Bókastaðir

Hēr Cēnwalh gefeaht æt Peonnum wiþ Walas, ⁊ hīe geflīemde oþ Pedridan; þis wæs gefohten siþþan hē of Ēast Englum cōm. hē wæs þǣr ·iii· gēar on wrece, hæfde hine Penda ādrifenne, ⁊ rīces benumenne. forþon hē his swo's'tor an forlēt.

Hēr Cēnwealh gefeaht æt Peonnum wiþ Walas. ⁊ hēo geflȳmde oð Pedredan. þis wæs gefohton syððan hē of Ēast Engla cōm. hē wæs þǣr ·iii· gēar on wreccesīð. hæfde hine Penda ādrēfedne. ⁊ rīces benumene forþan ꝥ hē his swustor forlēt.

Hēr Ægelbryht bisc̃ gewāt from Cēnwale, ⁊ Wine hēold þone biscepdōm ·iii· gēar; ⁊ se Ægel bryht onfēng Persa bisc̃ dōmes on Galwalum bī Signe.

Hēr Æglbriht biscop gewāt fram Cē'n'wala. ⁊ Wine hēold ðone biscopdōme ·iii· gēar. ⁊ sēo Æglbriht onfēng Persa biscopdōmes on Galwalum be Sigene.

Hēr Cēnwalh gefeaht in Ēastron on Posentes byrg, ⁊ gehergeade Wulfhere Pending oþ Æsces dūne; ⁊ Cūþrēd Cuichelming, ⁊ Cōenbryht cyning on ānum gēare forþfērdun; ⁊ on Wiht gehergade Wulfhere Pending, ⁊ gesalde Wihtwaran Æþelwalde Sūþ Seaxna cyninge. forþon Wulfhere hine onfēng æt fulwihte. ⁊ Eoppa mæsse prēost. be Wilferþes worde ⁊ Wulfhere cyning brōhte Wihtwarum fulwiht ǣrest.

Hēr Cēnwealh feaht on Ēastron on Posentesbyrig. ⁊ gehergode Wulfhere Pending of Æsces dūne. ⁊ Cūþrēd Cwichelming. ⁊ Centbriht cining on ānum gēare forðfērdon. And on Wiht gehergode Wulfhere Pending. ⁊ gesealde Wihtwarum Æðelwolde Sūð Seaxena cininga. forþan Wulfhere hine onfēng æt fulwihte. ⁊ Eoppa prēost be Wilferðes worde ⁊ Wulfheres cininges brōhte Wihtwarum fulwiht ǣrost manna.

Hēr sunne āþīestrode, ⁊ Arcenbryht Cantwara cyng forþfērde; ⁊ Colman mid his gefērum fōr tō his cȳððe. Þȳ ilcan gēare wæs micel man cuealm; ⁊ Ceadda ⁊ Wilferþ wǣron gehādode, ⁊ þȳ ilcan gēare Deusdedit forþfērde.

Hēr sunne āðēstrode on ·v· ⁿō. Mai. ⁊ on ðissum gēare cōm micel man cwealm on Brytene īgland. ⁊ on þām cwealme forðfērde Tuda biscop. ⁊ wæs bebyrged on Wagele. ⁊ Ercenbriht Cantwara cining forðfērde. ⁊ Ecgbriht his sunu fēng tō þām rīce. ⁊ Coleman mid his gefērum fōr tō his cȳððe. ⁊ Ceadde ⁊ Wilferð wǣron gehādode. ⁊ on þām ilcan gēare sēo ærcebiscop Deus dedit forðfērde.

Not in Parker (A).

Hēr Ōswiu ⁊ Ecbriht sendon Wīgheard prēost tō Rōme. ꝥ hine man scolde hālgian tō ærcebiscope. ac hē forðfērde sōna swā hē þider cōm.

Hēr Þeodorus mon hādode tō ercebisc̃.

Hēr Uitalianus se pāpa gehādode Theodorus tō arcebiscop. ⁊ sende hine tō Brytene.

Hēr Ecgbryht cyning salde Basse mæsse prīoste Reculf mynster on tō timbranne.

Hēr Egbriht cining sealde Basse prēost Raculf, mynster tō tymbrianne.

Hēr forþfērde Ōswēo Norþanhymbra cyning, ⁊ Ecgferþ rīcsode æfter him; ⁊ Hloþhere fēng tō biscep dōme ofer Wesseaxan Ægelbryhtes bisc̄ nefa. ⁊ hēold ·vii· gēar, Þeodor bisc̄ hine gehālgode; ⁊ se Ōswīo wæs Æþelferþing, Æþelferþ Æþelrīcing, Æþelrīc Iding, Ida Eopping.

