Bókastaðir

Hēr Landfranc se þe wæs aƀƀ an Kadum cōm tō Ængla lande, se efter fēawum dagum wearð arceƀ on Kantwareberig. Hē wæs gehāded ·iiii· kł Septembris. on his āgenum bisc̃psetle fram eahte biscopum his under ðīoddum; ðā ōþre ðe þǣr nǣron þurh ǣrend rakan ⁊ þurh ge write atīwdon hwī hī ðǣr bēon ne mihton. On þām gēare THOMAS se wæs ge coran bisc [o] p tō Eferwīc cōm tō Cantwareberig ꝥ man hine ðǣr ge hādede efter þan ealdan ge wunan. Ðā ðā Landfranc crafede fæstnunge his gehērsumnesse mid āð swerunge. þā for sōc hē. ⁊ sǣde ꝥ hē 'hit' nāhte tō dōnne. þā ge wrāðede hine se ar̃ƀ Landfranc. ⁊ bebēad þām biscopan ðe þār cumene wǣran be ðās ar̃ƀ Landfrances hǣse þā serfise tō dōnde. ⁊ eallan þan munecan, ꝥ hī scoldan hī un scrȳdan. ⁊ hī be his hǣse swā didan.

Swā Thomas tō þām tīman agēan fērde būton blētsunga. þā sōna æfter þysan belamp ꝥ se ar̃ƀ Landfranc fērde tō Rōme ⁊ Thomas forð mid. þā þā hī þyder cōmon ⁊ umbe ōþer þing gesprecon hæfdon umbe ꝥ hī sprecan woldon. þā angan Thomas his spǣce hū hē cōm tō Cantuuarebyri, ⁊ hū se ar̃ƀ āxode hȳrsumnesse mid āþ swerunge at him. ⁊ hē hit for sōc. þā agann se ar̃ƀ Landfranc atȳwian mid openum gescēade. ꝥ hē mid rihte crafede þās þā hē crafede. ⁊ mid strangan cwydan ꝥ ylce gefæstnode tōforan þām pāpan Alexandre. ⁊ tōforan eallan þām concilium þe þār gegadered was. ⁊ swā hām fōran. Æfter þysan cōm Thomas tō Cantwarebyri ⁊ eal ꝥ se ar̃ƀ at him crafede. ēadmēdlīce ge fylde. ⁊ syþþan þā blētsungan under fēng.

Her se eorl Walþeof griðede wið þone cyng. ⁊ þæs on lengten se cyng let hergian ealle þa mynstra þe on Engla lande wæron.

