycel ge feoht on Norðhymbra lande on lengtene on ·iiii· No. Apr̃. æt Hweallæge. ⁊ þær man of sloh Alric Heardberhtes sunu. ⁊ oðre mænige mid him.

Her Æþelheard ærce bisc̄ ⁊ Cynebryht Wesseaxna bisc̄ foron to Rome ·

Her Æðelred arceƀ ⁊ Cynebriht Wæst Sæxna biscop foran to Roma.

Her Beorhtric cyning forþferde ⁊ Worr aldor mon; ⁊ Ecgbryht feng to Wesseaxna rice; ⁊ þy ilcan dæge rad Æþelmund aldor man of Hwiccium ofer æt Cynemæres forda, þa mette hine Weoxtan aldor man mid Wilsætum; þær wearþ micel gefeoht, ⁊ þær begen ofslægene þa aldor men, ⁊ Wilsætan namon sige ·

Her wæs se mona aðistrad on ðære oðre tid on niht on ·xvii· kl. Febr̄. ⁊ Brihtric cining forðferde. ⁊ Wo'r'r ealdorman. ⁊ Ecgberht feng to WæstSeaxna rice. ⁊ þy ilcan dæg rad Æþælmund ealdorman of Hwiccum of 'er' æt Cynemæres forda. þa ge mette hine Weohstan ealdorman mid Wilsætum. ⁊ þær wærð mycel gefeoht. ⁊ þær begen ofslagene wæron. þe ealdor men. ⁊ Wilsæte na [mo] n sige. Karolus rex imperator factus est, et a Romanis appellatus Augustus; qui illos qui Leonem papam dehonestauerant morte damnauit, sed precibus papæ morte indulta exilio retrusit. Ipse enim papa Leo imperatorem eum sacrauerat.

Her wæs gehadod Beornmod bisc̄ to Hrofes ceastre ·

Her aðeostrade se mona on dagunge on ·xiii· kl Ianr̄. ⁊ Beornmod wæs gehalgod to ƀ to Rofeceastre þy ilcan geare.

Her Æþelheard ærce bisc̄ forþferde, ⁊ Wulfred wæs to ærce bisc̄ gehadod, ⁊ Forþred abbud forþferde ·

Her forðferde Higbald Lindisfarna ƀ on ·viii· k Iulii. ⁊ man gehalgode on his stæal Ecgberht on ·iii· idus Iunii. ⁊ Æðelherd arceƀ forðferde on Cent. ⁊ Wulfred [wæs] to arceƀ gehalgod.

Her Wulfred ærce bisc̄ pallium onfeng ·

Her Wulfred arceƀ onfeng pallium.

Her Cuþred cyning forþferde on Cantwarum, ⁊ Ceolburg abbudesse, ⁊ Heabryht aldor man ·

Her Cuðred cining forðferde on Cantwarum. ⁊ Ceolburh abbe. ⁊ Heardberht.

Not in Parker (A).

Her se mona aðistrode on kl Sept̄. ⁊ Eardwulf Norðanhymbra cining wæs of his rice adrifen. ⁊ Eanberht Hagusteald bs̄ forðferde.

Not in Parker (A).

Karolus cum Niceforo imperatore Constantinopol pacem fecit.

Her Carl cyning forþferde, ⁊ he ricsode ·xlv· wint. ⁊ Wulfred arce bisc̄ ⁊ Wigbryht Wesseaxna bisc̄ foron begen to Rome;

Her Karl cining forðferde. ⁊ he rixade ·xlv· wintra. ⁊ Wulfred arceƀ. ⁊ Wigbriht WæstSæxna ƀ foran to Rome. Cireneius Karolo imperatori legatos suos cum pace mittit. Karolus imperator obiit.

Her Wulfred ærce bisc̄ mid bledsunge þæs papan Leon hwearf eft to his agnum bisc̄dome; ⁊ þy geare gehergade Ecgbryht cyning on West Walas from easte weardum oþ weste wearde ·

Her Wulfred arceƀ mid bletsunge þæs papan Leon hwearf eft to his agenum biscopdome. ⁊ þy geare gehergode Ecgberht cining on WestWalas fram easteweardum oð westewearde.

Her Leo se æþela papa ⁊ se halga forþferde, ⁊ æfter him Stephanus feng to rice ·

Her Leo se æðela papa ⁊ se halga forðferde. ⁊ æfter him Stephanus feng to rice.

Not in Parker (A).

Her Stephanus papa forðferde. ⁊ æfter him wæs Paschalis to papan gehalgod. ⁊ þy ilcan geare forbarn Angelcynnes scolu.

Not in Laud (E).

Her Stephanus papa forþferde, ⁊ æfter him was Paschalis to papan gehadod; ⁊ þy ilcan geare forborn Ongol cynnes scolu ·

Her Cenwulf Miercna cyning forþferde, ⁊ Ceolwulf feng to rice, ⁊ Eadbryht aldor mon forþ ferde ·

Her Cenwulf Myrcena cining forðferde. ⁊ Ceolwulf feng to rice. ⁊ Eadberht ealdorman forðferde.

