Bókastaðir

Fra Sifka.

Sifca hans har er ravtt sem bloð. eða rosa grasit. oc karhofðaðr. hans andlit er leost oc ravðfrecnottr. oc biartan likama hævir han oc allan freknottan. rautt skeg heuir hann oc hællðr sitt. fagra aseonu. mæðalmaðr at hæð. oc þo er han stercr at afle oc riðr hest alluasklega. oc mikill er hans gervileicr um marga luti hann er vitr maðr oc þolin moðr. langræcr oc vndirhygiv maðr mikill. bliðmælltr fagr mall grimr illgiarn. otrur harðr var hann. Oc hans nafn man iafnan vppi vera.

Fra Hilldibrandi meistara.

Meistari hilldibranðr hævir þann lut vm framm alla kappa ibern at han kann þat slag með sverði at ængi maðr matti koma firir sic skilldi hvar sem hann kemr i vig. oc optazt fær han sigr a æinu hogui oc við þat sama er hans getið hvar sem hans nafn er ritað eða fra honum sagt.

Fra Heimi.

Heima en mikillati fær af því mestan metnað með því er han er frœcn oc mikill berserkr. er hann mælti við þidrec æptir þeira holmgongu. at þiðrecr konungr myndi vera yvir ollum monnum i verolldu at afli oc hvg. oc þar með var hans sverð betra kostum en flest vapn oc hialmr harðari en fyrr hæfði hann seð ænskiskonar stal. oc við hans bryniv feck hann ængi maka. Oc œrit er hans skiolldr stinnr. En sua goðr drengr oc mikill hœfðingi. hvi barðiztv a sua vandum hæsti. at hann feck æigi borit þik. oc æigi stoz hann æitt lag. Ec veit i. hæst herra. oc er nu. iij. uetra gamal oc ef þv kemr a hans bac þa skalltu legia þinv spioti oræddr hver sem þv villt. oc ec leg þer at veði mitt hœfuð at fyrr skal. racna þinn enn sterci armr oc inn digri en hans rygr skyli vikna. Nu suarar Þiðrecr a þessa lunð. Mattu fa mer hæst þenna er ec skal æigi meirr ræðazc of han i orrostu eða turniment. en sealfan mic. þa skal ec gera þic mestan mann oc mer næstan þa er fra er tekinn hilldibrandr meistari af ollum minum monnum. Oc af þessu orði reið heimir heim aptr til sins fœður studars. oc tecr af hans stoði. i. fola hann er blæikr at lit. iii. uetra gamall. meiri en ængi maðr sei fyrr hest. hann er vel ramr alaup hann heitir falka. oc með þeima hætti riðr hann heim til bernar. oc gefr Þiðreki konungi. oc þetta launar þiðrekr konungr honum vel mœrgu sinni. hana varði minnzt. oc hvilir i hia henni. en þar af getr hon einn svn sa heitir hogni. oc þo at hann syndiz maðr verit hava þa var hann þo alfr. hogni var mikill maðr oc sterer oc eigi mioc vænn. Sialfr konongrenn a við drotningv. iiij. svnv oc eina dottvr. oc heitir sv grimhildr. hinn elzti konongs svn heitir GvnnaR en annaR Gvthormr. þriði Gernoz fiorði Gisler. her segir fra Jrvngi konongi oc hans svnvm.

En þa er irvngr konongr fellr ifra. þa tecr GvnnaR svn hans hinn ellzti við rikino oc þvi verðr hann hallzi. þiðric konongr hevir sanna frett af gvnnari konionge oc senðir hanom orð at hann scal coma til hans veizlv oc þigia þar mikinn soma oc tign oc sva byðr hann hogna broeðr hans oc Gvthormi. Oc er sendimenn þiðrics konongs coma a fvnd Gvnnars konongs þa tecr hann með þocc oc vinattv boð þiðrics konongs oc lezc fara mvnv at visv oc sva hogni broðir hans en Gvthormr er heima firir því at hann er sivcr Nv feR GvnnaRr konongr til veizlvnnar með sina menn til bærnar. oc er hanom þar vel fagnað er nv veizlan albvin með allvm hinom beztvm fangvm er til þarf at hava oc ero nv saman settir allir hinir tignastv menn oc hinir beztv vinir. her nemnir kappa þiðrics konongs.

