Nu gengr Viðga þegar til sins hæstz oc riðr nu allra mest nott oc dag sem han ma. En erminrikr konungr letr a somu stundu við kueða alla sina luðra og letr kalla at allir hans menn skulu taka uapn sin oc hesta. oc er þessi herr er buin riðr hann nott oc dag sem allra mest ma hann. oc samnar at ser huerium manni er hann fær. oc stefnir með þenna her til bernar. Viðga kemr um miðia nott til bernar. oc eru aptr oll borgar lið. oc nu uerða uarð menn uarir uið at maðr er kominn undir borgina oc spyria huer þar se. Viðga nefnir sic oc biðr upp lata borgina. Nu ganga uarð menn til borgar liðs en sumir at sægia þiðreki konungi at Viðga er þar kominn hans felagi. En þegar er þiðrecr konungr hoyrir þetta stendr hann upp oc gengr i gegn honum | oc þegar er þeir finnaz fagnar konungr honum uel oc bliðlega oc spyr hver tiðændi hann kann sægia. oc ænn spyr hann ef Viðga viti hui erminricr konungr heimtir skatt af minu landi. Vidga segir ec kann sægia þer ill tiðændi oc mikil. oc þo sonn. Ef her biði þer dags þa man her koma erminric konungr með u uigian her. oc nu erttu sua rœgðr firi honum at hann vill drepa þic sem alla frændr sina.
Nu gengr konungr isina holl oc lætr blasa sinum luðrum oc stefnir til sin ollum sinum hofdingium oc radgiofum oc riddorum oc segir huer tidændi Viðga hefir sagt. oc lycr a þessa lund sinu male at nu munu oss uera. ij. kostir geruir. sa er annar at biða hans oc ueria sic sem bæzt oc mun erminrikr konungr lata marga dugandi drengi. oc uer munum oc firi sakar ofreflis lata uart riki oc sua sealfa oss aðr letti. Sa er annarr kostr at uer buum oss oc riðum i brottu oc leifum borgina. Guð ma raða ner uer fam hana. oc holldum uer þa monnum uarum oc liui. oc er þat mitt rað ef þer vilit sem ec. Nu suarar hilldibrandr hans enn bæzti uin þat ueit Gud at nu uerðu uer at lata vart riki usœmilega ner sem uer fam þat. oc huerr þeira er nu uill flyia. þiðrecr konungr hann skal nu upp standa oc bua sic sem tiðast firir þui at æcki er nu her lengr at tala undan skal nu riða at sinni en uer mægum fa uart ef Guð uill. oc nu er þetta hæuir mellt hilldibrandr uerðr mikill romr um alla bern af konum oc bornum sumar grata sina menn sumar sonu sumar bröeðr sumar feðr sumar adra uini sina goða. en ioðrum stað er mikit uapna brac oc hesta gnegivn er huerr riddari tecr sin uapn oc hest. oc er nu a þessi nott mikill gratr oc veinan ibern. oc mikill stormr af luðrum oc opi. oc nu ero albunir allir til reiðar með uapnum oc ganga þeir allir i enar mestu konungs hallir oc sitia þar oc talaz við. oc drecka uin um stund. Nu kemr riðandi at bern heimir þeirra felagi. oc kann segia en sœmu tiðændi. at erminricr konungr mun æiga skammt þangat. oc hann hæuir. v. þusundir riddara oc otal annarra manna. En þiðrekr konungr hæuir. dccc. riddara. oc er þeir hœyra þessi tiðændi. þa suer heimir þat við Guð at uist latum uer uart riki uið usœmð firir sakar erminrix konungs oc en ma hann fa af oss meira skaða en gagn aðr en uer skilium. þott hann taki bern oc allt aumlunga land. oc nu tekr hilldibrandr meistari merkis stong þiðrex konungs. oc biðr nu alla fylgia ser. En hann lez munu fyrir riða. Nu laupa allir riddarar huerr a sinn hest. Oc nu riðr firi hilldibrandr ut i langbarðaland oc snyr með mundinu. oc sua irriki erminrikrr konungs. nu brenna þeir borgir oc kastala oc þorp oc bœi oc margan mann drepa þeir. oc aðr þeir riði norðr um feall. haua þeir brentt iriki erminrix konungs. xi. þusundir þorpa oc bea oc kastala.
