Bókastaðir

Orrosta Osantrix konongs oc þiðrics konongs.

Konongrinn osantrix hevir nv saman samnat miklv liði vm alt sitt riki oc er nv cominn til motz við þa oflyiandi herr. oc riða nv saman oc verðr þar nv mikil orrosta oc mannskœð. Nv riðr fram hvgmannlega hærbrandr merkis maðr þiðrics konongs oc hœgr atvær hendr bæði menn oc hesta oc kastar hverivm davðvm ovan a annan. En eftir hanom riðr sialfr þiðricr konongr oc hans kappar oc beriaz af miclv drambi oc reyna sverð sin i harðom hialmvm oc stinnvm skioldom. oc sterkvm bryniom. oc engi þeirra felaga livizt við aðrvm at dvga oc at fylgia. oc engi fylking stendr við þeim þar sem þeir coma at farandi. þeir riða imiðian her vilcina manna oc fella menn abaðar hendr ser.

Viddolfr lystr viðga af hesti.

A moti þeim kœmr vidolf mittvm stangan oc lystr með sinni iarnstong til viðga því at hann var þeirra allra framarst oc lystr a hialm hans sva at þegar fell hann til iarðar af hesti sinvm. oc sva þavt at hans þvnvangvm at mioc sva vissi hann ecki til sin. En þar var nær staddr heimir oc fær þegar sverð hans mimvng er hann var fallinn. oc leitar þegar brot með. Nv ganga vilcinamenn fram ravstlega oc beriaz þeir nv snarplega oc verðr nv mikit mannfall. þiðricr konongr eggiar menn sina til framgango.

Þidricr konongr eggiar nv alla sina menn til framgango oc segir at hann vill eigi at þeir beriz af scarti sva miclv oc mælir nv at engi scal livazt við lengr oc biðr nv at þeir lati vilcina menn sia hvat hans kappar mego. oc latvm þa sia handaferðir varar. Nv verða þeir halvv oðari en aðr oc stendr nv ecki viðr þeim. Nv ser osantrix konongr at þar er enskis at biða nema illz eins oc flyr hann nv vndan oc allir hans menn oc hevir aðr latit fimhvndrað riddara. en atila konongr þriv hvndrað riddara oc recr hann nv flottann.

Nv er viðga hertekinn.

Í þvi bili com farandi hertnið broðvr svn osantrix konongs með sina fylking oc sia þeir nv hvar viðga ligr oc kenna þegar vapn hans oc sialvan hann at sion oc at sogn. oc taka hann oc binda oc hava með ser. Nv ser hertnið at engi er annarr til en vndan at halda. meðr því at osantrix konongr frændi hans er flyðr oc allr herrinn. oc flyr nv vndan sem allir aðrir. nv fara vilcina menn osigr i þetta sinni. oc skiliaz nv at sva bvnv. oc fara hvarirtveggiv nv heim til sins rikis. Osantrix konongr lætr coma viðga idyflizv.

Heimferð atila konongs oc þiðrics konongs.

Atila konongr oc þiðricr konongr riða nv heim i svsat sem havvð staðr var þa atila konongs. oc dveliaz þar vm nott en vm morgoninn eftir þa riðr þiðricr konongr svðr til bernar. Oc hevir hann latið. lx. manna vm fram viðga en siðr vildi hann missa hans eins en allra þeirra annarra. Vildiver gengr firir þiðric konong oc biðr hann leyva ser eftir at dveliaz noccora stvnd. þiðricr konongr spyrr hann hvi þat sætir. En vildiver segir at aldrigi vill hann fyrr heim coma til bernar en hann veit hvart viðga felagi hans er lifs eða andaðr. Þiðric konongr lovar hanom þat oc er hann nv eptir með atila konongi. en þiðricr konongr riðr nv heim til bernar.

Atila konongr ferr a scog a dyra veiðar.

Fam dagvm siðarr ferr atila konongr i einn scog er heitir lyravald at veiða dyr oc fvgla með havca oc hvnda oc með han-om vildiver. oc mart annarra manna oc riddara. oc er a liðr daginn þa ferr atila konongr heim með sina menn. Nv er vildiver einn eptir orðinn i scoginvm með micla. ij. veiðihvnda hann finnr einn scogar biorn þat var allra dyra mest. nv fær hann þann biorn veiddan oc flær af hanom belg en siðan ferr hann heim oc for leynilega með scinni biarnarins. oc hirðir þar sem hann veit einn saman.

Þat er eitt sinn er isvngr havuðloddari kœmr til atila konongs svnnan af bern fra þiðrics konongs. hann hevir gœrvan hann a niosn at vita ef viðga væri lifs firir þvi at hvervitna megv leikarar fara ifriði millim hofðingia þar sem eigi comaz aðrir menn. firir mistrvnaðar sakar. Atila konongr fagnar hanom vel oc fellr hann þar i sið með aðrom mannvm. oc skemtir vm þat kveld alt.

Vildiver talar við isvng leikara.

246. Vildiver talar við isvng leikara oc segir hanom sina ætlan alla at hann vill aldrigi fyrr coma aftr til bernar en hann hittir viðga annat hvart lifs eða davðan. en ec vil at þer hattið sva með velvm yðrvm oc bragðom at ec coma ihirð osantrix konongs. sva at engi maðr kendi mic ef þv vilt sva sem ec vil. Isvngr lezc þess albvinn eigi seinna en vm morgoninn eptir oc biðr hann sva við bvaz oc þegar er dagr kœmr vm morgoninn eptir. þa gengr vildiver firir atila konong oc segir at hann vill fara litla stvnd i ætthaga sinn heim i amlvngaland oc aptr til hans siðan. Atila konongr biðr hann raða oc spyrr ef hann vili hava hans riddara með ser oc riða eigi einn saman. vildiver segir sva at isvngr havvð loddari ferr með hanom oc eigi vill hann fleiri menn hava firir þvi at ivir friðar lond er at fara sitia oc vinir firir oc frændr er fram kœmr. konongrinn atila gefr þeim orlof.