Bókastaðir

Not in Parker (A).

Her on þissum geare com Cnut cyning mid his here ·clx· scipa. ⁊ Eadric ealdormann mid him ofer Temese into Myrcan æt Cræcilade. ⁊ wendon þa to Wæring scire innon þære midde wintres tide. ⁊ hergodon ⁊ bærndon ⁊ slogon eall ꝥ hi to comon. Ða ongan se æðeling Eadmund to gadrienne fyrde. þa se [o] fyrd ge somnod wæs. þa ne on hagode him buton se cyng þære wære. ⁊ hi hæfdon þære burh ware fultum of Lundene. ge swicon þa þære fyrding. ⁊ færde ælc mann him ham. Ða æfter þære tide þa bead mann eft fyrde be fullum wite. ꝥ ælc mann þe feor wære forð ge wende. ⁊ mann sende to þam cyninge to Lundene. ⁊ bædon hine ꝥ he come ongean þa fyrde mid þam fultume þe he gegaderian mihte. Ða hi ealle to somne comon. þa ne beheold hit naht þe ma þe hit oftor ær dyde. þa cydde mann þam cyninge ꝥ hine mann beswicon wolde. þa þe him on fultume beon sceolden. Forlet ða þa fyrde. ⁊ cyrde him eft to Lundene.

Ða rád se æþeling Eadmund to Norðhymbran to Vhtrede eorl. ⁊ wænde ælc mann ꝥ hi woldon fyrde somnian ongean Cnut cyng. þa ferdon hi in to Stæfford scire. ⁊ into Scrobbes byrig. ⁊ to Legeceastre. ⁊ hergodon hi on heora h'e'alfe ⁊ Cnut on his. ⁊ wende him þa út þurh Buccinga ham scire in to Beadaford scire. ⁊ þanon to Huntandun scire. ⁊ lang fennes to Stanforda. ⁊ ða in to Lincolne scire. þanon to Snotingaham scire. ⁊ swa to Norðhymbran to Eoforwíc weard. Ða Uhtred ge axode þis. ða forlet he his hergunga ⁊ efeste norðweard. ⁊ beah þa for nede. ⁊ ealle Norðhymbran mid him. ⁊ he gislode. ⁊ hine man ðeah hwæðere of sloh. ⁊ Þurcytel Nafanan sunu mid him. ⁊ þa æfter þam se cyng Cnut ge sætte Yric in to Norðhymbran to eorle. eall swa Uhtred wæs. ⁊ syððan wendon him suðweard oðres weges. eall be westan. ⁊ com þa eall se here to foran þam Eastron to scipon. ⁊ se æþeling Ædmund wende to Lundene to his fæder. ⁊ þa æfter Eastron wende se cyng Cnut mid eallum his scipum to Lundene weard.

Ða ge lamp hit þet se cyng Æðelred forðferde ær ða scipu comon. he ge endode his dagas on sc̃s Georius mæsse dæge æfter mycclum ge swince. ⁊ earfoðnissum his lifes. ⁊ 'þa' æfter his ende. ealle þa witan þe on Lundene wæron ⁊ se burhwaru ge curon Eadmund to cynge. ⁊ his rice he heardlice werode þa hwile þe his tima wæs.

