Bókastaðir

Velent ræðir við ivncfrv.

Nv hevir velent hemt sinnar svivirðingar oc nv veit hann ef þetta kœmr vpp at konongr lætr drepa hann. Nv kallar velent til sin egil broðor sinn oc biðr at hann scal coma ivngfrv atal við hann oc sva gerir hann. Nv hittaz þav oc talaz við marga lvti sin a milli oc þat kœmr i þeirra rœðo at velent vill enga cono eiga nema konongs dottor. en hon segir at hon vill engan mann eiga annan en velent. oc þetta likar þeim baðom vel. þa mælti velent til hennar iocrom fyndi þa hefi ec skipt ocrom clæðom oc þat væntir mec at þv mvnt fœða eitt barn oc likari picki mer at þat mvn vera svn. En þat skalltv segia hanom ef ec finn hann eigi. at ec hefi gort hanom vapn. oc hevi ec þar hirt sem vatn gengr inn en vindr vt. en þat var þar sem hann kœldi afl sinn. nv skiliaz þav.

Velent gerir fiaðrham.

Þat er eitt sinn at velent biðr egil broðor sinn fa ser allar fiaðrar bæði storar oc smar. oc segir at hann vill gera ser einn flygil. Egill ferr i scog oc veiðir allz kyns fvgla oc fa r velent.

Nv gerer velent einn flygil en þa er gor var þa er þvi likazt sem fiaðrhamr veri fleginn af grip eða af gambr. eða af þeim fvgl er strvz heitir.

Ægill freistar fyrri fiaðrhamsens.

Nv biðr velent egil fara i þar sem firir var gort. oc flivga oc freista ef dygði. þa mælti egill. hverso scal ec vp hefiaz eða flivga eða niðr setiaz. þa mælti velent. þv scalt hefiaz imot vindi. oc flivga scalltv bæði hatt oc langt. en setiaz skalltv firir vindi. þa ferr egill ifiaðr haminn oc flygr vp ilopt sva letlega sem hinn fimazti fvgl oc þa er hann skal setiazt þa steypiz hann hofðino til iarðar oc ferr akaflega til iarðarennar. ok nalega veit hann ecki til sin sva þavt at hans eyrom oc þvnnvangom. Nv mælti velent seg mer egil broðir var noccoro nytr þessi flygill.

Egill rœðir vm fiaðr haminn.

Þa mælti egill væri sva gott at setiaz með hann sem at flivga var þa væra ec nv a aðro landi oc aldrigi fengir þv hann siðan. Velent mælti ec skal bœta vm þat sem ascortir. þa ferr velent i fiaðr haminn við atbeina egils broðor sins. oc ferr vp a hvs eitt oc hefs vp i lopt oc mǫlti. Rangt sagða ec þer þa er ec bað þec at þv skyldir setiaz firir vindi þvi at ec trvða þer eigi at þv mvndir fa mer ef þv vissir at sva goðr væri sem er. þat mattv vita at allir fvglar setiaz moti vindi. oc sva vp hefiaz. En nv vil ec segia þer broðir mina ætlan. ec vil nv heim fara oc hitta vil ec niðvng konong aðr at mali. En ef ec mæli þat nockot er konongenom er a moti skapi oc neyðir hann þic til at skiota at mer. þa hœf þv vndir vinstrv hond mer þar hevi ec bvndit vndir eina blaðro þar er i bloð svna niðvngs konongs. Nv mattv hœva sva til scoti þino at mer verði ecki mein at ef þv villt noccors okra frænzemi virða.

Velent er nv cominn ifiaðr ham sinn.

Nv flygr velent a hinn hæsta tvrn i konongs garði. Nv gengr konongr til hallar sinnar oc mart manna með hanom. En þa er hann sa velent þa mælti hann. er tv nv fvgl velent morg vndr gerir þv af þer. þa mælti velent herrrra nv em ec fvgl oc nv em ec maðr oc brot ætlomc ec nv. oc aldrigi scalltv fa mitt vald siðan aldrigi livir þv sva lengi. her segir Velent skipti þeirra Niðvngs konongs.

Þat var fyrst kavpmali ockarr at þv gaft mer þina dottor oc þar með halft riki þitt oc firir því at yðr þotti þa mikill vandi oc ofriðr firir dvrom standa. En þv gerðir mic vt lægan oc friðlavsan firir þat at ec varða hendr minar oc drap ec þann er mic vildi fyrri drepa. fectv þer þa þat til slita við mic oc lavnaðir þv mer illa mitt starf. en hvgkvæmt varð mer þo at ec væra liðlavss oc litilmagni allt saman mart hevir til osættiz gorz með ocr. þv toct sinor oc skart isvndr ibaðom fotom minom. þar firir drap ec syni þina baða tva oc þar bera vitni vm þin borðker. þar ero þeirra havsar firir innan oc i allan þinn hinn bazta borðbvnað let ec þeirra bein. oc vil ec ecki leynaz firir þer vm þat mal. en alt þat er þv gerðir fyrr illa til min sem ec sagða fyrr aðan. þess galt þin dottir þa er ec skipta ocrom fatom. oc þess væntir mec at hon se olett. en þvi veld ec nv hafa sva farit ockor viðrskipti. Nv flygr velent vpp a lopt hatt.

