Bókastaðir

Þiðricr tecr nv vapn sin.

Þiðricr kallar nv skyndilega til vapna sinna ero oc þav bratt fengin hanom. Nv ferr hann ibrynhosor siðan tecr hann brynio sina oc steypir hann ivir sec en þa setr hann hialm sinn a havvð ser hildigrim. Siðan gyrðir hann sec með sino sverði naglring. þa toc hann skiold sinn er a var markaðr leon af gvlli en skioldrenn hvitr. Nv tecr hann glavel sitt. þa var oc hestr hans bvinn er falca het. hann var broðir skemmings er viðga atti oc broðir rispa er heimir atti. Nv leypr þiðricr a bac hesti sinom oc riðr vt or bern siðan oc mikill manna fioldi með hanom bæði hofðingiar oc riddarar. Nv er þiðricr com vt af bern þa var þar viðga firir hanom oc hildibrandr oc fatt manna með þeim. viðga sitr a hesti sinom með allom her vapnom sinom oc nv albvinn at beriaz oc er bæði mikill oc tigvrlegr. heimir gefr þiðric at drecca.

Heimir gengr at þiðriki oc hefir a hendi ser scal fvlla af vini oc mælti. drec herra gvð gefi þer nv sigr idag oc hvert sinni. þiðricr tecr við skalenni oc drecr af oc selr af hendi siðan. Nv fœrir hildibrandr aðra scal viðga. Viðga mælir at hann scal fœra þiðric oc bið hann fyrri drecka til min. hildibrandr fœrir þiðric scalena en hann er sva reiðr at hann vill vist eigi viðr taca. Nv mælir hildibrandr. Enn veiztv eigi gorla hveim þv scalt reiðr vera. firir þvi at nv manntv dreng firir hitta en eigi sva sem þer havit sagt idag at hann mvndi eigi vera dvgandi maðr. oc snyr aptr siðan oc fœrir viðga scalena. oc mælti. dreck nv oc ver þec siðan með drengscap oc reysti. oc gvð veiti þer nv sitt lið. oc lati þer nv vel at faraz. þa toc viðga við skalenne oc drac af oc feck siðan hildibrandi oc gaf hanom gvllring sinn oc mælti. haf firir gvðs þocc firir þina lið veizlo oc lif nv heill.

Viðga mælir við þiðric.

Nv kallar viðga a þiðric oc spyrr ef hann se þa bvinn en þiðricr kveðr sec þa ecki dvelia. Nv lystr hvarr þeirra hest sinn með sporom oc fram visa þeir sinom glafelom. oc hevir þiðricr merki hvitt oc a leon ravtt oc gvll savmat. En viðga hevir merki ravtt oc merct a hamar oc tong með hvitom lit. oc eptir þetta riðr hvarr þeirra at aðrom sva snart sem þa er soltinn valr flygr eptir brað. Oc þa er þeir coma saman. þa leggr hvarr þeirra spioti at aðrom afbvrðar sterklega. þiðrics spiot geck or skildi viðga oc helt hann þvi at sinni. En viðga spiot festi i skildi þiðrics sva at i svndr rytr skaptit i þria lvti. Nv rinnr hestrinn hvarr fra aðrom oc skiliaz þeir at þvi sinni at sva hvno.

Viðga biðr þiðric riða at ser snarplega.

Viðga kallar nv a þiðric snv aptr hesti þinom titt oc liost hest þinn sporom oc rið at diarflega þv hefir enn haldit þino spioti en ec hevi mitt latit. nv scal ec halda kyrrro firir þer oc scvlvm við sva skiliaz annat sinn at þv scalt hava latit þitt spiot eigi siðr en ec mitt. eða elligar scalltv fella mec til iarðar af hesti minom. siðan brigðr viðga sverði sino. Nv snyr þiðricr aptr hesti sinom oc riðr nv diarflega oc hvatlega at viðga nv leggr þiðricr spioti sino firir briost viðga oc vill nv at viso veita hanom bana. En viðga hœggr með sverði sinv isvndr spiotscaptið. oc i þvi sama hoggvi hœggr hann sporð af sialfs sins skildi. Oc enn er hann ecki sarr sialfr þvi at hin harða brynia lifði hanom at þvi sinni. Nv skiliaz þeir at sva bvno oc rinnaz hestarnir vmfram.