þa comon þa scipo to Grenawic to þam gandagum. ⁊ binnon lytlum fæce wendon to Lundene. ⁊ dulfon þa ane mycele díc on ða suðhealfe ⁊ drogon heora scipa on west healfe þære brycge. ⁊ be dicodon syððon þa burh uton ꝥ nan mann ne mihte ne inn ne út. ⁊ oft rædlice on ða burh fuhton. ac hi heom heardlice wið stodon. þa wæs Eadmund cyng ær þam ge wend út. ⁊ ge rád þa West Seaxan. ⁊ him beah eall folc to. ⁊ raðe æfter þam he ge feaht wið þone here æt Peonnan wið Gillinga. ⁊ oðer ge feoht he ge feaht æfter middan sumera æt Sceorstane. ⁊ þær mycel wæll feoll on ægðre healfe. ⁊ þa heres him sylfe to eodon on ðam ge feohte. ⁊ Eadric ealdorman ⁊ Ælmær Deorlingc wæron þam here on fultume ongean Eadmund cyng. ⁊ þa ge gaderode he ·iii· siðe fyrde ⁊ ferde to Lundene. ⁊ þa burhware ahredde. ⁊ þone here aflymde to scipon. ⁊ þa wæs ymbe twa niht ꝥ se cyning ge wende ofer æt Brent forda. ⁊ þa wið þone here ge feaht ⁊ hine aflymde. ⁊ þær adranc mycel Æn [g] li [s] ces folces on heora agenre gymeleaste. þa ðe ferdon beforan þære fyrde. ⁊ fang woldon fon. ⁊ se cyning wende æfter þam to West Seaxan. ⁊ his fyrde ge somnode. Ða ge wende se here sona to Lundene. ⁊ þa burh utone be sæton. ⁊ hire stranglice wið feaht ge be wætere ge be lande. ac se ælmihtiga God hi ahredde.

Se here ge wende þa æfter þam fram Lundene mid heora scipum into Arwan. ⁊ þar úp foran. ⁊ feordon on Myrcean. ⁊ slogon ⁊ bærndon swa hwæt swa hi ofer foron. swa heora ge wuna wæs. ⁊ heom metes tilodon. ⁊ hi drifon ægðer ge scipa. ge heora drafa in to Medewæge. Ða ge somnode Eadmund cyng ·iiii· siþe ealle Engla þeode. ⁊ ferde ofer Temese to

Brent forda. ⁊ ferde innan Cent. ⁊ se here him fleah be foran mid hira horsa in to Sceapige. ⁊ se cyng ofsloh heora swa feala swa he of faran mihte. ⁊ Eadric ealdormann gewende þa ðæne cyng ongean æt Ægeles forda. næs nan mare unræd gered þonne se wæs.

Se here gewende eft úp on East Seaxan. ⁊ ferde in to Myrcean. ⁊ fordydon eall ꝥ he ofer ferde. Ða se cyng ge axode ꝥ se here uppe wæs. ða ge somnode he ·v· siðe ealle Engla þeode. ⁊ ferde him æt hindan. ⁊ offerde hi innan

East Seaxan æt þere dune þe mann hæt Assandun. ⁊ þær togædere heardlice fengon. Ða dyde Eadric ealdormann swa he oftor ær dyde. astealde þone fleam ærest mid Mage sæton. ⁊ swa aswac his cynehlaforde. ⁊ ealle þeode. þær hæfde Cnut sige. ⁊ ge feaht him eall Engla land. þær wearð of slagen Eadnoð. ⁊ Wulsige aƀƀ. ⁊ Ælfric ealdorman. ⁊ Godwine ealdorman. and Ulfcytel of East Englan. ⁊ Æðelward Æðelsiges sunu ealdormannes. ⁊ eall se dugoð on Angel cinne.

Ða æfter þisum ge feohte wende Cnut cing upp mid his here to Gleawe ceastre scire. þær he ge herde secgan þet se cyng wæs Eadmund. Ða ge rædde Eadric ealdor mann ⁊ þa witan þe ðær wæron ꝥ þa cyningas seht namon heom betweonan. ⁊ hi gislas sealdon heom be tweonan. ⁊ þa cyningas comon to gædere æt Olanige. ⁊ heora freondscipe þær ge fæstnodon. ge mid wedde ge mid aðe. ⁊ ꝥ gyld setton wið þone here. ⁊ hi to hwurfon þa mid þisum sehte. ⁊ feng Eadmund cing to Weast Seaxan ⁊ Cnut to Myrcean.

Se here ge wende þa to scipon mid þam þingum þe hi ge fangen hæfdon. ⁊ Lundene waru griðede wið þone here. ⁊ heom frið ge bohtan. ⁊ se he [re] ge brohton heora scipa on Lundene. ⁊ heom winter setle þær inne namon.

