Vm andlat þetmars konongs oc þiðric tecr konongdom.
Þetmarrr konongr tecr nv sott oc þvinæst bana oc let hann nv lif sitt með fvllvm veg sinvm. oc toc nv rikit þiðricr svn hans oc er hann nv konongr ibern oc er hinn mesti hofðinngi sem kvnnict er viða vm heiminn. oc hans namn man vppi vera oc eigi verða tapað nalega vm alt svðrriki meðan verolden stendr.
Nv kœmr Vildever til bærnar.
Nv er þat einn dag er þiðricr konongr sitr i sinv hasæti oc með hanom hans kappar. Nv kœmr þar inn gangandi einn maðr hann er mikill vexti oc sterclegr eigi er hann vel bvinn at clæðvm ne at vapnvm. hann hevir einn siðan hott oc eigi megv þeir sia vandlega hans andlit. Sia maðr gengr firir konong oc kvaddi hann kvrteislega oc vel. konongrenn fagnar hanom vel þo at hann se vtlennzcr maðr firir þvi at hann var litillatr oc kvrteiss. Nv spyrr þiðricr konongr hvat manna hann er. hann svarar. Ec heiti Vildiver ætt min er i amlvngalandi. en firir þvi em ec hingat kominn at ec vil yðr mina þionastv bioða með yðr at riða oc yðar maðr at gerazt ef þer vilit þeckiazt.
Þa svaraði þidricr konongr. þo attv ser okvnnigr þa vil ec þiggia þina þionastv ef þv villt vel þiona. oc vilia þessir hinir goðo drengir taca þec ilagvneyti viðr sec. er með mer erv. her firir. þa svaraði viðga. engi mvn a moti hanom mæla herra ef þer vilið við hanom taka. enda er betra goðan dreng at taka i samneyti við sec en at visa fra ser. konongrenn tecr vel við þeima manni oc er hanom til sess visat. hann gengr fyrr at taka ser handlavg en hann gangi til borðz. oc er strycr vp ermina af vlflíða ser þa ser viðga at hann hevir digran gvllring vm sinn armlegg. oc firir því þyckiz hann vita at þessi maðr mvn vera goðrar ættar þo at hann lati litið yfir ser.. Nv fær þiðricr hanom goð klæði oc goðan hest oc vapn oc syniz nv vildiver manna friðaztr oc kvrteisaztr oc þyðiz hann fyrst konónginn sialvan oc þar næst alla hina beztv menn. Oc þeir Viðga oc vildiver geraz goðir felagar. sva at hvargi ma annan an. er oc konongrinn fyrst vel við hann oc allir aðrir siðan.
Þiðricr sendir eptir herbrandi.
Þidricr konongr spyrr nv til eins manz gafvgs sa heitir herbrandr hann er allra manna þeirra viðforlaztr er hann hevir frettir til. oc nalega hevir hann verit með allvm hinvm gofgastvm hofðingiom er firir norðan haf ero oc viða i girklandi hafði hann verit oc hann veit hvers þeiRa siðv hann kann nalega allar tvngvr er mæla ma oc hann er hinn mesti reystimaðr. þessvm manni sendir þiðricr orð at hann comi a hans fvnd oc sva kœmr hann til konongs hirðar oc er þar vel við hanom tekit oc geriz herbrandr riddari þiðrics konongs. oc því næst er hann raðgiavi hans firir því at hann er vitr maðr oc vel siðaðr vm alla lvti. oc hann bar merki þiðrics konongs oc for hanom þat vel oc kvrteislega.
Nv er annat sinni viðrscipti þeiRra osantrix konongs oc atila konongs.
A þessari stvndv allri hevir verit mikill ofriðr milli atila konongs i hvna landi oc osantrix konongs i vilcinalandi oc hava imsir sigr oc imsir osigr. Atila konongr hevir styrcnat mikit oc aflat ser viða vinattv af agætvm hofðingiom. oc rikis mannvm. var hann oc þocca sæll isinv riki við alt lanzfolkit vildv þar allir liva oc deyia sem hann var. en hann matti sialfvm ser eigi meira lið vinna af allv lanz folkino firir því at engi mvndi skipti a vilia gera hofðingiom innan lanz meðan hann var hœgr allvm þeim er hann scyldi stiorna. firir því at illt þyckir flestvm vndir ofmiclv ofrelsi at bva.