Nv beriaz þeir viðga oc þiðricr afœti.

Siðan leypr hvarrrtvegi af sinom hesti oc gengr aðrom igegn oc beriaz akaflega með sverðom sinom. Nv veitir viðga morg hogg oc stor oc sva þiggr hann bæði. Nv vill viðga ætla þiðric þat hogg er hann ætlar at æ scal noccot merkia hann ef sva ferr sem hann ætlar Reiðir nv til af allo afli sverðit i hialm þiðrics hilldigrim. en sa hialmr var sva harðr at ecki sacar þetta hit micla hogg en þo verðr noccot at bila sverðit brestr i svndr i tva lvti.

Viðga mælir við faðvr sinn.

Þa mælti viðga þv velent haf firir gvð drottins reiði er þv gerðir sva illt sverð sva vel sem þv kvnnir. ef þv vildir. ec mvnda nv hava drengilega variz ef ec hefða haft gott sverð. Nv er mer þetta bæði scom oc scaði oc sva þeim er gerði. Nv spennir þiðricr baðom handom sverð sitt naglring oc vill af hogva havvð viðga. Nv leypr hildibrandr i milli þeirra oc mælir við þiðric. Gef þessom manni grið oc tac hann til þin oc ger hann þinn mann. oc fær þv aldregi vaskara mann ne ravstara at allri atgervi en hann er. hann toc einn kastalann brittan af. xij. hermannom. er þv fect eigi aðr með allom þinom mannom vnnit. þat er þer vegr ef þvilicr maðr scal þer þiona. þa svaraði þiðricr. þat er satt er ec sagða þer aðan i dag scal hann vppi hanga firir bern. þa svaraði hildibrandr. Ger eigi sva herra við goðan dreng hann er af bezto konónga ætt bæði ifaðerni oc imoðerni. Nv vill hann við hanom vel oc tigvrlega sem von er at þer. þa mælti þiðricr. þav grið scal ec setia vm alt land faðor mins at eigi scal hverr þræls svnr bioða mer a holm oc eigi scal ec þola lengr vandræði af þeim oc nv idag frelsi ec mic ifra þvi. þa er þessi hinn illi hvndr hangir vppi firir bern. oc eigi firir þvi at siðr at hann fylgði þer hingat. Gac nv ibrot þaðan sem nv stendr þv ecki mvn þer nv ne hanom liva þin þionasta ef þv gerir eigi sva. Oc scal ec fyrst þic hogva itva lvti en siðan hann.

Hildibrandr fær viðga sverð sitt.

En þa er hildibrandr heyrir þat at þiðricr vill eigi heyra bœn hans. oc eigi vill hann liva sialvom hanom þa mælti hann. Ec finn nv at þv cannt eigi lið at þiggia enda scal nv hava barn þat er brekar. þa dro hildibrandr sverð or sliðrom oc mælti. Gvð firir bioði otrygleic hveriom manni. se nv goðr drengr at nv vil ec halda ockarn felagscap sem við hetom hvarr occar aðrom i ocrom viðr mælom. tac nv her sverð þitt mimvng oc ver þec ravstlega.

Nv kennir viðga mimvng.

Nv verðr hann sva feginn sem fvgl degi. Nv kyssir hann a gvllmalin i sverðino oc mælti siðan. Gvð firir gefi mer er ec mælta illom orðom við faðor minn velent. Se her nv mimvng þiðricr goðr drengr. nv em ec sva fvss at beriaz við þec sem þyrstr maðr til dryckiar eða soltinn til matar. Nv hœggr hann til þiðrics hvert at aðro. oc hverio sinni leysir hann noccorn lvt af brynio hans oc af skildi oc sva af hialmi. oc eigi ma þiðricr eitt hogg i moti hogva. oc verðr hann nv engan lvt gera nema liva ser oc þo hevir hann œrit at vinna. oc þo hevir hann nv. v. sar. Nu ser þiðricr hverso fara mvn þetta vig ef hanom kœmr engi annor liðveizla. þa mvn hann fara osigr. Nv kallar hann a hildibrand meistara sinn. Com nv hingat oc skil þetta einvigi. eigi se ec nv hverso ec geta skilt þat einn saman. hildibrandr vill nv eigi skilia þa.