Hēr Ōswiu forðfērde Norðanhymbra cining on ·xv· ꝁ Mr̄. ⁊ Ecferð his sunu rīxade æfter him. ⁊ Hlothere fēng tō biscopdōme ofer WeastSeaxum Æglbrihtes biscopes nefa. ⁊ hēold ·vii· gēar. ⁊ Þeodorus biscop hine hālgode.

Hēr wæs þæt micle fugla wæl.

Hēr wæs ꝥ mycele fugla well.

Hēr forþfērde Cēnwalh ⁊ Seaxburg ān gēar rīcsode his cuēn æfter him.

Hēr forðfērde Cēnwalh. ⁊ Sexburh ān gēar rīxade his cwēn æfter him.

Hēr Ecgbryht Cantwara cyning forþfērde; ⁊ þȳ gēare wæs senoð æt Heorotforda, ⁊ Sc̄e Æþeldryht ongon þæt mynstær æt Ēlige:

Hēr Ægbriht Cantwara cining forðfērde. ⁊ Theodorus ærcebiscop gesomnode sinoð æt Heortforde. ⁊ Sc̃e Æðeldrīþ ongan ꝥ mynster æt Hēlige.

Hēr fēng Æscwine tō rīce on Wesseaxum, se wes Cēnfūsing, Cēnfūs Cēnferþing, Cēnferþ Cūþgilsing, Cūþgils Cēolwulfing, Cēolwulf Cynrīcing, Cynrīc Cerdicing.

Hēr fēng Æscwine tō rīce on WeastSeaxum.

Hēr Wulfhere Pending ⁊ Æscwine gefuhton æt Biedanhēafde; ⁊ þȳ ilcan gēare Wulfhere forþfērde, ⁊ Æþelrēd fēng tō rīce.

Hēr Wulfhere Pending ⁊ Æscwine Cēnfūsing gefuhton æt Bedanhēafde. ⁊ þā ilcan gēare Wulfhere forð fērde. ⁊ Æðelrēd fēng tō rīce.

On his time þa seonde he to Rome Wilfrid biscop to þam pape þe þa wes. Agatho he wæs gehaten. ⁊ cydde him mid writ ⁊ mid worde. hu his breðre Peada ⁊ Wulfhere ⁊ se abbot Saxulf heafden wroht an minstre Medeshamstede wæs gehaten. ⁊ ꝥ hi hit heafden gefreod wið kyning ⁊ wið biscop of ealle þewdom. ⁊ bed him ꝥ he scolde ꝥ geten mid his writ ⁊ mid his bletsunge. And seo papa seonde þa his gewrite to Englalande þus cweðende.

Ic Agatho papa of Rome grete wel seo wurðfulle Æðelred Myrcene kyning ⁊ se ærcebiscop Theodorum of Cant'warbyrig. ⁊ seo Myrcene biscop Saxulf seo ær wæs abbot. ⁊ alle þa abbotes þa sindon on Engla lande Godes gretinge ⁊ minre bletsunge. Ic haue geheord seo kyninges Æðelredes geornunge ⁊ þes ærcebiscopes Theodorus. ⁊ þes biscopes Saxulfes. ⁊ þes abbotes Cuthbaldes. ⁊ ic hit wille ꝥ hit on ælle wise beo. swa swa ge hit sprecon hauen. And ic be beode of Godes half ⁊ S. Petres. ⁊ ealra halgan. ⁊ ealre hadode heafde. þet ne kyning ne biscop ne eorl. ne 'n'an man ne haue nan onsting. ne gafle ne geold ne feording ne nanes cinnes ðeudom ne nime man of ꝥ abbotrice of Medeshamstede. Ic beode æc ꝥ þe scýrbiscop ne seo swa dyrstlece ꝥ he ne hading ne haleging ne do on þis abbotrice buton seo abbot hit him bidde. ne biscopwite ne sinað ne nanes kinnes þing na haue þær nan onsting. ⁊ ic wille ꝥ seo abbot beo gehealden for legat of Rome ofer eal ꝥ iglande. ⁊ hwilc abbot þe beþ þær coren of þe munecan ꝥ he beo gebletsad of þan ærcebiscop of Cantwarbyrig. Ic wille ⁊ tyðe ꝥ whilc man swa haued behaten to faren to Rome, and he ne muge hit forðian. ouðer for untrumnisse. ouðer for lauerdes neode. ouðer for haueleste. ouðer for hwilces cinnes oðer neod he ne muge þær cumon. beo he of Engle lande ouðer of hwilc oðer igland beo he. cume to ꝥ mynstre on Medesham stede. ⁊ haue ꝥ i'l'ce forgiuenesse of Criste ⁊ S. Peter. ⁊ of þonne abbot ⁊ of þone muneca ꝥ he scolde hauen gif he to Rome fore. Nu bidde ic þe broðer Theodorus ꝥ þu lete bedon geond æl Engle lande þet seo sinað wurðe gegaderod. ⁊ þis write wurðe ge redd ⁊ ge healdon. Al swa ic beode þe Saxulf biscop ꝥ swa swa þu hit geornest. ꝥ seo mynstre beo freo. swa ic forbeode þe ⁊ ealle þe biscopas þe æfter ðe cumon of Criste ⁊ of ealle his halgan ꝥ ge nan onsting ne hauen of ꝥ mynstre buton swa micel swa þone abbot wile. Nu wille ic hit segge mid worde ꝥ hwa swa halt þis write ⁊ þis bode. þa wurðe he efre wuniende mid God Ælmihti on heuenrice. ⁊ hwa swa hit tobreceð. þa wurðe he amansumed ⁊ anidrod mid Iudas ⁊ mid ealle deofle on helle buton he cume to dedbote. Amen.