Her wearþ Ceolwulf his rices besciered ·

Her wærð Ceolwulf his rices bescered.

Her tuegen aldormen wurdon ofslægene, Burghelm ⁊ Muca; ⁊ senoþ wæs æt Clofes hoo ·

Her twægen aldormen wurdon ofslagene Burhhelm ⁊ Muca. ⁊ sinoð [wæs] æt Clofesho.

Her wæs Wala gefeoht ⁊ Defna æt Gafulforda; ⁊ þy ilcan geare gefeaht Ecbryht cyning ⁊ Beornwulf cyning on Ellendune, ⁊ Ecgbryht sige nam, ⁊ þær wæs micel wæl geslægen; þa sende he Æþelwulf his sunu of þære fierde, ⁊ Ealhstan his bisc̄, ⁊ Wulfheard his aldormon to Cent micle werede, ⁊ hie Baldred þone cyning norþ ofer Temese adrifon, ⁊ Cantware him to cirdon, ⁊ Suþrige, ⁊ Suþ Seaxe, ⁊ East Seaxe, þy hie from his mægum ær mid unryhte anidde wærun; ⁊ þy ilcan geare East Engla cyning, ⁊ seo þeod gesohte Ecgbryht cyning him to friþe ⁊ to mund boran for Miercna ege, ⁊ þy geare slogon East Engle Beornwulf Miercna cyning ·

Her wæs Weala gefeoht. ⁊ Defena æt Gafolforda. ⁊ þy ilcan geare gefeaht Ecgberht WestSeaxna cining. ⁊ Beornulf Myrcena cining æt Ellandune. ⁊ Ecgberht sige nam. ⁊ þær wæs mycel wæl geslægen. þa sende he Æðelwulf his sunu of þære ferde. ⁊ Ealhstan his ƀ. ⁊ Wulfheard his ealdorman to Cent mycele wærede. ⁊ hi Baldred þone cining norð ofer Temese adrifen. ⁊ Cantwara him to cyrdon. ⁊ Suðrig. ⁊ Suðseaxe. ⁊ Eastseaxe. þy hi fram his magum ær mid unrihte anydde wæron. ⁊ þy ilcan geare EastEngla cining. ⁊ seo þeod gesohte Ecgbriht cining him to friðe. ⁊ to mundburan for Myrcena ege. ⁊ þi ilcan geare slogon EastEngle Beornulf Myrcena cining.

Her Ludecan Miercna cyning ⁊ his ·v· aldormen mon ofslog mid him ⁊ Wiiglaf feng to rice ·

Her Ludecan Myrcena cining. ⁊ his ·v· ealdormen man ofsloh mid him. ⁊ Wiglaf feng to rice.

Her mona apistrode on middes wintres mæsse niht; ⁊ þy ilcan geare geeode Ecgbryht cyning Miercna rice ⁊ al þæt besuþan Humbre wæs, ⁊ he wæs se eahteþa cyning sepe Bretwalda wæs; Ærest Ælle Suþ Seaxna cyning se þus micel rice hæfde, se æftera wæs Ceawlin Wesseaxna cyning, se þridda wæs Æþelbryht Cantwara cyning, se feorþa wæs Rædwald East Engla cyning, fifta was Eadwine Norþanhymbra cyning, siexta wæs Oswald se æfter him ricsode, seofoþa wæs Oswio Oswaldes broþur, eahtoþa wæs Ecgbryht Wesseaxna cyning; ⁊ se Ecgbryht lædde fierd to Dore wiþ Norþanhymbre, ⁊ hie him þær eaþmedo budon ⁊ geþuærnesse, ⁊ hie on þam tohwurfon ·

Her se mona aðistrode on middeswintres messaniht. ⁊ þy geare geeode Ecgbriht cining Myrcena rice. ⁊ eal ꝥ besuðan Humbre wæs. ⁊ he wæs se eahtoða cining se þe Brytenwealda wæs. ⁊ ærest wæs Ælle Suðseaxna cining se þus mycel hæfde. oþær wæs Ceawlin WestSeaxna cining. þridde Æþelbriht Cantwara cining: feorðe Redwald EastEngla cining. fifta Ædwine Norþanhymbra cining. sixta wæs Oswald þe æfter him rixade. seofaðe wæs Oswiu Oswaldes broþor. eahtoða wæs Ecgbriht WestSeaxna cining. ⁊ se Ecgbriht lædde fyrde to Dore wið Norþanhumbra. ⁊ hi him þær eadmedo budon. ⁊ þwærnessa. ⁊ hi mid þan tohwurfon.

Her eft Wilaf onfeng Miercna rices, ⁊ Æþelwald bisc̄ forþferde, ⁊ þy ilcan geare lædde Ecgbryht cyning fierd on Norþ Walas, ⁊ he hie to eaþmodre hersumnesse gedyde ·

Her Wiglaf eft onfeng Myrcena rice. ⁊ Æðelbald ƀ forðferde. ⁊ þy ilcan geare Ecgbriht cining lædde fyrde on Norð Wealas. ⁊ he heom ealle to eadmodere hyrsumnesse ge dyde.

