Bókastaðir

Hēr Cynewulf benam Sigebryht his rīces ⁊ West Seaxna wiotan for unryhtum dǣdum, būton Ham tūn scīre; ⁊ hē hæfde þā oþ hē ofslōg þone aldormon þe him lengest wunode; ⁊ hiene þā Cynewulf on Andred ādrǣfde, ⁊ hē þǣr wunade oþ þæt hiene ān swān ofstang æt Pryfetes flōdan; ⁊ hē wræc þone aldormon Cumbran; ⁊ se Cynewulf oft miclum gefeohtum feaht uuiþ Bretwalum;

⁊ ymb ·xxxi· wiñt þæs þe hē rīce hæfde, hē wolde ādrǣfan ānne æþeling se was Cyneheard hāten, ⁊ se Cyneheard wæs þæs Sigebryhtes brōþur; ⁊ þā geāscode hē þone cyning lȳtle werode on wīfcȳþþe on Merantūne, ⁊ hine þǣr berād, ⁊ þone būr ūtan beēode ǣr hine þā men onfunden þe mid þām kyninge wǣrun; ⁊ þā ongeat se cyning þæt, ⁊ hē on þā duru ēode, ⁊ þā un hēanlīce hine werede, oþ hē on þone æþeling lōcude, ⁊ þā ūtrǣsde on hine, ⁊ hine miclum gewundode. ⁊ hīe alle on þone Cyning wǣrun feohtende oþ þæt hīe hine ofslægenne hæfdon; ⁊ þā on þæs wīfes gebǣrum onfundon þæs cyninges þegnas þā unstilnesse, ⁊ þā þider urnon swāhwelc swā þonne gearo wearþ ⁊ radost; ⁊ hiera se æþeling gehwelcum feoh ⁊ feorh gebēad, ⁊ hiera nǣnig hit geþicgean nolde. Ac hīe simle feohtende wǣran oþ hīe alle lǣgon būtan ānum Bryttiscum gīsle, ⁊ se swīþe gewundad wæs.

Ðā on morgenne gehīerdun þæt þæs cyninges þegnas þe him be æftan wǣrun þæt se cyning ofslægen wæs, þā ridon hīe þider, ⁊ his aldormon Ōsrīc, ⁊ Wīferþ his þegn, ⁊ þā men þe hē be æftan him lǣfde ǣr, ⁊ þone æþeling on þǣre byrig mētton þǣr se cyning ofslægen læg, ⁊ þā gatu him tō belocen hæfdon ⁊ þā þǣr tō ēodon; ⁊ þā gebēad hē him hiera āgenne dōm fēos ⁊ londes gif hīe him þæs rīces ūþon, ⁊ him cȳþdon þæt hiera mǣgas him mid wǣron þā þe him from noldon; ⁊ þā cuǣdon hīe þæt him nǣnig mǣg lēofra nǣre þonne hiera hlāford, ⁊ hīe nǣfre his banan folgian noldon, ⁊ þā budon hīe hiera mǣgum þæt hīe gesunde from ēodon; ⁊ hīe cuǣdon þæt tæt ilce hiera gefērum geboden wǣre, þe ǣr mid þām cyninge wǣrun; þā cuǣdon hīe þæt hīe 'hīe' þæs ne onmunden þon mā þe ēowre gefēran þe mid þām cyninge ofslægene wǣrun. ⁊ hīe þā ymb þā gatu feohtende wǣron oþþæt hīe þǣr inne fulgon, ⁊ þone æþeling ofslōgon, ⁊ þā men þe him mid wǣrun alle būtan ānum, se wæs þæs aldor monnes god sunu, ⁊ hē his feorh generede ⁊ þēah hē wæs oft gewundad.

⁊ se Cynewulf rīcsode ·xxxi· wiñt. ⁊ his līc līþ æt Wintanceastre, ⁊ þæs æþelinges æt Ascan mynster, ⁊ hiera ryht fæder [en] cyn gǣþ tō Cerdice; ⁊ þȳ ilcan gēare mon ofslōg Æþelbald Miercna cyning on Seccandūne, ⁊ his līc līþ on Hrēopadūne; ⁊ Beornrǣd fēng tō rīce, ⁊ lȳtle hwīle hēold ⁊ ungefēalīce; ⁊ þȳ ilcan gēare Offa fēng tō rīce, ⁊ hēold ·xxxviiii· wiñt. ⁊ his sunu Egfer [þ] hēold ·xli· daga ⁊ c · daga. Se Offa wæs Þincg ferþing, Þincgferþ Eanwulfing, Eanwulf Ōsmōding, Ōsmōd Ēawing, Ēawa Pybing, Pybba Creoding, Creoda Cynewalding, Cynewald Cnebing, Cnebba Iceling, Icel Ēomǣring, Ēomǣr Angelþōwing, Angel þēow Offing, Offa Wǣrmunding, Wǣrmund Wyhtlǣging, Wihtlǣg Wōdening:

Hēr Cynewulf benam Sigebrihte his mǣge his rīce. ⁊ WæstSeaxna witan for unrihtum dǣdum būton Hamtūn scȳre. ⁊ hē hafde þā oð hē ofslōh ðone ealdor man þe him lengs [t] wunode. ⁊ hine þā Cynewulf on Andred ādrēfede. ⁊ hē þǣr wunode oþ ꝥ ān swān hine ofstang æt Pryftes flōdan. sæ swān wræc ðone ealdorman Cumbran. ⁊ se Cynewulf oft feaht mycclum ge feahtum wið Britwealas.