Ðas writ seonde seo papa Agatho ⁊ an hundred ⁊ fif ⁊ twenti biscopes bi Wilfrid ærcebiscop of Eoferwic to Engla lande. Þis wæs gedon æfter ure Drihtnes acennednesse ·dc· lxxx · þes kininges ·vi· gear Æðelredes.

Ða heot seo kining þone ærcebiscop Theodorus ꝥ he scolde setton ealle gewitene mot æt þone stede ꝥ man cleopeð Heatfelde. Ða hi wæron þær gegaderod. þa leot he rædon þa gewrite þe seo papa þider seonde. ⁊ ealle hit getton ⁊ fulfeostnodon.

Ða seide se kyning, Ealle þa þing þe min broðer Peada. ⁊ min broðer Wulfere. ⁊ mine swuster Kineburh ⁊ Kynesuith geafon ⁊ getton Sc̃e Peter ⁊ þone abbot þa wile ic ꝥ stande. ⁊ ic wile on min dæi hit æcon for here sawle. ⁊ for minre sawle. Nu gife ic Sc̃e Peter to dæi into his minstre Medeshamstede þas landes. ⁊ eal ꝥ þær to liggeð. þet is Bredune. Hrepingas. Ceden ac. Swines hæfed. Heanbyrig. Lodeshac. Scuffanhalch. Costes ford. Stret ford. Wættelleburne. Lufgeard. Æþelhuniglond. Barþanig. Ðas landes ic gife Sc̃e Peter eal swa freolice swa ic seolf hit ahte. ⁊ swa ꝥ nan min æftergengles þær nan þing of ne nime. Gif hwa hit doð. þes papa curs of Rome ⁊ ealre biscope curs he habbe. ⁊ here ealre þe her be gewitnesse. ⁊ þis ic festnie mid Cristes tacne. +. Ic Theodorus ærcebiscop of Cantwarbyrig am witnesse of þas gewrite of Medeshamstede. ⁊ ic festnie mid min gewrite. ⁊ ic āmansumie ealle þā þǣr aniþing ofbreke. ⁊ ic bletsie ealle þa þe hit healden. +. Ic Wilfrid ærceƀ of Æferwic ic eam witnesse of þas gewrite. ⁊ ic gæte þæs ilce curs. +. Ic Saxulf þe wæs first abbot ⁊ nu eam biscop ic gife hi min curs ⁊ ealle min æftergengle þe þis tobreket. Ic Ostriðe Æðelredes cwen hit tyðe. Ic Adrianus legat hit iete. Ic Putta biscop of Rofecestre ic hit write.

Ic Waldhere biscop of Lundene hit festnie. Ic Cuðbald abbot hit geate swa þet hwa swa hit breket. ealre biscope cursunge ⁊ eal Cristene foces he hafe. Amen.

Hēr Æscwine forþfērde, ⁊ Hedde fēng tō bisc̄ dōme, ⁊ Centwine fēng tō rīce; ⁊ Centwine was Cynegilsing, Cynegils Cēolwulfing; ⁊ Æðe rēd Miercna cyning oferhergeada Cent lond ·

Hēr Æscwine forðfērde. ⁊ Hedde fēng tō biscopdōme. ⁊ Centwine fēng tō West Seaxna rīce. ⁊ Æðelrēd Myrcena cining ofer hergode Cent land.

Hēr oþ īewde cometa se steorra. ⁊ Wilfriþ biscop wæs ādrifen of his bisc̄ dōme from Ecg ferþe cyninge ·

Hēr ātēowede cometa se steorra on Auguste. ⁊ scān ·iii· mōnðas ǣlce morgen swilce sunne bēam. ⁊ Wilferð biscop wæs ādrifen of his biscop dōme fram Ecferðe cininge. ⁊ man ge hālgode ·ii· biscopas on his stal. Bosan tō Derum. ⁊ Eatan tō Beornicum. ⁊ man ge hālgode Lindiswarum tō biscope Ēadhed. se wæs on Lindissi ǣrost biscopa.

