Bókastaðir

Nu bua sig aller riddarar og rida vt af borginne og wid þeim vij. c. manna. ok rida nv alla sina leid þar til er þeir koma j skóginn, þar er fyrer war Þidrek kongur og hertugi Lodwigur. Meistari Hilldibrand og Alibrand og aller riddarar stíga af sinumm hestumm og hneigia Þidrek kongi. kongur stenndur vpp j giegnn þeim og kyssir Alibrand þar mikill fagnna funndur. þa stigur Þidrek kongur a sinn hest og rida aller samt þa leid er liggur til Bernar. ok er þeir koma j nannd staþnum og borgar menn sia reid Þidreks kongs fer vt i gegn þeim aull alþýda wid leikumm og allskyns gledi. ok þa er Þidrek kongur kom fyrer Bern ridur Hilldibrand wid hans merki. enn Alibrand a adra hond honum. hann tekur sinne henndi j hond Þidreki kongi og tok eitt litit fingur gull og fær honum og mællte.

Ríki herra Þidrek kongur, siþann er anþadist þinn frændi Erminrek kongur er mik setti ifer þenna stad og þar med ath giæta alls Omlunnga lanndz þa kom þetta riki alldrei vnder Sifka. þetta litla fingur gull wil ek gefa ydur herra og her med Bern og allt Omlunnga lannd og sialfan mik til fylgdar og alla mína menn.

Nu svarar Þidrek kongur og bidur hann hafa fyrer Gudz laun og sagde ath þetta will hann launa honum wid gódu. Nu gefa Þidreki kongi aller riddarar, sumer stór bv, sumer hesta góda edur adra herneskiu, og aller gefa honum riker menn hinn besta grip. Nu werdur her mikill fagnadur. med þessu ridur Þidrek kongur j Bern til sins gardz. hertugi Alibrand og Hilldibrand leida hann til sins hasætiss, ok þenna dagh hafa hann ei færre menn enn x. c. til sins bords.

Kongur sennder nv bod wmm allt sitt riki og stefner til sin ollumm þeim er ræda fyrer borgumm edur kostolumm edur herudumm. Nu koma marger hvern dagh til Þidreks kongs þeir er honum gefa borger vpp edur kastala edur onnur riki.

Fam doghum siþar ridur Þidrek kongur vt med mikinn her til þess stadar er heiter Ran. þa er hann kiemur i stadinn stefner hann þing ok a þessu þingi sagdi hann mikil tiþindi ath Sifka hefþi samann dreigit wwigann her og will rida j Omlunnga lannd og vinna lanndet. Nu spyrr Þidrek kongur borgarmenn huart þeir wilia hafa hann ath kongi edur Sifka og sagdi sik ei flyia munu fyrer her Sifka. enn aller borgarmenn svara þeir er wid eru. ath Þidreki kongi wilia þeir þiona ok helldur vilia þeir falla med Þidreki kongi enn weita Sifka einn penning. Þa mællte Þidrek kongur ath aller hans menn og aller þeir er honum wilia weita skulu vapna sik og nv vill hann þar ongva nott wera sem adur var hann, firr enn hann hitter Sifka.

Nu ridur Þidrek kongur vt af stadnum Rana og hefer hann nv viij þusunder manna. Sifka er kominn med sinn her fyrer þann stad er heiter Gregen borg wid xiij þusunder manna. þa kemur j gegn þeim Þidrek kongur. þa ridur framm Hilldibrandur med merki Þidreks kongs og þegar eftter Þidrekur kongur sialfur og aller hans menn.

Í þessu bili kemur lid af Romaborg til ath weita Sifka med vij þusunnder riddara og koma a bak fylking Þidreks kongs ok er Omlunngar werda þessa warer þa snyr Þidrek med sitt merke a mót Romveriumm enn Hilldibrandur og Omlunngar mot Sifka. Alibrand hertugi ridur nv j mot Sifka alldiarfliga allt framm vnder hans merki. ok fyrsta slagh veitti hann a hond þeim er merkit bar suo ath af tók høndina og j sunndur merkisstøngina og fellur merkit a jørdina og þa ridur Siffka j gegn honum alldiarflega og hwar veitir audrumm stór høgg og þeirra einvigi stenndur wm hrid allt þar til ath Alibrand werdur rikare og Sifka fellur dauþur af sinumm heste.

Ok nv er fallinn er kongur Romveria þa œpa omlunngar mikit sigur óp og þui næst gefa Romveriar sik vpp. þa er Þidrek kongur verdur var ath Sifka er fallinn og til hans kiemur Alibrand þa seiger hann ath vist hefer hann þenna dag henndt mikit happ og ef þat hefdi hann gert ix wetrumm fyrr munnde betur stannda riki Omlunnga. Er Romverium ekki mikill harmur epter sinn hofþingia, og allur þessi her gefur sik vpp j walld Þidreks kongs.

Þidrek kongur ridur nv med þenna her þa leid er liggur til Romaborgar, fyrer honum eru vpp gefnar borger og kastalar huar sem hann ferr. hann ridur j Roma borg med allann sinn her og til þeirrar hallar er att hafdi Erminrek kongur og setst i hans hasæti, ok þar setur Hilldibranndur a hans hofud koronu Erminreks kongs. þa gannga til hanns aller riddarar þeir er þionad haufdo Erminrek kongi og gerast hans menn og aller hnijga nv til hans j þessu riki, sumer med vingan enn sumer med þvi ath þeir þora ei annad.

Nu hefer Þidrek kongur gert morg werk þav er enn ma siá. badet ær kallad ær Þidreks bad. ok j Roma borg liet hann steypa eitt likneski epter sinumm hesti Falka. og sialfumm sier. þat er gert af kopar. annad likneski liet hann enn giera nordur j borginne. þar stenndur hann j turn og reider sitt sverd Ekkisax wid steinboga þann er ifer ana liggur.

Ofarliga æfe Þidreks kongs war fyrerdæmd willa Arrius af kristnum monnum og snuast til riettrar truar aller þeir er med hafa farit villuna. Litlu her epter tekur sott Hilldibrandur. þessi sott er hættiligh og Þidrek kongur situr ifer honum. Nu mællti Hilldibrandur. herra, þessi sott hefer mier suo fyrerkomit ath egh hygg ath hun leidi mik til bana. Nu vil ek þess bidia ath minn son Alibrand læter þu nióta okkarar winattu og min vopn wil ek honum sie feinginn. ok litlu hier epter anndast Hilldibrandur. ok þa grætur Þidrek kongur sinn góda win Hilldibrannd. Þidrek kongur liet bua vegligha wmm lik hans og gera hans leidslu gøfugliga, og war Hilldibrandur harmadur miøg. ok i allri þessi søgu þa er einnghi madur iafn miøgh lofadur sem Hilldibrandur. enn þat er mest af trunadarleik þeim er hann hafdi vid Þidrek kóng ok þat med ath hann var allra manna vaskastur og bestur til wigs, ok milldastur af fee. seigia þydversker menn ath hann hefdi halft annad hunndrad wetra þa er hann anndaþist. enn þydersk kuæde seigia ath hann hefdi. cc. wetra.

Litlu epter andlat meistara Hilldibrandz tekur sott fru Herat kona Þidreks kongs og af þessi sott fær hun bana. hun var god kona kurteis og winsæl epter þui sem war aþur hennar frændkona Erka drottning, og Godelinda kona margreifa Rodingeirs. þessar iij konur hafa werit bestar ollumm sinumm og mílldastar af fee af ollumm þeim er gietid er j þessari søgu.