⁊ ymb ·xvi· wintra þæs þe hē rīce hæfde. hē wolde ādrǣfan ǣnne æðeling se wæs Cyneheard gehāten. se Cyneheard wes þæs Sigebrihtes brōðor. ⁊ þā ācsode hē þone cining lȳt wyrede on wīf cȳððan on Meran tūne. ⁊ hine þǣr berāð. ⁊ þone būr ūto'n' be ēodon. ǣr hine þā men afundan þe mid þām cyninge wǣron. ⁊ þā ongeat se cyning ꝥ. ⁊ hē on ðā duru ēode, ⁊ þā unhēanlīce hine werode. oð hē on þone æþeling lōcade. ⁊ þā ūt rēsde on hine. ⁊ hine mycclum gewundode. ⁊ hē ealle on ðone cining feohtende wǣron. oð þet hīg hine ofslægen hæfdon. ⁊ þā on ðæs wīfes ge bǣron onfundon þæs ciningas þegnas þā unstilnessa. ⁊ þā þider urnon. swā hwilc swā ðonne gearo wearð hraðost. ⁊ se æðeling gehwilcan feoh. ⁊ feorh bēad, ⁊ hēo nǣnig þicgan noldan. ac hēo symle feohtende wǣron. oþ hīg ealle ofslagene wǣron. būton ānum Brytwyliscum gīsle.

⁊ se swȳðe 'ge'wundod wæs. þā on morgen gehȳrdon ꝥ þes ciniges þegnas þe him bæfton wǣron ꝥ se cining ofslagen wæs. þā ridon [hī] þider ⁊ his ealdorman Ōsrīc. ⁊ Wīferð his þegn. ⁊ þā men þe hē him beæfton lǣfde ǣr. ⁊ þone æðeling on þǣre byrig ge mētton þǣr se cining ofslagen læg. ⁊ hēo þā gatu heom tō belocen hæfdon. ⁊ ðā ðēr tō ēodon. ⁊ þā bēad hē heom heora āgene dōm fēos. ⁊ landes gif hēo him þæs rīces ūðon. ⁊ heom cȳdde ꝥ heora māga him mid wǣron ðā þe him fram noldon. ⁊ þā cwēðon hīg. ꝥ heom nǣnig mǣg lēofra nǣre þone heora hlāford. ⁊ hēo nǣfre his banan folgian noldon. ⁊ þā budon hī heora māgon ꝥ hī heom ge sunde fram ēodon. ⁊ hī cwǣdon ꝥ ꝥ ilce heora gefērum geboden wǣre þe ǣr mid þām cininge wǣron. Ðā cwǣdon hī ꝥ ꝥ hī þæs ne gemundon þonne mā þe heora gefēren þe mid þām cininge wǣron ofslagene. hī þā ymb ðā gatu feohtende wǣron oð hī þǣr in flugon. ⁊ þone æþeling ofslōgon. ⁊ þā men ðe mid him wǣron ealle būton ānum. se wæs þes ealdormannes godsunu. ⁊ hē his feorh generede. ⁊ hē wæs oft gewundod.

⁊ se Cynewulf rīxade ·xxxi· wintra. ⁊ his lic ligð on Wintan ceastre. ⁊ þæs æðelingas on Axan mynster. ⁊ heora riht fæderan cyn gǣð tō Certice.

⁊ þȳ ilcan gēare man ofslōh Æðelbald Myrcene cining on Secan dūne. ⁊ his lic restað on Rēopandūne. ⁊ hē rīxade ·xli· wintra. ⁊ þā fēng Beornrēd tō rīce. ⁊ lītle hwīle hēold ⁊ unge fēalīce. ⁊ þā ilcan gēare Offa geflȳmde Beornrēd ⁊ fēng tō þām rīce. ⁊ hēold ·xxxix· wintra. ⁊ his sunu Ecgferð hēold ·xli· daga. ⁊ ·c· daga. se Offa wæs Þingc ferþing.

Not in Parker (A).

Hēr Ēadberht Norðhymbra cining fēng tō scære. ⁊ Ōsulf his sunu fēng tō þām rīce. ⁊ rīxade ·i· gēar. ⁊ hine ofslōgon his hīwan on ·ix· kł Augusti.

Hēr Cūþbryht arcebisc̃ forþ fērde:

Hēr Cūðbriht ærceƀ forðfērde.

Hēr Bregowine wæs tō erce bisc̄ gehādod tō Sc̄e Michaeles tīde:

Hēr Bregowine wæs tō ærceƀ gehālgod tō sce Michaeles tȳde. ⁊ Moll Æðelwold fēng tō rīce on Norð hymbrum. ⁊ rīxade ·vi· winter. ⁊ hit þā forlēt.

Hēr Æþelbryht Cantwara cyning forþfērde: [se was Wihtrēdes sunu cing [es].]

Hēr Æðelbriht Cantwara cining forðfērde. ⁊ Cēolwulf ēac forðfērde.

Hēr wæs se mycla winter:

Hēr wæs se myccla winter. ⁊ Moll Norþhymbra cining ofslōh Ōswine æt Ædwines clife. on octauo idus Augusti.

Not in Parker (A).

Hēr Ianbe [r] ht wæs gehādod tō ærceƀ on ðon ·xl· dæg ofer midewinter ⁊ Friðewald biscop æt Wīterne forðfērde on nō Mai. se wæs gehālgod on Ceastrum on ·xviii· ꝁ Sep̄t. þām ·vi· wintra Cēolwulfes rīces. ⁊ hē wæs ƀ ·xxix· wintra; þā man gehālgode Pyhtwine tō ƀ æt Ælfetee on ·xvi· ꝁ Aug' tō Hwīterne.