Hēr Ælfwine wæs ofslægen, ⁊ Sc̃e Æþelþrȳþ forþ fērde ·

Hēr man ofslōh Ælfwine be Trentan þǣr ðǣr Egferð ⁊ Æðelrēd gefuhton. ⁊ hēr forðfērde sce Æðeldrīð. ⁊ Coludes burh forbarn mid godcundum fȳre.

Hēr gesæt Þeodorius ærce biscop senoþ on Hǣþ felda, forþon hē wolde þone Xp̄es gelēafan geryhtan; ⁊ þȳ ylcan gēare forþfērde Hild abbodesse on Strēones heale ·

Hēr geset Theodorus ærcebiscopes sinoð on Hǣð felda. forþan þe hē wolde þone Crīstes gelǣfan gerihtan. ⁊ þȳ gēare Hild abboðessa on Strēonesheale forðfērde.

Not in Parker (A).

Hēr man hālgode Trumbriht biscop tō Hagustaldes ēa. ⁊ Trumwine Pihtum forþan hȳ hȳrdon þā hider.

On þissum gēare Centwine geflīemde Bret wealas oþ sǣ ·

Hēr on ðissum gēare Centwine geflȳmde Britwalas oþ sǣ.

Not in Parker (A).

Hēr on ðissum gēare sende Ecgferð here on Scottas. ⁊ Briht his ealdorman mid. ⁊ earmlīce hī Godes cyrican hȳndan ⁊ bærndon.

Hēr Ceadwalla ongan æfter rīce winnan; Se Ceadwalla was Cōenbryhting. Cōenbryht Cading, Cadda Cūþaing, Cūþa Ceawlining, Ceawlin Cynrīcing, Cynrīc Cerdicing; ⁊ Mūl was Ceadwallan brōþur, ⁊ þone mon eft on Cent forbærnde; ⁊ þȳ ilcan gēare Ecgferþ cyning mon ofslōg; Se Ecgferþ was Ōswēoing, Ōswēo Æþelferþing, Æþelferþ Æþelrīcing, Æþelrīc Iding, Ida Eopping; ⁊ Hloþhere þȳ ilcan gēare forþ fērde ·

Hēr hǣt Ecgferð cining gehālgian Cūðberht tō biscope. ⁊ Theodorus archieps hine gehālgode on Eoferwīc þām forman Ēastordæge tō biscope tō Hagustaldesham. for þām Trumbriht wæs ādōn of ðām biscopdōme. ⁊ ðȳ ilcan gēare man ofslōh Ecgferð cining be norðan sǣ. ⁊ mycelne here mid him on · xiiiᵒ · kł Iunii. Hē wæs ·xv· winter cining. ⁊ Aldfrið his brōðor fēng æfter him tō rīce. ⁊ hēr ongan Ceadwala winnan æfter rīce. ⁊ þȳ ilcan gēare Loðere Cantwara cining forðfērde. ⁊ man gehālgode Ioħs on Agust' tō biscope. ⁊ hē þǣr wæs oððe Wilfriþ incōm. Syððan fēng Ioħes tō Ceastre biscopdōme. forðan Bosa biscop wæs forðfaren. þā wæs Wilferð his prēost syððan gehālgod Ceastre tō biscope. ⁊ † fōr tō his mynstre on Derawuda.

Hēr Ceadwalla ⁊ Mūl Cent ⁊ Wieht forhergedon ·

Her Ceadwala ⁊ Mul his broðor forhergodan Cent ⁊ Wiht. þæs Cædwala gef into sce Petres minstre Medeshamstede Hoge. ꝥ is in an igland Heabureahg hatte. þa wæs abbot on þære minstre Egbalth wæs gehaten. heo wæs se þridde abbot æfter Saxulfe. þa wæs Theodorus ærceƀ on Cent.

Hēr Mūl wearþ on Cent forbærned, ⁊ ōþre ·xii· men mid him, ⁊ þȳ gēare Ceadwalla eft Cent forhergeada ·

Hēr Mūl wærð on Cent bærned. ⁊ ōðre ·xii· men mid him. ⁊ þȳ gēara Ceadwala eft forhergode Cent.

