Bókastaðir

Oc er þæir hafa legit um staðinn. iii. manaðe. þa segir Þiðrekr konungr Attila konungi at æigi vill hann væra lengr i þæim stað með allan þenna hær. oc mælti a þessa lund. herra Attila konungr. Nu vilium ver annat huart at þer riðit með yðrar fylkingar vt i ruziland oc sua margræifinn i annan stað en ver manom sitia um þænna stað með vara fylking oc skiliaz æigi heðan fyrr en stadrinn er unninn. En með þui at þer vilit helldr her sitia þa vilium ver fara i annan stað. Nu svarar Attila konungr hofsamlega oc kom þat i hug at Þiðrekr konungr myndi nu vilia æinsaman hafa af ordlof firir þat at þessi staðr væri unninn. oc hann þickiz nu sia at mikit er spilt at borgar veggionom er dag oc nott hafa gengit valslengor þær er æigi hafa fœri menn ræidt en. iij. hundrað oc ero þær margar i hverri fylkingo. oc þat annat kemr honom i hug at ef Attila konungr vill eptir sitia með sina fylking æina saman at þa kann vera at þar komi Valldemar konungr oc bœriz við hann með uvigian her sem hann spyrr at þa hæfir hann saman dregit en þa missir hann lidvæizlu Þiðreks konungs oc margrœifa.

Attila konungr suarar a þa læið male Þiðreks konungs. Goði vinr sua mikit kapp hæfi ek a lagt at fa þenna stað at æigi ma ek heðan fara aðr en mit mærki er borit yfir vigskorð borgarinnar en ek vil biðia þic hælldr at æigi farir þu ibrot oc sua Margrœifi Roðingœirr firir þui at ver hofom optlega bariz við ruzi menn sua at ver hofom orðit liðvana af ofrliði landzmanna nu hofom ver mikinn her sua at oss ma ækki til saka ef ver skilium æigi lið vart. Nu svarar þiðrekr konungr. Sæint fáám ver unnit ruziland ef ver liggiom þrir um æina borg. Ver komom i allan hær ruzimanna með æigi mæira lið enn. x. hundrað manna. en nu hofom ver. x. þusundrat riddara oc mæira hær annan oc leystumz ver sua ibrot af hærinom at ruzimenn leto firir oss mæira en. xx. hundrað manna. Nu verit þer eptir herra með yðarn her oc Mar Græifinn með sinn hær. en ek man ut riða með mina fylking oc hitta firir mer flæiri staðe firir þui at nu muno hynir fa sigr oc þesso iatta þæir.

Þiðrekr konungr tækr nu upp allar sinar hærbuðir. oc flytr nu allan sin hær iruziland hann færr nu hærskilldi yfir oc huar sem hann kom drepr hann nu margan mann oc brytr margan kastala oc borgir oc gerir mikit illvirki oc nu kemr hann firir þann stað er hæitir smaland oc þar legz hann um staðinn med her sinn oc a margar orrostor við borgar mennina. Oc nu er hann hefir þar værit. vi. daga þa kemr þar Valldemar konungr með her ruzi manna oc hæfir æigi mina hær en. xl. þusunðraða. En þiðrekr konungr lætr blasa i alla sina luðra oc biðr aumlunga oc hyni vapna sic oc hlaupa a sina hæsta oc riða igegn Valldemar konungi oc sægia at þænna dag skal Valdemar konungr fa bana eða flyia eða at þridia kosti skal þiðrekr konungr sialfr falla med allan hær sinn. Nu riðr Þiðrekr konungr i andverðri fylkingu oc með honom hans frændi vlfarð oc mæistari hilldibrandr oc hans hinn goði vin villdifer. oc nu verðr horð orrosta oc long bæði. Þiðrekr konungr er nu riðinn imiðian hær Ruzimanna oc hoggr a tvær liðar bæði menn oc hæsta oc fællir hvern a annan oc hans kappar fylgia honom alldrengiliga oc hverr þæira fællir mikinn manfiolda oc allir Aumlungar ero nu katir oc bæriaz nu allan þann dag með miklu drambi oc nu bærsk Þiðrekr konungr sua i hærinom sem leon i dyra flokki oc hræðaz nu allir hans vopn ok allr er hann bloðogr oc sua hans hæstr oc nu hittir hann firir ser mærki oc fylking sialfs Valldemars konungs oc riðr þar at alldiarflega oc hoggr i æino hauggi þann riddara er bærr mærkit a hans hægri hond oc af hondina með bryniunni oc þa fællr mærkit a iorðina oc þar með hoggr hann sialfan Valldemar konung bana hogg her eptir verðr op mikit oc gnyr af aumlungum oc hynum oc æggiar hverr annan. oc falla ruzi menn hundraðum. Nu flyia ruzimen oc er þa drepit aðr sua sem storð þar er þæir hafa fundiz. aumlungar oc hynir bæriaz allan þan dag oc þa nott oc annan dag oc drepa hvern mann er þæir fa staðit oc nu hæfir litill lutr undan komiz.

