Bókastaðir

Not in Parker (A).

Hēr on þison gēare wæs se cyng Henrig tō Natiuited on Westmynstre. ⁊ þǣr his hīred hēold. ⁊ uppon þǣre tīde Rotbert de Bælesme mid unsehte fram þām cynge ūt of þison lande intō Normandige fōr.

Ðā hēr æfter on foran længtene wæs se cyng æt Norðhamtūne. ⁊ se eorl Rotbert his brōðer of Normandig þyder tō him cōm. ⁊ forþām se cyng him nolde āgifan ꝥ þe hē on Normandige uppon him genumen hæfde. hī mid unsehte tō hwurfon. ⁊ se eorl fērde ofer sē sōna eft ongēan.

On þǣre forman længten wucan on þone Frīge dæg '·i· xiiii ꝁ Mr̃' on ǣfen ætȳwde ān ungewunelic steorra. ⁊ lange stunde þǣr æfter wæs ǣlce ǣfen ge sewen hwīle scīnende. Se steorra ætȳwde innon ꝥ sūð west. hē wæs lītel ge þūht. and deorc. ac se lēoma þe him fram stōd wæs swīðe beorht. ⁊ swilce ormǣte bēam ge þūht norð ēast scīnende. ⁊ sumne ǣfen wæs ge sæwen swilce se bēam ongēan weardes wið þes steorran ward fyrcliende wǣre. Ge hwylce sǣdon ꝥ hīg mā on þison tīmon un cūðra steorra ge sāwon. ac wē hit openlīcor ne āwriton. forþām þe wē hit sylfe ne sāwon. On þā niht þe on morgen wæs Cena Dñi. ꝥ is se þunres dæg tōforan Ēastran. wǣron ge sewen twēgen mōnan on þǣre heofonan tōforan þām dæge ōðer be ēastan. ⁊ se ōðer be westan bēgen fulle. ⁊ þæs ylcan dæges wæs se mōna xiiii.

Tō Ēastran wæs se cyng æt Baðan. ⁊ tō Pentecosten æt Searbyrig. forþām þe hē nolde on his fundunge ofer sǣ hīred healdan. Ðǣr æfter tō fora'n' August fērde se cyng ofer sǣ intō Normandig. ⁊ ealle mǣst þe þǣr on lande wǣron him on his willan tō ge bugon. wiðūton Rotbert de Bælesme. ⁊ þām eorle of Moretoin. ⁊ fēawa ōðre of þām hēafod mannan þe mid þām eorle of Normandige þe gȳt hēoldan. ⁊ forþan se cyng syððan mid fyrde fōr. ⁊ be sæt þæs eorles ǣnne castel of Moretoin Tenercebrai hātte. On mang þām þe se cyng þone castel besæt. cōm se eorl Rotbert of Normandig on sc̄e Michaeles mæsse ǣfen uppon þone cyng mid his fyrde. ⁊ mid him Rotbert de Bælesme. ⁊ Willelm eorl of Moretoin. ⁊ ealle þā þe mid heom woldan. Ac sēo streongðe ⁊ se sige wearð þæs cynges. Ðǣr wearð se eorl of Normandig ge fangen. ⁊ se eorl of Moretoin. ⁊ Rotbert de Stutteuile. ⁊ tō Engla lande syððan ge sende. ⁊ on hæftnēðe ge brōhte. Rotbert de Bælesme þǣr wearð āflȳmed. ⁊ Willelm Crispin ge læht. ⁊ manige forð mid. Ēadgār æþeling þe lītle ǣr fram þām cynge tō þām eorle wæs ge faren þǣr wæs ēac gefangen. þone lēt se cyng syððan saclēas faran. Syððan ge ēode se cyng eall ꝥ on Normandige wæs. ⁊ hit on his willan ⁊ geweald ge sette.

Ðises gēares ēac wǣron swīðe hefige ⁊ sinlice gewinn betwux þām Cāsere of Sex'l'ande ⁊ his sunu. ⁊ on mang þām ge winnan se fæder forð fērde. ⁊ se sunu fēng tō þām rīce.

Not in Parker (A).

