Bókastaðir

Fall Osangtrix konungs.

Attila konungr sægir nu Þiðreci konungi huersu mikit uandreði osangtrix konungr villcina manna hæuir gort honum langa rið. bæði imanndrapum oc i land auðn. oc nu suarar Þiðrec konungr oc lez uilia at þess ueri hefnt meðan han skal uera iriki attila konungs oc æigi uilium uer nu þat þola. oc æigi myklu her æptir coma til attila konungs sendi menn með þeim tiðænðum. at osangtrix konungr er kominn með her mikin ihans riki oc brennir bygðir og œyðir lanð hans oc hevir drepit marga menn. oc nu er þetta heyrir attila konungr oc þiðrecr konungr. Nu suarar attila konungr. þat skulu vita allir minir menn at nu skulu uer við buaz sem tiðazt oc skulu uer ut riða oc ueria uart land. oc dugi nu huerr sem drengilegast. oc nu mællti þidrecr konungr uið sina menn meistari hilldibrandr þu skallt taka mitt merki oc allir uarir men skulu nu uera bunir at ueita lið Attila konungi. oc a þessi stundu mun rœynt uerða huart aumlungar þora at ueita honum lið. Nu riðr Attila konungr ut af susam með sinn allan her. oc með honum þiðrecr konungr oc margreiui roðingeirr. oc allz hæuir hann. x. þusunðir riddara. oc þenna her flytia þeir i þann stað er heitir brandina borg. en þa borg heuir aðr tecit osangtrix konungr oc drepit þar margan mann. attila konungr oc þeir sezt nu þar. Osangtrix konungr med allan sinn her er þar.

Oc nu er Osangtrix konungr spyrr at Attila konungr er þar nær kominn. byr han her sinn oc riðr ut igegn Attila konungi. oc nu er þeir hittaz. oc eru huarir tueggiu bunir til uigs. þar ma sea margan fagran hialm oc nyian skiolld hvitar bryniur oc huoss suerð. oc margan drengilegan riddara. Nu kallar Osangtrix konungr huart Attila konungr er buinn oc hans her at beriaz. oc nu kallar hann rað at hynir ueri sic drengilega. Nu heitr han a uillcina menn at þeir skulu nu beriaz af kappi. oc nu flyi ængi fra honum. Nu suarar Þiðrecr konungr af bern oc mællti þu Osangtrix konungr munt skiott finna at Attila konungr er nu albuin. En fyrst skulu þer mœta þui liði er aumlungar heita oc þar nest hunum oc weried yðr sua sem nu se her komnir þeir er socia munu ydart lif. oc enn mællti hann til sinna manna sœkit framm uel goðir drengir mic uentir at þeir muni fa bana. en uer sigr. oc ueitum ver uel lið et fyrsta sinn Attila konungi. Nu riðr framm hilldibranðr með merki þiðrex konungs oc hœggr a baðar henðr. oc fellir villcina menn huern a annan ofan. oc þegar æptir honum riðr þiðrecr konungr oc firir honum falla villcina menn a tuer liðar. oc ulfraðr hans fraendi fylgir honum alldrengilega oc her aeptir riðr framm huer at oðrum aumlunga lanz hers. oc firi þessi fylking falla uillcina menn huar sem þeir koma fram oc hilldibrandr meistari ber merki þiðrex konungs sua lanct framm iher villcina manna sua at allar fylkingar riða þeir i gegnum. oc þo snua þeir aptr a leid aðra. oc drepa uillcina menn huern yuir annan. oc a þessa lund fara þeir þann dag allan oc nu ser osangtrix konungr oc riðr herðilega a hendr hunum oc drepr margan mann. oc ueröur nu orrostan all mannskeð af huara tueggiu liði. Osantrix konungr riðr i enduerðri fylking oc veitir nu morgum manni skaða. oc nu riðr ulfraðr i gegn honum fraenði þiðreks konungs með sina sueit oc aeiga þeir all harða orrostu. oc aðr en letti fellr Osangtrix konungr. oc nu er konungr er fallin flyia uillcina menn en hynir soekia nu aeptir oc drepa sua margan mann at fatt kemz undan oc heuir nu Attila konungr sigr oc þo latið aðr i orrostunni. v. hundruð riddara. En þiðrecr konungr hefir latit halft hunðrað af sinum monnum. Nu fer Attila konungr heim með sinn her oc hæuir nu frelst sitt riki fyrir uillcina monnum. Nu taka uillcina menn hertnit til konungs son Osangtrix konungs.