Not in Laud (E).

Hēr Ianbryht wæs gehādod tō ærce bisc̄ on þone fēowertegan dæg ofer midne winter:

Not in Laud (E).

Hēr Iaenbryht ærce bisc̄ onfēng pallium:

Not in Parker (A).

Hēr fēng Alhrēd tō Norðhymbra rīce. ⁊ rīxade eahta winter.

Not in Parker (A).

Hēr forðfērde Ecgberht ærceƀ. in Eoferwīc on ·xiii· kł Decemƀ. se wæs ƀ ·xxxvi· wintra. ⁊ Friðeberht in Hagustaldes éé. se wæs biscop ·xxxiii· wintra. ⁊ man gehālgode Æðelberht tō Eoferwīc. ⁊ Ealhmund tō Hagustaldesee.

[Hēr forþfērde Ēadberht 'Ēating' cing.]

Hēr forðfērde Ēadberht Ēating on ·xiiii· kł Septembris.

Not in Parker (A).

Initium regni Karoli regis.

Hēr Milrēd bisc̄ forþ fērde:

Hēr Mildrēd ƀ forðfērde.

Not in Laud (E).

Hēr oþ īewde rēad Crīstes mǣl on hefenum æfter sunnan setl gonge; ⁊ þȳ gēare gefuhton Mierce ⁊ Cantware æt Ottan forda; ⁊ wu'n'derleca nǣdran wǣron gesewene on Sūþ Seaxna londe.

Not in Parker (A).

Hēr Norðhymbra fordrifon heora cining Alhrēd of Eoferwīc on Ēastertīd. ⁊ genāmon Æðelrēd Molles sunu heom tō hlāforde. ⁊ se rīxade ·iiii· gēar. ⁊ men gesēgon rēad Crīstes mēl on heofenum æfter sunnan setlangange. on þȳ gēare gefuhton Myrce ⁊ Cantwara æt Ottanforda. ⁊ wundorlice nǣdran wǣron geseogene on Sūðseaxna lande.

Not in Parker (A).

Hēr forðfērde Pehtwine biscop on ·xiii· ꝁ Octoƀ. se wæs ƀ ·xiiii· wintra.

Hēr Cynewulf ⁊ Offa gefuhton ymb Benesing tūn ⁊ Offa nam þone tuun:

Hēr Cynewulf ⁊ Offa geflȳton ymb Benesingtūn. ⁊ Offa genam þone tūn. ⁊ þȳ ilcan gēare man gehālgode Æðelberht tō biscope tō Hwīterne in Eoferwīc on ·xvii· kł Iulii.

On þas kinges dæi Offa. wæs an abbot on Medeshamstede Beonne gehaten. se ilca Beonne þurh ealle þa muneke red of þere ministre þa let he Cuðbriht ealdorma [n] ·x· bonde land at Swinesheafde mid læswe ⁊ mid mædwe. ⁊ mid eal þet ðær to læi. ⁊ swa ꝥ seo Cuðbriht geaf þone abbote ·L· punde þær fore. ⁊ ilca gear anes nihtes feorme ouðer ·xxx· scyllinge penega. swa eac ꝥ eafter his dæi scolde seo land on gean in to þa mynstre. At þis gewitnesse wæs seo kining Offa. ⁊ seo kining Egferð. ⁊ seo ærceƀ Hygeberht. ⁊ Ceolwulf biscop. ⁊ Inwona ƀ. ⁊ Beonna abbot. ⁊ feola oþre biscopes ⁊ abbotes. ⁊ feola oðre ricemen. On þes ilca Offa dæi. wæs an ealdorman Brordan wæs gehaten. he geornde at se kyning. ꝥ he scolde for his luuen freon his ane mynstre Wocingas het. forþi ðet he hit wolde giuen into Medeshamstede. ⁊ Sce Peter. ⁊ þone abbote þe þa was. he was Pusa gehaten; seo Pusa wæs æfter Beonna. and seo kining hine luuede swiðe. ⁊ seo kyning freode þa ꝥ mynstre Wocingas wið cining ⁊ wið biscop ⁊ wið eorl. ⁊ wið ealle men. swa ꝥ nan man ne hafde þær nan onsting. buton S. Peter ⁊ þone aƀ. Ðis wæs don on þe cininges tune Freoric burna hatte.

Not in Parker (A).

Hēr Æðebald ⁊ Hearberht of slōgon ·iii· hēah ge rēfan Ealdulf Bosing æt Cininges clife. ⁊ Cynewulf. ⁊ Ecgan æt Hela þyrnum on ·xi· ꝁ Ap̃r. ⁊ þā fēng Alfwold tō rīce. ⁊ Æðelrēd bedrāf on lande. ⁊ hē rīxade ·x· winter. Karolus in Hispanias intrauit. Karolus Saxoniam uenit. Karolus Pampileniam urbem destruxit, atque Cesar Augustam. exercitum suum coniunxit, et acceptis obsidibus, subiugatis Sarracenis, per Narbonam Wasconiam Franciam rediit.

Not in Parker (A).

Hēr Ealdseaxe ⁊ Francon gefuhton. ⁊ Norð hymbra hēah ge rēfan forbearndon Beorn ealdorman on Sele tūne on ·ix· ꝁ Iañr. ⁊ Æðelberht erceƀ forðfērde in Ceastre. ⁊ on þæs stall Eanbald wæs gehālgod. ⁊ Cynebald ƀ gesæt in Lindisfarna ee.

