Bókastaðir

Oc standa nv þessir þrir drengir allir saman a einom velli.

Nv mælir maðr imvnni drekanvm.

Maðrinn mælir til þeirra. Vel ætta ec yer þetta at lavna sva vel sem þit havet mec nv leystan fra þeima hinom illa fianda. en ein er bœn sv er ec vilda biðia ycr oc geta ef kostr væri at ec vilda fa mitt sverð af ycr at ycrvm vilia þat er fasold toc or mvnni drekans. þiðricr mælir við manninn.

Nv mælir þiðricr til hans. hvat manna ertv goðr drengr eða hverrar ættar eða hvar ertv fœðingi. eða hvert villtv fara. hann svarar. oc segir hanom. Ec heiti Sistram enn minn faðir heitir Reginbaldr hann er iarl i fenedi oc þar var ec fœddr. en ec vilda fara a fvnd hildibranz frænda mins oc hans fostra þiðrics af bern. oc nv hevi ec riðit. xi. daga oc nætr oc allitit hevi ec dvalz oc varð ec moðr aðan. oc sva hestr minn oc lagðomc ec her niðr oc sofnaða oc þa toc mic sia hinn illi dreki. Nv svarar þiðricr hanom.

Þiðricr kennir sistram oc byðr með ser.

Vel cominn goðr drengr fa scaltv þitt sverð oc alt þat er þv beiðiz af oss þvi at þer hevir nv vel til borit þv hevir nv fvnnit þiðric af bærn oc scaltv nv fara heim með oss. oc vera þar igoðom fagnaði.

Nv ganga þeir iscoginn oc finna vano braðari sciold hans. oc leita þeir hest hans. ij. daga. oc finna eigi. oc ferr nv ser hverr þeirra.

Nv leita þeir hestz sistram.

Þiðric kœmr nv or scoginvm. þar stendr ein borg hon heitir aldinflis. þa borg a einn greivi er heitir loðvigr. Oc þar finnr hann hestinn með sœðli oc hava fvnnit greivans menn oc fœrt hanom. Nv biðr þiðricr fa ser hestinn. oc segir hverr a. en greivinn lætr þess enga van at hestrinn faezt. þa svarar þiðricr. kann vera ef þv vill nv eigi lata hestinn at þv latir þo siðarr meirr oc þar með. x. aðra eða fleiri ef sva kann at berazt. Oc þar með mattv tyna livi þino oc riki. Nv grvnar iarlinn hvi þessi maðr mælir sva diarflega oc mikilmannlega oc þat þyckiz hann sia a vapnvm hans oc a bvnaðe at hann er ein kenpa ef hann er eigi tignari maðr. oc mikill þyckir hanom hann vera ivir syndom oc stormannlegr. þa melir iarlinn. Ec vil firir vinatto sacar geva þer hestinn ec se at þv mvnt vera dvgandi maðr er þv ert sva diarfr i okvnnvm stað oc tecr einn mikinn gvllring oc gefr hanom. Siðan mælir jarlinn við hann. hvart ertv þiðricr af bern eða eigi. eða ertv einn hverr hans iamningi. þa mælti þiðricr. Eigi vil ec leyna namni minv ec em þiðricr svnr þetmars konongs af bærn oc havet þocc firir velgerning yðra oc livið heilir. nv mælir iarlinn at hann scal vel fara. Þa riðr þiðricr abravt til þess er hann finnr sina lags menn. oc leypr nv Sistram a hest sinn oc hverr þeirra a sinn hest oc riða nv allir saman oc letta eigi fyrr en þeir coma heim til bærnar. oc er þar tekit við þiðric vel oc hans felagom sem von var at.

Nv er þiðricr heim cominn til bernar.

Nv sitr þiðricr isino hasæti hia sinom feðr þetmari konge oc hans felagar með hanom oc iamningiar. Heimir þionaði oc skencti þeim þann dag. Nv bœtir heimir i gullscal eina oc stendr firir þiðriki oc þionar vel. Nv brigðr þiðricr sverði sino naglring oc synir lagsmannom sinvm oc mælti siðan. þv hinn goði naglring. nv comtv i mikla ravn at sinni er ec var ibrottv or bern. oc eigi ætla ec fazt betra sverð en þec. Se her heimir firir þina þionastv eigi ann ec aðrom manni betr at niota þessa sverðz en þer. þigg nv vinr goðr oc niot vel. Nv tecr heimir við naglring oc þackar herra sinvm vel giofna þar var mikill fioldi annarra manna oc þacca allir herra þiðric sina velgerð er hann birti við heimi.