En þrim dagum siðar en þiðrekr konungr var brot riðinn fra Attila konungi. gerir Attila konungr sua harða atgangu at borginni með mango oc lasbogom at nu fa þæir unnit staðinn oc a þæim degi ganga hynir upp i borgina með allan sinn hær oc drepa margan mann oc taka orgryni fear oc briota þan stað nalega allan til iarðar. oc þau verk voro þa unnin er en mego sia þæir er þar koma i þan sama stað.

Vm Attila konung oc Jron Jarl.

Her eptir flytr Attila konungr allan sinn hær vpp i Ruziland þar sem hann spyrr til Þiðreks konungs. oc nu er Þiðrekr konungr er aptr horfinn til smalænzku. þa com þar Attila konungr með sinn her oc segir nu þiðrekr konungr Attila konungi oll tiðindi þau er orðit hafðo i hans ferð siðan þæir skilduz. J þæim stað var Jron jarl broðir Valldemars konungs. hann ræðir við sina menn sua liz mer sem ver æigim tua kosti firir hondom. sa er annar kostr at hallda upp bardaga við Attila konung meðan ver megum. En þo er þess mest von at ver standimz ekki vid þæira ofræfli oc latimz ver. en hinn er annar kostr at ver gefim oss upp oc staðin i valld Attila konungs. þa fær jarlinn af sinom skom oc niðr leggr hann alla sina hærneskio oc a þessa lund ganga allir hofðingiar ruzimanna oc ganga bærfættir oc vapnlausir ut af borginni oc syna a þessa lund at þæir ero yfir komnir ok þænna dag er upp gefin tign oc vælldi ruzi konunga i valld Attila konungs. Nu ræðs Attila konungr við þiðrek konung hvart grið skal gefa þessom jarle. þat syniz mer rað sagde Þidrek kongur ef þer vilit sua gera at gefa þessum jarli grið oc hans mannom. þo kom hann a yðart valld oc allt hans riki er nu undir yðr komit þat er yðr nu drængskapr oc tign at drepa hann æigi þo hæfir hann engi vopn at væria sik oc allt riki ruzimanna megut þer þa væl æignaz. Nu mælti Attila konungr til jarlsins ef þer vilit oss þiona með trunaðe þa skulut þer þat upp sægia a yðra tru oc þa vilium ver yðr grið gefa oc allum ydrom monnom þæim er a vart valld ero komnir með raði Þiðreks konungs oc annarra varra hofðingia. Nu svarar Jron jarl a þessa lund. herra Attila konungr. Ef ver hæfðim lið sua mikit at ver fengim halldit staðinom firir huna hær þa gengim ver æigi a yðart valld oc firir þui megut þer gera hvat er þer vilit af varo raði. En firir þui lagðum ver niðr var vopn oc lukum upp staðinn oc gengom sialfir firir yðr bærom fotom ok stondum nu firir yðrum kniom at ver vissom yðr goða drengi oc mikla menn sua sem nu er komit oc sa lutr annarr bar til at allir hinir stærsto hofðingiar rruzimanna ero nu dauðir oc skulo ver nu at viso þat gera með trunaðe at væita yðr lyðni. Oc nu tækr Attila konungr upp Jron jarl oc setr hann med sinum hofðingium.

Vm malstefnu þiðrex konungs oc Attila konungs.

Nv kallar Attila konungr Þiðrek konung amalstefno oc marga aðra hofðingia oc raða nu landraðum hverso nu skal sætia allt þætta riki er þa hafa þæir unnit. oc her eptir með umræði þiðreks konungs oc annarra hofðingia sætr Attila konungr Jron jarl hofðingia i ruzilandi at styra þui riki oc dœma landzlog oc giallda skatt Attila konunge oc væita honom liðvæizlu hvers er hann þarf við.