Hēr Ald Seaxe ⁊ Francan gefuhtun:

Hēr Alchmund biscop in Hagstd ee forðfērde on ·vii· idus Sept'. ⁊ Tilberht man gehālgode on his steal on ·vi· Nᵒ Octoƀ. ⁊ Higbald man gehālgode tō biscop æt Soccabyrig tō Lindisfarna ee. and Ælfwold cining sende man æfter pallium tō Rōme ⁊ Eanbald dyde [tō] ærceƀ.

Not in Parker (A).

Hēr forðfērde Wærburh Cēolrēdes cwēn. ⁊ Cynewulf ƀ in Lindisfarna ee. ⁊ seonod wæs at Āclēa.

Hēr Cyneheard ofslōg Cynewulf cyning, ⁊ hē þǣr wearþ ofslægen, ⁊ ·lxxxiiii· monna mid him; ⁊ þā onfēng Beorhtrīc Wesseaxna rīces, ⁊ hē rīcsode ·xvi· gēar, ⁊ his līc līþ æt Werham, ⁊ his ryht fædren cyn gǣþ tō Cerdice. [Tō þysan tīman rīxode Ealhmund cing innon Cent.]

Hēr Cyneheard ofslōh Cynewulf cining. ⁊ hē wærð þǣr ofslagen. ⁊ lxxxiiii · manna mid him. ⁊ þā onfēng Brihtrīc West Seaxna cining tō rīce. ⁊ hē rīxade ·xvi· gēar. ⁊ his lic liðær Wærham. ⁊ his riht fædern cyn gǣð tō Certice.

Hēr wæs geflit fullic senoþ æt Cealchȳþe, ⁊ Iaenbryht ærcebisc̃ forlēt sumne dǣl his bisc̃domes, ⁊ from Offan kyninge Hygebryht wæs gecoren, ⁊ Ecgferþ tō cyninge gehālgod:

Hēr forðfērde Botwine abbot in Hripum. ⁊ hēr wæs geflitfullic sinoð æt Cealc hȳðe. ⁊ Ianberht erceƀ forlēt sumne dǣl his biscopdōmes. ⁊ fram Offan cininge Hygebriht wes ge coren. ⁊ Ecgferð tō cining ge hālgode. ⁊ in ðās tīd wǣren ǣrendracen ge send of Rōme fram Adrianum pāpan tō Ængla lande tō nīwianne þone gelēafan ⁊ þā sibbe ðe sc̃s Gregorius ūs sende þurh þone ƀ Augustinum. ⁊ hī 'man' mid wurðscipe under fēng.

Hēr nōm Beorhtrīc cyning Offan dohtor Ēadburge; ⁊ on his dagum cuōmon ǣrest ·iii· scipu, ⁊ þā se gerēfa þǣrtō rād, ⁊ hīe wolde drīfan tō þæs cyninges tūne þȳ hē nyste hwæt hīe wǣron; ⁊ hiene mon ofslōg; Þæt wǣron þā ǣrestan scipu Deniscra monna þe Angel cynnes lond gesōhton:

Hēr nam Breohtrīc cining Offan dohter Ēadburge. ⁊ on his dagum cōmon ǣrest ·iii· scipu Norðmanna of Hereða lande. ⁊ þā se ge rēfa þǣr tō rād. ⁊ hē wolde drīfan tō ðes cininges tūne þȳ hē nyste hwæt hī wǣron. ⁊ hine man ofslōh þā. Ðæt wǣron þā ērestan scipu Deniscra manna þe Angel cynnes land ge sōhton.

Not in Parker (A).

Hēr wæs sinoð ge gaderod on Norðhymbra lande æt Pincanheale on · iii'i' · nō Sept'. ⁊ Aldberht aƀƀ forðfērde. Karolus per Alemanniam uenit ad fines Bauuarie.

Not in Parker (A).

Hēr Alfwold Norðanhymbra cining wæs ofslagan fram Sigan on ·ix· ꝁ Octobr̃. ⁊ heofenlic lēoht wæs gelōme seogen ðǣr þēr hē ofslagen wæs. ⁊ hē wæs be byrged on Hagust'dee. innan þǣre cyrican. ⁊ sinoð wæs ge gaderod æt Āclēa. ⁊ Ōsrēd Alchrēdes sunu fēng tō rīce æfter him, se wæs his nefa.

Hēr Iaenbryht ærcebisc̄ forþfērde, ⁊ þȳ ilcan gēare wæs gecoren Æþelheard abbud tō bisc̄:

Hēr Ianbriht arcebiscop forðfērde. ⁊ þȳ ilcan gēare wæs ge coren Æðelheard aƀƀ tō arceƀ. ⁊ Ōsrēd Norðan hymbra cining wæs be swicen ⁊ of rīce ādrēfed. ⁊ Æðelrēd Aðelwaldes sunu eft fēng tō rīce.

Not in Parker (A).

Hēr wæs Baldwulf ge hālgod tō ƀ tō Hwīterne on ·xvi· ꝁ Aṽg. fram Eanbalde arceƀ. ⁊ fram Æðelberhte biscope.

Hēr Offa Miercna cyning hēt Æþelbryhte rex þæt hēafod ofāslēan.

