Bókastaðir

Fra Villdifer.

Villdifer en dramblati oc hin kappsami hans har er dœkt en andlit leost. oc langt oc vel vaxit. nockot bivgnætiaðr oc havclegr i avgum. har oc herðibreiðr oc vel vaxinn. fagra hond hævir han oc hvita oc digran arm oc stercan. hann er allra manna fimastr oc vel ærn. Atgervi maðr mikill iallzkonar leikum. hann er vitr oc raða maðr mikill. stilltr vel iskapi oc skavrunglyndr. oc diarfr ef hann skal firir raða oðrum monnum. en listvgr oc kurteis ef hann skal þiona oc nackuat vndir hyggiu maðr oc en harðasti iorrostum oc sigursæll. Villdifer hin frœkni markaðe sin uapn a þenna veg at a hans skilldi er skrifaðr æin golltr oc æinn biorn með dœkcrauðum lit. En gulan hævir hann lit a skilldi. oc um utan dœckravða rœnd. oc þuilikan lit hæuir hans oll herneskia. þat iartegnir hans bunaðr villdigolltr. Þat er a þyðesku villdifer firir því er han kallaðr sva at han er alldrigi með sinum frændum. oc æigi a sinni fostr jorðu. hællðr iafnan með utlenzkum hœfdingium. villdigolltr er allra dyra frocnastr oc verstr við at æiga þeim er veiðir. en biorn er firir því a hans uapnum. at þar með rosar han því at hann kallaðez. i. biorn þa er han lœysti vt sinn felaga Viðga. því hævir villdifer sundrlita hœrneskiu oc annan veg en aðrir kappar at han vill lata kenna sina ferð sua langt sem huerr ma sea.

Fra herbrandi enum viðfœrla.

182. Herbrandr en viðfœrli er iarpr a harslit oc brockinharr oc dœycklitaðr oc þo faul litaðr. skarpleitr oc liðr anefi. brunt skegg oc liðaz oc tuikvislot langt andlit oc æigi meoc breitt oc frecnott. augu snœr. oc æigi er hann ven oc æigi er hans andlit fagrt oc er þo harðlict oc grimlikt. mikill maðr vexti har oc velvaxin. oc stercr. oc allra manna kann hann bæzt a hesti. spekingr mikill. mælsku maðr fagr orðr. harðmælltr diarfr. vaskr forvitin glogþeckinn. minnigr osparr af sealfum ser i mannrœnum. herbrandr hævir skiolld oc alla herneskiu at rauðr er allr skiolldrin oc lagðr a skotœlldr með gulli sem logi. en skotælldr er a hans uapnum er harðara flygr oc siðr firir færsk en ængi litr annarra þann er ihærnaði se hafðr. þar til er iamnað iorrostu er herbranðr riðr at sva sem skotælldren flygr oc er alldregi kyrr. þa er hann skal til vapns hava. sva er oc herbranðr er alldrigi var kyrr oc naliga hævir han farið vm alla verolldina.

Fra Gvnnari konungi oc hans vapnum.

Gvnnarr konungr var leos har oc breiðleitr. leost skegg oc skamt herðibreiðr leoslitaðr oc haligr at ollum uexti syndum kurteiss stercr oc allgoðr riddari oc haucligr er han sat a sinum hæsti oc vel kann hann asinum hæsti við skiolld oc suerð oc skot. hann er areðiz maðr mikill frocn oc oforseall. grimr. glaðr oc millðr af fe. avðtryggr við vini sina. tallyðin goðr drengr. harðr við sina ovini. Gunnarr konungr hævir alla hœrnæskiv hvita sem silfr oc er amarkað hans skilldi orn æin oc korona a hofði. þat marc berr han a ollvm sinum vapnum. en firir þvi at han er konungr berr orn koronu a sinu hofði. En firir þvi hævir han sic sua markaðan. at avrn er kallaðr konungr allra fugla. oc hans vapn erv avðkend. oc scyrlit. sua kemr han oc alldrigi með morgum monnum at æigi ma skiott hann kenna af ollum sua er han kvrteis oc hœverskr.

Fra vapnabunaði hogna broðr.