On þisum gēare tō Xp̄es mæssan wæs se cyng Henri on Normandig. ⁊ ꝥ land on his ge weald dihte. ⁊ sette. ⁊ þǣr æfter tō længtene hider tō lande cōm. ⁊ tō Ēastran his hīred on Windles ōran hēold. ⁊ tō Pentecosten on West minstre. ⁊ syððan eft tō Augustes anginne on West mynstre wæs. ⁊ þǣr þā biscop rīcen ⁊ abbod rīcen geaf. ⁊ sette. þe on Engle lande oððe on Normandige būton ealdre ⁊ hyrde [wǣron]. Ðēra wǣron swā fela swā nān man næs þe ge mynde ꝥ ǣfre ǣr swā fela tō gædere gyfene wǣron.

⁊ æt þes ylcan | sȳðe. on mang þā ōððre þe aƀƀrices under fēngon. Ernulf þe ǣr wæs prior on Cantwar byrig fēng tō þām aƀƀrice on Burh. Ðis wæs rihtlīce ymbe ·vii· gēar þæs þe se cyng Henri cynedōmes onfēng. ⁊ wæs ꝥ ān and fōwertigeðe gēar þæs þe Francan þyses landes wēoldan. Manege sǣdon þet hī on þām mōnan þyses gēares mistlice tācna ge sāwon. ⁊ ongēan cynde his lēoman wexende ⁊ waniende.

Ðises gēares forð fērdon. Mauricius biscop on Lunden. ⁊ Rotbert aƀƀ on sc̃e Ēadmundes byrig. ⁊ Ricard aƀƀ on Ēlig. Ðises gēares ēac forð fērde se cyng Ēadgār on Scotlande idus Iañr. ⁊ fēng Alexander his brōðer tō þām rīce swā se cyng Henri him ge ūðe.

Not in Parker (A).

Hēr on þisum gēare wes se cyng Henri tō Natiuiteð on West mynstre. ⁊ tō Ēastron on Winceastre. ⁊ tō Pentecosten eft on West mynstre. ⁊ þǣr æfter tōforan Aug' hē fērde in tō Normandig.

⁊ se cyng of France Philippus forðfērde N °. Aug'. ⁊ fēng his sunu Loðewis tō þām rīce. ⁊ wurdon syððon manege ge winn betwux þām cynge of France ⁊ þām of Engle lande. þā hwīle þe hē on Normandig wunode.

On þisum gēare ēac forð fērde se arceb Girard of Eoferwīc tōforan Pentecosten. ⁊ wearð syððan Thomas þǣr tō ge sett.

Not in Parker (A).

Hēr on þison gēare wæs se cyng Henri tō Xp̄es mæssan ⁊ tō Ēastron on Normandig. ⁊ tō foran Pentecosten hider tō lande cōm. ⁊ his hīred on Westmynstre hēold. Ðǣr wurdon þā forewearda full worhte. ⁊ þā āðas ge sworene his dohter þām Cāsere tō gifene.

Ðises gēares ge wurdon swīðe fela þunra. ⁊ þā swīðe ægeslīce. And se arceb Ansealm of Cantwara byrig forð fērde on þām dæge ·xi· k Apr̃. ⁊ wæs se forma Ēaster dæg on Letania maior.

Not in Parker (A).

On þisum gēare hēold se cyng Henri his hīred tō Xp̄es mæssan æt West mynstre. ⁊ tō Ēastron hē wæs æt Mærle beorge. ⁊ tō Pentecosten forman sīþe his hīred on þām nīwan Windlesōran hēold.

Ðises gēares sende se cyng tō foran længtene his dohter mid mænig fealdan mādman ofer sǣ. ⁊ hī þām Cāsere forgeaf. On þǣre fīftan nihte on Maies mōnðe. ætȳwde se mōna on ǣfen beorhte scīnende. ⁊ syððan lītlan ⁊ lītlan his lēoht wanode. swā ꝥ hē sōna nihtes tō þām swīðe mid ealle ācwanc. ꝥ nāþer ne lēoht ne trændel ne nān þing mid ealle of him wæs ge sæwen. ⁊ swā þurh wunode fullnēah oð dæg. ⁊ syðþan full ⁊ beorhte scīnende ætȳwde. hē wæs þæs ylcan dæges fēowertȳne nihta eald. ealle þā niht wæs sēo lyft swīðe clēne. ⁊ þā steorran ofer eall þā heofon swīðe beorhte scīnende. ⁊ tr'ē' ow wæstmas wurdon þǣre nihte þurh forste swīðe for numene. Ðǣr æfter on Iunies mōnðe ætȳwde ān steorra norðan ēastan. ⁊ his lēoma stōd tō foran him on þet sūðwest. ⁊ þus manega niht wæs ge sæwen. ⁊ furðor nihtes syððan hē ufor āstāh. hē wæs ge sewen on bæc on ꝥ norð west gangende.

