Bókastaðir

Vm vildiver oc isvng leicara.

Ganga þeir nv vt af borginni svsat baðir saman oc er þeir ero fra comnir aðrvm mannvm þa tecr vildiver skinn biarnarins oc lætr isvng sia oc spyrr ef þat megi þeim noccot til vela verða. Isvngr leikari hygr at skinninv oc snyr vm oc gefr gavm at alla vega hversv orðit er. oc segir at þat mæti þeim at liði verða ef vel vildi til segiaz. Nv mælir Isvngr at hann fari i belginn oc sva gerir hann at hann ferr i belginn ivir brynio sina vtan. Oc nv tecr isvngr ser nal oc þrað oc savmar sva fast at hans baki oc fotom með bragðom oc kvnnastv fær hann sva gort at vildiver syniz sva hverivm manni sem hann se einn biorn. oc sva lætr vildiver sem hann se biorn. Nv leggr isvngr helsi a hals hanom oc leiðir hann eftir ser. Oc fara þeir nv hvern dag fra aðrom til þess er þeir coma i vilcinaland. Oc nv er þeir attv scamt til borgar osantrix konongs þa mœta þeir manni. oc Isvngr spyrr hann tiðinda oc hvarr þeirra annan. Isvngr spyrr hvaðan hann hevir farit en hann kvezc farit hava or borginni fra osantrix konongs. Isvngr spyrr ef konongrenn se heima eða hverso fiolmennr hann er. maðrinn segir at hann er vist heima oc nv er fatt manna með hanom firir því at hann var scammv i herfor sem þv mvnt spvrt hava oc ero nv flestir hans riddarar heimfarnir til sinna hibyla þeir sem noccor eigv firir því at costnaðarsamt er at sitia langvm i kavpstað. isvngr spyrr hversv konongrenn lætr ivir sinvm sigri er hann feck i herforinni. hann segir at fatt hevir konongrenn sialfr þar vm en aðrir menn segia at hann hevir þar meira latit en vnnit firir vtan þat at hann feck einn kappa af þiðric af bern. oc mvndi hann eigi þann fengit hava ef eigi væri hertnið broðvr svn hans. isvngr spyrr nv ef hertnið frændi hans se heima i borginni. eða hvat sa kappi heti er hertekinn var. eða hvart hann var nv lifs eða eigi. hann segir at hertnið er nv eigi heima. hann hevir farit til kastala sinna oc bva. en viðga heitir sa maðr er hertekinn var. oc er hann i myrkvastofo oc i storom fiotrom oc ætla ec at hann biði þar sins enda dags. með margvm oc miclvm pinslvm. Isvngr segir at þat er eptir vanvm at hann vili varðveita hanom fastlega oc segir at konónginvm mvn eigi til snvðar at hann verði lavss oc biðr hann vel fara. oc hvarr þeirra annan oc skiliaz nv.

Isvngr leikari kœmr til osantrix konongs.

Þa gengr isvngr til borgarennar en þvi næst inn i borgina oc firir konong sialvan. Oc nv er þar kœmr hinn agezti havvð loddari þa er hanom þar vel fagnat. Nv spyrr osantrix konongr hvat þessi hinn frægi leikari kann þess at leika at hann er agætri en aðrir leikarar. Isvngr svarar þat væntir mic herra at fatt man þat leikit her i vilcina landi er ec man eigi kvnna betr en flestir aðrir ec kann qveða. ec cann sla harpv oc draga fiðlv oc gigiv oc allzkonar strengleica.

Isvngr leicr firir Osantrix konongi.

Harpv lætr konongrinn fa hanom. oc slær hann nv harpvna oc mælir sva konongrinn oc hverr annarra at aldrigi heyrðv þeir betr slegit oc sva sem hann slo harpvna þa leicr hans biorn oc hoppar þar eptir. oc nafn hevir isvngr gevit birni sinvm oc kallar hann vizleo. oc hverivm manni þyckir vndr oc fvrða hversv sa biorn kann vel at leika. oc kvrteislega eða hversv hann var vanðr. Oc isvngr skemtir konongi þat kveld vel oc kvrteislega oc hans biorn oc sva er hann vanðr at engan mann vill hann lata nær ser coma nema isvng einn. oc hvatvitna vill hann riva oc slita annat er nær hanom kœmr.

Osantrix konongr beiðizt leics af birninvm.

Konongrinn mælti. þessi biorn er vel vanðr. kann hann noccot at leika fleira en nv er sagt oc ver havum sett. þa svaraði isvngr. sva viða sem ec hevi farit vm heiminn. þa fann ec aldrigi meiri gersimi en biorn minn er oc alla leika oc iðrottir kann hann sva vel at svmir einir menn kvnnv iamvel.

Nv ferr isvngr at sova þa nott. en at morni annan dag þa biðr osantrix konongr at isvngr scal veita hanom noccora skemtan af birni sinvm. Isvngr sagði at varla matti hann þess synia hanom en allilt þycki mer sagði hann at veita yðr leic af birni minvm ef þer vilið ofmioc freista hans. konongrinn segir at hann vill freista a þessa leið fyrst at hann vill lata til veiði hvnda sina oc vita hversv frœcn biorninn mvn vera. þa svaraði isvngr. Illa mælir þv til mins biarnar konongr segir hann. firir þvi at ef ec missi biarnarins oc læzc hann þa vil ec þat eigi firir alt þat gvll oc silfr er þv att. þo at þv gevir mer. Oc ef sva verðr at þv tynir hvndom þinvm firir birni minvm þa manntv reiðr verða oc drepa biorn minn oc menn þinir en mer þyckir mestar vanir at biorn minn veri sic noccot oc geviz eigi þegar vp i fyrstv. konongrinn mælti. Eigi mattv þess synia mer til verð ec at lata hvndana biarnarins. en heita vil ec þer þvi at engi minna manna ne sialfr ec scal misþyrma birni þinvm. Nv verðr isvngr þessa heitzi er konongrinn bað. En bæði þann dag oc hit fyrra qvældit þa heyrþv þeir vm rœtt at viðga la þar i myrkva stofo i stercvm beivm oc stinnvm hals iarnvm.

