Heimfor þidrex konungs.
Nv er i Susat sua mikill gnyr ok stormr af vapna braki oc af allzkonar kalli oc hæsta gneggian oc allzkonar gny af hærinom. allr þessi staðr er sua fullr af mannom oc hestom at ængi maðr fær fram komiz þott ganga vili. engi ma hæyra annars mal ef æigi er við sialft. Nu stigr Attila konungr upp a æinn turn ok kallar hatt. hlyðit mer allir menn ok næmi staðar meðan ek tala mitt œyrindi. Ok þui nest verðr lioð um alla borgina sua er mikils metið hans œyrendi. Þa mælti konungrinn. Sua liz mer sem her man væra saman kominn mikill hærr manna oc margir dyrligir hofðingiar. Nu skulut þer sua fara með þenna hær sem ek kenni yðr. Þiðrekr konungr skal fara æinn saman með sinn hær. en minn maðr Margræifi Roðingœirr hann skal fara með annan flok með þæim riddarom er ek hæfi fengit Þiðreki konungi. Oc nu allir adrir menn þœir er saman ero komnir oc æigi ero talldir þœir skulo fylgia minom sonom oc hinn ungi Pether. Oc þesso iatta allir er Attila konungr hefir boðit. Nu riðr út af susat Margrœifi Roðingœirr með sina fylking hans hær er mikill oc vœl buinn. Nest honom laupa a sina hæsta junkhærra ærpr oc ortvin hans broðir oc með þœira fylking er hærtogi nauðung af valka borg hann hæfir merki Pethers. oc þar er Vlfarð frændi þiðreks. oc þar er hinn goði riddari hialprik frændi Þiðreks konungs. oc er hann leypr a sinn hest þa mælti Erka drotning goði vinr hialprikr þer fa ek mina sono til gezlo oc latið þa með yðr riða þa er þer komit til orrosto. þa svarar hialprikr. fru þæss vil ek sværia við guð at alldri kæm ek hæim af þessi orrosto ef ek læt þina sono. Þa mælti Erka drotning oc bað hann hafa mikla þauk firir sin hæit. Nu riðr út af Susat Nauðung hærtogi oc þar nest Pether. oc þar nest Erpr oc Ortvin oc goði riddari hialprik þa vlfarð oc allt lið þæira. Nu læypr Þiðrekr konungr a sinn hæst falka oc mæistari Hilldibrandr hæfir hans mærki oc riðr út firir Þiðreki konungi oc Villdifer oc allr herr Þiðreks sa er hans mærki fylgir riðr nu út oc er nu i þessom þrim flokkom æigi minni hær en. x. þusundrat riddara oc mikill uvigr hær annar.
En um heim for þidrex konungs.
Nv fara þæir sina læið með sinn hær oc ækki er af at sægia þæira færð. þa er Þiðrekr konungr hæfir alæið snuit sinom hær þa kallar hann til sin tva sina menn. hann segir at þœir skulo fara sem mest megu þœir dag oc nott til þess er þœir finna Erminrik konung. oc sægia at þiðrekr konungr oc pether hans broðir vilia nu riða hæim i aumlunga land i sitt riki ok fara með her. oc ef Ærmenrikr konungr vill væria landit þa skal hann koma igegn þæim við gronssport með sinn hær. oc þessir tvæir menn fara alla sina læið oc æigi finna þœir Erminrik konung fyrr enn þœir koma i romaborg ok er þœir koma firir Erminrik konung þa mælti sa er œyrindit bar hæyr þu konungr Erminrikr. þu ert vist otrur svikare. Þiðrekr konungr oc hans broðir pether hafa nu samnat her um allt huna land. ok þar ero með þæim tvæir synir Attila konungs ok nu vilia þœir hæfna þæss er þu tokt af þæim þœira riki með osæmð ok nu kann væra at nu verði þer golldin aull þin otru firir pui at allan þænna vætr hafa þœir buit sitt lið oc nu ero þœir a leið komnir. En ef þu villt væria þitt riki þa kom þu i gegn þæim til gronsport. oc nu sendi hann oss at segia þer þessa hærsogo. oc vill hann æigi stælaz a hendr þer eða a land þitt. Nu er Erminrikr konungr hæyrir þessi tiðinde saugð lætr hann taka tva goða hæsta oc goð klæði tvæggia manna ok lætr fa þessom mannom er honom hafa sagt hærboðit. oc mælti at þær skulo riða hæim oc hafa flrir hans vinattu þessa sendifor. firir þui at ek hræðomz allitt hær huna ef æigi koma þæir at oss obunom. ok við sua buit rida brot sendi menn.