Osantrix konongr hafði fengit annat scaplyndi er hann leið vp a aldr en þa hafði hann er hann var yngri gerðiz hann sva harðr ivir boði at lyðrinn sa er i var landino fec varla borit þetta hit þvnga oc er hann lagði a hals hverivm manni. treystiz hann viðlendi sino oc fiolmenni oc var æ þvi grimmari a hendr þegnvm sinvm innan laniz til fear er meira var hanom fœrt. hafði hann oc hvern at fe kavpvm ser rikan oc orikan iamvel sialfs sins hirð sem bondann eða kavpmenn vt ifra. Sva oc þo at hann fengi sinvm riddarvm len til sinna mala at hava at þo vildi hann sialfr vera syslv maðrenn at hann hefði þa ivir setta fœrðv þeir aldrigi hanvm sva mikit at hann fryði eigi æ iam mioc kom oc aldrigi sva mikit i hans garð fe eða vistir at ei var æ sem i svelg bæri oc æ var þar svltr oc seyra. varo a hveriom tolf manaðom vtboð mikil oc stor sem þat þotti allvm at vanvm meðr því at hann atti iamnan við mikinn ofrið at skipta þar sem atila konongr var. firir því at hann lagðiz mioc arikit firir hanom oc hvarr þeirra firir aðrvm en hitt þotti allvm vm fram þat sem vera matti oc hovino gegndi at þegar er ofriðrinn geck af hanom hinn mesti at hann lagði þegar gioldin oc avarkostina a alt folkit er i var landino. oc hann naði kyrrrsætino dro hann oc eignir annarra manna vndir sec oc frændr sina firir því at allir varo þeir a eina boc lærðir til frekvnnar. var oc þat eitt ro hans þegnvm er hann var i hernaði or landino brottv væntv oc allir at hann scyldi noccot sinni sva or rikinv fara i herforena at hann skyldi aldrigi aftr coma. fegnir væri þeir allir dvolenni en allir ottadvz heimqvamvna hans. Osantrix konongr hafði nv iamnan með ser tva risana. vidolf mittvmstanga oc aventroð broðor hans. En einn risann broðvr þeirra þann er atgeirr het þann hafði hann brot sendan firir vinattv sakar til isvngs konongs i bertanga land. En isvngr konongr setti atgeir risa við landa mæri i einn mikinn skog lannz at gæta oc ottaðiz isvngr konongr ecki þaðan a riki sitt sem risinn gætti.
Atila konongr senðir þiðric kononge orð til liðs.
Vm Atila konong er nv at ræða hann vildi giarna sættaz við osantrix konong ef hann reði oc marga menn gerir hann afvnd hans at vita af hanom hvart hann vill sættaz eða eigi. en hann firir qveðr þat. Oc þa er konongr verðr viss at með engo moti vill hann sættaz við hann þa sendir hann bref sin oc innsigli til þiðrics konongs i bærn at hann scal coma til hans i hvnaland ef hann vill hanom lið veita með alla sina hina beztv drengi firir þvi at hann vill nv heria i vilcinaland. a hendr osantrix konunge. Biðr nv at hann scal eigi þetta vndir havvð leggiaz inavðsyn hans eftir þvi sem hvar þeirra hevir aðrvm vinattv heitið. Oc nv vill þiðricr konongr fara meðr þvi at hann ser at vinr hans þarf liðveizlv hans. þiðricr konongr riðr vt af bern.
Hann riðr vt af bærn með fim hvndrað riddara alla yrit reynda at ravstleic oc með hanom hans kappar allir vm fram. Oc þa er þeir coma i hvnaland þa verðr atila konongr feginn qvamv þeirra oc fagnar þeim vel oc er hann nv albvinn með hanom at riða i vilcina land. Nv riða þeir með herinn allan ivilcinaland. oc er þeir coma þar. þa ræna þeir menn oc marga drepa þeir oc svmir flyia vndan. Nv brenna þeir storar borgir oc fagrar oc morg þorp oc stora bœa oc taca þeir nv mikit herfang bæði menn oc gvll oc silfr.