Þa on þam ilcan geare com Swegn cyng of Denmarcan in to Humbran. ⁊ ꝥ land folc comen him ongean ⁊ griðedon wið hine. wændon ꝥ he sceolde þet land ofer gan. Þa comen into Elíg Xp̄istien þa Densceƀ ⁊ Osbearn eorl ⁊ þa Densca hus carles mid heom. ⁊ þet Englisce folc of eall þa feon landes comen to heom. wendon ꝥ hi sceoldon winnon eall ꝥ land. Þā hērdon þā munecas of Burh sægen ꝥ heora āgene menn wolden hergon þone mynstre, ꝥ wæs Hereward ⁊ his genge. ꝥ wæs forðan þet hī hērdon sæcgen þet se cyng heafde gifen ꝥ abbotrīce ān Frencisce abbot Turolde wæs gehāten. ⁊ ꝥ he wæs swiðe styrne man. ⁊ wæs cumen þa into Stanforde mid ealle hise Frencisce menn. Þa wæs þære an cyrce weard Yware wæs gehaten. nam þa be nihte eall þet he mihte. þet wæron Xp̄es bec ⁊ mæsse hakeles ⁊ cantelcapas ⁊ reafes ⁊ swilce litles hwat. swa hwat swa he mihte. ⁊ ferde sona ær dæg to þone abbot Turolde ⁊ sægde him ꝥ he sohte his griðe. ⁊ cydde him hu þa útlages sceolden cumen to Burh. ꝥ he dyde eall be þære mun'ece ræde. Þa sona on morgen comen ealle þa utlaga mid fela scipe, ⁊ woldon into þam mynstre. ⁊ þa munecas wið stoden ꝥ hi na mihton in cumen. Þa lægdon hi fyr on. ⁊ forbærndon ealle þa munece huses ⁊ eall þa tun buton ane huse. Þa comen hi þurh fyre in æt Bolhiðe geate. ⁊ þa munecas comen heom to geanes. beaden heom grið, ac hí ná rohten na þing. geodon into þe mynstre. clumben úpp to þe halge rode. namen þa þe kynehelm of ure Drih't'nes heafod eall of smeate golde. namen þa þet fotspure þe wæs undernæðen his fote. ꝥ wæs eall of read golde. Clumben úpp to þe stepel. brohton dune ꝥ hæcce þe þær wæs be hid. hit wæs eall of ‘'gold' ⁊ of seolfre. hi namen þære twa gildene scrines ⁊ ·ix· seolferne. ⁊ hi namen fiftene mycele roden. ge of golde ge of seolfre. hi namen þære swa mycele gold ⁊ seolfre ⁊ swa manega gersumas on sceat ⁊ on scrud ⁊ on bokes swa nan man ne mæi oðer tællen. sægdon ꝥ hí hit dyden for ðes mynstres holdscipe. Syððon geden heom to scipe. ferden heom to Elig, betæhtan þær þa ealla þa gærsume; þa Denescæ menn wændon ꝥ hi sceoldon ofer cumen þa Frencisca men. þa to drefodon ealle þa munekes. beleaf þær nan butan án munec he wæs ge haten Leofwine lange. he læi seoc in þa secræ man in. Ða com Turold abbot ⁊ æhte siþe twenti Frencisce men mid hím ⁊ ealle full wepnode. þa he þider com þa fand he for bærnd wiðinnan ⁊ wiðutan. eall butan þa cyrece ane. þa wæron þa ut lagas ealle on flote. wistan ꝥ he scolde þider cumen. þis wæs don þæs dæges iiiio No Iuníí. þa twegen kyngas Willelm ⁊ Swægn wurðon sæhtlod. þa ferdon þa Dænesca menn út of Elig mid ealle þa foren spræcena gærsume ⁊ læddon mid heom. þa hi comen on middewarde þe sæ. þa com an mycel storm ⁊ to dræfede ealle þa scipe þær þa gersumes wæron inne. sume ferdon tó Norwæge. sume to Yrlande. sume to Dænmarce. ⁊ eall ꝥ þider com ꝥ wæs þone hæcce ⁊ sume scrine ⁊ sume roden ⁊ fela of þa oðre gærsume. ⁊ brohten hit to an cynges tún hatte. ⁊ dyden hit eall þa in þone cyrce. Ða syððon þurh heora gemelest ⁊ þurh heora dru'n'cen hed on án niht for bærnde þa cyrce. ⁊ eall þet þær innæ wæs. Ðus wæs se mynstre of Burch forbærnd ⁊ forhærgod. æl mihtig God hit gemiltse þurh his mycele mild hertnesse. And þus se abbot Turolde com to Burh. ⁊ þa munecas comen þa ongean. ⁊ dydan Xp̄es þeudom in þære cyrce. ꝥ ær hæfde standen fulle seofeniht for utan ælces cynnes riht. Ða herde Ægelric biscop þet gesecgon. þa amansumede he ealle þa men þa ꝥ yfel dæde hæfden don.

Ða wæs mycel hunger þæs geares. ⁊ þa þæs sumeres com þet lið norðan of Humbran into Tæmese. ⁊ lagon þær twa niht. ⁊ heoldan syððon to Dænmercan. And Baldewine eorl forð ferde. ⁊ his sunu Arnulf feng to rice. ⁊ Willelm eorl sceolde ben his geheald. ⁊ Franca cyng eac. ⁊ com þa Rodbriht eorl ⁊ ofsloh his mæg Arnulf. ⁊ þone eorl. ⁊ þone cyng aflymda. and his menn ofsloh fela þusenda.

Not in Parker (A).