Ðises gēares wurdon be lǣnde Philippus de Brause. ⁊ Willelm Mallet. ⁊ Willelm Bainart.

Ēac þises gēares forð fērde Elias eorl. þe þā Mannie of þām cynge Heanri ge hēold. ⁊ on cwēow. ⁊ æfter his forsīðe fēng tō se eorl 'of' Angeow. ⁊ hī tōgēanes þām cynge hēold.

Ðis wæs swīðe ge deorfsum gēar hēr on lande þurh gyld þe se cyng nam for his dohter gyfte. ⁊ þurh un ge wædera. for hwan eorð westmas wurdon swīðe āmyrde. ⁊ trēow westmas ofer eall þis land for nēah eall for wurdon.

Ðises gēares me began ǣrost tō weorcenne on þām nīwan mynstre on Ceortes ǣge.

Not in Parker (A).

On þison gēare ne bær se kyng Henri his coronan tō Xp̄es mæssan. ne tō Ēastron. ne tō Pentecosten. ⁊ innan August hē fērde ofer sǣ intō Normandig. for un sehte þe wið him hæfdon sume be þām gemǣran of France. ⁊ swīðost for þām eorle of Angeow þe þā Mannie tōgēanes him hēold. and syððan hē þyder ofer cōm. manega un rāda ⁊ bærnetta ⁊ hergunga hī heom betwēonan ge dydan.

On þison gēare forð fērde se eorl Rotbert of Flandran. ⁊ fēng his sunu Baldewine þǣrtō.

Ðises gēares wæs swīðe lang winter. ⁊ hefig tȳme. ⁊ strang. ⁊ þurh ꝥ eorð wæstmas wurdon swīðe āmyrde. ⁊ ge weard se mǣsta orf cwealm þe ǣnig mann mihte ge munan.

Not in Parker (A).

Eall þis gēar wunode se cyng Henri on Normandig for þǣre un sehte þe hē hæfde wið France. ⁊ wið þone eorl of Angeow þe þā Mannie tō gēanes him hēold. ⁊ on mang þām þe hē þǣr wæs. hē be lǣnde þone eorl of Eureus. ⁊ Willelm Crispin. ⁊ ūt of Normandi ādrāf. ⁊ Philippe de Braus his land āgeaf. þe ǣr wæs be lǣnd. ⁊ Rotbert de Bælesme hē lēt niman ⁊ on prisune dōn.

Ðis wæs swīðe gōd gēar ⁊ swīðe wistfull on wudan ⁊ on feldan. ac hit wæs swīðe hefig tȳme ⁊ sorhfull þurh ormǣtne man cwealm.

Not in Parker (A).

Hēr on þison gēar wæs se cyng Henri tō Natiuiteð ⁊ tō Ēastron. ⁊ tō Pentecosten on Normandig. ⁊ þǣr æfter tō sumeran hē sænde hider tō lande Rotbert de Bælesme intō þām castele tō Wærham. ⁊ him sylf sōna þǣr æfter hider tō lande cōm.

Not in Parker (A).

On þison gēare hēold se cyng Henri his hȳred tō Natiuiteð on Windlesōran. ⁊ þæs gēares syððan hē ne hēold hīred nān oftar.

And tō middan sumeran hē fērde mid fyrde in tō Wealon. ⁊ þā Wyliscean cōman ⁊ wið þone cyng griðedon. ⁊ hē lēt þǣr inne castelas weorcean. ⁊ þǣr æfter innan Septemƀ hē fōr ofer sǣ intō Normandig.

Ðises gēares on æfteward Mai wæs ge sewen ān selcūð steorra mid langan lēoman manege niht scīnende. Ēac on þis ylcan gēare wæs swā mycel ebba ǣghwǣr ānes dæges swā nān man ǣror ne ge munde. ⁊ swā ꝥ man fērde rīdende ⁊ gangende ofer Tæmese be ēastan þǣre brigge on Lunden. Þises gēares wǣron swīðe mycele windas on Octoƀr̃ mōnðe. ac hē wæs or mǣte mycel on þā niht Octaƀ sc̃i Martini. ⁊ ꝥ gehwǣr on wudan ⁊ on tūnan ge cȳdde.

