Bókastaðir

Nv birtir sic Rodolfr.

Nv tækr Sigurðr ovan hottenn ok mællte. junkfru. Ek svik karla. ok ek svik konor. ok ek svik Osanctrix konong. ok ek svik yðr jvnkfru. Ek em æigi Sigurðr hælldr em ek græivi Roðolfr. sendematðr Atila konongs. gær hann vin þinn ok hærra. ok tak hann þer til manz. þa mun hann gæva þer lond ok riki ok marga kurtæisa riddara. storar borgir ok morg pæll. ok rikir hærtogar. skolu þik læiða ok upphallda þinvm klæðom. Ok siolf skalltu væra drottneng allz hunalandz ok allar þinar mœiar skolu væra rikra manna dœttr ok draga dyr pæll.

Nv kennir jvnfrv Rodolf.

Þa svaraðe junkfru af miklum moð ok kallar min sœta systir bærta sægir hon kom hingat ok hæyr þæssa manz ærænde. bærta gængr þængat ok spyr huat hon vill. Erka svarar. hær er æigi Sigurðr. sem hann sægir. hann gængr nu igægn at hann er hælldr græivi roðolfr. sendemaðr Atila konongs. hann svæik mik ok minn faður ok nu flytr hann mal Atila konongs. Gak nu eptir minum fæðr. ok skal nu dræpa hann firir þui at hann drap a æinum vælli. v. c. riddara mins faður ok þar firir skal hann idag uppi hanga. Enn mællte græivi roðolfr. gær sem ek bið junkfru. lægg ast við Atila konong ok vær drottneng ivir þui riki er atte þinn moðorfaðer Melias konongr ok en vnga bærta þin systir skal væra min kona imikilli sœmd ok goðo ivirlæte.

Bærta mælir.

Þa mællte bærta junkfru sægir hon. þu ert konongsbarn ecki skalltu rœgia ne ropa utlænzkan mann. mæðr þui at hann er komenn ayðart vallð. þat er yður tign. lat hann fara huart er hann vill. En sæg mer systir mællto þer æigi þat æitsinni. æða huat þæssom orðom. Hinn hællgi guð ihimnvm væit þu mer þa bœn at ek sia drottneng allz hunalandz. Nu er þat framkomet er þu bat ok hævir nu guð væit þer bœn þina. rœg æigi vtlænkzkan mann. vær drotning Atila konongs. en ek vil fara mæðr þer. Ok aðr en bærta hæfði mællt sitt ærænde. þa villdi Roðolfr braut ganga ok hyggr at hon muni sægia konongenom sem hon het.

Jvngfrv vill eigi rœgia margreifanvm.

Þa kallar jvnkfru aroðolf hæyr þu goðr riddare gak æigi sva skiott ibrott. ek væra vil drotning Atila konongs ok æinn gullring sæl ek þer at væði. ok val skolu vit min systir. læyna yðare hærvist firir minum fæðr. en þer sætið rað til varar brottfærðar.

Nv gængr Sigurðr ut af kastalanom ok iborgena firir konongana. ok hava þæir sett alla þœira viðrœðo. Þa mællte Norðungr konongr goðe vinr. have þer af trunaðe rekit vart ærænde ok æf þer haveð þat val til lycta læitt þa skal ek þer þat val launa. þu skallt væra minn jarll iminu riki. ivir margum kastalom ok mikklu riki. Þa svaraðe Sigurðr hœrra af trvnaðe sagðe hon mer at hon vill æigi aþæssom tolfmanaðom giftazt æða mann taka. ok at væði fæk hon mer sinn gullring. ok se hær nu ringen hœrra. En ærændet gat ek æigi bætr flutt. ok sva hialpe mer guð at ek hævi syslat af allre minni kvnnasto. Ok þat hyg ek at far æinn skuli bætr sysla ærænde iokunnu lande. æða diærflægra utlænzkr matðr. firir sva tigurlægom mannvm. Þa svaraðe Norðungr konongr ok kvazt þæss gærna vilia biða. ok biðr hann hug a læggia. at þætta kœme fram a tolf manaða freste. ok hæitr hanom sinni vinatto. æf þætta syslazt. ok riðr nu Norðungr konongr hæim.

