Bókastaðir

Konongrinn þetmarrr er nv i bærn heima oc þiðricr með hanom oc heviz nv meðalage af sarom. En þessir riddarar ero með kononge. iiij. Einn er hildibrandr. annarr er Viðga. þriði hornbogi iarl. fiorði er heimir. Nv er þiðricr orðinn heill sara sinna. oc þat er einn dag er hann riðr vt af bærn einn saman. oc engi veit hvert hann ferr nema viðga hanom segir hann ætlan sina. hann hevir nv farit osigr en hvat firir þvi þo vill hann eigi tyna lofi sino oc vill hann eigi koma fyrr til bærnar en hann se iamfrægr sem aðr var hann. Nv riðr hann nætr oc daga kvæld oc morna sva sem hann ma mest a. vij. nattom. hann riðr storar bygðir oc obygðir oc okvnnar leiðir þar til er hann com at scoge einom er heitir osning oc toc þar gisting vm kvældit við skoginn. her rœðir vm farlengð þiðrics.

Þar spyrr hann þav tiðendi at aðro megin skogsens stendr ein borg er heitir drecannflis. þa borg atti konongr sa er drvsian het. en hann var þa davðr en kono atti hann eptir oc. ix. dœtr oc drotning hevir fest ser mann þann er heitir ecca. engi riddari ma við hann iamnazt iallvm þeim landom er hann er barnfœddr a. hans broðir heitir fasold. hann var sva styrcr oc stollz at þess hefir hann strængt heit at hann hittir engan mann sva mikinn firir ser at hann scal gefa meira en eitt slag þa er hann skal beriaz oc engan hevir hann þann fvndit er hanom have staðizt meira en eitt slag hvargi sem hann hevir til einvigis komit. En þat er iðrn ecka at hann ferr iþann scog at veiða dyr með alvæpni. oc ef hann finnr noccorn þann mann er við hann vill iamnazt þa vill hann hveriom þeim firir coma. Nv veit hann eigi hverso hann scal comaz vm þann scog firir sakar ecka. firir því at hann vill eigi hava fvnd hans at sinni ef hann ma raða firir því at i aðrom stað vill hann sin fyrri freista en við ecca. firir því at hann þyckiz enn kenna sara þeirra er viðga veitti hanom. oc vill hann fyrr við minna mann freista sin en ecca er.

Nv riðr þiðricr a bravt at miðri nott sem myrkast var oc ætlar nv at riða sva vm scoginn at ecca verði eigi varr við hann. nv villiz hann i scoginom oc veit eigi hvar hann ferr.

Her finnaz þeir Ecca oc Þiðricr af bærn.

Aðr en þiðricr yrði varr við þa com þar Ecca oc kallaði ahann. oc spyrr eftir hvat þar ferr er sva stolzlega riðr. þa mælti þiðricr her riðr sa maðr er heimir heitir svnr stvdars. en ec rið minna skyldra erenda heim i bertangaland til faðor mins. oc a ec engi scyld erendi viðr þec oc eigi vil ec finna þec. þa mælti Ecca. Sva ma vera sem þv segir at þv ser heimir en þin ravdd væri vænni til at þv værir þiðricr sialfr svnr þetmars konongs. en ef þv ert sva dvgandi maðr sem sagt er fra. þa mvntv eigi vilia leyna namni þino firir einom manni. Nv svaraði þiðricr. Þo spyrr þv nams mins sva kapsamlega þa scal eigi lengr leyna þvi firir þer. Ec em þiðricr svnr þetmars konongs af bærn sem þv gazt oc a ec ecki erenði viðr þec oc vil ec riða leið mina firir þa soc. þa svaraði ecka. Ef sva er sem mer er sagt at þv haver farit osigr firir einom danskom manni eigi allz firir langri stvndo. þa hevir þer her nv væl til borezt at her mattv fa sva micla sœmð sem aðr fectv osœmð. þv spellaðir goð vapn i ycrom viðrsciptum. her fær þv annor eigi verri ospellað ef þv tecr af mer min vapn oc fellir mec til iarðar. Nv mælti þiðricr. byðr þv mer einvigi en ec hevi ecki til þess heiman bvizt. eða hvat mvndo við nv beriaz er hvargi occarr ma annan sia. en ef dagr væri lioss þa mætta ec varla þess synia þer er þv biðr þo at ec sia eigi iamvel við bvinn sem þv ert. Oc hevi ec otravðr verit til einvigis þa er ec hefi minnr beðinn verit en nv. oc er þat margom mannom kvnnict ivaro landi þo at her se farœtt vm. en at sva bvno þa vil ec eigi viðr þec beriaz.