Ēac on þisum gēare se cyng geaf þet arceƀrice on Cantwara byrig Raulfe. se wæs ǣror biscop on Hrofe ceastre. And se arceƀ on Eoferwīc Thomas forð fērde. ⁊ fēng Turstein þǣrtō. se wæs ǣror þæs cynges capelein.

On þæs ylcan tyme feorde se cyng toweard þone sæ ⁊ ofer wolde. ac wæder him lætte. þa hwile þa sende he his writ æfter þone aƀƀ Ernulf of Burh. ⁊ be bead him ꝥ he efeostlice scolde to him cuman. forþi ꝥ he wolde sprecon mid him dærne sprece. Ða he to him com. þa neodde he him to þam biscoprice of Hrofeceastre. ⁊ þa arc̃biscopes ⁊ biscopes ⁊ ꝥ dugeð ꝥ wæs on Engla lande forð mid se cyng. ⁊ he lange wið stód. ac hit ne for heol naht. ⁊ se cyng þā bebēad þone arc̃ƀ ꝥ hē sceolde him lǣden tō Cantwara byrig ⁊ blǣtson him tō ƀ wolde hē nolde hē:~ þis wæs dōn on þǣre tūna þā man cleopað Burne. ꝥ wæs þes dæges ·xvii· k Octoƀr̃. Ðā þe munecas of Burch hit hērdon sægen. þā wǣron hī swā sāri swā hī nǣfre ǣr ne wǣron. forþī ꝥ hē wæs swīðe gōd ⁊ sōfte man. ⁊ dyde mycel to gode wiðinnan ⁊ wiðutan. þa hwile þe he þær wunode. God ælmihtig wunie æfre mid him.

Ða sona þær æfter þa geaf se cyng þone aƀƀ rice an munec of Sæis Iohan wæs gehaten. þurh þæs arceb gearnunge of Cantwarbyrig. ⁊ sona þær æfter sende se cyng him ⁊ se arceb of Cantwarbyrig to Rome 'æfter þes ærceb pallium'. ⁊ an 'munec' mid him Warner is gehaten. ⁊ þone ærce diæcne Iohan þes arceb neafe. ⁊ hi þær well spæddon. Ðis wæs don þes dæges ·xi· k Octoƀr̃, on þone tuna þe man cleopað Rugenore. ⁊ þes ylces dæges eode se cyn'g' on scipa on Portes muðe.

Not in Parker (A).

Hēr wæs se cyng Henri tō Natiuiteð on Normandig. ⁊ on mang þām þe hē þǣr wæs. hē dyde ꝥ ealle þā hēafod mæn on Normandig dydon man rǣden ⁊ hold āðas his sunu Willelme þe hē be his cwēne hæfde. ⁊ æfter þan syððan innon Iulies mōnðe hider intō lande cōm.

Ðises gēares wæs swā strang winter mid snāwe ⁊ mid forste. swā nān man þe þā lifode ǣr þan nān strengre ne gemunde. ⁊ wearð þurh ꝥ un gemǣte orf cwealm.

On þison gēare sænde se pāpa Paschalis Raulfe ærceb on Cantwarabyrig pallium hider tō lande. ⁊ hē his onfēng mid mycelan wurðscipe æt his arce stōle on Cantwara byrig. Hine brōhte Ansealm aƀƀ of Rōme se wæs nefa Ansealmes ærceb. ⁊ se aƀƀ Iohan of Burh.

Not in Parker (A).

On þison gēare wæs se cyng Henri tō Natiuiteð æt sc̃e Albane. ⁊ þǣr lēt ꝥ mynster hālgian. ⁊ tō Ēastron on Wudiham. ⁊ Wes ēac þyses gēares swīðe hefig tȳme winter ⁊ strang ⁊ lang. wið orf ⁊ wið ealle þing. And se cyng æfter Ēastron sōna fērde ofer sǣ intō Normandig. ⁊ wurdon manega unrāda ⁊ rǣfunga. ⁊ castelas genumene betwux France ⁊ Normandig. Mǣst þis unsehte wæs forþan þe se cyng Henri fylste his nefan þām eorle Tædbalde de Blais. þe þā wyrre hæfde tōgēanes his hlāforde þām cynge of France Loðewis.