Ða to sc̄s Andreas mæssan forðferde se cyng Eadmund. ⁊ is byrged mid his ealdan fæder Eadgare on Glæstinga byrig. ⁊ on þam ilcan geare forðferde Wulfgar aƀƀ on Abbandune. ⁊ feng Æðelsige to.

Her Cnut wearð ge coran to kinge.

Her on þisum geare feng Cnut cyning to eall Angel cynnes rice. ⁊ hit to dæld on fower. him sylfum West Seaxan. ⁊ þurcylle East Englan. ⁊ Eadrice Myrcean. ⁊ Yrice Norðhymbran. ⁊ on þisum geare wæs Eadric ealdormann of slagen. ⁊ Norðman Leofwines sunu ealdormannes. ⁊ Æðelword Æðelmæres sunu þæs grætan. ⁊ Brihtric Ælfgetes sunu on Dæfenan scire. ⁊ Cnut cyng aflymde ut Ædwig æðeling. ⁊ Eadwig ceorla cyng. ⁊ þa to foran kl Aug het se cyng feccan him Æðelredes lafe þes oðres cynges him to cwene Ricardes dohtor.

Not in Parker (A).

On þisum geare wæs ꝥ gafol ge læst ofer eall Angel cynn. ꝥ wæs ealles ·lxxii· þusend punda. buton þam þe seo burhwaru on Lundene guldon ·xi· þusend punda. ⁊ se here ferde þa sum to Denmea'rcon. ⁊ ·xl· scipo belaf mid þam cyninge Cnute. ⁊ Dene ⁊ Engle wurdon sam mæle æt Oxna forda. ⁊ her Æðelsige aƀƀ forðferde on Abbandune. ⁊ feng Æðelwine to.

Not in Parker (A).

Her ge wende Cnut cyng to Denmearcon. ⁊ þær wunode ealne winter.

Not in Parker (A).

Her com Cnut cyng to Engla lande. ⁊ þa on Eastron wæs mycel ge mot on Cyrn ceastre. þa ge út lagode mann Æðelword ealdor man. ⁊ on þissum geare se cyng for to Assandune. ⁊ Liuing arcb forðferde. ⁊ Æðelnoð munuc ⁊ decanus æt Xp̄es cyrcan wæs þe ilcan geare þar to ge hadod to biscop.

Not in Parker (A).

Her on þysum geare Cnut cyng to Martinus mæssan ge út lagode þurkil eorl.

Not in Parker (A).

Her Cnut cyng for út mid his scipum to Wiht. ⁊ Æðelnoð biscop for to Rome. ⁊ wæs under fangen þær fram Benedicte þam papan myd mycclum wurðscipe. ⁊ mid his agenum handum him his pallium on sette. ⁊ to arcb arwurðlice gehalgode. ⁊ he syððan mid þam pallium þær mæssode swa se papa him gewissode. ⁊ he hine gereordode æfter þam mid þam papan. ⁊ syððon mid fulre bletsunge ham gewende. ⁊ Leofwine abb se wæs unrihtlice of Elig adræfed wæs his gefera. ⁊ hine þær ælces þinges geclænsode þe him mann on sæde. swa se papa him tæhte on þes arcbes gewitnesse. ⁊ on ealles þæs ge ferscipes þe him mid wæs.

Not in Parker (A).

Her forðferde Wulfstan arcb. ⁊ feng Ælfric to. ⁊ þæs ilcan geares Æðelnoð arcbiscop ferede sce Ælfeges arcb reliquias to Cantwarbyrig of Lundene.

Not in Parker (A).

Hic Ricardus secundus obiit. Ricardus filius eius reg-nauit prope uno anno. et post eum regnauit Rodbertus frater eius viii annis.

Not in Parker (A).