Hēr Ine fēng tō Wesseaxna rīce, [and hē getimbrade ꝥ menster æt Glæstinga byrig.] ⁊ hēold ·xxxvii· wiñt. ⁊ þȳ ilcan gēare Ceadwalla fōr tō Rōme, ⁊ fulwihte onfēng from þām pāpan, ⁊ se pāpa hine heht Petrus. ⁊ ymb ·vii· niht hē forþ fērde. Þonne was se Ine Cēnrēding, Cēnrēd Cēolwalding, Cēolwald was Cynegilses brōþur, ⁊ þā wǣron Cūþwines suna Ceaulininges, Ceaulin Cynrīcing, Cynrīc Cerdicing:

Hēr fōr Ceadwala cining tō Rōme. ⁊ onfēng fulluht æt Sergium þām pāpan. ⁊ hē him s'c'ōp Petrum tō name. ⁊ hē syððan ymbe ·vii· niht forðfērde on ·xii· kł Mai under Crīstes clāðum. ⁊ hē wæs gebyrged innan Sce Petres cyrican. ⁊ Ine fēng tō rīce on WæstSæxna æfter him. se rīxade ·xxvii· wintra. ⁊ syððan gewāt tō Rōme. ⁊ þǣr wunode oþ his ende dæg.

Hēr Þeodorius ærce bisc̄ forþ fērde, ⁊ fēng Beorhtwald tō þām bisc̄ dōme. Ǣr wǣrun Rōmānisce biscepas, siþþan wǣrun Englisce:

Hēr Theodorus ærceƀ forðfērde. hē wæs ·xxii· wintra ƀ. ⁊ hē wæs bebyrged innan Cantwarbyrig.

Not in Parker (A).

Hēr Brihtwold wæs gecoren tō ærcebiscop on kł Iuł. hē wæs ǣr abbot on Raculfe. ǣr þissan wǣron Rōmānisce biscopas. ⁊ syððan wǣron Englisce. þā wǣron ·ii· ciningas on Cent. Wihtrēd. ⁊ Wæbheard.

Not in Parker (A).

Hēr wæs Brihtwald gehālgod tō ærcebiscope fram Godune Galwala biscop on ·v· nō Iuł. innan þās tȳd Gifemund ƀ forðfērde. ⁊ Brihtwald gehālgode Tobian on his steall. ⁊ Brihthelm wæs of lȳfe gelǣd.

Hēr Cantware ge þingodan wiþ Ine, ⁊ him gesaldon ·xxx· m̄. forþon þe hīe ǣr Mūl forbærndon; ⁊ Wihtrēd fēng tō Cantwara rīce, ⁊ hēold ·xxxiii· wiñt; Se Wihtrēd was Ecgbryhting, Ecgbryht Arcenbryhting, Erconbryht Ēadbalding, Ēadbald Æþelbryhting:

Hēr Cantwara geðingoden wið Ine ⁊ him gesealdon ·xxx· þūsenda, forðan þe hī ǣr Mūl forbærndon. ⁊ Wihtrēd fēng tō Cantwara rīce. ⁊ hēold thrē ⁊ twēnti wintra.

Not in Parker (A).

Hēr Sūðan hvmbre ofslōgon Ōstrȳðe Æðelrēdes cwēn. Ecgfriðes swuster.

Not in Parker (A).

Hēr Pyhtas slōgon Berht ealdorman.

Not in Parker (A).

Hēr Kēnrēd fēng tō Sūð hvmbra rīce.

Hēr Hedde bisc̄ forþ fērde, ⁊ hē hēold þone bisc̄ dōm ·xxvii· wiñt on Winta ceastre:

Hēr Hǣdde ƀ forðfērde. ⁊ hē hēold þone biscopdōm ·xxvii· wintra on Wintanceastre.

Hēr Æþelrēd Pending Miercna cyning onfēng munuc hāde, ⁊ þæt rīce hēold ·xxviiii· wintra. þā fēn'g' Cōenrēd tō:

Hēr Æðelrēd Pending Mircena cining onfēng munuchāde. ⁊ þet rīce hēold ·xxix· wintra. þā fēng Kēnrēd tō.

Hēr Aldferþ Norðan hymbra cyning forþ fērde ⁊ Seaxuulf bisc̄:

Hēr Aldfrið Norþanhymbra cining forðfērde on ·xix· kł Iañr. on Driffelda. þā fēng Ōsrēd his sunu tō rīce.