Osanctrix konongr sitr isinu hasæte ok kallaðe til sin sigurð. ok þa er hann kom firir hasætet. þa mællte konongren. goðe vinr þu hævir hær veret i minu riki nv tvavætr ok nu hævi ek þat ræynt. at þu ert kurtæisare riddare ok hœværskare en flester aðrer hær innan hirðar. ok þu mant væra rikr matðr. iþinu lande ok goðrar ættar. ok vil ek gæva þer nokkot. riki æf þu villt hær dvalst hava. Þu skallt væra hirðstiornar matðr innan hirðar ok skipa konongs malom ok riða mæð hærr at væria landet. þa svaraðe Sigurðr ok þakkaðe kononge sit boð. ok þat lezk hann taka vilia. En þat harmar mik hœrra at ek fæ æigi golldet þat Atila kononge. er hann drap brœðr mina ok rak mik ibraut fra minu riki ok allre sœmd. ok sva mindi mer gevezt hava. æf ek hæfða æigi sva goðan hofðingia hæimsott. sem nu hævi ek. ok fiarkomen være Atila konongr at væra hofðingi allz hunalandz. En hann hævir allz ekki iskipt vm riðir huassu morg rangyndi hann hævir framme hofð. oll hava hanom þau væl lytt. ner sem hann fær hæfndir firir. þa svarar Osanctrix konongr. hamla man hanom vm siðir ver skolum vittia hans ihunaland. þa sagðe Sigurðr. iþæiri villda ek gærna væra. En ek a æinn broðor hœrra sa hæitir Alebrandr. er allra manna er kurtæisaztr ok bæzt mannaðr. vm alla luti. en hann var þa sar er vit skildumk. En þau sar laut hann af Atila kononge. En þat þyckir mer illa at hann kœmr æigi ayðarn fund ok þiona yðare tign. Nv vil ek biðia yðr hœrra at þer geveð mer orlof at fara æptir hanom. konongr læyfir hanom þæssa færð.

Greivi Rodolfr riðr til sinna manna.

Riðr nv græivi roðolfr abraut sa er Sigurðr kallaðezt æinnsamann iskogenn. afund sinna manna. ok hava þæir væl halldet sik þar. Nu mæler græivi roðolfr til Osið. broðor sunar Atila konongs. þu skallt riða mæð mer til hirðar Osanctrix konongs. ok þat hævi ek þar sagt at þu ært minn broðer. ok sva skalltu sægia ok kallazt þu Alebrandr. Osið biðr hann raða. Nu riða þæir afund Osanctrix konongs ok ganga nu firir hann ok hæilsa hanom væl ok vægelæga. ok hann tækr við þæim mæðr bliðu ok mikilli tign ok ekki þikkir konongenom Sigurðr hava mæira sagt fra brœðr sinum en hanom synizt at væra muni. Nu ero þæir þar vm rið igoðom fagnaðe. sva lenge sem þeim likar.

Greifi Rodolfr sendir jvngfrv boð.

Eitt kvælld sende Sigurðr sinn trunaðar man til junkfru ok sagðe at hon skilldi buin væra a. vii. natta fræste. ok hænar systir bærta. mæðr allum sinum hinum dyrstu gripum. Nu liða þær siaunetr. ok æitt kvælld er konongr var sofnaðr ok aðr miok drukkin af víni ok aller hans mænn. þa taka þæir Sigurðr ok Alebrandr ok bua sæx hina baztu hæsta ok riða at kastalanom. ok þa ero þær bunar mæðr alla sina hina bæztu gripi ok læggia a þæssa hæsta suma. en sumum riða þau. ok fara þau utt af kastalanom. ok riða alla þa nott ok allan þænn dag æptir ok æigi letta þæir fyrr. en þæir koma iskogenn til sinna laxmanna. ok hava þæir nu fim. c. manna goðra riddara. vænda nu ihunaland ok þikkiazt nu væl arnat hava.