Hēr Ǣdwine eorl ⁊ Morkēre eorl ūthlupon ⁊ mislīce fērdon on wudu ⁊ on felda. Ðā gewende Morkēre eorl tō Ēlig on scipe. And Ēadwine eorl wearð ofslagen arhlīce fram his āgenum mannum. ⁊ cōm se ƀ Egelwine. ⁊ Siward Bearn. ⁊ fela hund manna mid heom in tō Ēlig. ⁊ þā þe se cyng Willelm ꝥ ge āxode. þā bēad hē ūt scip fyrde ⁊ land fyrde. ⁊ þet land ābūtan sæt. ⁊ brycge ge wrohte. ⁊ inn fōr. ⁊ sēo scip fyrde on þā sǣ healfe. ⁊ þā ūt lagan þā ealle on hand ēodan. ꝥ wæs Egelwine ƀ. ⁊ Morkēre eorl. ⁊ ealle þā þe mid heom wǣron būton Herewarde āne. ⁊ ealle þā þe mid him woldon. ⁊ hē hī ahtlīce ūt lǣdde. ⁊ se cyng genam scipa ⁊ wǣpna ⁊ sceattas manega. ⁊ þā men hē ātēah swā swā hē wolde. ⁊ þone ƀ Egelwine hē sende tō Abbandūne. ⁊ hē þǣr forðfērde sōna þæs wintres.

Not in Parker (A).

Hēr Willelm cyng lǣdde scipfyrde ⁊ landfyrde tō Scotlande. ⁊ ꝥ land on þā sǣ healfe mid scipum ymbe læg. ⁊ his land fyrde æt þām Ge wǣde inn lǣdde. ⁊ hē þǣr nāht ne funde þæs þe him þe bet wǣre. ⁊ se cyng Melcolm cōm ⁊ griðede wið þone cyng Willelm ⁊ gīslas sealde. ⁊ his man wæs. ⁊ se cyng hām ge wende mid ealre his fyrde. ⁊ se ƀ Egelrīc forð fērde. hē wæs tō biscop hādod tō Eoferwīc. ac hit wæs mid unrihte him of ge numon. ⁊ man geaf him ꝥ ƀ rīce on Dūnholme. ⁊ hē heafde hit þā hwīle þe hē wolde. ⁊ forlēt hit syððan. ⁊ fērde tō Burch tō sce Petres mynstre.

⁊ þǣr drohtnode ·xii· gēar. Ðā æfter þām þe Willelm cyng gewan Engla lande. þā nam hē hine of Burch ⁊ sende 'hine' tō Westmynstre. ⁊ hē forðfērde on idus Octob. ⁊ hē is bebyrged þǣr innan þām mynstre. innon sces Nicolaus portice.

Not in Parker (A).

On þisum gēare Willelm cyng lǣdde Engliscne here ⁊ Frencisce ofer sǣ. ⁊ gewan ꝥ land Mans. ⁊ hit Englisce men swȳðe āmyrdon. wīngearðas hī fordydon. ⁊ burga forbærndon. ⁊ swīðe þet land āmyrdon. ⁊ hit eall ābēgdon Willelme tō handa. ⁊ hī syððon hām gewendon tō Engla lande.

Not in Parker (A).

On þisum gēare fōr Willelm cyng ofer sǣ tō Normandig. ⁊ Ēadgār cild cōm of Scotland tō Normandige. ⁊ se cyng hine ge inlagode. ⁊ ealle his men. ⁊ hē wæs on þes cynges hȳrede. ⁊ nam swilce ge rihta swā se cyng him ge ūðe.

Not in Parker (A).

On þisum gēare Willelm cyng geaf Raulfe eorle Willelmes dohtor Ōsbearnes sunu. ⁊ se ylca Raulf wæs Bryttisc on his mōder healfe. ⁊ his fæder wæs Englisc Raulf hātte. ⁊ wæs geboren on Norðfolc. þā geaf se cyng his sunu þone eorldōm on Norðfolc. ⁊ Sūðfolc. þā lǣdde hē ꝥ wīf tō Norðwīc.

þǣr wes ꝥ brȳd eala mannum tō beala.

Ðǣr wæs Roger eorl. ⁊ Walþēof eorl. ⁊ biscopas ⁊ abbotes. ⁊ rǣddon þǣr swā ꝥ hī woldon þone cyng ge settan ūt of Englelandes cynedōme. ⁊ hit wearð sōna gecȳdd þām cynge tō Normandige hū hit wæs ge rǣd. ꝥ wæs Roger eorl. ⁊ Raulf eorl. þe wǣron yldast tō ðām unreode. ⁊ hī spēonan þā Bryttas heom tō. ⁊ sendon ēast tō Denmearcan æfter scip here heom tō fultume. ⁊ Roger fērde west tō his eorldōme. ⁊ ge gaderode his folc tō þæs cynges unþearfe. ac hē wearð ge let. ⁊ Raulf ēac on his eorldōme wolde forðgān mid his folce. ac þā castel men þe wǣron on Englalande ⁊ ēac ꝥ land folc him tō gēanes cōmen. ⁊ ge macodon ꝥ hē nāht ne dyde. ac fōr tō scipe æt Norð wīc. ⁊ his wīf wæs innan þām castele. ⁊ hine hēold swā lange ꝥ man hire grið sealde. ⁊ hēo ūt fērde þā of Engla lande. ⁊ ealle hire men þe hire mid woldon. ⁊ se cyng siððan cōm tō Engla lande. ⁊ genam Roger eorl his mǣg. ⁊ ge festnode hine. ⁊ Walþēof eorl hē genam ēac.