Her for Cnut cyng to Denmearcon mid scipon to þam holme æt ea þære halgan. ⁊ þær comon ongean Vlf ⁊ Eglaf. ⁊ swiðe mycel here ægðer ge landhere ge sciphere of Swaðeode. ⁊ þær wæs swiðe feala manna forfaren on Cnutes cynges healfe. ægðer ge Deniscra manna ge Engliscra. ⁊ þa Sweon heafdon weallstowe geweald.

Not in Parker (A).

Her for Cnut cyng of Englalande mid fiftig scipum to Norwegum. ⁊ adraf Olaf cyning of þam lande. ⁊ geahnode him þet land.

Not in Parker (A).

Her com Cnut cyng eft ham to Englalande.

Not in Parker (A).

Her com Olaf cyng eft into Norwegum. ⁊ þet folc gegaderode him togeanes. ⁊ him wið gefuhton. ⁊ he wearð þær ofslagen.

Her com Cnut a [gan to Engla lande.] Sona swa he be com to Engla lande. he geaf in to Xp̄es cyrican on Cantware byri þa hæfenan on Sandwic. ⁊ ealla þa gerihta þe þær of arisaþ of æiðre healfe ðare hæfene. swa ꝥ loc whenne ꝥ flod byþ ealra hehst ⁊ ealra fullost 'beo' an scip flotigende swa neh þan lande swa hit nyxt mæge. ⁊ þar beo an mann stande on þan scipe ⁊ habbe ane taper æx on his hande . . .

Her for Cnut cyng to Rome. ⁊ þy ilcan geare he for to Scotlande. ⁊ Scotta cyng him to beah Mælcolm. ⁊ twegen oðre cyningas. Mælbæþe. ⁊ Iehmarc. Rodbertus comes obiit in peregrinatione. et successit rex Willelmus in puerili ætate.

Not in Parker (A).

Her on þissum geare atywde ꝥ wildefyr. ðe nan mann æror nan swylc ne gemunde. ⁊ ge hwær hit derode eac on manegum stowum. ⁊ on þam ilcan geare forðferde Ælfsige biscop on Win ceastre. ⁊ Ælfwine þæs cynges preost feng þær to.

Not in Parker (A).

Her on þisum geare forðferde Merehwit ƀ on Sumersæton. ⁊ he is bebyrged on Glæstinga byrig.

Not in Parker (A).

Her forðferde Æðeric ƀ.

Not in Parker (A).

Her forðferde Cnut cyng æt Sceaftes byrig. ⁊ he is be byrged on Winceastre on Ealdan mynstre. ⁊ he wæs cyng ofer eall Engla land swyðe neh ·xx· wintra. ⁊ sona æfter his forsiðe wæs ealra witena gemot on Oxna forda. ⁊ Leofric eorl ⁊ mæst ealle þa þegenas benorðan Temese. ⁊ þa liðsmen on Lunden. ge curon Harold to healdes ealles Engla landes. him ⁊ his broðer Hardacnute þe wæs on Denemearcon. ⁊ Godwine eorl. ⁊ ealle þa yldestan menn on West Seaxon. lagon ongean swa hi lengost mihton. ac hi ne mihton nan þing ongean wealcan. ⁊ man gerædde þa ꝥ Ælfgifu Hardacnutes modor sæte on Win ceastre mid þæs cynges huscarlum hyra suna. ⁊ heoldan ealle West Seaxan him to handa. ⁊ Godwine eorl wæs heora healdest mann. Sume men sædon be Harolde ꝥ he wære Cnutes sunu cynges. ⁊ Ælfgiue Ælfelmes dohtor ealdormannes. ac hit þuhte swiðe ungeleaflic manegum mannum. ⁊ he wæs þæh full cyng ofer eall Engla land.

Not in Parker (A).

Her man dræfde út Ælfgife Cnutes cynges lafe. seo wæs Hardacnutes cynges modor. ⁊ heo ge sohte þa Baldewines grið be suðan sæ. ⁊ he geaf hire wununge on Bricge. ⁊ he hi mundode. ⁊ heold þa hwile þe heo þær wæs.