Nv birtiz ovinatta viðga við heimi.

Nv tecr viðga til orða. Vist ertv naglring illa cominn því at heldr væri hann dvganda manz vapn en þess er nv hevir. Oc siðan er ec com til bernar. þa virda ec þec eigi meira til gengis oc fylgðar en eina cono siðan er ec sa þic þat niðings verc gera þa er ec var navðstaddr þa er við riðom tveir til hinna. v. alravstra hermanna oc bavttv mic fram en þv sazt a hesti þinvm vel við bvinn oc vildir eigi dvga mer ne nær coma. En iarlinn hornbogi oc hildibrandr matto eigi við coma at dvga mer þvi at þeir leyptv vt a ana en siðan er iarlinn com til farandi þa þyrfta ec þin allz ecki. nærgi sem ec fæ þer þat goldet. herra þiðricr mælir við heimi.

Þa svaraði þiðricr. heyr þar micla scom oc niðings verc at vilia eigi dvga faronavt sinom er hann var navðolega staðr. þv hinn illi hvndr sagði hann. dragstv ibravt or avgsion minni oc væri þat þo maclegra at þenna dag hengir þv vppi firir bærn. Nv verðr heimir mioc reiðr við þessa ræðo. Gengr nv i brot oc tecr hest sinn rispa oc oll sin vapn riðr nv i brot.

Heimir ferr a brot or bærn.

109. Heimir vændir nv norðr vm fiall oc riðr nv marga daga okvnnar bravtir oc eigi veit hann nv vist hvat hann ma til frama vinna þess er hann þycki iamfrægr sem aðr. hann spyrr nv til mannz eins þess er heitir Ingram. sa er vikingr mikill oc hermaðr oc liggr vti a scogom oc þar heviz hann optazt við sem heitir falstr scogr. oc með hanom aðrir. x. hans felagar. falstr scogr er imilli saxlannz oc danmarkar. Ingram er i osætti við hertoga einn i saxlandi hanom gerer hann þat alt ilt er hann ma. oc engan mann lætr hann fara at frialsv vm þann scog styrcr er hann oc mikil firir ser oc einn kappi er hann oc vel ma hann einn bera af. xii. mannvm. heimir gerir þat rað firir ser at leita til þessa Ingrams oc eigi lettir hann fyrr en hann finnr hann oc þa felaga. Nv byðr hann sec til samlags við þa oc þvi taka þeir vel nv er hann hinn xij. i þeirra sveit. liggia þeir nv vti oc a þeim scogi oc gera mart illt.

Vm viðrattv kavpmanna oc ransmanna.

Petta er fra sagt at kavpmenn noccorer hava bviz af saxlandi til danmarkar. þeir hava með ser mikinn fearlvt eigi ero þeir færi saman en. lx. manna. allir vel vapnaðir. oc þat ætla þeir at eigi scvlv allfair menn banna þeim veg sinn ne ræna þa fe sino. Goða hesta hava þeir oc storar gœrsimar a. Nv fara þeir þar til er þeir coma a scoginn falstr. Oc þa er sacmenn verða varir við þessa menn. þa mæla þeir sin a milli. þo at þeir se margir oc vel viðbvnir. þa mvno þeir er ofreflis menn callaz oft við mikit ofrefli hava att at scipta ef þeir vilia ser fear afla. En nv þo at þeir se margir saman þa farom i mot þeim oc dvgi hverr sem drengr er. Nv vapnaz þeir oc fara siðan igegn þeim. En þa er cavpmenn sia sina ovini firir ser. þa verða þeir vel við. lavpa af hestvm sinvm oc brigða sverðom oc snva fram spiotz oddom sinvm. meðr þvi at eigi ero scildir til at lifa ser með. þar verðr nv horð orrosta oc mannscœð oc eigi long aðr en sa verðr scilnaðr þeirra at ingram oc hans felagar hava sigr oc halda sinvm mannvm allom. en eigi sciliaz þeir fyrr en allir þeir. lx. manna ero fallnir. Taca þeir nv fe þeirra oc vapn oc hesta. oc þyckiazt nv hava vel arnat. oc ero catir oc þyckiaz nv meiri menn firir ser en aðr oc frægri. Oc þat ætla þeir firir ser at eigi mvno þeir til moz coma viðr þa er þeim mvn meira ofrefli i vera ivir at stiga en þessir varo þeim. Oc kallaz þeir nv mikil vandræði hava af hendi leyst. oc heimir telr sec nv ravstari mann en aðr var hann oc þar dveliaz þeir langar riðir.