⁊ sōna æfter þām cōmon ēastan of Den mearcan ·cc· scipa. ⁊ þǣr on wǣron twǣgen hēafod menn. Cnut Swægnes sunu. ⁊ Hacun eorl. ⁊ hī ne dorstan nān ge feoht healdan wið Willelm cynge. ac hēoldon ofer sǣ tō Flandran.

⁊ Ēadgīð sēo hlǣfdig forðfērde on Winceastre ·vii· nihton ǣr Xp̄es mæssan. ⁊ se cyng hī lēt bryngan tō West mynstre mid mycclan wurðscipe. ⁊ lægde hī wið Ēadward kyng hire hlāforde.

⁊ se wæs on West mynstre þone mide winter. ⁊ man for dyde þǣr ealle þā Bryttas þe wǣron æt þām brȳd ealoð æt Norðwīc. sume hȳ wurdon āblænde ⁊ sume of land ādrifene. swā wurdon Willelmes swican geniðrade.

Not in Parker (A).

On þisum gēare forðfērde Swægn cyng on Dænmercan. ⁊ Harold his sunu fēng tō 'þe' kyne rīce. ⁊ se cyng geaf West mynster Vithele abbode se wæs ǣr aƀƀ on Bærnege. ⁊ Walþēof eorl wes behēafdod on Win ceastre. ⁊ his lic wearð ge lēad tō Crūlande.

⁊ se cyng fōr ofer sǣ. ⁊ lǣdde his fyrde tō Brytlande. ⁊ be set þone castel Dol. ⁊ þā Bryttas hine hēoldon ꝥ se cyng cōm of Franc land. ⁊ Willelm þanon fōr. ⁊ þǣr forlēas ǣgðer ge men ge hors. ⁊ feola his gersuma.

Not in Parker (A).

Hēr on þisum gēare wurdon sæhte Franca cyng ⁊ Willelm Englalandes cyng. ac hit hēold lītle hwīle.

⁊ Ðes gēares forbarn Lunden burh ānre nihte ǣr Assumptio cōmb sce Mariæ swā swȳðe swā hēo nǣfre ǣr næs syð þan hēo ge stabeled wæs.

And on þisum gēare forðfȳrde Ægelwīg aƀƀ on Euesham on þām dæge ·xiv· ꝁ Mr̃. And Hereman ƀ ēac forðfērde on þām dæge ·x· ꝁ Mr̃.

Not in Parker (A).

On þisum gēare cōm Melcolm cyng of Scot lande intō Engle lande betwyx þām twām Mariam mæssan mid mycclum fyrde. ⁊ ge hergode Nord hymbra land oð hit cōm tō Tīne. ⁊ ofslōh feala hund manna. ⁊ hām lǣdde manige sceattas. ⁊ gersuma. ⁊ menn 'on h'eftninge.

And þī ilcan gēare se cyng Willelm ge feaht tōgēanes his sunu Rotbearde wið ūtan Normandige be ānum castele Gerborneð hātte. ⁊ se cyng Willelm wearð þǣr ge wundod. ⁊ his hors ofslagen þe hē on sæt. ⁊ ēac his sunu Willelm wearð þǣr ge wundod. ⁊ fela manna ofslagene.

Not in Parker (A).

On þisum gēare wæs se ƀ Walchere ofslagen on Dūnholme æt ānum ge mōte. ⁊ ān hund manna mid him Frencisce ⁊ Flemisce. ⁊ hē sylf wæs on Hloðeringa geboren. þis dydon Norð hymbran on Maies mōnðe.

Not in Parker (A).

On þisum gēare se cyng lǣdde fyrde in tō Wealan. ⁊ þǣr ge frēode fela hund manna.

