Bókastaðir

Fra meistara Hildibrandi oc Ræinalldi.

Oc nu riða þæir baðir saman upp með ánni oc talaz við. Oc nu kemr upp tungl oc gerir sua liost at þæir megu sia yfir hvar tvæggia liðit. Nu mælti Hilldibrandr. hvar er lið Sifka oc hans landtiolld hann er var hinn mæsti uvinr. nu mætta ek honom væita nokkot illt ef æigi viltu mæinat hafa. Þa svarar Ræinalld þu matt sia æitt land tialld gult oc af upp stonginni þrir gullknappar storir þat land tialld mattu væl kenna þat a erminrikr konungr. þar liggr Sifka i en þo at ækki banna ek þer þa mattu honom ækki mæin gera at sinni sua liggr þar um mikill hær. Þa mælti hilldibrandr hvar er Vidga var keri vin með sit lið. Nu svarar Ræinalld. Þu mat sia græent landtialld oc af upp með stonginni æinn mikill silfr knappr. J þesso landtialldi sæfr Viðga oc þar margir aumlungar oc þæir hafa þæss hæitstrængt at idag skulu þæir kliufa margan hialm þann er hynir muno upp sætia oc þat fa þæir væl æfnt. Þa mælti Hilldibrandr hverr a þar landtialld svart. þa svarar Ræinalld þar mattu væl kenna mitt tialld þar sofa i minir menn. Nu mælti Hildibrandr. Nu hæfir þu væl gert er þu sagðir mer dæili hverso skipat er ydrom hærbuðom. Nu skalltu fara með mer vpp með anni gagnvart þui er standa var landtiolld oc skal ek segia þer hverso ver hofom skipat varom hærbuðum. oc sua gera þæir.

Ok þa er þæir riða upp með anni riða i gegn þæim. v. menn þat ero aumlungar oc ero af liði Sifka oc hans varðmenn. Nu riða þessir. v. diarflega at þæim oc hyggia at þætta myni væra hynir oc fara a niosn i hær þæira oc brægða sværðom oc vilia drepa þa. Nu brægðr hilldibrandr sverði sinu alldiarflega oc riðr i gogn þæim. Nu mælti Ræinalld oc biðr þa æigi riða at sua hart þessi maðr fylgði mer hingat ok er minn maðr. Nu þikiaz þessir kenna at þætta man væra Mæistare hilldibrandr oc hoggua til hans a hans hiolm hott ok sundr hialm hottinn oc ekki vetta bitr hialminn. Nu hoggr hilldibrandr til eins þeirra með sværðe a hans hals sua at af flygr hofuðit oc sa fællr dauðr af hæstinom oc at suabuno skiliaz þæir. þui at Ræinalld vill æigi at þæir bæriz lengr. riðr nu Ræinalldr oc hilldibrandr sem þæir hofðo ætlat oc varðmenn riða læið sina.

Nv koma þæir hilldibrandr a arbakkann gagnvart hærinom. þa mælti hilldibrandr. Þar mattu sia landtialld oc fim stangir ok gullknappr a hverri þat er audkent þat er tialld Þiðreks konungs. oc þar mattu sia a hægra veg rauðt landtialld med rauðo silki þat er med ix stongom oc ix. gullknappom þat er landtialld Attila konungs. þar i ero synir Attila konungs oc junkherra Pether broðir Þiðreks konungs. oc vill hann nu hæfna sinnar sviviröingar. Oc en mælti hann. A vinstra væg fra Þiðreki konungi mattu sia æitt landtialld grœnt þat er tialld Margræifa Roðingœirs oc vill hann nu væita lið Pedther oc þiðreki konungi. Nu hæfi ek sagt þer hverso sætt ero var landtiolld oc þat skal spyria med sonno Sifka at Þiðrekr konungr vill hællzt lata sitt mærki igegn fara Sifka oc þat skal hann spyria. Þa mælti Ræinalld. Sifka hæfir aðr sua ætlat at bæriaz við þiðrek konung en mitt mærki vil ek lata fara igegn Margræifa Roðingœir honom fylgia hynir þæir ero ække varir vinir. En þa verðr Viðga var vinr með sina fylking bæriaz við junkherra pether oc junkherra sono Attila konungs oc er hann þo hælldr trauðr at bæriaz við pether firir sakir hans broðor Þiðreks konungs en þo man sua væra verða oc nu kyssir hvar þæira annan oc skiliaz. biðr hvar þæira annan væl fara.