Not in Parker (A).

Her forðferde Æðelnod arceƀ on kl Nov.' ⁊ þæs ymbe litel Æðelric ƀ on Suð Seaxum. ⁊ þa toforan Xp̄es mæssan Brihteh ƀ on Wigra ceastre scire. ⁊ raðe þæs Ælfric ƀ on East Englum. ⁊ þa feng Eadsige ƀ to þam arcƀ rice. ⁊ Grymcytel to ðam on Suð Sexum. ⁊ Liuing ƀ to Wigra ceastre scire. ⁊ to Gleaw cestre scire.

Not in Parker (A).

Her forðferde Harold cyng on Oxna forda on ·xvi· k Apr. ⁊ he wæs bebyrged æt West mynstre. ⁊ he weolde Engla landes ·iiii· gear ⁊ ·xvi· wucan. ⁊ on his dagum man geald ·xvi· scipan æt ælcere hamulan ·viii· marc. eall swa man ær dyde on Cnutes cynges dagum. ⁊ on þis ilcan geare com Hardacnut cyng to Sandwic ·vii· nihtum ær middan sumera. ⁊ he wæs sona under fangen ge fram Anglum ge fram Denum. þeah þe his rædes menn hit syððon strange forguldon. ða hi gerædden þet man geald ·lxii· scipon æt ælcere hamelan ·viii· marc. ⁊ on þis ilcan geare eode se sæster hwætes to ·lv· penega ⁊ eac furðor.

Her Eadsige arceb for to Rome. ⁊ Harold king forðferde:

Her wæs þet here geold gelæst. ꝥ wæron ·xxi· þusend punda. and ·xcix· punda. ⁊ mann geald syððan ·xxxii· scipon ·xi· þusend punda ⁊ ·xlviii· punda. ⁊ On ðis ilcan geare com Eadward Æðelredes sunu cinges hider to lande of Weallande. se wæs Hardacnutes cynges broðor, hi wæron begen Ælfgiues suna. seo wæs Ricardes dohtor eorles.

Not in Parker (A).

Her forðferde Hardacnut cyng æt Lámb hyðe on ·vi· id' iun.' ⁊ he wæs cyng ofer eall Engla land twa gear buton ·x· nihtum. ⁊ he is be byrged on Ealdan mynstre on Winceastre mid Cnute cynge his fæder. ⁊ ear þan þe he bebyrged wære. eall folc ge ceas Eadward to cynge on Lundene. healde þa hwile þe him God unne. ⁊ eall ꝥ gear wæs swiðe hefig time on manegum þingum. ⁊ mislicum. ge on unwæderum. ge on eorð wæstmum. ⁊ swa mycel orfes wæs þæs geares forfaren. swa nán man ær ne gemunde. ægðer ge þurh mistlice coða ge þurh ungewyderu. On þis ilcan tyme forðferde Ælf [sine] abbot of Burh. ⁊ man ceas þa Arnwi munec to abb. forþan þe he wæs swiðe gód mán ⁊ swiðe bilehwit.

Her forðferde Harðacnut king.

Her wæs Æðward ge halgod to cyng on Winceastre on Æster dæg mid mycclum wurðscipe. ⁊ þa wæron Eastron on ·iii· No Apr̃. Eadsige arcb hine halgode. ⁊ foran eallum folce hine well lærde. ⁊ to his agenre neode. ⁊ ealles folces well monude. ⁊ Stigand preost wæs gebletsod to biscope to East Englum. ⁊ raðe þæs se cing let geridan ealle þa land þe his modor ahte him to handa. ⁊ nam of hire eall ꝥ heo ahte on golde ⁊ on seolfre. ⁊ on unasecgendlicum þingum. forþan heo hit heold to feste wið hine.

Her wæs Eduuard gehalgod to kinge.