Osantrix gengr til leics með hirð sinni.

En vm morgonin eptir þa gengr konongrinn vt or borginni oc allir hans menn. þeir sem til varo a einn fagran voll. oc þar með hanom vidolf mittvmstangan i stercvm iarnvm. firir því at hann matti aldrigin lavss verða nema i orrastvm. En þa þotti eigi væra hins mesta ofriðar van. aventroð risi broðir hans leiðir hann oc ero þeir vapnlavsir oc sva allir konongs menn. aðrir. oc nv fara þar vt or borginni conor oc karlar vngir menn oc gamlir oc hvert barn er i var borginni at sia þann leic oc skemtan er þar scyldi vera. Oc nv spyrr viðga idyflizvna at isvngr vin hans var cominn oc grvnar at hann mvn vilia leysa hann vt með noccorvm bragðom or myrkva stofonni með raðom þiðrics konongs eða annarra hans felaga.

Viðga brytr af ser iarnin oc vm liflat Osantrix konongs.

Nu brytr viðga af ser iarnin. En þeir leysa at birninvm. lx. storhvnda oc nv lavpa þeir allir at hanom i senn. En biorninn toc hinn mesta hvnd i eftre fœtr með sinvm fyrrvm fotom. oc drap þar með aðra xíj. hvndana þa er baztir varo. Nv verðr konongrenn reiðr er hvndar hans ero drepnir. oc leypr at birninvm oc brigðr sverði oc hœgr a ryggin ovan. En sverðit beit skinnit en i bryni-vnni nam staðar oc gengr i brot oc vill til sinna manna. En vildiver þrifr sverð sitt oc brigðr or hendi isvngi leikara oc leypr eftir kononginvm oc hœgr af hanom havuð. leypr siðan at aventroð risa oc veitir hanom bana. En þvi næst gengr hann at vidolve mittvmstangan oc veitir hanom bana. oc lycr nv sva osantrix konongr sinni ævi oc með hanom tveir risar hans þeir er hann þottiz hava mikit travst af meðan þeir lifðv allir saman. Oc nv leypr ser hverr konongs manna. er firir ero staddir vapnlavsir. oc verða allir rygvir oc felms fvllir við fall konongsens oc ætla allir at fiandinn sialfr se lavpinn i þann biorn firir því at þeim þotti með ofmikilli œði vera hans athævi oc verðr þeim flestvm fatt firir.

Nv ræðir vm vildiver oc þa alla felaga.

Vildiver leypr nv vp i borgina oc kallar oc spyrr hvar er hans hinn goði vin viðga. En viðga hevir nv brotit dyflizvna oc lavpa þeir nv baðir saman vm staðinn oc drapv þar. xvi. menn. Oc nv skortir þar eigi goð vapn oc goða hesta oc þar kennir viðga hest sinn skeming oc oll vapn sin firir vtan sverð sitt mimvng hann finnr hann eigi oc þyckir hanom þat all illa. Nv rifr vildiver af ser biarnarins belg oc lætr nv sia sic hverr hann er oc sia nv borgarmenn at hann er maðr en eigi troll sem þeir hvgðv oc finna þeir nv at með storom svikvm er aftac þeirra hofðingia orðit. oc ætlaz nv at hefna hans oc na svmir vapnvm.

Viðga er nv lavss.

A hesta lavpa þeir nv viðga oc vildiver oc isvngr leikari meðr þeim oc vilia nv þar enskis avarkostar biða lengr. oc þyckiazt þo nv vel hava arnat sem var. oc hava aðr tekit gvll oc silfr oc goðar gersimar slicar sem þeir mattv með fara. oc riða nv vt af borginni oc nv riða þeir alt vtan bygða sem þeir mego því við coma þar til er þeir coma i hvnaland til atila konongs.

Konongrinn fagnar viðga all vel oc þeim felagvm oc lætr sem hann havi viðga or heliv heimtan oc spyrr hversv hann varð lavss fra osantrix konongs. en viðga segir konunge allan voxt aferð þeirra oc davða osantrix konongs. þa mælti atila konongr vist er þat satt at þv ert goðr hofðingi þiðricr konongr oc mikill reystimaðr enda hevir þv miclar manngersimar meðr þer. er sva vill hverr felagi legia sitt lif við annars þvrft. oc við þina sœmð oc iam vel leysa or slicvm sva vanda sem nv vartv goðr vinr i stadr oc vist er þetta með goðom lvtvm gialdandi. sva er oc af minni hendi vel þetta verc yðr lavnandi. firir því at þer havet mer frið keypt ef ec kann nv sialfr til at gæta. Nv er þat salt at litit lagðiz firir þec osantrix konongr. oc vist væri þer sœmilegra at hava tekit sættir oc mvndi þer engi ovegr eða sviviring at occarrri magsemð vera ef hann vildi friðgiarnari verið hava. en nv gerðir þv ocr baðom mikil ohœgendi. oc mikinn scaða þinni oro. Oc væri þer betra oc baðvm ocr fyrr sett hava.