Nockoru siðar er þat jron jarll byr ferd sina oc með honum norðian hans ueiðimaðr oc nocorir aðrir riddarar. oc haua með ser marga hunða. Nu buaz þeir sua heiman sem þeir skyli vera heiman. ij. manudr. þeir rida nu langt ibrot i œyðimercr. veiða dyr oc skemta ser. jarllinn riðr nu suðr iskoga sua sem œydimercrnar vinnaz þar til er allt koma þeir i avmllunga land iriki aka oc frittila. þa spyrr jron jarl at ærminrikr konungr hævir buit veitzlu mikcla iromaborg oc þar til boðit þiðreki konungi af bern. oc hertugi aki skal þar oc til koma. þa sendir jron jarll æinn riddara iborgina sa ferr með hans brefi til bolfriana at jron jarll sendir henni ord hversu þau skulu finnaz þa er aki er heiman riðin. þessi riddari ferr sem. i. loddari oc fær ser klæði lodðara oc ferr sua i borgina þar er dryckia micil i hollinni fru bolfriana stendr oc skenkir hertuganum. oc þa er hon gengr imoti bord kerinu er skenkiarin hevir inn borit þa kemr til hennar senði maðren oc fær henni brefit ihond. oc sægir henni iartegnir hon lætr brefit isinn pung oc mællti at jron jarll skylldi riða j borgena þa er aki væri brot riðin um nott. Riddarinn hverfr brot or hollinni skyndilega. fru bolfriana tecr nu borð kerit oc skenkir hertuganum han tecr nu við kerinu oc drecr til bolfriana oc mællti se herna fru. oc drecc til halfs við mic. hon tecr við skalenni oc dreccr af allt. þetta kuelld lætr hertuginn hana drecca til halfs við sic. oc aðr en letti var bolfriana druckin sva at hon sofnaði fast hertugin biðr Riddara sina taka upp bolfriana oc bera til reckiv oc sealfr ferr han þa at sofa. Riddarar legia bolfriana upp i hviluna með ollum sinum klæðum. þa biðr han riddarana fara at sofa. oc standa. vi. kerti er brenna skulu at hofði oc at fotum hertuganum. þa er sko sueinen hafði dregit af honum hans klæði. þa biðr han han brot ganga. han lycr fast hvrðena þa gengr han þangat sem hans fru var han tecr af henni hennar pung oc yr þat sem i var hann hittir þar i æitt bref hann recr þat isunðr oc less. her stendr þætta a. jron jarll af brandina borg sendir qveðiu bolfriana sinni unnastu han er komin iþan skog er skamt er heðan ef aki hertugi riðr ut af sinu riki þan dag er amorgin er. þa annat kuelld i dagsætr skolu vit finnaz við þan lunð er stenðr hia borginni mun hann þa dueliaz með yðr nockora rið. Með þvi at aka hertuga dueliz meirr sin bravtreið þa gerit mer þar um skyr orð oc mun ec þa þess biða með þeim er þu truir. hertugin brytr saman brefit sua sem aðr var oc lætr niðr ipunginn oc legz nidr i hvilu sina oc sefr.
Nu er hertugin hæuir sofit lengi. þa stenðr han upp snemma um morginin oc gengr þangat sem bolfriana sefr vecr hana vpp oc er en katasti við hana oc biðr hana standa upp með ser. vill hann nu riða sina leið. hann bað koma til sinn riddara. xij. bað þa bua sic snema dagsens. oc skal hann nu riða suðr til ruma borgar þeir buaz allir kurteislega með godum uapnum oc haua sina ena bæztu hesta. firir miðian dag riða þeir ut af borginni frittila oc fara leið sina allt þar til er þeir koma i skogin þeir riða nu allan dagin til nons. þa mællti hertugi aki við sina menn. vist reið ec nu sneypilega ef ec skal æigi biða mins frænda þidrix konungs af bern oc riða með honum til veizlunnar. er þat illa funðit ef han kemr j fritila at ver sem þa æigi heima. Nu skal aptr uenda oc biða hans heima snyr nu aptr hestinum oc allir þeir oc er þeir koma aptr i skogin þa riða þeir um rið. oc litlu æptir solar setr þa sea þeir hvar riðr. i. maðr. firir honum renna. ij. hunðar avinstri sinni henði hevir hann hauc hann hævir fagran oc friðan skiollð | oc markaðr a haucr af gulli oc hunðr. þar kenir aki at vera mun jron jarll af brandina borg. oc kallar nu a sina menn at þeir skulu riða til oc drepa hann. þa bregðr aki sinu suerði oc allir riddarar riða igegn honum. jron jarll kenir nu þenna en fyrsta mann. sa hefer raudann skiolld oc amarkaðan leon af gulli at þetta er hertugi aki af frittila borg er allra kappa var mestr oc berserkia. þeir finnaz við gotuna oc beriaz þegar. jron jarll verr sic vel oc drengilega oc aðr en letti skilsk hann við sinn hest oc lætr sigaz til iarðarennar með morgum storum sarum hertugin aki riðr nu abrot við sina menn skilsk nu við jron jarll davðan. hertugi aki ridr nu til bus þes er han a við skogin oc tecr þar gisting um nottina.