Not in Parker (A).

Hēr nam se cyng Odan ƀ. ⁊ hēr wæs mycel hungor.

Not in Parker (A).

On þisum gēare ārās sēo ungehwǣrnes on Glæstinga byrig betwyx þām abbode Þurstāne. ⁊ his munecan. Ǣrest hit cōm of þæs abbotes unwīsdōme. ꝥ hē misbēad his munecan on fela þingan. ⁊ Ðā munecas hit mǣndon lufelīce tō him. ⁊ bēadon hine ꝥ hē sceolde healdan hī rihtlīce. ⁊ lufian hī. ⁊ hī woldon him bēon holde. ⁊ ge hȳrsume. Ac se abbot nolde þæs nāht. ac dyde heom yfele. ⁊ be hēot heom wyrs. Ānes dæges þe abbot ēode intō capitulan. ⁊ spræc uppon þā munecas. ⁊ wolde hī mis tūkian. ⁊ sende æfter lǣwede mannum. ⁊ hī cōmon intō capitulan on uppon þā munecas full ge wēpnede. ⁊ þā wǣron þā munecas swīðe āfērede of heom. nyston hwet heom tō dōnne wǣre. Ac tō scuton. sume urnon in tō cyrcean. ⁊ belucan þā duran intō heom. ⁊ hī fērdon æfter heom intō þām mynstre. ⁊ woldon hīg ūt dragan. þāðā hīg ne dorsten nā ūt gān. Ac rēowlic þing þǣr gelamp on dæg. ꝥ þā Frencisce men bræcen þone chór ⁊ torfedon tōwærd þām wēofode þǣr ðā munecas wǣron. ⁊ sume of ðām cnihtan fērdon uppon þone upp flōre. ⁊ scotedon adūnweard mid arewan tōweard þām hālig dōme. swā ꝥ on þǣre rōde þe stōd bufon þām wēofode sticodon on mænige arewan. ⁊ þā wreccan munecas lagon on būton þām wēofode. ⁊ sume crupon under. ⁊ gyrne cleopedon tō Gode his miltse biddende. Ðā þā hī ne mihton nāne miltse æt mannum begytan. Hwæt magon wē secgean. būton ꝥ hī scotedon swīðe. ⁊ þā ōðre ðā dura brǣcon þǣr adūne ⁊ ēodon inn. ⁊ ofslōgon sume þā munecas tō dēaðe. ⁊ mænige gewundedon þǣr inne. swā ꝥ ðet blōd cōm of ðām wēofode uppon þām gradan. ⁊ of ðām gradan on þā flōre. þrēo þǣr wǣron ofslagene tō dēaðe. ⁊ eahtetēone gewundade.

⁊ on þæs ilcan gēares forðfērde Mahtild Willelmes cynges cwēn. on þone dæg æfter ealra hālgena mæsse dæg.

And on þes ylcan gēares æfter midewintre se cyng lēt bēodan mycel gyld ⁊ hefelic ofer eall Engla land. ꝥ wæs æt ǣlcere hȳde twā ⁊ hund seofenti peanega.

Not in Parker (A).

Hēr on ðisum gēare forðfērde Wulfuuold aƀƀ on Ceortesēge. on þām dæge ·xiii· ꝁ Mai.

Not in Parker (A).

On þisum gēare menn cwydodon ⁊ tō sōðan sǣdan. ꝥ Cnut cyng of Denmearcan Swægnes sune cynges fundade hiderward. ⁊ wolde gewinnan þis land mid Rodbeardes eorles fultume of Flandran. forðan 'þe' Cnut heafde Rodbeardes dohter. Ðā Willelm Englalandes cyng þe þā wæs sittende on Normandige. forðīg hē āhte ǣgðer ge Engla land ge Normandige. þis geāxode. hē fērde intō Englalande mid swā mycclan here rīdendra manna. ⁊ gangendra of Fran'c rīce and of Brytlande. swā nǣfre ǣr þis land ne gesōhte. swā ꝥ menn wundredon hū þis land mihte eall þone here āfēdan. Ac se cyng 'lēt' tō scyfton þone here geond eall þis land tō his mannon. ⁊ hī fǣddon þone here ǣlc be his land efne. ⁊ men heafdon mycel geswinc þæs gēares. ⁊ se cyng lētt āwēstan ꝥ land ābūtan þā sǣ. þet gif his fēond cōmen upp. ꝥ hī næfdon nā on hwām hī fēngon swā rǣdlīce. Ac 'þā' se cyng geāxode tō sōðan ꝥ his fēond gelætte wǣron. ⁊ ne mihten nā geforðian heora fare. þā lētt hē sum þone here faren tō heora āgene lande. ⁊ sum hē hēold on þisum lande ofer winter.

