Nu varð mikil hræzla oc skialpti oc allir vilia nu væra hæima i babilonia. en þo uerðr her nu strong orrosta oc a litilli hrið hæfir Þiðrekr konungr nu drepit. vii. riddara annarri sinni hendi. en mæistari hildibrandr hæfir nu drepit. ix. Þa sækir at honom hinn ungi Aumlungr oc bœrsc við hann. en firir Þiðreki konungi flyia nu allir þœir er eptir ero. Nu væitir hilldibrandr Aumlungi æitt slag a hans skiolld oc a hans hialm oc firir þui micla hoggi fællr Aumlungr oc hilldibrandr a hann ofan oc biðr hann gefa upp sin vopn oc hallda sinu lifi. Þa svarar Aumlungr. Vist æigi er mer bœtra at lifa við þat at sua gamall maðr skal mik hafa yfir stigit. en þo vil ek gefa upp min vopn oc lifa at sinni. hann gefr upp vopn sin oc biðr hilldibrandr hann upp standa oc spyrr huat manna hann er eða firir hui þessir menn hafa sott þœira lif. en Aumlungr sægir elsung jarl uilldo hæfna sins frænda elsungs jarls er drepit hafði samson konung oc þiðrekr konungr var skylldr frendi hans. Nu mœlti Þiðrekr konungr. Aumlungr goðr drengr þu skalt nu sægia oss tiðindi ef þu væizt suðr til fealz oc siðan skalltu þiggia þitt lif oc þin vopn oc alla þina hærneskio oc allra þinna faronauta oc þat skaltu hafa firir iboetr þins frænda elsungsjarls. þa mœlti Aumlungr. Goði herra þiðrekr konungr. Ec kann segia þer mikil tidindi af þinom faðorbrœðr ermenrik konungi. hann hefir nu nockora rið siukr værit af þui at hans kuiðr var slitnaðr oc ofan hafa sigit hans þarmar oc istra oc her hefir Sifka lagt til rad at skera skylldi til oc draga sua ut istru og seiger ath þa munde wera betur. Ok suo war gert og er nv halfu werr enn adur. ok nv vitum wier æigi hvort kongur lifer edur æigi. ok nv hlær Hilldibrand og Þidrek og bidia hann hafa mikla þaukk fyrer sin tiþindi. Nu fara aptur riddarar aller þeir er a flotta komu og seigia ath daudur er Elsungur jarl huar sem þeir koma. og fæir hafa vndann komizt hans manna. Og þetta hafa giort ij menn, einn gamall madur og annar gilldur madur.
Nu fara þesser menn ifer Rín og alla leid j Babilon.
Ok er þeir koma i stadinn kunnu þeir seigia slik tiþindi sem fyrr. þa spyr radgiafi jarls, huerier hafa þetta gert. þa suara riddararner. ij menn hafa þetta gert. ok annar þeirra war suo gamall ath furda war ath. og þat weit ek ei. hvi sa fianndi var suo gamall ordinn og wist war þat fiandi og hann hafdi fiandann sialfann j henndi sier. þar fyrer stod ekki wætta ok þat hid gra skegg war suo mikid ath huldi hans bringv. þa seiger radgiafenn, þad þike mier mest von ad þad mune vered hafa Þidrik kongur af Bern og hannz fostre Hilldebrandur, og mune komit hafa j vort land, og þar sem hafa sig hirt, þa munu þeir giøra mørgumm manni skada ádur þeir hafa bana, og j þessu bile kiemur þar rijdande Ømlungur, og med honum rijda xij menn, og þar hafa þeir øll vopn Elsungz jarlls. Og er borgarmenn sia þetta, þa seigia þeir ad þad mun vera Elsungur jarll, og mune riddarar hafa flued fra honum lifande.
Nu stenndur vpp sialfur ræadgiafenn og marger riddarar fylgia honum og heilsa wal Omlungi og kalla mikla giæfu er hann er apttur kominn. spyria nv hverier þesser ij menn eru er vid hann hafa barist. edur hver sa war hinn gamli og hinn skeggsidi? Nu svarar Omlungur. Sa hinn gamli er þier spyriest epter, er gódur dreingur sem gaf mier lif er atte kost æ ath drepa mik, ok enn ædri madur var Þidrek kongur af Bern, enn enn gamle madurinn er meistari Hilldibrand en þat er þeirra dreingskapur ath þeir werdi sik suo wal. þeim þreingdi ærinn naudsyn til. þeir stodu fyrir. ij. monnum og fimmtigumm og þo lietum wier xiiij menn fyrer þeim tueimur.
Þidrek kongur mællte wid Hilldibrannd ath þeir skulu rida sydur wmm Mundiufiall, ok þa er fyrer þeim skógur. Nv wender Þidrek kongur j skóginn. þar stiga þeir af bestinumm og taka ofann klyfiarnar. Nu er epter j skóginumm Þidrek kongur og fru Herat. Enn meistare Hilldibrand ridur af skoginum til borgar og þessa borg aa annar jarl sa heiter Hlodver og er nv gamall. hans son er vngur. hann heiter Konradur. þa hitter Hilldibrand einn mann j skóginumm. þess heimili er j borginne. Hilldibrandur spyr þenna mann. Hver rædur þessi borg er eg sie her. þessi madur svarar. þar rædur fyrer hertugi Lodver og hans son Konradur. Hilldibrandur mællte huad kanntu seigia af þui. Hwer rædur fyrer Bern? hann svarar. þat er Alibrandur son gamla Hilldibrandz. þa mællte Hilldibrandur og hlær. Hversu gódur dreingur er Alibrandur edur hversu mikill madur er hann fyrer sier? borgar madur suarar. Alibrandur er allra kappa mestur og ifer ollum monnum wmm milldi og kurteísi. hann er þo grimmur og kappsamur og illur sinumm vvinumm og wid einngann mann will hann iafnast. Nu ridur Hilldibranndur wid honum og enn mællte Hilldibrandur wist erttu godur dreingur. Hver tiþinndi kantu fleiri seigia? borgar madur suarar. Søgd eru mikil tiþinndi og þikki mier won ath sønn sie ath Ermiurek kongur mun wera davþur.