Þetta sama kuelld kemr i frittila borg þiðrecr konungr af bern við alla sina menn þar er þa viðr hanum viðga en sterci oc heimir þeir duel-iaz þa nott ifrittila i goðum fagnaði iholl aka hertuga en um morginin æptir byz i brot þiðrec konungr snemma með ollum sinum monnum allt þar til er þeir koma a skogin. þar hitta þeir igotunni. i. mann dauðan firir ser. oc er þeir koma at fram sea þeir þar oc. i. hest með riddara soðli. sea hestr bitr oc ber til þeira oc vill æigi lata hœndla sic æptir sinn herra þar eru oc. ij. hvndar oc nollra þeir oc grenia. þeir vilia oc æigi alata taka sinvm herra þar ero oc haucar. ij. itrenu uppi oc gialla hatt. þa mællti þiðrecr konungr at þeir skylldi ofan stiga oc vita hverr sea maðr muni vera er her ligi þui at hann hævir kvrteislegan bunat oc han mun verit hava abburðar maðr þvi vnna honum mikit hans hundar oc havkar oc hestr at þeir þickiaz mikillar gersimi haua mist. þa er þeir mistu sins herra þeir stiga nu af baci oc taka upp mannin oc sea ef þeir mægi kenna. þa segir þidrecr konungr her er fallin dyrlegr drengr oc mikill hœfðingi jron jarll af brandina borg huar þeir menn munu vera er han hava drepit tœkum nu oc buum vm lic hans þa taca þeir vpp stor treo iskoginum oc gera þar grof virðulega. taka nu jron jarll oc legia hann igrofina með allan sinn herbunað. bera at griot oc viðu oc gera um merkilega sua at kena mægi hverr þar ligr. oc þa er þeir bua vm jron jarll. þa kemr þar aki hertugi at riðandi með sina menn han fagnar vel þiðreci konungi sinum frænda oc sægir at þeir munu riða allir saman til roma borgar. þa suarar þiðrecr konungr hertuganum at hann mun vita huerr drepit hæfir jron jarll af branðina borg. En hertugin segir at hann drap han oc hans menn. þa suarar þiðrecr konungr oc spyrr hueria sœc gafttu honum er þu drapt sua goðan dreng sem var jron jarll af brandina borg. þa svarar aki han villdi veiða imorkunni tvifœtt dyr með velsamlegri flærð oc meðferð oc slogligri raða gerð begia þeira firir uttan minn vilia. þiðrecr konungr oc með honum aki hertugi hans frænði rida nu alla sina leið til rumaborgar.
Norðian oc með honum. iij. riddarar þeim þickir jron jarll seinn aptr til sinn riða nu um kuelldit suðr a leiðina at leita hans þa er þeir koma imorc þa er hann var drepin oc i þat reoðr er han var iarðaðr þa hœyra þeir at hundarnir nœllra yvir leiði jrons jarls. þa riðr nordian þar til oc kenir þar hunða jrons jarls oc hans hest oc hauka. þar sea þeir oc umbunað nockuerskonar. Nu riða þeir þar til oc kenna þar sinn herra jron jarll dauðan með sin en storu sar þickiaz þeir nu sea at þetta man gort haua aki hertugi. taka þeir nu hestinn oc sua hundana oc sua et sama havkana. dueliaz nu þar til i avmlunga landi er þeir verða varir at þetta hævir gort aki hertugi or fritila. siðan riða þeir heim norðr i hunaland með þessi tidændi oc sægia attila konungi oc nu setr hann annan hertuga yvir brandina borg at styra þvi riki er aðr hafdi haft jron jarll.
Dauðe Aka hertuga.
Þau tiðændi verða a langbarðalandi at andaz æinn greifi er heitir aki avrlinga trausti. han a æptir. ij. sonu við konu sini oc er huartueggi barn at alldri. heitir annar egard en annarr aki sem fadir hans het. En þeira modir het bolfriana hon var allra kuenna friðust. en gamli aki var samfeðri við erminric konung oc en rikasti maðr. Nu ferr þiðrecr konungr oc með honum. c. riddara oc viðga hans en goði vin oc felagi. oc riða alla sina leið sua sem firir ligr til þess er þeir koma iroma afunð ærminriks konungs oc nu berr hann vpp sitt ærendi. at hann vill biðia bolfriana af Drecanfil til handa sinum enum bezta vin viðga. þessu mali tekr vel erminrikr konungr oc sægir ef viðga vill vera mer sva trur sem aðr var han þer. oc sua mikill minn vin þa vil ec gefa þer þessa konu oc þar með borgina oc skal hann þar vera yvir greifi. oc at raði þiðrex konungs oc erminriks konungs er nu þetta gort at Viðga gengr at æiga bolfriana oc er han greifi ærminriks konungs. En þiðrekr konungr ferr nu aptr isitt riki.