Oc nu riða þeir aptr Viðga oc heimir oc skiliaz nu uið sina felaga all okatir oc fara afund erminrix konungs heimir gengr nu afund erminrix konungs með reiði mikilli oc mællti. þu erminrikr konungr hæfir mart illt gort a þinum frændum. friðrec oc reginballd sendir þu fyrst sealfr til dauða. oc en unga samson draptu oc þina broðr ur sonu egarð oc aka leztu hengia. oc her a ofan hæuir þu abrot recit or sinu riki þinn frænda þiðrec konung. oc pether oc ulfrað þinn systur son. oc en goða dreng hilldibrand. oc marga aðra goða riddara suma drepit en suma brott recit. oc | þessu ollu illu uelldr sifca en illraði. þa suarar sifca. þat sagða ec þer firir longu herra þa er þu drott heimi hengat oc gerðir hann sua stolzsan at nu ofr yrðir han sealfan þic oc þat veri | fallit attu letir han fara i sama skog oc hans faðir sat oc getti hann þinna hesta sem fadir hans. þa mællti heimir þat veit Guð ef nu hæfða ec her mitt et goða suerð naglring. þa skyllda ek sua drepa þic sem. i. | hund. oc nu lystr hann til sifca með nefa sinum a hans uanga sua at þegar fell hann agolfit fram firir fœtr konungi oc or reota. v. tenn or hans hofði oc ækci veit hann til sin. oc nu mællti erminrik konungr standi upp allir minir menn oc taki hann oc hengi. oc nu gengr heimir skyndilega ibrot. þa er hann hœyrir orð konungs oc þar til sem uoru hans vapn oc byr sic sem tiðast. Nu lœypr hann a sinn hest rispa oc riðr ut at borgar liði. en æptir honum. lx. riddara aluapnaðra. oc nu kemr at liðinu Viðga oc loypr firir mitt liðit oc hæuir mimung ihendi. oc nu þorir ængi þessi riddari ut at riða. oc kemz heimir undan at sinni. oc riðr ut askog. oc allt þar sem eru bu eða æignir erminrics konungs eða sifca þa brenir hann oc drepr menn. oc æigi lettir hann fyrr en hann hæuir brennt. d. bœa. oc nu liggr hann uti a skogum. En sifca þorir alldrigi með færi menn at riða en. lx. riddara. oc nu ottaz þeir æ heimi.
Fra Þiðreci konungi oc margreifa roðingeir.
Nv er at sægia fra þiðreci konungi at han riðr norðr vm feall oc ferr leið sina allt þar til er hann kemr iborg þa er heitir bacalar hon stendr við rina. þar ræðr firir mikill hofðingi margreifi Roðingeir oc nu er greifin hœyrir sagt at kominn er þiðrecr konungr af bern skamt fra borginni hann lætr bua alla sina menn oc setr a hesta oc sealfr riðr hann ut af borginni oc kona hans gudelinda oc lætr hann skipa allt með klæðum allzkonar oc riða sua igegn þiðreci konungi. oc nu er þeir finnaz riðr at guðilinða at þiðreci konungi oc gefr honum merci af silki halft grœntt en halft rautt. oc markat a leo allt með gulli oc ænn gefr hon honum æitt purpura pell þat er ængi maðr sa meiri gersimi. Nu gefr margreifi rodingeir honum hesta. oc gull oc uapn oc goð klæðe. oc nockora goð gripi hverium þeira Riddara er með konungi voru. riðr nu þiðrecr konungr til borgarennar með margreifa Rodingeir oc sitr þar i enum bæzta fagnaði.
Nu riðr þiðrecr konungr oc með honum greifin til susam afund Attila konungs. oc er attila konungr spyr at þiðrecr konungr er þar kominn lætr hann blasa ollum sinum luðrum oc bua alla sina riddara sem bezt ma hann oc ut letr hann bera oll sin merki oc riðr siðan i moti þiðreci konungi með mikilli pryðe oc drambi oc með honum hans kona erka drottning oc með honum margir leikarar með allzkonar skemtanar leikum. oc nu er þeir finnaz fagnar huar odrum uel. Nu riðr þiðrecr konungr með Attila konungi heim isusam. oc setr Attila konungr hann et nesta ser. oc ollum hans riddœrum skipar hann ueglega oc gerir hann nu mikcla ueizlu oc gofuglega oc byðr þiðreci konungi með ser at vera sua lengi sem hann vill sealfr oc þiGia hans oll en bæztu fong þau er til se oc þetta boð þeckiz nu þiðrecr konungr. oc duelsk nu með attilla konungi langa rið.