Ðis wæs swīðe geswincfull gēar ⁊ byrstfull on eorð wæstman. þurh þā ormǣte reinas þe cōman sōna onforan August. ⁊ swīðe gedrehton ⁊ geswencton þe gȳt þe cōm Candel mæssan. Ēac þis gēar wæs swā gǣsne on mæstene. swā ꝥ on eallon þison lande. ne ēac on Wealon ne ge hȳrde me of nānan segcean. Ðis land ⁊ þās lēodon wurdon ēac þyses gēares oftrǣdlīce sāre ge swencte. þurh þā gyl'd' þe se cyng nam. ǣgðer ge binnan burgan ⁊ būtan.

On þisum ylcan geare bærnde eall ꝥ mynstre of Burh. ⁊ eallæ þa husas butan se Captel hus ⁊ se Slæpperne. ⁊ þær to eac bærnde eall þa mæste dæl of þa tuna. Eall þis belamp on an Frig dæg. ꝥ wæs ·ii· N° Aug't.

Not in Parker (A).

Eall þis gēar wunode se cyng Henri on Normandig. for þes cynges unsehte of France ⁊ his ōðra nēhhebūra. ⁊ þā tō ðan sumeran cōm se cyng of France ⁊ se eorl of Flandra mid him mid fyrde intō Normandig. ⁊ āne niht þǣr inne wunedon. ⁊ on morgen būtan ge feohte on gēan fērden. ⁊ Normandig wearð swīðe gedreht. ǣgðer ge þurh gyld. ge þurh fyrde þe se cing Henri þǣr ongēan gaderode. Ēac þēos þēode þurh þis ylce þurh manigfealde gyld. wearð strange ge swenct.

Ðises gēares ēac on þǣre nihte ꝁ Decemƀ wurdon ormǣtlica wædera mid þunre. ⁊ līhtinge. ⁊ reine. ⁊ hagole. And on þǣre nihte · ·iii°· · idus Dec̃ wearð se mōna lange nihtes swylce hē eall blōdig wǣre. ⁊ syððan āðīstrode. Ēac on þǣre nihte ·xvii· k Iañr wæs sēo heofon swȳðe rēad ge sewen. swylce hit bryne wǣre. And on Octaƀ sc̃i Joh̄is Eugłæ wæs sēo mycele eorð byfung on Lumbardige. for hwan manega mynstras ⁊ turas. ⁊ hūses ge fēollon. ⁊ mycelne hearm on mannan ge dydon. Ðis wæs swȳðe byrstful gēar on corne. þurh þā renas þe fornēh ealles gēares ne ge swicon.

And se aƀƀ Gilebert of West mynstre forð fērde ·viii· idus Dec̃. And Farits aƀƀ of Abbandūne ·vii· k Martīī. And on þisum ylcan gēare . . . . . . .

Not in Parker (A).

Hēr eall þis gēar wunode se cyng Henri on Normandig. for þes cynges wyrre of France. ⁊ þæs eorles of Angeow. ⁊ þæs eorles of Flandran. ⁊ se eorl of Flandra warð innan Normandig ge wundod. ⁊ swā ge wundod in tō Flandran fōr. Ðurh þisra un sehte wearð se cyng swȳðe ge dreht. ⁊ mycel for lēas. ǣgðer ge on feoh ⁊ ēac on lande. ⁊ mǣst hine dryfdon his āgene mæn þe him ge lōme fram bugon. ⁊ swicon. ⁊ tō his fēondan cyrdon. ⁊ heom tō þæs cynges hearme ⁊ swicdōme heora castelas āgēafon. Eall þis strange gebōhte Engla land. þurh þā mænig fealdlice gyld þe ealles þises gēares ne geswicon.

On þison gēare on þǣre wucon Theophanie wæs ānes ǣfenes swȳðe mycel līhtinge. ⁊ un gemetlice slæge þǣr æfter.

And sēo cwēn Mahald forð fērde on West mynstre þæs dæges ꝁ Mai. ⁊ þǣr wæs bebyrged. And se eorl Rotbert of Mellent þises gēares ēac forð fērde.

Ēac on þison gēare tō sc̃e Thomas mæsse. wæs swā swīðe ungemetlīce mycel wind. ꝥ nān man þe þā lifode nǣnne māran ne gemunde. ⁊ ꝥ wæs ǣghwēr ge seone. ǣgðer ge on hūsan. ⁊ ēac on trēowan.

Ðises gēares ēac forð fērde se pāpa Paschalis. ⁊ fēng Iohan of Gaitan tō þām pāpdōme. þām wæs ōðer nama Gelasius.