Riðr hilldibrandr nu hæim til sinna landtiallda oc þar til vadsins er aðr hæfir hann yfir riðit. En Ræinalldr i sin landtiolld. oc er hann kemr i landtialld þa er þar firir honom Sifka með marga menn ok er nu albuinn at bæriaz hann hæfir spurt um for Hilldibranz oc vill nu riða eptir honom oc drepa hann. Þa mællti Ræinalld til Sifka. Villtu riða eptir hilldibrand oc drepa minn goða vin með þino liði. þa ma ek a allitilli stundo fa æigi minna lið en þu hæfir oc skaltu þa fyrr við mik bæriaz en við hann oc væntir mik aðr þu naer hilldibrandi at fyrr skaltu lata margan mann oc þo er mæiri von at hann riði sina læið at sinni huart er þu riðr eptir honom eða æigi. Þa svaraðe Sifka. Þu Ræinalld. Viltu geraz uvinr erminriks konungs er mik sætti hofðingia til þessarrar hærfarar oc þu villt firir standa varom ovinom. þa svarar Reinalld. Ek vil eigi væra uvinr Erminriks konungs hælldr vil ek væita yðr lið til orrosto þott ek bæriz við vara frændr ok vini. en æigi ma ek þætta væita yðr at þer drepit hilldibrand er hann riðr einn vndan. Nu kann væra at þenna hinn sama dag fait þer fullgoða kosti at hitta hilldibrand. þa er hann kemr með sinum monnom. Nu vil ek þat engum banna at til hans riði oc kann þa vœra at sialfr væri hann sik. Ok af þessom orðom læz Sifka ok hans menn oc riða æigi eptir hilldibrandi. En hilldibrandr riðr hæim til landtiallda Þiðreks konungs oc er þa i dagan. hann sægir Þiðreki aull þau tiðindi er hann varð var a þœiri nott. En konungr sægir at enn for hann drengilega sem fyrr.

Fra Þiðreci konungi oc Erminriki konungi.

Ok nu er mornar oc alliost er orðit stendr Þiðrekr konungr upp oc lætr blasa sin bosun oc þægar istað lætr við kvæða junkhœrra Pether sina ludra oc slict sama Margrœifi Roðingœirr oc standa nu upp allir oc vapna sik. oc er þœir koma a sina hæsta þa riðr firir Mœistari hilldibrandr oc bærr i sinni hændi mœrki stong þiðreks konungs. oc þægar eptir honom riðr Þiðrekr konungr oc hverr eptir aðrom allir hans menn oc riða til þessa vaðs er aðr um nottina hafði yfir riðit hilldibrandr. Oc er þat sia auml-ungar letr Sifka blasa basun erminriks konungs. oc er þætta hæyrir Viðga oc ræinalld þa lata þœir blasa ollom sinom mannom til at vapnaz oc bua sik til orrosto. Oc nu læypr viðga a sinn hest skemming med allum sinum vopnom oc er albuinn at bæriaz. slict sama rei-nalld með sinn hær. Valltari af vaskastæini er nu kominn a sinn hæst oc bærr i hændi ser mærkistong Erminriks konungs. þat mærki er a þa lund gert at hinn ytri lutr mærkisins er suart silki sem ramn. en annarr lutr er silki litt sem gull. en hinn þriði lutr mærkissins er græn sem gras oc utan við þat mærki er saumat siautigir dynbiollor af gulli sua ringir þætta merki oc glymr at hæyrir um allan hærinn þegar er riðit er mærkit eða vindr bær þat oc her eptir riðr sifka með alla sina fylking. vi. þusundrat riddara oc mikinn fiolda sargenta. Oc er Þiðrekr konungr ser mærki Erminriks konungs oc hann væit at þar fylkir Sifka. þa kallar hann Mæistari hilldibrandr skylldi bera þar i mot hans mærki þat er gort af huito silki þar stendr i leo af gulli með korono oc þar fylgia dynbiollor af gulli æigi færi en. vij. tigir. þætta mærki hæfir erka drotning latið gera oc gaf Þiðreki konungi. Nu riða saman þessar tvær fylkingar. Ræinalld riðr með sinom flokk. hans mærki er a þessa lund buit þat er raut silki sem bloð oc firir ofan a millom oc spiotzins ero þrir knappar af gulli oc hann stæfnir sinom hær igegn Margrœifa Roðingœir. oc þa riðr Viðga með sinn hær hans mærki bar hinn sterki runga er engi risi fekz sa er honom væri iamsterkr þætta mærki er suart oc af hvitom stæini hamar oc tong oc stæði. her igegn riðr hœrtogi nauðung oc bærr i sinni hændi mærki huit oc a markat leo af gulli oc þat merki gaf erka drotning þether. oc þar eptir riðr junkherra þether oc tvæir synir Attila konungs erpr oc ortvin. ok hinn goði riddare hialprik er allra riddara er kurtæisaztr oc vaskastr. þœira skor er buin allt með rauðo gulli suo at liominn stendr af sem a loga sei.