Þa mælti ecca. Niv konongs dœtr oc þeirra moðir er min festar cona. en þær bivggo mic til þessa vigs oc firir þeirra soc com ec her oc þær fengo mer þessor vapn.

Ecca segir fra vapnvm sinvm.

Minn hialmr er allr gvllroðinn oc min brynia er oll gvlli bvin. oc a einn skiold com aldrigi meira ravtt gvll eða betri steinar en a þenna. Ec hevi enn engan hest en þv riðr oc mattv firir því flyia occarn fvnd. en þat er drengs verc at biða heldr eins mannz. osynio let ec hest minn heima eftir. væri hann nv her þa scyldir þv nv beriaz við mic hvart er þv vildir eða eigi. Oc enn mælir ecca. bið min þiðricr goðr drengr ec hevi her eitt sverð er ec kann þer af at segia.

Ecca segir fra sverði sinv ecci saxi.

Þat sverð slo hinn sami dvergr alfricr er þitt sverð slo naglring. hann gerði þat neðarla i iorðo aðr en fvllgort væri. hann leitaði oc vm. ix. konongs riki aðr en hann fynni þat vatn er hann fengi hert þat i. oc eigi fann hann þat aðr en hann com þar sem a ein var sv er treya heitir. þar var hann herðr i. hiolt hans oc meðalcafli er hvartveggia af ravðo gvlli slegit oc steypt. oc eftra hialtit er scygt sem gler. Oc oll vmgerð fra hioltom oc til odz er með ravðo gvlli lagð. oc fetlar allir ero gvlli lagðir oc goðom sylgiom bvnir. oc sprotom oc dyrom steinom settir. Brandr er vel scygðr oc gvlli merctr ef þv setr odd hans niðr a iorð þa syniz sem ormr renni fra oddinom oc vpp til hialtana litr sem gvll. En ef þv heldr hanom vpp þa syniz sem sa hinn sami ormr renni vndan hialtanom oc vpp a oddinn þat bragðar alt sem qvict se. sa ormr. hans eggiar ero sva hvassar at fatt stal vænti ec at þvi standiz. þat sverð heitir ecki sax. þvi heitir þat sva at ecki sax ne sverð var iam gott borit or eldi þo at leiti vm alla veröld. en ef hans iamningi finnz þa man allviða aðr coma. En þat sverð var stolit oc leynt lengi en þat gerði alfricr dvergr hinn micli stelari. hann com i þat berg er faðir hans atti leynilega. oc stal hann þvi fra feðr sinom oc gaf hann síðan konunge rozeleif þar var þat vel varðveitt þar til er hinn vngi rozeleif bar þat. oc þar með drap hann marg-an mann. Siðan bar hann mart konongs barn. En ef þv fær hann af mer firir vtan sar þa lati gvð þec vel niota. fyrr vill ec davðr vera en ec vil þat spara i mina navðsyn. Nv mælti þiðricr. hvi ma ec pitt sverð flyia meðan ec ma eigi sialvan þic sia. oc ecki veit ec af þer nema ec heyri kall þit oc ofrmæli. Ec hevi riðit i þenna hinn myrqva scog sva at ecki fæ ec set. Nv er mer við þvi hermt at ec for sva at ec mista bæði gatvnnar oc sva faro-navz. Nv meðr þvi at þv vilt halda þitt lif þa scalt þv eigi oftar bioða mer einvigi. þegar er dagr cœmr þa vil ec at hvarr occarrr taki þat af annars hendi sem fa ma oc allz væntir mic at þv scalt þess giold fa aðr en við scilimc er nv hevir þv hœlz.

Ecca segir þiðric fra gvlli því er hann hevir a ser.

