Bókastaðir

Kuanfang attila konungs er hann fecc Grimilldi.

Attila konungr af Susa spyrr at dauðr er Sigurðr sveinn oc æpter lifir hans kona grimhilldr ær allra kvinna er vitrast oc fegrst. enn hann ær nu kvanlaus. Hann sender æpter sinvm frœnda osið i herraland at hann skal coma til hans. Oc er hertogenn spyrr at hans frende attila konungr vill hann hitta. Gerer hann færð sina til Susa. oc með hanvm. xx. ridderar. Attila konungr fagnaðe honvm vel oc seger at hann have hanum sent orð. oc vill at hann fare hans sendefor iniflvngaland. attila konungr vill senda hann at biðia ser konv Grimhilldar systvr Gvnnars konungs er átt hever Sigvrðr sveinn. Osiðr hertoge lez fara vilia hvert er konungr vill hann sent hava. Nv byz hann til þessar ferðar með mikilli kurteisi oc hever með ser. xl. enna kurteisastu riddera oc marga sveina vel buna. Hann fer alla sina leið til þess er þeir komv iniflungaland oc hitta Gunnar konung i vernico. Þeim er þar vel fagnat. dvelz hann þar nokora daga.

Ein dag heimter hann gunnar konung a tal oc með hanum hogna oc gernoz oc er þeir ero a malstefno. mellte osið hertoge. Attila konungr af Susa sender goða kveðio gunnare konunge oc hogna hans broðor. Attila konungr vill fa yðra systor Grimhilldi með sva miklo fe sem yðr somer at senda honvm. oc hann vill vera yðar vin. En aðr ek fare heðan verð ek hœyra mitt erende hvert vera skal. Þa suarar Gunnarr konungr. attila konungr er maðr rikr oc mikill hofðingi. vill hogne oc Gernoz minir brœðr sem ek þa megom ver ei synia hanum þessa. Þa suarar hogni. Sua liz mer sem os mune þat vera mikill vegr at hinn riki attila konungr fae varrar systor. hann er allra konunga rikastr oc mestr. nu megvm ver af þvi vera meiri menn en nv erom ver. en þetta mal verðr þo at rœða fyr henne. fyr þvi at hennar skap er sua stort. at ei ma attila konungr oc enge annarra iverolldo hennar fa fyr uttan hennar vilia. Gernorz biðr raða konung oc þa hogna. oc þikkir þetta vel fallit ef þeim syniz Nu ferr Gunnarr konungr oc með hanom Vsið oc hitta Grimilldi oc seger Gunnarr konungr henne aull þesse tiðinde oc spyrr huessu henne man vera iskape þetta rað. En hvn seger at hon þorer eigi at neitta attila konunge ser til manz. Sua er hann rikr konungr oc sua er fengit þess manz at reka hans erende. at helldr vill hon þessv iatta ef þat er rað Gunnars konungs hennar broðor. en konungr seger þat at eigi vill hann neita þessu raðe með þvi at þat er ei imote hennar vilia. Gunnarr konungr oc hans brœðr tala allt þetta mal við hertoga Osid sua at þetta skal vera raðet. Oc her æpter byz hertoge osið heim at riða. Oc er hann er albuenn þa tecr gunnarr konungr skiolld gullbven oc hialm er att hafðe Sigvrðr sveinn er allra vapna er beztr. oc gefr hann osið oc skiliaz þeir goðer vinir. Riðr hertogenn heim i hvnaland oc seger attila konunge alla sina ferð. konungrenn þakkar hanum vel oc seger at hans ferð er hin bezta vorðen.

Litlo siðar byr attila konungr færð sina oc skal nv fara iniflvngaland epter sinni festar konv grimhilldi. Þessi ferð er bven allvegleg. Attila konungr hever. d. hvndrað riddera oc marga sveina. Þa er gunnarr konungr spyrr at attila konungr oc þiðrecr ero komner i hans land. riðr hann vt igegn þeim með allum sinum envm beztum mannvm. oc þa er þeir finnaz. riðr Gunnarr konungr fyr attila konung oc heilsar honvm. oc hans broðer hogne fyr þiðrek konung oc kyssaz þeir oc hittaz nv ener bestu vinir riða nu aller saman aptr til borgar vernicv. oc er nv bven en dyrlecsta veiðzla. oc at þesse veizlv giptir Gunnarr konungr attila konunge grimilldi systvr sina. oc er lokit er þesse veizlv. riðr attila konungr oc þiðrecr konungr brvtt oc at skilnaðe gaf Gunnarr konungr þiðreke konunge grana hest sigurðar sveins oc sverðet gram gaf hann margreifanum.