Fra hær for Attila konungs.

En er attila konungr hæfir hæima værit æigi lengi þa spyrr han þau tiðinde at valldemarr konungr af holmgarðe brodir Osantrix konungs er kominn i hunaland oc hæriar með almikinn hær. Oc nu er þat æinn dag at þiðrekr konungr stendr i hinum hæsta turn oc nu ser hann viða um hunaland hann ser mikinn reyk oc mikinn loga viða of landit. oc nu gengr hann til Attila konungs oc mælti. Stat upp herra oc bu þik oc allir þinir menn. Ek hæfi þat set at þæna dag man Valldemar konungr brænna mart þit bu oc marga fagra staðe oc mikinn skaða man hann gera a riki þino. oc ef þu villt æigi hann finna oc væria land þitt þa mun hann þo her koma oc skaltu þo bæriaz at þu vilir æigi eða flyia ælligar. Ok nu stændr Attila konungr upp oc biðr blasa ollum luðrum. Oc nu riðr Attila konungr vt af Susa með sinn hær. Oc nu hæfir Valldemarr konungr tækit æina rika borg af Attila konunge oc i þæiri borg tok hann æinn goðan riddara Roðolf sendimann oc bindr hann. Oc nu hæfir hann drepit allz. x. hundrað manna. Oc hann hæfir brænt. x. hundrað þorpa oc. xv. kastala oc borgir oc tækit mikit fe oc menn. Oc nu er hann spyrr at Attila konungr hæfir hær uvigian flyr hann undan oc aptr i sitt riki.

Nu færr Attila konungr með hær sinn oc hæfir nu samnat um allt sitt riki hærtogum oc græivom oc riddarom oc allzkonar hær. oc nu er hann er buinn færr hann i ruzi land. Oc vill nu hæfna sin oc þægar er hann kom i riki vilcina lanz oc ruzi landz hæriar hann oc brænnir allt þar sem hann færr oc gerir þæim mikinn skaða. þætta spyr Valldemar konungr huat Attila konungr hæfz at oc samnar ser liði um allt sit riki oc færr igegn þæim oc hittaz i vilcina lande oc hæfir Valldemar konungr þa miclu mæira lið. oc nu ætlaz þæir at bæriaz huarirtvæggio. Oc skipar Attila konungr huna hær oc sinu mærki igegn merki valdemars konungs. En þiðrekr konungr sætr sitt mærki oc sina fylking i gegn mærki þiðreks sonar valldemars konungs.

Vm bardaga huna oc ruzimanna.

Oc nu riða þæir saman oc bæriaz allraustlega hvarer aðrum igegn. Oc nu riðr þidrekr af bærn firir miðri sinni fylking oc hoggr ruzimenn a hvaratvæggio hlið ser. Oc nu riðr at honom þidrekr Valldemars son oc bæriaz þæir nu tvæir sua at ængi maðr væitir nu hvarigum. Oc nu væitir hvarr oðrom stór hogg oc marg sar oc stór oc bæriaz af hino mæsta kappi oc ofstopa. Oc nu hæfir þidrekr af bærn hlotið. ix. sar en þiðrekr valdemars son. v. sar. oc oll stór. Oc nu riðr þidrekr af bærn allra diarflegaz. oc æigi lettir hann aðr en hann hæfir tækit þiðrek valdemars son oc siðan bundit. Oc nu hæyra þæir mikit hæróp oc þæss verða þæir varir at nu flyr Attila konungr með ollom huna hær. Oc nu kallar þidrekr af bærn hat oc grimlega. Allir minir menn snuit aptr oc bæriz æigi vil ek flyia at sua buno oc enn munut þer sigr fa ef þer vilit duga yðr. Oc riðr nu fram harðlega oc hoggr a baðar hliðar oc allir hans menn fylgia honom drængilega. Oc nu hæfir attila konungr latið af sinu liði. v. hundrat manna oc flyr nu undan við suabuit til þæss er hann kæmr undan i hunaland. En þiðrekr af bærn bærsk nu allan þann dag. Oc nu hæfir hann latið af sinom mannom. cc. manna. En valldemar konungr hæfir allz latið mæiR en. xx. hundrað riddara.