Viðga byzt heiman.
Þa fær velent hanom brynhosor oc hann vapnar sec með. þær varo þivccar oc vel gorvar oc biartar. þar næst feck hann hanom brynio oc hann steypir ivir sec. hon var horð sem stal oc oll tvigor sið oc rvm sem hanom samir. Nv tecr velent sverð oc mælir sva at hanom. svn minn sverð þetta heitir mimvngr. haf oc niot vel. sialfr gerða ec þetta sverð oc þer til handa hefi ec varðveitt oc þat væntir mec at biti þer sverðit ef þv ert eigi ættleri. þa setr hann hialm a havvð ser. sa hialmr var gorr af hino harðazta stali rendr storom naglom þivcr oc þolinn. þar var amarkaðr ormr sa er slangi heitir sa ormr hevir gvllz lit þat merkir riddara scap hans. sa ormr er eitrsfvllr þat merkir kap viðga oc grimleic hans. Siðan toc hann skiold sinn oc festi a hals ser. sa skioldr var þivcr oc þvngr sva at einn maðr feck eigi meira valdit annarre hendi. Sa skioldr var hvitr oc skrifat a með ravðom steini hamarr oc tong firir þvi at smiðr var faðir hans. J þeim skildi ovanverðom varo. iij. karbvnkvlus steinar. þat merkir moðerni hans hann var konongborenn. Siðan feck velent hanom einn hest sa het skemmingr. sa var allra hesta baztr. hans saðoll var gor or fils beini þar er a scrifat naðra ein. Siðan geck viðga at hitta moðor sina. kysti hana oc bað hana heila lifa oc hon bað hann vel fara oc feck hanom. iij. mercr gvllz oc fingr gvll sitt. þa kysti hann faðor sinn oc bað hann vel lifa velent bað svn sinn vel fara oc komz mioc við er þeir skilðoz. Siðan toc viðga spiot sitt oc liop a bac hesti sinom oc steig ecki istigreip. þa lo velent er hann sa þat. hann fylgði hanom agato oc visaði hanom alla leið sem glœglegast oc sagði hanom marga lvti firir oc skilðvz þeir feðgar þa ferr nv velent heim.
Viðga hevir skilz við faðor sinn Velent.
Nv riðr viðga langar leiðir stora skoga bæði bygðir oc obygðir. hann com at a einni mikilli. er heitir eidis a. Nv hittir hann eigi a vaðit sem faðir hans hafði visat hanom. Siðan ferr hann af hestbaki oc leiddi hann i scog oc festir hann við eitt tre siðan ferr hann af vapnom sinom oc grefr niðr i iorð oll saman oc felr vandlega firir því at hann ottaz ef menn coma at vapnom hans at þeir mvno abrot taka. Siðan veðr vt a ana sva divpt at ecki com vpp nema havvðit eitt ahanom. oc ferr vp oc ovan at anni. her koma þeir riðandi hildibrandr oc hans felagar.
Þa coma þar riðandi. iij. riddarar. einn þeirra var hildibrandr fostri þiðrics af bern. annarr var heimir. þriði var jarlinn er nemdr er hornbogi. þessa tva hofðingia hefir þiðricr sennt eptir jarlenom i vinnland. firir því at hann vissi at hornbogi var sva goðr drengr at aldregi mvndi faz betri bæði at | riddara scap oc allo aðro því sem goðom dreng skyldi soma. firir því vildi þiðricr taka hann ser til samlags oc felaga oc allom sinom mannonum. Nv mælir hildibrandr til sinna felaga. ec se vt i a þessi einn dverg en þat mætti vera alfricr dvergr er ivncherra þiðricr toc eitt sinni. oc þar af feck hann hit goða sverð naglring oc hinn goða hialm hildigrim oc mikit fe annat oc þa var ec með hanom. Nv skvlv ver til stilla ef ver fengim enn tekit hann oc skvlv ver a hann leggia eigi minni lavsn en þa leysti hann sec.
Her finnaz þeir Viðga oc hildibrandr.
Nv stiga þeir af hestom sinom oc gengo at anni. en viðga heyrði fvllgœrla hvat þeir sagðo. oc svaraði. Gevet mer grið oc landgango þa mego þer sia hvart ec em dvergr heldr en einnhverr yðarr eða mitt havvð beri lægra en eins hvers þess er mec callaði dverg. þeir iattvðo hanom því oc baðo at hann skyldi a land ganga. Siðan liop hann or ánni. ix. feta i eino skrifi. Siðan spvrði hildibrandr hann. hvat manna er tv eða hversv comtv her. Viðga svaraði. Ef þv ert goðr drengr hvi spyrr þv mec slics nœctan mann. lat mec fara oc taka vapn min oc siðan spyr mic slics sem þv villt spvrt hafa. oc þvi iattvðo þeir hanom. þa for viðga þingat sem vapn hans varo oc clæði oc clæddi sec oc vapnaði sec siðan geck hann til hestz sins oc liop abac hanom oc reið amot þeim oc mælti. þer þrir goðir riddarar gvð hialpi yðr ec mvnda sino namni nemna hvern yðarn ef ec kynna heiti yðor. Nv mælir hildibrandr hvert er namn þitt goðr maðr eða hver er ætt þin eða hvert geriz þv eða hvi riðr þv sva einn saman iokvnno landi.
Viðga segir þeim hildibrandi ætlan sina.