Hēr Offa Myrcena cining hēt Æðelbrihte ꝥ hēafod ofslēan. ⁊ Ōsrēd þe wæs Norþanhymbra cining æfter wræc sīðe hām cumenum ge læht wæs. and ofslagen on ·xviii· ꝁ Octobr̃. ⁊ his lic ligð æt Tīnan mūþe. ⁊ Æðelrēd cining fēng tō nīwan wīfe. sēo wæs Ælflēd ge hāten. on ·iii· k Octobr̃.

Not in Parker (A).

Hēr wǣron rēðe forebēcna cumene ofer Norðanhymbra land. ⁊ ꝥ folc earmlīce bregdon; ꝥ wǣron ormēte līg rǣscas, ⁊ wǣron ge seowene fȳrene dracan on þām lyfte flēogende. þām tācnum sōna fyligde myccl hunger. ⁊ lītel æfter þām þæs ilcan gēares on ·vi· idus Iañr earmlīce hēðenra manna hergung ādīligode Godes cyrican. in Lindisfarena ee. þurh rēaflāc. ⁊ man sleht. ⁊ Sicga forðfērde on vii'i' k Mr̃.

Hēr Adrianus pāpa ⁊ Offa cyning forþfērdon; ⁊ Æþelrēd Norþan hymbra cyning wæs of slægen from his āgenre þēode, ⁊ Cēolwulf bisc̄ ⁊ Ēadbald bisc̄ of þǣm londe āfōron; ⁊ Ecgferþ fēng tō Miercna rīce. ⁊ þȳ ilcan gēare forþfērde; ⁊ Ēadbryht onfēng rīce on Cent. þām was ōþer noma nemned Præn.

Hēr Adrianus pāpa ⁊ Offa cining forðfērden. ⁊ Æðelrēd Norðanhymbra cining wæs of slagan fram his āgenre þēode on ·xiii· k Mai. ⁊ Cēolwulf ƀ ⁊ Ēadbald biscop of þan lande āfōron. ⁊ Ecgferð fēng tō Myrcene rīce. ⁊ þȳ ilcan gēare forðfērde. ⁊ Ēadbriht onfēng rīce on Cent þām wæs ōðer nama nemned Præn. ⁊ Æðelheard ealdorman forðfērde on k Aug'. ⁊ þā hǣðenan on Norðhymbrum hergodon. ⁊ Ecgferðes mynster æt Done mūþe berēfodon. ⁊ þǣr heora heretogena sum of slægen wearð. ⁊ ēac heora scipu sume þurh oferweder wurdon tō brocene. ⁊ heora feala þǣr ādruncon. ⁊ sume cuce tō þām stæðe cōmon. ⁊ þā man sōna of slōh æt ðǣre ēa mūðan.

Not in Parker (A).

Hēr wæs sēo mōna āðīstrod be twux hancrēd. ⁊ dagunge on ·v· kł Apr̃. ⁊ Eardwulf fēng tō Norþanhymbran cine dōme on ·ii· idus Mai. ⁊ hē wæs syððan ge blētsod. ⁊ tō his cine stōle āhōfen on ·vii· k Iunii on Eoferwīc fram Eanbalde arceƀ. ⁊ Æðelberhte. ⁊ Higbalde. ⁊ Badewulfe.

Hēr Cēolwulf Miercna cyning oferhergeade Cantware oþ Mersc, ⁊ gefēngun Praen hiera cyning, ⁊ gebundenne hine on Mierce lǣddon;

Hēr forðfērde Offa Myrcena [cining] on ·iiii· idus Augusti. se rīxode ·xl· wintra. ⁊ Eanbald arceƀ on ·iiii· idus Aug' þæs ilcan gēares. ⁊ his lic ligð on Eoferwīc. ⁊ þes ilcan gēares forð fērde Cēolwulf ƀ. ⁊ man ge hālgode ōþer [ne Ean] bald on þæs ōðres stal on ·xix· | kł Septẽ. ⁊ þȳ ilcan gēare Cēolwulf Myrcena cining ofer hergode Cantware ⁊ Mersc ware. ⁊ ge fēngon Præn heora cining. ⁊ ge bu'n'den [ne] hine lǣddon on Myrce.

Hēr Rōmāne Leone þǣm pāpan his tungon forcurfon, ⁊ his ēagan āstungon, ⁊ hine of his setle āflīemdon; ⁊ þā sōna eft Gode fultomiendum hē meahte gesēon ⁊ sprecan, ⁊ eft was pāpa swā hē ǣr wæs.

Hēr Rōmāne Leone þām pāpan his tungan forcurfan. ⁊ his ēagan ūt āstungon. and hine of his setle āflȳmdon. ⁊ þā sōna eft Gode ge fultumiendum hē mihte ge sēon ⁊ sprecan. ⁊ eft wæs pāpa swā hē ǣr wæs. ⁊ Eanbald onfēng pallium on ·vi· idus Sep̃t. ⁊ Æðelberht ƀ for [ð] fērde on [·xvii· k. Nouemƀ. ⁊ Heardrēd man gehālgode on his steal tō biscop. on] ·iii· k nov.

Not in Parker (A).

Hēr wæs mycel ge feoht on Norðhymbra lande on lengtene on ·iiii· No. Apr̃. æt Hweallæge. ⁊ þǣr man of slōh Alrīc Heardberhtes sunu. ⁊ ōðre mænige mid him.

Hēr Æþelheard ærce bisc̄ ⁊ Cynebryht Wesseaxna bisc̄ fōron tō Rōme ·

Hēr Æðelrēd arceƀ ⁊ Cynebriht Wæst Sæxna biscop fōran tō Rōma.

