Bókastaðir

Attila konungr af susa var bæði rikr oc feolmennr. oc vann morg riki. han legr vingan við erminrik konung er þa reð puli. þessir ij. konungar legia vingan sin amæðal sua at Attila konungr sendir erminrik konungi sinn frænda Osið með. xij. riddara. erminric konungr sendir igegn Valltara af uaskasteini sinn systur son með. xij. Riddara. þa var Valltari. xij. uetra. þar dualdiz hann. vij. uetr.. ij. uetrum siðar kom þar en Valtari com til susa hilldigunðr dottir jlias jarls af greca oc var senð at gisling Attila konungi. þa var hon. vij. vetra gomul. þessir enir ungu menn unnuz mikit oc veit þat þo æigi attila konungr.

Þat er. i. dag at veizla rik er i grasgarði attila konungs oc danz rikr. oc þa hellt Valltari i honð hilldigundi. þau talaz við marga luti oc þat grunar ængi maðr. Nu mællti Valltari hue lengi skalltu vera ambatt erca drottningar oc væri bætr fallit attu forir heim med oss til minna frænda. hon mællti herra æigi skalltu spotta mic þo at ec se æigi hia minum frændum. Nu suarar Valltari. fru þu ertt dottir jlias jarls af greca oc þinn er fauður brodir Osangtrix konungr villcina manna oc annar i mikcla ruzi. en ec em systur son ærminrix konungs af romaborg. oc annar er minn frændi þiðrecr konungr af bern oc hvi skal ec þiona Attila konungi. ger sua uel far heim með mer. oc sem ec em þer hollr sua se guð mer hollr þa suarar hon. þægar ec ueit þinn vilia at sœnnu þa skalltu oc vita mic oc minn uilia. þa var ec. iiij. uetra gomul er ec sa þic et fyrsta sinni. oc unna ec þer þægar sua mikit at œngum lut i verolldu meira oc fara vil ec med þer þangat er þu villt. þa suarar Valltari ef sua er sem þu sægir þa kom þu amorgin er sol rennr vpp til ens yzta borgar liðs oc haf sua mikit gull með þer sem þu mat mest bera a anari hendi þinni firir þui at þu ueiz allar febirzlur erka drottningar frænkonu þinnar. oc hon sægir sua vera skulu. oc nv verðr Attila konungr æcki varr við þetta rað fyrr en Valltari hæuir ut riðit af susam. oc með honum hilldigunðr oc hofðu nu mikit fe i gulli oc. ij. riðu ut af borgini oc ængi var þeira sua godr vinr at þav tryði til þessa at vita sina færð.

Oc nu verðr við varr Attila konungr at Valltari er brot ridinn oc hilldigundr oc nu biðr hann sina menn. xij. riða æptir þeim. hilldigundi oc Valltara oc skulut aptr haua fe þat allt er brot er tecit oc sua høfud Valltara. oc af þessum var. i. maðr havgni son alldrian konungs oc nu rida þessir. xij. riddarar æptir þeim skyndilega oc sea nu huarir annarra reið. Nu lœypr Valltari af sinum hæsti með mikilli kurteisi oc rœysti oc tekr ofan sina fru hillðigundi. oc þeira gersimar nu lœypr han asinn hest oc setr sinn hialm a hœfuð ser. oc snyr fram sinum glaðil nu mællti hilldigundr við sinn sœta lafarð herra harmr er þat er þv skallt. i. beriaz við. xij. riddara. rið hælldr aptr oc forða þinu liui. fru sægir hann grat æigi set hævi ec fyrr hialma klofna skiolldu skipta bryniur sunðraðar. oc menn stœypaz af sinum hæstum havfuð lausa. oc allt þetta hæui ec gort minni henndi oc æcki er mer þetta ofrefli oc nv riðr han i moti þeim. verðr nv mikill bardagi. oc fyrr er myrct af nott en lokit se viginu.

En Valltari er nu sar mioc oc drepit hævir han nu. xi. riddara en hœgni komz unðan. oc komz i skog en Valltari hittir nu sina fru. oc buaz þar um við skogin. Valltari slær þa ælld við tinnv oc gerir þar mikinn ælld oc þar við steikir hann. i. bœysti villigalltar. oc nu mataz þau siðan oc luka æigi fyrr en allt er af beinunum. Nu snyr hœgni or skoginum oc til ællzens er Valltari sat hia oc hygr at hann skal drepa han. oc bregðr nu sueroi. hilldigunr mællti til Valltara vara þic her fer nu. i. af þinum ouinum. er þu barðiz við iðag. oc nu tecr hann vpp bœystið uilligalltarens er af uar etit oc kastar at hœgna. oc lystr sua mikit hog at þægar fellr han til iarðar. oc kom a hans kinn sua at þægar rifnaði holldit oc ut sprac augat. oc nu stenðr han upp skiott afœtr oc lœypr asinn hæst oc riðr við þetta heim til susam. oc sægir Attila konungi vm sina ferð. Valltari stigr nu a bac oc riða þau suðr um feall afund ærminrix konungs oc sægir honum nu allt at sinum ferðum. oc þo fa þeir Attila konungr halldit sinu vinfengi með fegiofum er ærminrikr konungr gaf Attila konungi.

Fra þvi er Jsungr konungr oc synir hans komo j bertangalandi.

245. J landi þvi er heitir bertangaland uar. i. konungr er heitir artus hann er mikill maðr firir ser oc er nu gamall orðin hann a. ij. sonu enn ællri heitir iron en enn yngri apollonius. artus konungr fær bana sott. En æptir hans dauða kemr til rikis bertanga isungr konungr oc hans synir. xi. oc allir þeir sua mikclir kappar at uarla fenguz iafningiar þeira sem fyrr er ritað. Jsungr konungr æignaz allt bertanga land með hernaði en synir artus konungs flyia undan með sina menn þeir fara viða um lond oc æigi fa þeir ser riki aðr en þeir koma ihunaland oc þar finna þeir Attila konung isusam er aðr hafði æigi mikklu æignaz hunaland. han tecr við þeim baðum uel oc monnum þeira oc geraz þeir hans undir menn. æptir þat ueitir Attila konungr þeim riki baðum Iron setr hann jarll yuir braudina borg. oc þat land er þar helldr til. Apollonium setr han jarll yuir tira skamt fra rin. oc gefr honum þar lonð apollonius var allra manna friðastr oc stercr maðr at afli. oc enn bæzti riddari. oc manna raustastr til vigs. Iron var oc væn maðr oc giorvilegr synum. stercr oc mikill atgervi maðr. hans kapp var þat mest at veiða dyr oc þar með gerði hann micit afrec optlega. i hans landi var. i. skogr er heitir valslœngu skogr hann ligr imilli oc uestra fraclandz er þa reð firir solumon konungr er allra konunga var rikastr oc uaskastr oc auðgastr at lausa fe hans kona het herborg. þau attu æina dottur hon heitir sem hennar moðir herborg hon er allra meyia fridazt konungr unni henni mikit. margir konunga synir eða hertuga hofðu hennar beðit. En sua mikit ann henni salomon konungr at œngum vill hann hana gipta.