Hēr Aldhelm bisc̄ forþfērde, se wæs be westan wuda bisc̄, ⁊ wæs tō dǣled in fore weardum Danieles dagum in tuā bisc̄ scīra West Seaxna lond, ⁊ ǣr hit wæs ān. ōþer hēold Daniel, ōþer Aldhelm; Æfter Aldhelme fēng Forþhere tō; ⁊ Cēolrēd fēng tō Miercna rīce, ⁊ Cōenrēd fōr tō Rōme ⁊ Offa mid him:

Hēr Aldelm biscop forðfērde. sēo wæs bewæstan wudu ƀ. ⁊ wæs tōdǣled on foreweardum Danieles dagum on ·ii· biscop scȳra WæstSeaxna landes. ⁊ ǣr hit wæs ān. ōðer hēold Daniel. ōðer Aldelm biscop. æfter Aldelme Forhere fēng tō. ⁊ Cēolrēd fēng tō Myrcena rīce. ⁊ Cēnrēd fōr tō Rōme ⁊ Offa mid him. ⁊ Cēnrēd wæs þǣr oð his līfes ende. ⁊ þī ilcan gēare Wilferð biscop forðfērde in Undalum. ⁊ his lic man lǣdde tō Rīpum. hē wæs biscop ·xlv· wintra. þone Ecgferð cining ǣr bedrāf tō Rōme.

[Hēr Beorhtfriþ ealdormon feaht wiþ Peohtas, ⁊ Ine ⁊ Nun his mǣg gefuhton wiþ Gerente Walacyninge.]

Hēr Acca Wilferðes prēost fēng tō þām biscopdōme þe hē ǣr hēold. ⁊ þām ilcan gēare feoht Beorhtfrið ealdorman wið Pyhtas betwix Hǣfe ⁊ Cære. ⁊ Ine ⁊ Nun his mǣi gefuhton wið Gerente Weala cininge ⁊ þām ilcan gēare man ofslōh Hygebald.

Hēr forþ fērde Gūþlāc se hālga.

Hēr Gūðlāc sēo hālga forðfērde.

Hēr Ine ⁊ Cēolrēd fuhton æt Woddes beorge.

Hēr Ine ⁊ Cēolrēd gefuhton æt Wōdnesbeorge.

Hēr Ōsrēd Norþanhymbra cyning wearþ of slægen, ⁊ se hæfde vii. winter rīce æfter Aldferþe; þā fēng Cōenrēd tō rīce, ⁊ hēold ·ii· gēar; þā Ōsrīc ⁊ hēold ·xi· gēar; ⁊ on þām ilcan gēare Cēolrēd Miercna cyning forþ fērde, ⁊ his līc resteþ on Licetfelda, ⁊ Æþelrǣdes Pendinges on Bearddanigge; ⁊ þā fēng Æþelbald tō rīce on Mercium, ⁊ hēold ·xli· wiñt. Æþelbald wæs Alweoing, Alweo Ēawing, Ēawa Pybing, þæs cyn is beforan āwriten; ⁊ Ecgbryht se ārwierþa wer on Hii þām ēalonde þā munecas on ryht gecierde, þæt hīe Ēastr'o'n on ryht hēoldon, ⁊ þā ciriclecan scare.

Hēr Ōsrēd Norðanhymbra cininga wærð ofslagen besūðan gemǣre. se hæfde ·vii· winter æfter Ealdferþe. þā fēng Cēnrēd tō rīce. ⁊ hēold ·ii· gēar. ⁊ þā Ōsrīc ⁊ hēold ·xi· gēar. ⁊ ēac on þām ilcan gēare Cēolrēd Myrcena cining forþfērde. ⁊ his lic restað on Licetfelda. ⁊ Æðelrēdes Pendinges on Bearðanēge. ⁊ þā fēng Æðelbald tō rīce on Myrcum. ⁊ hēold ·xli· wintra. ⁊ Ecgbyrht se ārwurþa wer [gecyrde] Ie hīwan tō rihtum Ēastrum. ⁊ tō Sce Petres scære.

Hēr Ingild forþ fērde Ines brōþur, ⁊ hiera swostur wǣrun Cuēn burg ⁊ Cūþburh, ⁊ sīo Cūþburg þæt liif æt Winburnan ārǣrde, ⁊ hīo wæs forgifen Norþanhymbra cyninge Ald ferþe, ⁊ hīe be him lifgendum hīe gedǣldun.

Hēr Ingild forðfērde Ines brōðor. ⁊ hēo [ra] swustra wǣron Cwēnburh ⁊ Cūðburh. ⁊ sēo Cūðburh ꝥ lȳf æt Winburnan ærērde. ⁊ hēo wæs forgifen Norðhymbra cininge Ealdferðe. ⁊ hēo be him lifigendum gedǣldon.

Hēr Daniel fērde tō Rōme; ⁊ þȳ ilcan gēare Ine ofslōg Cynewulf.

Hēr Daniel fōr tō Rōme. ⁊ þī ilcan gēare me ofslōh Cynewulf þone æþeling. ⁊ hēr forðfērde se hālga biscop Ioħs. se wæs biscop ·xxxiii· gēara. ⁊ ·viii· mōnðas. ⁊ ·xiii· dagas. ⁊ his lic restað in Beoferlic.