Hēr Beorhtrīc cyning forþfērde ⁊ Worr aldor mon; ⁊ Ecgbryht fēng tō Wesseaxna rīce; ⁊ þȳ ilcan dæge rād Æþelmund aldor man of Hwiccium ofer æt Cynemǣres forda, þā mētte hine Wēoxtān aldor man mid Wilsǣtum; Þǣr wearþ micel gefeoht, ⁊ þǣr bēgen ofslægene þā aldor men, ⁊ Wilsǣtan nāmon sige ·

Hēr wæs se mōna āðīstrad on ðǣre ōðre tīd on niht on ·xvii· ꝁ. Febr̄. ⁊ Brihtrīc cining forðfērde. ⁊ Wo'r'r ældorman. ⁊ Ecgberht fēng tō WæstSeaxna rīce. ⁊ þȳ ilcan dæg rād Æþælmund ealdorman of Hwiccum of 'er' æt Cynemǣres forda. þā ge mētte hine Wēohstān ealdorman mid Wilsǣtum. ⁊ þǣr wærð mycel gefeoht. ⁊ þǣr bēgen ofslagene wǣron. þe ealdor men. ⁊ Wilsǣte na [mo] n sige. Karolus rex imperator factus est, et a Romanis appellatus Augustus; qui illos qui Leonem papam dehonestauerant morte damnauit, sed precibus papæ morte indulta exilio retrusit. Ipse enim papa Leo imperatorem eum sacrauerat.

Hēr wæs gehādod Beornmōd bisc̄ tō Hrofes ceastre ·

Hēr āðēostrade se mōna on dagunge on ·xiii· ꝁ Ianr̄. ⁊ Beornmōd wæs gehālgod tō ƀ tō Rofeceastre þȳ ilcan gēare.

Hēr Æþelheard ærce bisc̄ forþfērde, ⁊ Wulfrēd wæs tō ærce bisc̄ gehādod, ⁊ Forþrēd abbud forþfērde ·

Hēr forðfērde Higbald Lindisfarna ƀ on ·viii· k Iulii. ⁊ man gehālgode on his steal Ecgberht on ·iii· idus Iunii. ⁊ Æðelherd arceƀ forðfērde on Cent. ⁊ Wulfrēd [wæs] tō arceƀ gehālgod.

Hēr Wulfrēd ærce bisc̄ pallium onfēng ·

Hēr Wulfrēd arceƀ onfēng pallium.

Hēr Cūþrēd cyning forþfērde on Cantwarum, ⁊ Cēolburg abbudesse, ⁊ Hēabryht aldor man ·

Hēr Cūðrēd cining forðfērde on Cantwarum. ⁊ Cēolburh aƀƀe. ⁊ Heardberht.

Not in Parker (A).

Hēr se mōna āðīstrode on ꝁ Sept̄. ⁊ Eardwulf Norðanhymbra cining wæs of his rīce ādrifen. ⁊ Eanberht Hagusteald bs̄ forðfērde.

Not in Parker (A).

Karolus cum Niceforo imperatore Constantinopoł pacem fecit.

Hēr Carl cyning forþfērde, ⁊ hē rīcsode ·xlv· wiñt. ⁊ Wulfrēd arce bisc̄ ⁊ Wīgbryht Wesseaxna bisc̄ fōron bēgen tō Rōme;

Hēr Karl cining forðfērde. ⁊ hē rīxade ·xlv· wintra. ⁊ Wulfrēd arceƀ. ⁊ Wīgbriht WæstSæxna ƀ fōran tō Rōme. Cireneius Karolo imperatori legatos suos cum pace mittit. Karolus imperator obiit.

Hēr Wulfrēd ærce bisc̄ mid blēdsunge þæs pāpan Leon hwearf eft tō his āgnum bisc̄dome; ⁊ þȳ gēare gehergade Ecgbryht cyning on West Walas from ēaste weardum oþ weste wearde ·

Hēr Wulfrēd arceƀ mid blētsunge þæs pāpan Leon hwearf eft tō his āgenum biscopdōme. ⁊ þȳ gēare gehergode Ecgberht cining on WestWalas fram ēasteweardum oð westewearde.

Hēr Leo se æþela pāpa ⁊ se hālga forþfērde, ⁊ æfter him Stephanus fēng tō rīce ·

Hēr Leo se æðela pāpa ⁊ se hālga forðfērde. ⁊ æfter him Stephanus fēng tō rīce.

Not in Parker (A).

Hēr Stephanus pāpa forðfērde. ⁊ æfter him wæs Paschalis tō pāpan gehālgod. ⁊ þȳ ilcan gēare forbarn Angelcynnes scolu.

Not in Laud (E).

Hēr Stephanus pāpa forþfērde, ⁊ æfter him was Paschalis tō pāpan gehādod; ⁊ þȳ ilcan gēare forborn Ongol cynnes scolu ·

Hēr Cēnwulf Miercna cyning forþfērde, ⁊ Cēolwulf fēng tō rīce, ⁊ Ēadbryht aldor mon forþ fērde ·

Hēr Cēnwulf Myrcena cining forðfērde. ⁊ Cēolwulf fēng tō rīce. ⁊ Ēadberht ealdorman forðfērde.

Hēr wearþ Cēolwulf his rīces besciered ·

Hēr wærð Cēolwulf his rīces bescered.

Hēr tuēgen aldormen wurdon ofslægene, Burghelm ⁊ Muca; ⁊ senoþ wæs æt Clofes hoo ·

Hēr twǣgen aldormen wurdon ofslagene Burhhelm ⁊ Muca. ⁊ sinoð [wæs] æt Clofeshō.