Þa suarar Hilldibrandur. Þat eru mikil tiþindi og munu ei god þikia hans winum. Nu koma þeir vnder borgina. þa mællti Hilldibrandur. willtu godur dreingur reka mitt eyrendi j borgina, enn egh wil nv ei fara leingra ath sinne. bid koma til min junkherra Konrad fyrer þui ath hann er liettfærri enn hans fader. borgar madur kuadzt reka munndu hans eyrendi. Ok þa er hann kømur j borgina hitter hann Konrad og mællte til hans. junkherra Konrad. her stenndur fyrer þessi borg einn madur mikill med hvitt skegg og bad migh kalla þigh og gaf mier sitt fingur gull. Konrad er madur litilaatur og will fara ath vtlenndur madur sennder honum ord, geingur vt af borginne einn sammt.
Firer vtann borgar hlid stenndur Hilldibrandur og bidur koma heilann þann mann og spyr hver hann er? Ek heiter Konrad seiger hann. enn minn fader heitir Lodver. Edur hvert er þitt nafn. Ek heiti Hilldibrand Ylfinga meistari ef þu hefer heyrt þann mann nefndann. þa geinngur Konrad ath honum og bidur hann koma allra manna heilastann. Konrad mællte. gakk med mier til mins faudurs, vist skalltu her wal kominn med oss. þa suarar Hilldibrandur. Ek maa nv ei fara med þier ath sinne. kantu nokkur seigia ny tiþinndi? ek kann seigia mikil tiþinndi, seiger Konradur. Ermenrek kongur er daudur. þa suarar Hilldibrandur. Hverr ber nv hans korvnu? nv suarar Konradur. þat er illt ath seigia, þat er hinn ille hunndur Sifka Balerad. Konradur spyr. Hver tiþindi kantu oss seigia, huadann er þin før? þa seiger Hilldibrandur. þess er meiri won ath ek kunni seigia þier þat er þu munt æigi spurt hafa ath drepinn er Elsungur j Babilon ok þad ath Þidrek kongur er kominn j Omlunga lannd.
Gud see þess lofadur, sagde Konradur, þviat Alibrandur þinn son hefer senndt menn nordur j Hunalannd epter Þidrek kongi ath hann skal koma aptur j sitt riki. og wist æigi will Alibrandur gefa vpp sina borg fyrer Sitka, og ongvann stad annann j Omlunga lanndi. fyrri wilia aller Omlungar deyia enn Sifka rædi Bern. Hilldibrandur gódur dreingur far med mier j borg til mins favþurs. þa seiger Hilldibrandur. Ek werd nv fyrst ath rída vt a skógginn fyrir þui ath þar bidur min Þidrek kongur. Þa mællte Konrad. godur win, bid min, ek wil seigia minumm fedur þessi tiþindi.
Ok nv geingur Konrad i borgina til sins faudurs og mællte. Herra, ek kann seigia þier mikil tiþinndi og gód. Þidrek kongur af Bern er kominn j omlunga lannd og Hilldibrandur wær frændi med honum. ok hann er hier fyrer vtann borgina og bidur min þar.
Enn er jarl heyrer þetta stenndur hann vpp j stad og geingur vt og med honum marger riddarar. ok er þeir koma vt af borginne hitta þeir Hilldibrand. Hertuginn Lodver geingur ath honum og minnist wid hann og sagde. Meistare Hilldibrandur. her skalltu walkominn med oss og haf her alla þa sæmd er wier meigumm weita þier. edur huar er Þidrek kongur? þa suarar Hilldibrandur. hann er a þessum skógbi. þa kallar hertugi ath taka skal hans hesta og will hann rida vt ath finna Þidrek kong. Ok i þessu bili koma þar vij borgar menn med hlodnum vøgnumm af hunangi og wini. þa lætur jarll taka þessa wagnna og aka a skóginn. og þar med hina bestu wist. rida þeir nv allir þar til er þeir finna Þidrek kong og hefer hann þa gert sier elld.
Hertuginn Lodver stigur af sinumm heste og hans son Konrad. gánnga fyrer kong og fellur a kne huartueggi þeirra og kyssa hans hønd og bidia hann heilann koma sinn herra Þidrek kong af Bern og bioda honum sialfa sig til lidveitslu huad er hann vill gert hafa.
Þidrek kongur stenndur þa vpp og tekur j hond þeim og bidur þa vpp staunda og sitia hia sier. þa spyria hwarer adra ath tiþindum. þa sagdi Þidrek kongur margt af sijnumm ferdumm og slikt sama Lodver hertugi aull tiþindi er hann weit. Jarll bidur þa Þidrek kong fara heim med sier. enn kongur sagde ath þar will hann vera j skóginumm fyrst. Enn meistare Hilldibrandur skal rida sagde hann ath hitta sinn son Alibrand. og nv byst Hilldibrandur. Enn fyrer þui vill Þidrek kongur ei til borgar fara ath þess hefer hann heit streingt ath alldrei fyrr skal hann koma j nokkurskonar bygd enn j sina borg.