Hēr Æþelburg cuēn tōwearp Tantūn þe Ine ǣr timbrede; ⁊ Aldbryht wræccea gewāt on Sūþrige ⁊ on Sūþ Seaxe; ⁊ Ine gefeaht wiþ Sūþ Seaxum.

Hēr Æðelburh cwēn tōwærp Tantūn þone Ine ǣr tymbrade. ⁊ Ealdbriht wrecca gewāt on Sūðrege. ⁊ on Sūð Seaxe.

Hēr Wihtrēd Cantwara cyning forþfērde. [⁊ Ēadberht fēng tō Centrīce.] þæs cyn is beforan. ⁊ Ine feaht wiþ Sūþ Seaxan, ⁊ þǣr ofslōg Aldbryht.

Hēr Wihtrēd Cantwara cining forðfērde on Nō ꝁ Mai. se rīxade ·xxxiiii· wintra. ⁊ Ine gefeaht wið Sūðseaxum. ⁊ þǣr ofslōh Ealdberht þone æþeling þe hē ǣr ūtflēmde.

Not in Parker (A).

Hēr Ine fōr tō Rōme. ⁊ fēng Æðelheard tō West Seaxna rīce his mǣi. ⁊ hēold ·xiiii· gēar.

Not in Parker (A).

Hēr forðfērde Tobias biscop in Rofecestre. ⁊ on his stal Brihtwold ærcebiscop gehālgode Aldulf tobiscope.

Not in Laud (E).

Hēr Ine fērde tō Rōme. [⁊ þǣr his feorh gesealde] ⁊ fēng Æþelheard tō Wesseaxna rīce ⁊ hēold ·xiiii· gēar. ⁊ þȳ gēare gefuhton Æþelheard ⁊ Ōswald se æþeling; ⁊ se Ōswald was Æþelbalding, Æþelbald Cynebalding, Cynebald Cūþwining, Cūþwine Ceaulining.

Hēr cometa se steorra hiene oþīewde, ⁊ Sc̃s Ecgbryht forþfērde;

Hēr atēwoden twēgen cometan. ⁊ þī ilcan gēare Ōsrīc forðfērde sēo wæs ·xi· winter cining. ⁊ sēo hālga Ecgbriht in Ii. þā fēng Cēolwulf tō rīce. ⁊ hēold ·viii· gēar.

Hēr Ōswald se æþeling forþ fērde ·

Hēr Ōswald æðeling forðfērde.

Hēr was ofslægen Ōsrīc Norþan hymbra cyning, ⁊ fēng Cēoluulf tō þām rīce, ⁊ hēold ·viii· gēar. ⁊ se Cēolwulf wæs Cūþaing, Cūþa Cūþwining, Cūþwine Lēodwalding. Lēodwald Ecgwalding, Ecgwald Aldhelming, Aldhelm Ocging, Ocga Iding, Ida Eopping; ⁊ Beorhtwald ærce bisc̃ gefōr; ⁊ þȳ ilcan gēare Tātwine wæs gehālgod tō ærce bisc̃ ·

Hēr Brihtwold ærcebiscop forðfērde on Idus Ianr̄. sēo wæs biscop ·xxxvii· wintre. ⁊ six mōnðas ⁊ ·xiiii· dagas. ⁊ þȳ ilcan gēare man gehālgode Tātwine tō ærcebiscop. sēo wæs ǣr in Mercum prēost in Breodūne. hine hālgodan Daniel Wæntan biscop. ⁊ Ingwald Lunden biscop. ⁊ Aldwine Licet felda ƀ. ⁊ Aldulf Rofeceastre ƀ. die ·x· Iunii mensis.

Hēr Æþelbald ge ēode Sumur tūn; ⁊ sunne āþīestrode ·

Hēr Æðelbold ge ēode Sumor tūn, ⁊ sunne āðēstrode. ⁊ Acca wæs ādrifen of biscop dōme.

Hēr wæs se mōna swelce hē wǣre mid blōde begoten; ⁊ fērdon forþ Tātwine ⁊ Bieda ·

Hēr wæs se mōna swilce hē wǣre mid blōde begoten. ⁊ Tātwine forðfērde erceƀ. ⁊ ēac Bēda. ⁊ man gehālgode Ecgbriht tō biscope.

Not in Parker (A).

Hēr onfēng Ecgbriht ƀ pallium æt Rōme.

Hēr Nōþhelm ærce biscep onfēng pallium from Rōmāna bisc̃ ·

Hēr Nōþhelm ercebiscop onfēng pallium fram Rōmāna biscope.