En Erminrikr konungr sendir boð um allt sitt land sua vitt sem þessi tiðindi spyriaz at til hans komi hverr maðr er sua er ungr eða sua gamall at hann ma væl riða eða vopn sin bera eða þori at bæriaz oc þætta hærboð fær. iii. daga ok. iij. nætr. En er þætta var liðit þa er saman komit i romaborg. xvii. þusundrat Riddara oc albunir til bardaga oc þæira er hinn fyrsti maðr hærtogi Viðga Velent son af fritila oc þessir ero búnir með stinnom hornbogom oc svortum hialmom oc huitom spanga bryniom. þa mælti Viðga til Erminriks konungs. her ero nu komnir allir minir menn oc æigi fæ ek samkat mæira hær alitilli stundo oc allir þessir ero nu fusir at bæriaz við hyni en æigi em ek fuss at bæriaz við þiðrek konung af bærn eða hans broðor Pether. en þo verð ek at gera nu slict er þu villt.
Fra ærminrik konungi.
Nv er sua mikit kall oc óp oc stormr um alla þessa borg oc vapna brak oc hæsta gnæggr oc þyss manna at hvert stræti er nu fullt af hærmannom. Oc nu fær konungr Erminrikr upp i æinn hinn hæsta turn oc kallar at nu skolo honom allir hlyða. Minn goði vinr Sifka þu skalt hafa mitt mærki oc mina hirð oc æigi minna lið en. vi. þusundrat riddara en ef þu kemr i vig þa skaltu hitta þiðrek konung af bærn oc allir yðrir menn skulo hann sœkia oc hans fylking oc væri þat drengiligt at við þat slitir þu þessa orrosto at þu bærir hans suærð þer i hændi. Oc en kallar hann. Minn goði frændi Reinalld þu skalt væra hærtogi yfir. v. þusundrad riddara. þu skallt styra þesso liði til motz við hyni oc i þessi orrosto skulut þer drepa margan mann. Minn frændi Þiðrekr konungr oc Pether huartvæggi þœira skylldi væra drepinn i þessi orrosto ef þer fait sigr. Oc enn hæyrdo goði vinr viðga min hinn bæzti hærtogi þu skalt hafa i þina fylking. vi. þusvndrað riddara oc þessir allir ero fvsir at bœriaz. þu munt æigi koma aptr i romaborg með usigri. Ek villdi giarna at drepinn væri Þiðrekr konungr oc pether hans broðir oc nu hœria a mitt riki oc firir hvetvitna fram annat latið þer alldrigi koma hæim með lifi sono Attila konungs. Nu gefi yðr guð sigr i þessi færð oc farit hæilir oc værit nu hraustir oc goðir drengir þar firir megit þer hafa ordlof.
Viðga oc reinalld oc Meistare hilldibrand.
Nv suarar Vidga oc lez nu væra albuinn at bæriaz við hyni oc æi þikir honom illt at bæriaz við sono Attila konungs en ækki mæin vill hann gera Þiðreki konungi ef hann skal raða. Nu lata þæir blasa ollom sinom luðrom oc laupa upp a sina hæsta oc riða með kalli oc opi oc luðra gang ut af borginni
Nu fara þæir sina læið með sinn hær norðr um fiall oc æigi letta þæir sinni færð fyrr en þæir koma i þann stað er hæitir gronsport oc þar hitta þæir firir norðan ana Þiðrek konung af bærn með sinn hær. Nu sætia aumlungar niðr sin lantiolld firir sunnan ana oc hynir hafa slægit sinom landtiolldom firir norðan ana oc nu liggia þæir her hvarir tvæggio þessa nott. A þessi nott var Meistare hilldibrandr varðmaðr Þiðreks konungs af bern yfir hærbuðom oc þa er allir menn ero sofnaðir i hærbuðom þa riðr hilldibrandr ofan med anni æinn saman læynilega oc þar til er hann hittir vað á anni oc riðr nu yfir ana. oc aðr en hann finni riðr maðr at moti honom oc sua er myrkt af nott at hvargi þæirra ser fyrr en hvar riðr upp a annan. Nu mællte Hilldibrandur hvor erttu riddari er suo vsidliga lætur og suo akafliga ridur. Þa svarar Reinalld. Eigi þarf ek at segia þer mitt nafn nema ek vilia firir. þui at þu riðr einn saman sem ek. Oc æigi þarf ek at spyria þic eptir nafne firir þui at ek kenni þik þo at æigi sæims við a. xx. vætrum. þu ert mæistare hilldibrandr maðr Þiðreks konungs. Þa svarar Hilldibrandr. Þu sægir satt ek em vist hilldibrandr hinn bæzti vinr Þiðreks konungs æigi vil ek þui firir þer leyna ne firir engum manne iverolldo at ek em hans vinr oc vist ertu væl kominn minn hinn bæzti vin ræinalld oc sæg mer tiðindi af yðro liði. Þa svarar Ræinalld þau ero hin fyrsto tiðindi yðr at sægia at yfir hær Erminriks konungs er æinn hærtogi Vidga yðar hinn godi vinr oc annarr er Sifka yðar hinn mikli uvinr oc þat kann ek yðr annat at sægia at sua ræið ek læynilega af varom landtiolldom at allir hyggia þat at enn sofa ek iminni sæing. en ek villda riða afund Þiðreks konungs oc segia honom tiðindi ef æigi hitta ek þic oc þat villdi ek vist at honom færiz væl at. en þo verð ek væita minom mannom. en engo vil ek læyna þiðrek þui er hann vill vita af varri færð.