Her Eadsige arcb forlet þet biscop rice for his untrumnisse. ⁊ bletsode þær to Siward abbot of Abbandune to biscope be þæs cynges læfe ⁊ ræda. ⁊ Godwines eorles. hit wæs elles feawum mannum cuð ær hit gedon wæs. forþan se arcebiscop wende ꝥ hit sum oðer mann abid'd'an wolde · oððe gebicgean. þe he his wyrs truwude and uðe. gif hit ma manna wiste. ⁊ On þisum wæs swyðe mycel hungor ofer Engla land.

⁊ corn swa dyre swa nan mann ær ne gemunde. swa ꝥ se sester hwætes eode to ·lx· penega. ⁊ eac furðor. ⁊ þæs ylcan geares se cyng for út to Sandwic mid ·xxxv· scipon. ⁊ Æðelstan cyrice weard feng to ðam abbotrice æt Abbandune. ⁊ Stigand feng to his biscop rice.

Her nam Ædward cyng Godwines dohtor eorles him to cwene. ⁊ on þis ilcan geare forðferde Brihtwold ƀ. ⁊ he heold þæs biscop rices ·xxxviii· wintra. ⁊ Hereman þes cynges preost feng to þam biscop rice. ⁊ on þysum geare man halgode Wulfric to aƀƀ æt Sc̄e Augustine to Xp̄es mæssan on Stephanes mæsse dæg. be þes cynges ge læfan ⁊ Ælfstanes abbotes for his mycelre untrumnysse.

Not in Parker (A).

Her forðferde Liuing ƀ on Defena scire. ⁊ Leofric feng þær to se wæs þæs cynges preost. And on þisum ilcan geare forðferde Ælfstan abbot æt Sc̄e Augustine ·iii· No Ivln. ⁊ on þis ilcan geare wearð aflemed ut Osgot Clapa.

Not in Parker (A).

Her forðferde Grymkytel ƀ on Suð Sexum. ⁊ feng Heca ðes cynges preost þær to. And on þysum geare for'ð'ferde Ælfwine biscop on Winceastre. on ·iiii· k Septemƀ. ⁊ feng Stigand ƀ benorðan þær to. ⁊ on ðam ilcan geare ferde Swegen eorl ut to Baldewines lande to Brycge, ⁊ wunode þær ealne winter. ⁊ wende þa to sumere út.

Not in Parker (A).

Bellum apud Uallium Dunas. Her forðferde Æþelstan abbot on Abbandune. and feng Spearhafoc munuc to of Sce Eadmundes byrig. ⁊ on þis ilcan geare forðferde Siward biscop. ⁊ feng Eadsige arcƀ eft to eallum þam ƀ rice. ⁊ on þis ilcan geare comon to Sandwîc. Loðen ⁊ Yrling mid ·xxv· scipon. ⁊ namon þær un asecgendlice here huðe. on mannum ⁊ on golde ⁊ on seolfre, þet nan man nyste hwæt þæs ealles wes. ⁊ wendon þa on buton Tenet. ⁊ woldon þær þet ilce don. ac þet land folc hardlice wið stodon. ⁊ for werndon heom ægðer ge up ganges ge wæteres. ⁊ aflymdon hi þanon mid ealle. ⁊ hi wendon heom þanon to East Seaxan. ⁊ hergodon þær ⁊ namon menn. ⁊ swa hwæt swa hi findan mihtan. ⁊ ge wendon him þa on Suð Sexan ƀ. ⁊ he lið on Cristes cyrican on Cantwara byrig. ⁊ Eadward cyncg geaf Hecan. his preoste. ꝥ ƀ rice.

⁊ on þis ylcan geare forð ferde Ælfwine ƀ. on ·iiii· kl Sept. ⁊ Eadward cyncg geaf Stigande ƀ ꝥ bisceoprice. ⁊ Æþelstan abƀ on Abbandune forð ferde on þan ylcan geare on ·iiii· kl Aprł. þa wæs Ester dæig. ·iii· non' Aprł. ⁊ wæs ofer eall Engla land swyþe mycel man cwelm on þan ylcan geare.