En attila konunge grimhilldi oc silfr sua mikit sem hanvm var some at. oc skiliaz nu goðer vinir. Riðr attila konungr oc þiðrekr konungr heim i sitt riki. oc geter vm stvnd sins rikis. en hans kona grimhilldr groetr hvern dag sin livua bvanda Sigurð svein.

Er attila konungr oc Grimilldr bioða heim Gvnari oc hœgna.

Oc er liðnir vorv. vij. vetr sua at grimhilldr hever veret i hvnalande þa er þat eina not at hvn mellte við attila konung. Herra attila konungr þat er mikill harmr er a þessvm. vij. vetrvm hevi ek eigi hitta mina brœðr hve ner villtv herra þeim heim bioða. Ec kann segia þer þau tiðindi er þo kann vera at aðr vitir þv at Sigurðr sveinn minn maðr atti sva mikit gull at engi konungr i verolldu var iamn avðegr. en þat mikla fe hava nv minir brœðr. oc eigi vilia þeir mer af vnna eins penninggs. en mer þætte sœmelegre herra at ek rœða fyr þessv fe. oc þat skalltu vist vita ef ek fœ þetta gull at allt skalltv þat eiga með mer. En er attila hœyrer þesse orð þa ihvgar hann vandlega hvat hvn seger oc veit at satt er. En attila konungr er allra manna fegiarnastr. oc þikkir illa er hann skal ei fa niflunga skatt oc suarar a þessa lund ek veit fru at Sigvrðr sveinn atte mikit gull. þat fyrst er hann toc vndan þeim mikla dreka er hann hafðe drepit. nest þat er hann fecc i hernaðe. oc þar með þat er hans faðer hafðe att Sigmundr konungr. en allz þessa missum ver. en þo er gvnnarr konungr várr en kerste vin. Nv vil ek fru at þv bioðer þeim ef þv vill heim þinvm brœðrvm. Enn ekki vil ek til spara at bva þa veizlv sem vegligast. þau skilia sina rœðv at sinni. Oc eigi mikilli stvndu siðar letr Grimilldr kalla til sin. ij. men oc seger þeim sin erende. at hon vil senda þa i niflvngaland at reka mitt erende. en til þessar farar skal ek ykr bva með gulli oc silfri oc goðum klœðum. oc goðum hestvm. oc þesser leicmen segia at þeir vilia allt þat er hvn byðr giarnsamlega gera. Nu byr hon færð þeirra hveria leið er hvn ma vegligast oc fœr þeim bref oc innsigli. attila konungs oc sitt.

Þesser menn fara alla sina leid til þess er þeir koma i niflvngaland. oc hitta Gvnnar konung i vernico borg. Gunnarr konungr tecr vel sendi monnum attila konungs mags sins. oc ero þeir þar igoðvm fagnaðe. Nv er sende men haua þar dualz litla rið stendr vpp sa er erendit bar. Gengr fyr Gunnar konung oc mellte. Attila konungr af Susa oc hans drottning Grimhilldr sender quedio Gunnare konunge i vernizv oc hans broðor hogna oc Genorz. oc Gislher oc allum þeirra vinum Guðs | oc sina. Ver vilivm yðr | bioða heim til veizlu oc vinattu ivart land. Attila konungr er nu gamall oc þungferrrr at styra sinu riki. en hans unge sun aldrian er en fara vetra gamall. Nu liz oss sem þier mvnit vera bezt til komner at stiorna þessv riki með yðrum frœnda hans moður breðr. þa rið er hann heuir ei sialfr alldr til at geta sins rikis. Nu verðit | þer at koma æptir varre orðsending. oc raðet landraðum með oss hvat sem þa syniz oss af at taka um þetta mal. oc havit með yðr sva marga menn sem yðar some er til oc veret heiler.