Hēr wæs Wala gefeoht ⁊ Defna æt Gafulforda; ⁊ þȳ ilcan gēare gefeaht Ecbryht cyning ⁊ Beornwulf cyning on Ellendūne, ⁊ Ecgbryht sige nam, ⁊ þǣr wæs micel wæl geslægen; Þā sende hē Æþlwulf his sunu of þǣre fierde, ⁊ Ealhstān his bisc̄, ⁊ Wulfheard his aldormon tō Cent micle werede, ⁊ hīe Baldrēd þone cyning norþ ofer Temese ādrifon, ⁊ Cantware him tō cirdon, ⁊ Sūþrige, ⁊ Sūþ Seaxe, ⁊ Ēast Seaxe, þȳ hīe from his mǣgum ǣr mid unryhte ānīdde wǣrun; ⁊ þȳ ilcan gēare Ēast Engla cyning, ⁊ sēo þēod gesōhte Ecgbryht cyning him tō friþe ⁊ tō mund boran for Miercna ege, ⁊ þȳ gēare slōgon Ēast Engle Beornwulf Miercna cyning ·

Hēr wæs Weala gefeoht. ⁊ Defena æt Gafolforda. ⁊ þȳ ilcan gēare gefeaht Ecgberht WestSeaxna cining. ⁊ Beornulf Myrcena cining æt Ellandūne. ⁊ Ecgberht sige nam. ⁊ þǣr wæs mycel wæl geslægen. þā sende hē Æðelwulf his sunu of þǣre ferde. ⁊ Ealhstān his ƀ. ⁊ Wulfheard his ealdorman tō Cent mycele wærede. ⁊ hī Baldrēd þone cining norð ofer Temese ādrifen. ⁊ Cantwara him tō cyrdon. ⁊ Sūðrig. ⁊ Sūðseaxe. ⁊ Ēastseaxe. þȳ hī fram his māgum ǣr mid unrihte ānȳdde wǣron. ⁊ þȳ ilcan gēare ĒastEngla cining. ⁊ sēo þēod gesōhte Ecgbriht cining him tō friðe. ⁊ tō mundburan for Myrcena ege. ⁊ þī ilcan gēare slōgon ĒastEngle Beornulf Myrcena cining.

Hēr Ludecan Miercna cyning ⁊ his ·v· aldormen mon ofslōg mid him ⁊ Wiiglāf fēng tō rīce ·

Hēr Ludecan Myrcena cining. ⁊ his ·v· ealdormen man ofslōh mid him. ⁊ Wīglāf fēng tō rīce.

Hēr mōna āþīstrode on middes wintres mæsse niht; ⁊ þȳ ilcan gēare geēode Ecgbryht cyning Miercna rīce ⁊ al þæt besūþan Humbre wæs, ⁊ hē wæs se eahteþa cyning sēþe Bretwal'd'a wæs; Ǣrest Ælle Sūþ Seaxna cyning se þus micel rīce hæfde, se æftera wæs Ceawlin Wesseaxna cyning, se þridda wæs Æþelbryht Cantwara cyning, se fēorþa wæs Rǣdwald Ēast Engla cyning, fīfta was Ēadwine Norþanhymbra cyning, siexta wæs Ōswald se æfter him rīcsode, seofoþa wæs Ōswīo Ōswaldes brōþur, eahtoþa wæs Ecgbryht Wesseaxna cyning; ⁊ se Ecgbryht lǣdde fierd tō Dore wiþ Norþanhymbre, ⁊ hīe him þǣr ēaþmēdo budon ⁊ geþuǣrnesse, ⁊ hīe on þām tōhwurfon ·

Hēr se mōna āðīstrode on middeswintres messaniht. ⁊ þȳ gēare geeode Ecgbriht cining Myrcena rīce. ⁊ eal ꝥ besūðan Humbre wæs. ⁊ hē wæs se eahtoða cining se þe Brytenwealda wæs. ⁊ ǣrest wæs Ælle Sūðseaxna cining se þus mycel hæfde. ōþær wæs Ceawlin WestSeaxna cining. þridde Æþelbriht Cantwara cining: fēorðe Rēdwald ĒastEngla cining. fīfta Ædwine Norþanhymbra cining. sixta wæs Ōswald þe æfter him rīxade. seofaðe wæs Ōswiu Ōswaldes brōþor. eahtoða wæs Ecgbriht WestSeaxna cining. ⁊ se Ecgbriht lǣdde fyrde tō Dore wið Norþanhumbra. ⁊ hī him þǣr ēadmēdo budon. ⁊ þwǣrnessa. ⁊ hī mid þan tōhwurfon.

Hēr eft Wīlāf onfēng Miercna rīces, ⁊ Æþelwald bisc̄ forþfērde, ⁊ þȳ ilcan gēare lǣdde Ecgbryht cyning fierd on Norþ Walas, ⁊ hē hīe tō ēaþmōdre hērsumnesse gedyde ·

Hēr Wīglāf eft onfēng Myrcena rīce. ⁊ Æðelbald ƀ forðfērde. ⁊ þȳ ilcan gēare Ecgbriht cining lǣdde fyrde on Norð Wealas. ⁊ hē heom ealle tō ēadmōdere hȳrsumnesse ge dyde.

Hēr Wulfrēd ærcebisc̄ forþfērde ·

Hēr Wulfrēd ærceƀ forðfērde.