Þa svaraði hildibrandr. þa er ec vilda skilt ycr hava þa vildir þv ecki af þvi raði taca oc hefðir þv þa af þessi orrosto fengit veg oc frama. oc spyriaz mvndi vm oll lond. en nv lœgir mic at þv mannt aldregi segia i sinn siðan at ec lyga at þer þa er ec sagða þer viðga goðan dreng oc mikinn reystimann. Nv syniz mer sem brynia þin se slitin hialmr þinn cvmblaðr skioldr brotinn oc sialfr þv storom sarom særðr oc mvntv nv verða slita þetta vig með scom oc osœmð oc veldr þvi dramb oc ofmetnaðr með grimleic. Skil þv nv ef þv matt engom kosti skil ec ycr annan veg en hann verðr nv at raða hvart hann vill hinn sama dom dœma þer sem hanom var dœmðr eða vill hann betr gera en maclect er. þetmarrr konongr vill nv skilia þa oc fær vist eigi.

En þa er þettmarrr konongr sa at svnr hans mvndi vera ivir cominn þa toc hann ser einn skiold ravðan. oc geck milli þeirra. þa mælti viðga hvat ætlar þv nv at gera konongr hvi ferr þv sva ec segi þer at sanno ef þv villt gera mer olog i þino landi oc rangendi oc sva þo at þv vilir drepa mec með þinom liðfiolða þa scal engi maðr kalla þic at betra dreng ne at meira mann. en þess ma þo vel hemnt verða þviat ec a moðorbroðor einn eigi orikari konong en þv ert. þa mælti konongr. Goðr drengr eigi vil ec þer gera annat en gott eitt. ec vil biðia þic attv lifir syni minom firir þvi at nv se ec at hann læzc ef þit eigiz lengr við. En ef þv gerir sva þa vil ec geva þer borg eina imino landi oc ver þv þar greifi ivir oc þar með tigvrlect qvanfang ef þat villtv.

Nv beriaz þeir anyia leic.

Nv svaraði viðga þat vil ec vist eigi er nv byðr þv. hann scal hava slikan dom sem hann havð mer. firir vtan þat at þer berit mic ofrefli firir fiolmennis yðars sakir. Nv gengr konongrenn ibravt en þeir taka nv at beriaz anyia leic allra harðast oc verr þiðricr sec vel oc karlmannlega. en viðga sœkir avarfast. Nv hœggr viða ihialm þiðrics hildigrim. hinvm vinstra megin sva at alt sneið i svndr til hins hœgra vegs sva at af flavg annarr lvtr hialmisins þat er firir ovan var havvðit oc þo fylgði harit. hildibrandr vill nv skilia þa.

Hilldibrandr ser nv þetta at hildigrimr er brotinn þa mælir hildibrandr oc leypr amilli þeirra Goði felagi viðga ger firir ockars felagskapar sakir at þv gevir þiðriki grið oc tac hann þer til felaga oc þo at þv riðir vm alla verold oc baðir þit saman. þa man engi þinn iamningi kallaz. þa mælti viðga. þo at þat se omaclect firir hans sacar þa scalltv þiggia þo þina bœn firir ockars felagscapar sakar. Nv geva þeir vpp vapn sin oc leggia nv saman hendr sinar oc geraz nv felagar. oc ganga nv inn i bærn goðir vinir.

Nv er þiðricr heima ibern oc sarr mioc En hvat firir þvi ef hann verðr heill saranna þa vill hann eigi tyna lovi sino oc brot riðr hann.