Her Wulfred ærceb̄isc̄ forþferde ·

Her Wulfred ærceƀ forðferde.

Her Ceolnoþ wæs gecoren to bisc̄ ⁊ gehadod, ⁊ Feologid abbud forþferde ·

Her Ceolnoþ wæs to ƀ gecoren ⁊ gehadod. ⁊ Feolagild abbot forðferde.

Her Ceolnoþ ærceb̄isc̄ onfeng pallium ·

Her Ceolnod ærceƀ onfeng pallium.

Her hæþne men oferhergeadon Sceap ige ·

Her hæðene men ofer hergodon Sceap ege.

Her gefeaht Ecgbryht cyning wiþ ·xxxv· scip hlæsta æt Carrum. ⁊ þær wearþ micel wæl geslægen, ⁊ þa Denescan ahton wælstowe gewald; ⁊ Hereferþ ⁊ Wigþen tuegen biscepas forþferdon, ⁊ Dudda ⁊ Osmod tuegen aldormen forþferdon ·

Her Ecgbriht cining ge feaht wið ·xxv· sciphlæsta æt Carrum. ⁊ þær wærhð mycel wæl ge slagen. ⁊ þa Deniscan ahton wælstowe ge weald. ⁊ Hereferð ⁊ Wigferð ·ii· ƀ forðferdon. ⁊ Duda ⁊ Osmod ·ii· ealdormen forðferdon.

Her cuom micel sciphere on West Walas, ⁊ hie to anum gecierdon, ⁊ wiþ Ecgbryht West Seaxna cyning winnende wæron; þa he þæt hierde, ⁊ mid fierde ferde, ⁊ him wiþ feaht æt Hengestdune, ⁊ þær gefliemde ge þa Walas ge þa Deniscan ·

Her com micel sciphere on Wæst Wealas. ⁊ hi to anum ge cyrdon. ⁊ wið Ecgbriht Wæst Seaxna cining winnende wæron. þa fyrdode him to geanes. ⁊ wið him feaht æt Hengestesdune. ⁊ þær ægðer aflymde ge þa Wealas ge þa Deniscan.

Her Ecgbryht cyning forþferde, ⁊ hine hæfde ær Offa Miercna cyning ⁊ Beorhtric Wesseaxna cyning afliemed ·iii· gear of Angelcynnes lande on Froncland ær he cyning wære, ⁊ þy fultumode Beorhtric Offan þy he hæfde his dohtor him to cuene; ⁊ se Ecgbryht ricsode ·xxxvii· wiñt [⁊] ·vii· monaþ. ⁊ feng Eþelwulf Ecgbrehting to Wesseaxna rice, ⁊ he salde his suna Æþelstane Cantwara rice ⁊ East Seaxna ⁊ Suþrigea ⁊ Suþ Seaxna ·

Her Ecgbriht cining forðferde. ⁊ hine ær hæfde Offa Myrcena cining. ⁊ Byrhtric Wæst Sæxna cining aflymde ·iii· gear of Angel cynnes lande on Franc land ær he cining wære. ⁊ se Ecgbriht rixade ·xxxvii· winter. ⁊ ·vii· monðas. ⁊ feng Æþelwulf his sunu to West Seaxna rice. and Æðelstan his oðer sunu feng to Cantwara rice. ⁊ to Suðrigan. ⁊ to Suðseaxna rice.

Her Wulfheard aldorman gefeaht æt Hamtune wiþ ·xxxiii· sciphlæsta, ⁊ þær micel wæl geslog, ⁊ sige nom; ⁊ þy geare forþferde Wulfheard; ⁊ þy ilcan geare gefeaht Æþelhelm dux wiþ Deniscne here on Port mid Dornsætum, ⁊ gode hwile þone here gefliemde, ⁊ þa Deniscan ahton wælstowe gewald, ⁊ þone aldormon ofslogon ·

Her Wulfheard ealdorman ge feaht æt Hamtune wið ·xxxiii· sciphlesta. ⁊ þær mycel wæl ge sloh. ⁊ sige nam. ⁊ þy geare forðferde Wulfheard. ⁊ Æþelhelm ealdorman ge feaht wið þa Deniscan on Port mid Dorsætum. ⁊ se ealdorman wærð ofslægen. ⁊ þa Deniscan ahton wælstowe geweald.

Not in Laud (E).

Her Herebryht aldorman wæs ofslægen from hæþnum monnum, ⁊ monige mid him on Mersc warum, ⁊ þy ilcan geare eft on Lindesse, ⁊ on EastEnglum, ⁊ on Cantwarum wurdon monige men of slægene from þam herige.

Her wæs micel wælsliht on Lundenne, ⁊ on Cwantawic, ⁊ on Hrofes ceastre.

Her wæs mycel wælsleht on Lundene. ⁊ on Cant wic ⁊ on Rofes cæstre.

Her Æþelwulf cyning gefeaht æt Carrum wiþ ·xxxv· sciphlæsta, ⁊ þa Deniscan ahton wælstowe gewald.

Her Ædelwulf cining gefeaht æt Carrum wið ·xxxv· sciphlesta. ⁊ þa Deniscan ahton wælstowe geweald.