Ðā tō þām mide wintre wæs se cyng on Glēaweceastre mid his witan. ⁊ hēold þǣr his hīred ·v· dagas. ⁊ syððan þe arceƀ ⁊ gehādode men hæfden sinoð þrēo dagas. Ðǣr wæs Mauricius gecoren tō ƀ on Lundene. ⁊ Willelm tō Norðfolce. ⁊ Rodbeard tō Ceasterscīre. hī wǣron ealle þæs cynges clerecas.

Æfter þisum hæfde se cyng mycel geþeaht. ⁊ swīðe dē'o'pe spǣce wið his witan ymbe þis land hū hit wǣre gesett. oððe mid hwylcon mannon. Sende þā ofer eall Englaland in tō ǣlcere scīre his men. ⁊ lētt āgān ūt hū fela hundred hȳda wǣron innon þǣre scīre. oððe hwet se cyng him sylf hæfde landes. ⁊ orfes innan þām lande. oððe hwilce gerihtæ hē āhte tō habbanne tō ·xii· mōnþum of ðǣre scīre. Ēac hē lētt gewrītan hū mycel landes his arceƀs hæfdon. ⁊ his leodƀs. ⁊ his aƀƀs. ⁊ his eorlas. ⁊ þēah ic hit lengre telle. hwæt oððe hū mycel ǣlc mann hæfde þe landsittende wæs innan Englalande. on lande. oððe on orfe. ⁊ hū mycel fēos hit wǣre wurð. Swā swȳðe nearwelīce hē hit lētt ūt āspyrian. ꝥ næs ān ǣlpig hīde. ne ān gyrde landes. ne furðon, hit is sceame tō tellanne. ac hit ne þūhte him nān sceame tō dōnne. ān oxe. ne ān cū. ne ān swīn. næs belyfon. ꝥ næs geset on his gewrite. ⁊ ealle þā gewrita wǣron gebrōht tō him syððan.

Hēr se cyng bær his corona ⁊ hēold his hīred on Winceastre tō þām Ēastran. ⁊ swā hē fērde ꝥ hē wæs tō þām Pentecosten æt Wæstminstre. ⁊ dubbade his sunu Henric tō rīdere þǣr. Syððan hē fērde ābūtan swā ꝥ hē cōm tō Lammæssan tō Seare byrig. ⁊ þǣr him cōmon tō his witan. and ealle þā land sittende men. þe āhtes wǣron ofer eall Engle land. wǣron þæs mannes men þe hī wǣron. ⁊ ealle hī bugon tō him. ⁊ wēron his menn. ⁊ him hold āðas swōron ꝥ hī woldon ongēan ealle ōðre men him holde bēon. Ðanon hē fērde intō Wiht. for þīg hē wolde faran intō Normandige. ⁊ swā dyde syððan. And þēah hē dyde ǣrest æfter his gewunan. begeat swīðe mycelne sceatt of his mannan þǣr hē mihte ǣnige teale tō habban oððe mid rihte oððe elles. Fērde þā syððan intō Normandige. ⁊ Ēadgār æþeling Ǣdwardes mǣg cynges bēah þā fram him for þīg hē næfde nā mycelne wurðscipe of him. ac se ælmihtiga God him gife wurðscipe on þām tōweardan. ⁊ Cristina þæs æðelinges swuster bēah intō mynstre tō Rūmesēge. ⁊ under fēng hālig rest.

⁊ þæs ilcan gēares wæs swīðe hefelic gēar. ⁊ swīðe swincfull ⁊ sorhfull gēar innan Engle lande on orf cwealme. ⁊ corn. ⁊ wæstmas wǣron æt standene. ⁊ swā mycel ungelimp on wæderunge. swā man nāht ǣðelīce geþencean ne mæg. swā stōr þunring. ⁊ lægt wes. swā ꝥ hit ācwealde manige men. ⁊ aa hit wyrsode mid mannan swīðor ⁊ swīðor. Gebēte hit God elmihtiga. þonne his willa sȳ.