Hœgni broðir hans hævir har suart oc sit oc nockorr sueipr i. langleitr nef mikill brvnsiðr dœkt skeg oc allr er hann dœkclitaðr harðligr andlit hævir han grimlikt. i. auga oc er þat helldr snarpt oc frœcnlekt. mikill vexti har oc digr a allan voxt. oc þa er hann kemr isin herclæði er hann huarttvegia sœmilegr oc þo ogvrlegr. oc han er allra manna sterkastr oc in bæzti riddari. oc æigi siðr er han holmgongu maðr oc su kempa. han er spacr maðr at viti forseamaðr mikill oc þyðr oc falatr. grimr oc kappsamr. got hiarta hævir han oc hugprutt. skiotr til allz er han vill gera þralyndr æinfalldr. harðuðigr oc oarmvitigr. Hogni hævir vapna marc með sama hætti oc Gvnnarr konungr broðir hans. hans skiolldr oc oll hærneskia er lagt meðr silfri oc avrn er i stendr hans vapnum. er steinðr rauðum steini. þetta marc silfri lagðr skiolldr ef hann er borin isolskin þa glitrar hann oc birtir sua at ængi fær igegn seð langa rið þætta bragð var vitrlikt. sem van var at honum. þat er nu aftekit i sœgum þyðeskra manna at ængi skal bera aholm silfrlagðan skiolld eða buklara. hans œrn var æigi koronaðr firir því at hann var æigi konungr.

Fra Sigurði svein.

Sigurðr suein hans har er brvnt oc fagrt oc liðaz ilocka stora. oc hans skeg er skamt oc þykt. oc með sama lit. hanefiaðr breitt andlit oc stor bein. oc hans avgu erv sua huoss. at fair menn munu vera sua diarfir at þori at lita undir hans bryn. hans hœrund er allt sua hart sem sigg villigaltar eða horn. at ænskiss konar vapn bita a. hans herðar eru sua miklar a at sea at sua er sem. iij. menn se a þyct. hans likami er allr skapaðr við sic a hæð oc digrleic þan veg sem bæzt ma sama oc þat er mark of hans hæð. þa er han hæuir gyrt sic sinu suerði gram of sic miðian er var. vij. spanna hatt. oc þa er han oð i rvgacr alskotin tecr niðr dœggskorin a acrin uppstandanda. oc þo er hans afl meira en voxtren. oc vel kann hann suerði at beita eða spioti at skiota eða leggia. eða skilldi hallda. eða boga spenna. eða hæsti at riða. oc margskonar kurteisi oc hœverskv er hann nam aunga alldri. hann er sua vitr maðr at suma luti veit han firir þa er eigi eru fram komnir. oc han kann oc skilr rœdd fugla. oc þar af koma honum fair lutir at ovorum. han er maldiarfr oc giarn raða við vini sina. malsniallr oc langtalaðr. oc æcki mal tecr han þat tala at han skiliz fyrr við en sua skal synazt þeim er hœyra sem a œngan veg mægi vera næma sua sem hann mælir. oc þat er hans scemtan at veita lið vinum sinum eða gengi eða rœyna sealfan sic a nackuara lund. istorvirkivm oc taka fe oc gersimar af sinum ovinum. oc geva sinum vinum. oc alldrigi skortir hann hug. En alldrigi varð han ræddr assinni ævi. Sigvrðr suein hævir markað sin skiolld aþann veg han er lagðr rauðu gulli oc askrifaðr æinn dreki dœckbrun et œfra. en fagr ravðr et næðra. oc a þann veg er markaðr hans hialm hœttr oc hans merci oc hans sœðull oc vapn rockr oc firir þvi er han sua markaðr at þægar er hann er senn. þa ma vita hverr þar riðr. oc sva er hann frægr er hann drap þann mikkla dreca. er veringiar kalla faðmi oc firir þvi ero oll hans vapn gullbrunat at hann er um framm alla menn at drambi oc kvrteisi. oc allri hœversku. naliga i ollum forn sœngum. þa er allir eru talðir enir sterkustu oc hinir frægustv. oc hinir milldastu kappar oc hofðingiar. oc hans nafn gengr i ollum tungum firir norðan girclandz haf. oc sua man vera mæðan verolld stendr.