Osantrix konongr spyrr at dottir hans er brotv.

Nv værðr Osanctrix konongr var viðr þæsse en mikklu svik ok velar ok værðr avarræiðr. samnar nu mikklum hærr ok færr ok eptir þæim.

Ok þæssa værðr græivi roðolfr varr ok hans mænn ok sia nv at æigi værðr kostr vndan at flyia. enda ero ok engi fong aviðrtaku eigi er ok sem til griða se at læita. ok firir þui at ekki var til þæira gort. Ok flyia nu til æins kastala ok komazt iþann kastala. Ok þar sæzk vm Osanctrix konongr mæð sinn allan hær ræisir valslœngior ok væita storar atgangur kastalanom. En þæir væriazt val ok drængilæga. Ok nu a Græivi Roðolfr viðr sina mænn tal ok sægir at þæir ero vannlæga viðr komner. sem var. ok spyrr æf nockor være hans manna sva val at ser gor æða hugaðr at træystazt mindi at fara afund Atila konongs ok sægia hanom var vanndræðe ok huær er þæssare færð kœmr alæiðis sva at oss værðr at nokkorum hialpum. þa skal mikit hans mætorð væra. sendimenn margrevans.

En til þæssarar færðar bioðazt tvæir hinir frœknazto riddarar riða nu utt af kastalanom. æina huæria nott imikklu myrkri. ok værða varðmænn Osanctrix konongs varer viðr þa ok hyggia at þœira svæinar se. er sva diærflæga riða vm netr ok komazt sva utt fra landtiælldum konongs ok letta alldrigin fyrr en þæir koma afund Atila konongs ok sægia hanom allan atburð afærð græivans. Nu er Atila konongr hæyrir þætta. þa mællte hann. Alldrigin hæyrða ek sagt ifra þui likum riddara sem græivi roðolfr er ok mikkla sœmd hævir hann mer nu vnnit æf ek fæ nu sialfr til gætt. skal ok æigi sia væiði or hondom ganga mæðr þui at sua væl er ihændr boret sem nu er. Bui sik nu aller minir mænn ok farum at væita græivanom lið. ok þar samnazt saman ovigr hærr.

Þæssom hærr lyftir Atila konongr utt af Svsat ok færr til moz við margræivann. Ok iannan stað er at sægia fra viðrskiptum Osanctrix konongs ok græivans ok Osiðz þæir bæriazt huærn dag. ok sva sottoz þæir fast at af Osanctrix kononge ok hans liði var fallet. ccc. riddara. ok kastala mænn hava latet. lx. ridara. Nu koma mænn skyndilæga afund Osanctrix konongs ok sægia hanom. at Atila konongr atte skamt til kastalans mæð ovigan hærr. Nu ser Osanctrix konongr at hann hævir enga viðrstaðu mote Atila kononge iþat sinn. firir sakar liðfæðess er hann hafðe þa. þui at braðom var boret. eftir þæim at fara. at konongr fæk minna liði samnat. en þurft hans gægndi. þa reðo raðgævar Osanctrix konongs hanom. þat at hann skilldi flyia ok samna ser liði ok fara ahændr Atila kononge mæð œrenn styrk. annat sinni ok þæssor rað tækr Osanctrix konongr ok lætr blasa til brautfærðar ok upp taka landtiolld ok flyia nu abrott. Nu ser þætta græivi roðolfr ok aller kastala mænn. ok vita þikkiazt þæir vm færð Atila konongs laupa þæir nv ahæsta sina ok riða utt af kastalanom ok dræpa af liði Osanctrix konongs. cc. riddara. Ok þa hæyra þæir mikit hærop ok vapnabrak af liði Atila konongs ok luðra gang. ok huærfa nu aptr.