Allir sitia þessir a einn pall. Þiðricr konongr oc Gvnnarr konongr. hogni oc hildibrandr hornbogi iarl. A vinstri hond hanom sat Viðga oc Amlvngr. Þetleifr oc fasold. Sistram oc Vildiver. herbrandr hinn vitri oc hinn viðforli. heimir grimmi. oc þat mæla nv allir er þar varo at aldrigi sa tigvrlegri menn alla ne iamravsta comna i eina holl ne meiri afbvrðar menn firir sakar alrar atgœrvi en þar varo þa comnir.

Þiðricr konongr rœðir vm frœcnleic manna sinna.

Nv mælti þiðricr konongr. er hann ser a tvær hendr ser. Mikit ofrefli er her saman comit i eina holl af þessvm hinvm dyrvm drengivm hvat manna mvndi sa vera er sva diarfr mvndi vera at hann myndi etia sinv kappi her við. Oc her sitia a einvm palli. xiij. menn oc ef þeir coma i sin vapn oc a sina hesta. þa væntir mic at riða scvlv þeir mega ifriði vm alla verold sva at aldrigi mvnv fazc iamningiar þeirra oc aldrigi þeir er hava mvnv diarfleic til at visa mvnv einvm spiotz oddi moti þeim. Oc ef noccorir væri þeir menn er sva diarvir væri eða kapsamir oc ovitrir at eigi kynni at ræðaz vart hit micla afl oc aræði oc var hin hvassv sverð oc hina harðo hialma oc hina stinnv skialdv oc þær sterkv brynior oc þa hina skiotv hesta er iamvel drepa menn sem hit ovarga dyr. þa mvndo þeir dœma sec bratt til bana. herbrandr hinn vitri merkismaðr svarar þiðric konongi.

Herbrandr hinn vitri merkismaðr konongsens tecr til orða oc annsvarar konongenvm. hættv herra oc tala eigi þar vm lengr. firir þvi at varla vitv þer hvat þer mælit. þv ert eitt barn oc vist mælir þv af kappi oc af oviti er þv hygr engan þinn iamningia vera ne þinna manna. herbrandr segir þiðric konongi af bertangalandi.

Ec kann at segia þer af einv landi þvi er heitir bertangaland. þar ræðr firir sa konongr er heitir jsvngr. hann er þeirra manna sterkastr oc aprastr við at eiga er ver havum spvrt til. hann a. xi. svno oc ero þeir með sama hætti oc faðir þeirra. hann hevir einn merkis mann þann er heitir sigvrðr sveinn. hann er afrecs maðr sva mikill vm alla lvti at eigi mvn meiri finnaz með þeim manni er kempa scal vera. Alt hans harvnd er sva hart sem horn. oc fa ein vapn bita ahanom oc sva er hann stercr at skiott mvndi hann binda hvern varn er cœmi til vigs við hann oc tœki hann handom. hann hevir eigi verra sverð en þer havit konongr. þat sverð heitir gramr oc þann hest hevir hann er grani heitir. hann er broðir falka oc skemmings oc rispa oc miclv beztr af allvm þeim. Gramr er oc allra sverða bazt. vel kann þat at skeina hialina oc scioldo eða mannabein svndr at skera. oc her eptir ero oll hans annvr vapn. Oc þess væntir mic ef þv kœmr til vigs við þessa menn er nv hevi ec vm rœtt firir þer at aðr en þv komir heim segir þv þat til ef þat verðr heldr en eigi at þv comt aldrigi fyrr i iamstora mannravn sem her scaltv coma. oc þess scaltv mer samqvæði gialda ef þv kœmr oc sva hverr annarra þinna manna.