Niðvngr konongr biðr egil skiota at Velent.

Nv mælti Niðvngr konongr. þv hinn vngi egill skiot hann velent. Egill svaraði eigi man ec þat gera við broðor minn. þa segir Niðvngr konongr. at egill scal hafa davða ef hann scytr eigi. oc segir at hann er þo verðr davða firir tilverka broðor sins sakar. en af þesso eino fær þv þer lif keypt ef þv skytr hann oc með engo aðro. egill leggr or astreng oc skytr vndir hond velent hina vinstri oc fellr nv bloð a iorð. þa mælti konongr oc allir menn at þetta mvn verða hans bani. Velent flygr heim i sioland oc er þar at bvum sinom þeim er vaði risi faðir hans hafði att. Niðvngr konongr fær sott bratt eptir þetta oc þvi næst bana. en rikit tecr svn hans en sa heitir otvin. oc er hann vinsæll við alla menn. hann er oc vel til systor sinnar.

Nv er fœddr hinn goði drengr Viðga.

Konongs dottir ferr at hvila oc fœðir sveinbarn hanom er namn gefit. hann er kallaðr viðga. Velent spyrr þenna allan atbvrð heim i sioland oc sendir otvin kononge orð i ivtland oc beiðiz af hanom griða oc sættar. konongr vill sættaz við velent oc sel hanom grið til viðmælis. Velent ferr i ivtland oc er þar vel við hanom tekit. oc giptir otvin konongr hanom systor sina. oc byðr hanom þar at vera ef hann vill. velent segir at hanom þyckir mvnlegra heim at fara i sitt fostr land. oc til faðor leifðar sinnar segir þo at hann vill vera heimhollr konongenom til allra goðra lvta þeirra sem hann kœmr aleiðis. Otvin konongr vill at hann raði oc heitr hanom sinni vinattv. Velent ferr nv heim i sioland oc hans cona með hanom oc svn þeirra viðga þrevetr. konongr gefr þeim mikinn fear lvt oc goðar gersimar oc skiliaz nv goðir vinir. oc er nv velent isiolandi langa æfi oc viðfrægr vm alla norðrhalfo heimsins at hagleic oc velvm allom.

Her hefr sago viðga svnar velennz oc kœmr sagan fram at þiðrics svnar þetmar konongs af bærn.

Viðga svn velentz er nv. xij. vetra gamall hann er mikill vexti oc sterkr at afli harðlegr oc tigvrlegr oc vinsæll oc allz ecki virðisamr. Velent spyrr svn sinn viðga ef hann vill kvnna sva mikinn hagleic sem hann kann at kenna hanom. at engi maðr hinn þriði kvnni iamvel alla smið sem við feðgar þo at leiti vm alla verold. Viðga svaraði. firir sakar mins moðernis þa vili gvð at min hond komi aldregi a hamar scapt ne atangar arm. þa spyrr velent hvat vill tv þa kvnna at gera þat er þv matt bæði fa þer með skamlavst matar oc klæða. viðga svaraði Ec vil hellzt elska goðan hest oc stinnt spiot scarpt sverð nyian skiold harðan hialm hvita brynio oc þar með tigvrlegan hofðingia hanom at þiona oc með hanom riða meðan mer vinnz lifit. Velent svaraði. Nv fæ ec þer þetta er þv beiðiz en hvert villtv siðan fara. Viðga svaraði. jamlvnga landi er mer sagt til eins mannz þess er heitir þiðricr svn petmars konongs er ræðr firir bern. hann er nv agæztr kappi vm alla verold sva at menn viti til. hann er minn iamnaldri hans fvnd vil ec hava oc til einvigis vil ec við hann ganga. En ef ec ma eigi standaz hans hin storo hogg oc fell ec til iarðar þa hefi ec þat spvrt at hann er sva goðr drengr at hann gefr mer lif mitt ef ec gef vpp sverð mitt oc geromc ec hans maðr. en vera kann at betr farezt. velent aftelr firir viðga at hann fari brot.

Velent svaraði þat er ecki mitt rað attv farir eptir þeim sama þiðric, comi þit saman i einvigi, þa stendr þv firir hanom litla rið sva er hann fræcn. Ec mvn raða þer annat rað. ec veit her einn skog. en i þeim skogi er einn risi hann er mikill oc styrkr oc gerir margom manni mikinn skaða. þar man ec þer til stoða at þv faer ivir hann stigit. En ef þv fær þat frægðar verc gort. þa mvn konongr af sviþioðo lavna þer vel. hann mvn geva þer dottor sina oc þar með halft riki sitt. firir því at risinn hevir gort mikinn skaða hans mannom. Viðga svaraði. þat ma ec vist eigi gera firir sakir kono einnar. þat mvn vist sagt ef ec em veginn firir risanom af þessi soc at vist leta ec mitt lif snaplega. Ec skal at viso sva gera sem ec sagða aðr. svðr verð ec at fara oc freista min við þiðric. Meðr því at ec fæ eigi latt þec segir velent stendr eigi þat firir at ec fa þer eigi þat er þv beiðiz.