Viðga svaraði. ec em danscr maðr at ætt ec heiti viðga faðir minn heitir velent. Moðir min er dottir Niðvngs konongs. er ræðr firir ivtlandi. en fara skal ec afvnd þiðriks svnar þetmars konongs af bern oc að en ec fara heim. þa verðr hann at vita oc baðir við saman hversv stinna skioldo við eigim eða styrka hialma eða hvoss sverð eða harðar brynior. firir þvi at hann er nv allra manna fræegaztr i veroldo af sinom drengscap oc reysti. Nv ser hildibrandr at þessi maðr er sva mikill oc ivirmannlegr at hans maka þottiz hann aldrigi set hafa oc þar eptir ero hans vapn oc oll annor herneskia. oc nv veit hann at nv man herra hans þiðricr koma ifvlla ravn. oc eigi þyckiz hann þat mega glœgt sia hvarr þeirra aðrom man firir coma. hildibrandr skiptir sverðvm við viðga.
Nv hygr hildibrandr eitt ráð firir ser þvi at hann var vitr maðr. Siðan mælti hann til viðga allglaðlega. Gvð se þess lofaðr at nv hevi ec þann mann fvnnit er mic vætir at til hafi diarfleic at lypta vpp spiot scapti igegn þiðriki. oc þess væenti ec ef þv hefir hamingio til eptir þinom gœrvileic at þv scalt steypa hans drambi. þvi at hann hyggr engan mann mega við sec iamnaz vm reysti eða vm harðleic. þo at alla verold kanni. Villtv ganga til við mec at gera felagscap sva at hvarr occarrr vinni aðrom trygðar eið. at við fylgimc hvarr aðrom i navðsyniar allar. hvar sem við erom staddir.
Nv binda þeir felagscap sin amilli hilldibrandr oc viðga.
Viðga svaraði. Sva liz mer sem þv mvnt vera goðr maðr oc ricr oc goðrar ættar. hvi mvna ec nita yðrom felagscap. ec rið aðr einn saman. eða hver ero nomn yðor. þa svaraði hildibrandr. Ec heiti boltram reginbaldr svn jarlsens af fenidi. annarr heitir sistram herinbrand svn hinn þriði er hornbogi iarl af vinnlandi. Siðan leggia þeir hendr sinar saman viðga oc hildibrandr oc geraz felagar. siðan riða þeir til arinnar oc vissi hildibrandr vaðit a ánni.
Nv riða þeir siðan leið sina þar til er vegirnir skiliaz þa mælti hildibrandr þessir baðir vegir liggia til bernar er annor long leið oc daleg en annor miklo skemri oc betri. en a þessi hinni skemri er annmarki noccorr sva þat er a ein er eigi ma ivir komaz nema at einom steinboga. við þann steinboga er kastali einn er heitir brictan. þann kastala halda. xij. scotmenn. einn þeirra heitir gramaleif. A þeim steinboga er tollr þar verðo ver at lata hesta vara oc vapn oc lata þo vel ivir ef ver haldom lifino eða limvm varom. Nv er litil von at ver komemc ivir þenna steinboga firir vtan þeirra vilia firir því at þiðricr hefir til komit at vinna þann kastala oc feck ecki at gort. En nv sa er þessom xij kappom ma firir coma þa þorir eigi þiðricr þeim imot at standa oc engi annarra. En nv at mino raði þa verðvm ver at fara hina lengri leiðina.
Viðga vill fara hinn skemra veg.
Þa svaraði viðga. Ver verðom vist at fara hinn skemra veginn firir því at þeir lata riða vtlennzkan mann hvert er hann vill igriðom. Siðan fara þeir þann veg sem viðga bað. þeir riða a einn skog er lyravald heitir. En firir framan þann skog er kastalenn. Nv sia þeir kastalann. þa mælti viðga. biðit min her ec vil nv riða fram til brvarinnar. kann vera at ec þiggia af þeim at þeir lati oss riða firir vtan skatt ef ec mæli mivclega til. En ef eigi verðr þess kostr þa rið ec aptr til yðar við svabvit. þeir biðia hann riða oc firir þyckir þo at hann fari.
Viðga riðr einn fram at kastalanvm.
Viðga riðr nv fram til kastalans oc steinbogans þeir sitia i vigskarðom ovan verðom i kastalanom oc sia reið hans. þa mælti Gramaleif. þar riðr einn maðr sa hevir skiold mikinn sa skioldr sœmði mer vel oc hann verð ec at hava en þer skiptið annarri herneskio hans sem þer vilit. þa mælti stvdfvs. meiri von at sia maðr eigi sverð gott þat man mitt verða oc engom kosti vil ec lata þat þo at mer væri mikit fe boðit við. Nv mælir þrælla hans brynio vil ec hava. þa mælir sigstaf hans hialm vil ec hava. þa mælir hinn fimti. hann hevir vist goðan hest hanom skipti ec mer. þa mælir hinn setti ec vil hava kyrtil hans oc oll klæði hans. Nv mælir hinn siavndi hvat hevi ec þa nema brynhosor hans með því at allo er aðro skipt aðr. þa mælir hinn. viij. fegyrðil hans vil ec hafa oc allt þat er i er. Nv mælir hinn. ix. ec vil hafa hina hœgri hond hans firir minn lvt. þa mælir hinn. x. at visv hevi ec ætlat mer hinn hœgra fot hans aðr ec fara heim. Nv mælir hinn. xi. ec vil þa hava havvð hans. þa svaraði stvdfvs. eigi scal drepa manninn þo hevir hann fatt gott eptir þa er hann hevir þetta latit er nv er skipt at hann haldi lifino. Nv mælti gramaleif hofðingi þeirra. Farit nv. iij. til hans oc takit vapn hans oc klæði sva sem nv var skipt. oc lati hann vndan coma hinom vinstra fœti oc vinstri hendi oc livinv oc havit þa vel arnat.