Hēr Cēolnōþ wæs gecoren tō bisc̄ ⁊ gehādod, ⁊ Feologid abbud forþfērde ·

Hēr Cēolnōþ wæs tō ƀ gecoren ⁊ gehādod. ⁊ Feolagild abbot forðfērde.

Hēr Cēolnōþ ærcebisc̄ onfēng pallium ·

Hēr Cēolnōd ærceƀ onfēng pallium.

Hēr hǣþne men oferhergeadon Scēap īge ·

Hēr hǣðene men ofer hergodon Scēap ēge.

Hēr gefeaht Ecgbryht cyning wiþ ·xxxv· scip hlǣsta æt Carrum. ⁊ þǣr wearþ micel wæl geslægen, ⁊ þā Denescan āhton wælstōwe gewald; ⁊ Hereferþ ⁊ Wīgþēn tuēgen biscepas forþfērdon, ⁊ Dudda ⁊ Ōsmōd tuēgen aldormen forþfērdon ·

Hēr Ecgbriht cining ge feaht wið ·xxv· sciphlæsta æt Carrum. ⁊ þǣr wærhð mycel wæl ge slagen. ⁊ þā Deniscan āhton wælstōwe ge weald. ⁊ Hereferð ⁊ Wīgferð ·ii· ƀ forðfērdon. ⁊ Duda ⁊ Ōsmōd ·ii· ealdormen forðfērdon.

Hēr cuōm micel sciphere on West Walas, ⁊ hīe tō ānum gecierdon, ⁊ wiþ Ecgbryht West Seaxna cyning winnende wǣron; Þā hē þæt hīerde, ⁊ mid fierde fērde, ⁊ him wiþ feaht æt Hengestdūne, ⁊ þǣr geflīemde ge þā Walas ge þā Deniscan ·

Hēr cōm micel sciphere on Wæst Wealas. ⁊ hī tō ānum ge cyrdon. ⁊ wið Ecgbriht Wæst Seaxna cining winnende wǣron. þā fyrdode him tō gēanes. ⁊ wið him feaht æt Hengestesdūne. ⁊ þǣr ǣgðer āflȳmde ge þā Wealas ge þā Deniscan.

Hēr Ecgbryht cyning forþfērde, ⁊ hine hæfde ǣr Offa Miercna cyning ⁊ Beorhtrīc Wesseaxna cyning āflīemed ·iii· gēar of Angelcynnes lande on Fronclond ǣr hē cyning wǣre, ⁊ þȳ fultumode Beorhtrīc Offan þȳ hē hæfde his dohtor him tō cuēne; ⁊ se Ecgbryht rīcsode ·xxxvii· wiñt [⁊] ·vii· mōnaþ. ⁊ fēng Eþelwulf Ecgbrehting tō Wesseaxna rīce, ⁊ hē salde his suna Æþelstāne Cantwara rīce ⁊ Ēast Seaxna ⁊ Sūþrigea ⁊ Sūþ Seaxna ·

Hēr Ecgbriht cining forðfērde. ⁊ hine ǣr hæfde Offa Myrcena cining. ⁊ Byrhtrīc Wæst Sæxna cining āflȳmde ·iii· gēar of Angel cynnes lande on Franc land ǣr hē cining wǣre. ⁊ se Ecgbriht rīxade ·xxxvii· winter. ⁊ ·vii· mōnðas. ⁊ fēng Æþelwulf his sunu tō West Seaxna rīce. and Æðelstān his ōðer sunu fēng tō Cantwara rīce. ⁊ tō Sūðrigan. ⁊ tō Sūðseaxna rīce.

Hēr Wulfheard aldorman gefeaht æt Hamtūne wiþ ·xxxiii· sciphlæsta, ⁊ þǣr micel wæl geslōg, ⁊ sige nōm; ⁊ þȳ gēare forþfērde Wulfheard; ⁊ þȳ ilcan gēare gefeaht Æþelhelm dux wiþ Deniscne here on Port mid Dornsǣtum, ⁊ gōde hwīle þone here geflīemde, ⁊ þā Deniscan āhton wælstōwe gewald, ⁊ þone aldormon ofslōgon ·

Hēr Wulfheard ealdorman ge feaht æt Hamtūne wið ·xxxiii· sciphlesta. ⁊ þǣr mycel wæl ge slōh. ⁊ sige nam. ⁊ þȳ gēare forðfērde Wulfheard. ⁊ Æþelhelm ealdorman ge feaht wið þā Deniscan on Port mid Dorsǣtum. ⁊ se ealdorman wærð ofslægen. ⁊ þā Deniscan āhton wælstōwe geweald.

Not in Laud (E).

Hēr Herebryht aldormon wæs ofslægen from hǣþnum monnum, ⁊ monige mid him on Mersc warum, ⁊ þȳ ilcan gēare eft on Lindesse, ⁊ on Ēast Englum, ⁊ on Cantwarum wurdon monige men of slægene from þām herige.

Hēr wæs micel wælsliht on Lundenne, ⁊ on Cwantawic, ⁊ on Hrofes ceastre.

Hēr wæs mycel wælsleht on Lundene. ⁊ on Cant wīc ⁊ on Rofes cæstre.

Hēr Æþelwulf cyning gefeaht æt Carrum wiþ ·xxxv· sciphlæsta, ⁊ þā Deniscan āhton wælstōwe gewald.

Hēr Ædelwulf cining gefeaht æt Carrum wið ·xxxv· sciphlesta. ⁊ þā Deniscan āhton wælstōwe geweald.