Hēr Forþhere bisc̃ ⁊ Friþogiþ cuēn fērdun tō Rōme ·

Hēr Forðhere biscop. ⁊ Fryðegiþ cwēn fērdon tō Rōme. ⁊ Cēolwulf cining fēng tō Petres scære. ⁊ sealde his rīce Ēdberhte his federan sunu. se rīxade ·xxi· winter. ⁊ Æðelwold biscop ⁊ Acca forðfērdon. ⁊ Cynewulf man gehālgode tō biscope. ⁊ þȳ ilcan gēare Æðelwold hergode Norðhymbra land.

Hēr Ēad bryht Ēating, Ēata Lēodwalding, fēng tō Norþan hymbra rīce. ⁊ hēold ·xxi· wiñt. ⁊ his brōþor wæs Ecgbryht Ēating ærce bisc̃, ⁊ hīe restaþ bēgen on Eofor wīc ceastre on ānum portice ·

Hēr Ēadbriht Ēating, Ēata Lēodwalding, fēng tō Norðhymbra rīce. ⁊ hēold ·xxi· wintra. ⁊ his brōðor wæs Ecgbriht Ēating ærceƀ. ⁊ hēo restað bēgen on Eoferwīc ceastre on ānum portice.

Not in Parker (A).

Hēr Æðelherd cining forðfērde. ⁊ fǣng Cūðrēd his mǣg tō West Seaxna rīce. ⁊ hēol'd' ·xvi· gēar. ⁊ heardlīce gewann wið Æðelbold Myrcena cining. ⁊ Ēadberht wæs tō ærceƀ gehālgod. ⁊ Dunn ƀ tō Rofescæstre.

Hēr Æþelheard cyning forþ fērde, ⁊ fēng Cūþrǣd tō Wesseaxna rīce, ⁊ hēold ·xvi· wiñt, ⁊ heardlīce gewon wiþ Æþelbald cyning; ⁊ Cūþbryht wæs tō ærce bisc̃ gehālgod, ⁊ Dun bisc̃ tō Hrofesceastre ·

Hēr forbarn Eoferwīc.

Hēr Æþelbald ⁊ Cūþrǣd fuhton wiþ Walas.

Hēr Æðelbald Myrcena cining ⁊ Cūðrēd West Seaxna cining ge fuhton wið Wealas.

Hēr Danihel gesæt on Wintan ceastre, ⁊ Hunferþ fēng tō bisc̄ dōme.

Hēr Daniel ge sæt on Wintan cæstre. ⁊ Un [ferð] fēng tō ƀ dōme. ⁊ steorran fōran swȳðe scotienda. ⁊ Wilferð sēo iunga se wæs ƀ on Eoferwīc forðfērde on ·iii· kł Mai. se wæs ·xxx· wintra biscop.

Hēr Danihel forþfērde, þā was ·xliii· wiñt āgān siþþan hē onfēng bisc̄ dōme.

Hēr Daniel forðfērde. þā wæs ·xlvi· wintra āgān syððan hē onfēng biscop dōme.

Hēr mon slōg Selrēd cyning.

Hēr man slōh Selrēd cining.

Hēr wæs ofslægen Cynrīc Wesseaxna æþeling, ⁊ Ēadbryht Cant wara cyning forþ fērde. [⁊ Æthelbyrht Wihtrēdes sunu cinges fēng tō þām rīce.]

Hēr wæs ofslagen Cynrīc West Seaxna æþeling. ⁊ Ēadbriht Cantwara cining forðfērde.

Hēr Cūþrēd cyning gefeaht uuiþ Æþelhūn þone ofermēdan aldormonn.

Hēr Cūðrēd Wæst Seaxna cining ge feaht wið Æþelhūn ðone eofer mōdigan ealdor man.

Hēr Cūþrēd gefeaht þȳ ·xii· gēare his rīces æt Beorg feorda wiþ Æþelbald.

Hēr Cūþrēd WæstSeaxna cining ge feaht þȳ ·xxii· gēara his rīces æt Beorh forda. wið Æðelbald Myrcena cing. ⁊ hine ge flȳmde.

Hēr Cūþrēd feaht wiþ Walas.

Hēr Cūðrēd Wæst Seaxna cyning ge feaht wið Wealas.

Hēr Cūþrēd forþfērde, ⁊ Cyneheard onfēng bisc̄ dōme æfter Hunferþe on Wintan ceastre; ⁊ Cant wara burg forbærn þȳ gēare, ⁊ Sigebryht fēng tō Wesseaxna rīce, ⁊ hēold ān gēar.

Hēr Cūðrēd WæstSeaxna cining forðfērde. ⁊ Cyneheard onfēng biscop dōme æfter Hunferðe on Wintan ceastre. ⁊ Cantwara byrig forbarn ðȳ gēare. ⁊ Sigbriht his mǣg fēng tō WæstSeaxna rīce. ⁊ hēold ·i· gēar.