Her nefnir kappa Þiðrex konungs.
Allir sitia þessir a æin pall þiðrecr konungr oc Gunnarr konungr. oc Hogni. oc Hilldibrandr. oc Hornbogi jarl. A vinstri hond honum sat Viðga oc Avmlungr. Þettleifr oc Fasolld. Sistram oc Villdifer. Herbrandr en vitri oc hin viðforle. Heimir grimmi. oc þat mæla nu allir er þar varu at alldrigi sa tigurlegri menn alla ne iamrausta komna i æina holl. ne meiri abburðar menn firir sacar allrar atgervi en þar uoru þa komnir.
Fra vapna bunaði þiðrex konungs.
Þiðrecr konungr hafði skiolld a þessa lund steindr rauðum steini oc amarkat með gulli leon oc hans hofuð horfir upp æptir skilldinum. oc fœtr taka sporðen. En siðan er þiðrecr uarð konungr yuir bern. toc hann þat mark sua at yuir hofði hans stoð korona af gulli. oc þvilikt mark hæuir han a merki sinu oc sœðli oc vapnroc. oc þar af ma han kenna huar sem hann riðr. oc hverr er skrifa vill hans liknæskiu þa geri han sua. En þetta mark hævir hann af þvi at sua sem leon er allra dyra mestr at virðingu. oc at hug. oc við hann eru oll dyr rædd er i verolldunni eru. Sva var oc þiðrecr konungr uræðin oc yvir maðr allra manna. En allir voru við hann ræddir. oc firir hans uapnum oc ænngi maðr skylldi sa haua leon a sinum skilldi at fornum sið er nockot sinn vill flyia.
Fra vapna bunaði hilldibrands.
Hilldibrandr enn gamli hæuir skiolld með sama lit oc þiðrecr konungr oc a skrifot borg með hvitum steini oc gylltir turnar. oc er su borg skrifuð æptir bern. En þat gegnir því at hilldibrandr hæuir þat marc a ollum sinum uapnum oc hann hæuir merki oc uapn rock allt með sama lit. oc þiðrecr konungr af því at alldrigi vill hann lœyna því at hann er þiðrecs konungs maðr. huar sem hann riðr. oc ænskiskonar navð oc uandræði vill hann sic með því firra at lœyna þeiRa vingan. vapna bunaðr heimis.
Heimir en mikillati hæfir oll uapn a þessa lund morkuð hann hæuir skiolld blan oc a markaðr hestr með bleikum lit. oc þat er skrifað a allri hans hærneskiu. oc merkir blar litr kallt briost. oc grimt hiarta. En sa hestr merkir iðn ætt manna hans oc þui at hann er enn bezti Riddari.
Vapna bunaðr Viðga ens sterca.
Vidga Velent son uar syndum a þessa lunð. hann hafði huit har sem gras þat er lilia heitir oc þyct oc liðaðiz allt i stora locka. oc sitt har hæuir hann. oc biart andlit oc allan likam hæuir hann hvitan sem sneo. hans augu uoru snor sua at uarla matti i gegn sea. ef hann uar reiðr. En ængi maðr ma han langleitan kalla ne breiðleitan firir þui at allt var við sic hans andlit. oc var þo mikit oc at ollu fagrt oc harðlikt. oc þa er han var reiðr uar hans andlit raut sem bloð oc grimlikt. han var allra manna þeira hæstr sem æigi uoru risar kallaðir hærðimikill bæði þyckr oc breiðr miðmeor. oc allra mana bæzt limaðr retuaxinn. oc at ollu uar hans uoxtr sua at allir sogðu at ængi maðr hæfði set kurteisara eða tigin mannlegra. han var lundaðr a þann veg. kyrrlatr oc hugat samr. oc er hann sat með felogum sinum. oc fatt var mana i hia þa var han glaðr oc malrœtin. en optazt famalugr i feolmenni. orðfœrr oc spacmalugr þa er han var a stefnum. hoguærr oc litillatr við vini sina. þa er hann kemr i her oc hann er með vapnum sinum þa var hann þægar sua grimligr at alldrigi var þat gort i ænskiss konar hernaði. er honum þœtti þa hormulekt. œrið var hann sterkr. oc mikill hugmaðr. oc at allri atgervi var han firir flestum monvm þeim er skapaðir haua verið. Viðga en sterki hafði alla herneskiu huita at lit. skiolld sauðul vapn rœck. merki hialmhavt a er markat hans skilldi með rauðum steini hamar oc tong. oc i þeim skilldi eru. iij. karbunkuli steinar. oc þetta mark er æptir æðli foður hans. hann er smiðr oc allra manna hagastr i uerolldunni. en gimsteinar iij merkia moður hans. a hans hialmhætti er skrifaðr ormr af rauðu gulli sa er slangi heitir. fullr af æitri. firir því berr hann þat mark yuir sinu hofði at ængi skyli i dyliaz at han ser hue mikit hans skap er. oc reiði þeim er firir uerðr oc moti vill bioðazc. a hans sœðli oc a hans vapnrock er sami ormr. oc a hans merci er sama mark oc a hans skilldi birti hans hærnæskiu markar þat at sem lengsta leið mætti hann kennðr vera huar sem hann riðr.