Nv mælti ecca. far þv nv vel oc heill en þo vil ec segia þer aðr af fegyrðli minom þar ero i xij. pvnd af ravðo gvlli. nv ef þv fær sigr þa hevir þv þetta gvll allt. en ef þv fær þat þa hevir þv vel arnat. Nv brenn oc gloar sva mitt hiarta sem þetta gull gloar iminum sioð firir því at ec ma nv eigi na þer at beriaz viðr þic. Oc ef þv villt eigi beriaz viðr mic firir sakar gullz eða goðra vapna. þa bers firir lif oc kvrteisi þessa ix drotninga oc þeirra moðor er min vapn leto bva með brendo gvlli. oc morg snildar brogð scal ec firir þeirra saker gera. bið min firir þeirra sacar oc bersc viðr mic.

Nv vill herra þiðricr ganga til einvigis við ecca.

Þa mælti þiðricr. þat veit gvð með mer at eigi firir gvll oc eigi firir vapn þin vil ec berriaz viðr þec. en firir sacar kvrteisi oc hœverscv þeirra. ix. drotninga þar firir vil ec giarna beriaz nv oc leypr af hesti sinom. Nu mælti enn þiðricr. her er sva myrct at ec ma ecki sia hann brigðr sverði sino naglring oc hœgr igriotit firir ser sva at eldr mikill flygr or griotino sva at hann matti sia hvar hann scal binda hest sinn við eitt olive tre oc sva gerir hann. Nv er þiðricr sva briostreiðr orðenn at eigi er gott firir hanom verða. hann trað sva fast griotið at vp geck er firir fotom hans varð. Nv er þiðricr vill til einvigis þa er ecca feginn oc glaðr er þeir scvlv finnaz oc hœgr nv sinv sverði igriotið sva at eldr glœðir or er stal oc steinn mœtaz oc þat eitt hava þeir lioset til þess er þeir finnaz.

Nv beriazt þeir herra þiðricr oc ecca.

Saman coma þeir oc beriaz afbvrðar snarplega. oc ravstlega oc sva er sagt at engi maðr havi vitat aðr ne siðan drengilegra tveggia manna vig. Nv er sva til at sia er eldr rycr or vapnom þeirra sem eldingar se. Oc sva mikill gnyr oc storir brestir ero af hoggom þeirra sem hinar mesto reiðar þrvmvr. oc sva com vmsiðir at naliga varo af þeim hognar allar lifðir af hvaromtveggia þeirra en hvargi þeirra er þo enn sarr. Nv hœggr Ecca af allo afli til þiðriks sva at hann fell i svima við. Oc ecca lætr nv fallaz a hann ofan oc spennir fast baða armleggi hans oc mælti siðan. Ef þv villt halda livi þino þa scaltv nv bvndinn vera oc vpp scaltv nv gefa sialvan þec oc vapn þin oc sva hest þinn. Siðan scaltv fara með mer til borgarennar oc scal ec syna þic þar bvndinn oc ivir cominn þeim drotningom er mic bivggo til þessarar orrastv. þa svaraði þiðricr. lata ma ec lif mitt her at sinni firir þer en eigi ma ec þat þola at hava spott af. ix. ivncfrvm oc þeirra moðor oc þar með af allvm kvrteisvm konom oc karlom þeim sem mic sia eða spyria til sva lengi sem ec livi. Nv tecr þiðricr oc leysir hendr sinar oc tecr vm hals hanom ecca oc sviptaz þeir nv af allo afli.

Vm Falka hest þiðrics konongs.

Falka hestr þiðrics hinn goði nemr þetta at sia at hans herra þvrfti liðs. þa slitr hann i svndr beislit milli tanna ser oc leypr þar til er þeir sciptaz við oc hefr vpp siðan sina baða hina fyrri fœtr oc lystr sem harðast ma hann a bac ecca sva at mioc sva gengr isvndr rygrinn i hanom. Nv kœmc þiðricr afœtr oc hœggr siðan a hals ecca oc af havuðet. Nv tecr þiðricr vapn hans oc herneskio oc vapnar sic með oc aldrigi þycciz hann fyrr set hava iamgoð vapn sem þessor ero.