Bókastaðir

Vm stola her þann er margreivinn com at osantrix konongi.

En þa er myrkkvazt var netr. þa stændr margræiui Roðolfr vpp ok fimhundraþ riddara mæð hanom ok hærklæða sik. Ok riðr nu græivinn askogenn ok ivir skogenn ok læypa þæir nu alandtiolld Osanctrix konongs koma aþa ovara ok dræpa marga riddara. ok aðr en þæir nae uapnum sinum. þa hava þæir drepet sæx. c. manna af þæim. sumt mæð uapnum en sumt vndir hæsta fotom. En þa er hær Osanctrix konongs fær vapnum komet firir sik þa flyr Rodolfr afund Atila konongs ok sægir hanom þæsse tiðænde ok biðr hann fara aftr ihunaland ok gæta þæss rikis væl. sægir at æigi munu þæir mæira þar fa syst at sinni. Konongren þackar hanom væl ok piggr þætta rað ok fær nu aftr isitt riki ok stændr nu kyrt vm rið mioklanga. sva buit. at huarge þæira hæriar a annan.

Nv ætlaz margreivinn til mikilla svika við osantrix konong.

Þat er æitt sinn at en goðe sendematðr græivi roðolfr sægir sinvm hærra Atila konunge. at hann vill hava or hirð hans. þriu. c. riddara. þæira er vaskazter værae. ok þar mæð broðor son konongsens osið ok braut vill hann riða ok æigi kvæðr hann sin þurfa fyrr at venta en þriggia væ ttra fræste. konongren gerer sva sem hann bæiðizt fær hanom lið ok mikinn hærr ser til fylgdar.

Rodolfr ferr i vilcinaland.

Riða þæir nu ibraut. visar margræivi Roðolfr læið ok lætr þat orð ifra fara. at hann skal riða væstr ispanialand. at bitðia þar Atila kononge kono. dottor konongsens þæss er þa reð firir spania.

En hann riðr hælldr ivillcinaland. huæria nott æftir aðra. skogalæið ok obygðir ok villistigu. en vm daga sova þæir ok æigi letta þæir sinni færð fyrr en þæir koma iriki Osanctrix konongs i æinn mikinn skog. skamt ifra konongs hæimili. Þar biðr Roðolfr margræivi þa sina fælaga gæra ser hus ok goð hærbyrgi ok flytia þanneg til sin af hæraðom alaunungu vistir ok þat sem þæir þurfu at hava ok osið biðr hann firir þæim raða. mæðan hann er ibrotto. ok sva gerir hann. Nu riðr Roðolfr abraut æinsamann ok kœmr til hirðar Osanctrix konongs ok torkennezt sem mæst ma hann. Nu gængr hann firir Osanctrix konong. þa er hann sat ivir matborðe ok hævir siðan hott ok hann kvæðr konongen bliðrlæga.

Rodolfr kœmr ivilcinaland oc kallaz Sigvrðr.

Konongrenn spyrr huatmanna hann er æða huaðan hann kom. æða huart hann vill. Han svaraðe ek hæiti Sigurðr ok sœke ek a yðarn fund hœrra ok bioða vil ek yðr mina þionosto. þa svaraðe Osanctrix konongr. þu mæler sem hynir varir ovinir. ok þu værir æigi olikr margræiva Roðolfe sendemanne Atila konongs. er drap af oss. vi. hundrað riddara æina nott ok launaðe oss sva gæver ok þa sœmd er ver gerðom hans hær. þa svarar Sigurðr. ækki kann ek roðolf þat þo hællzt. at mikit angr hævir hann mer gort sem margum atðrum ok markt niðings værk hævir hann vnnit firir sakir Atila konongs. En fœddr var ek ihunalande ok var ek mæð melias konunge marga daga igoðo ivirlæte ok er ækki þæss at dylia. at ek var amote yðr þa. allt er ek matta. mæðan er yðart osætte stoð. En þa er Atila konongr stæig til rikis ofirirsyniu ok sigraðezt amelias kononge. þa villda ek æigi þiona hanom ne ængi annara minna bræðra. þui at ek aflatte alla þa. En þa er Atila konongr sa ok fann at ek villda æigi hanom þiona. þa tok hann af mer æignir minar ok allt fe ok drap bræðr mina fiora ok sialfan mik gærðe hann utlægan. En ek gærða litlar hæmdir amote. drap ek. c. manna firir hanom ok sa ek nu ængan annan minn kost venna en soekia ayðarn fund. til miskunnar. slikrar sem þer vilið mer væitt hava. ok er nu mitt rað a ytðru vallde. vennter mik af yðr þæirar miskunnar at ek niota hælldr Melias konongs en ek gællda. bæðe af yðr hærra ok sva af yðare drotnengu hans dottor. ok æf hon væreæigi þa sva ung. er hon skildizt viðr sinn faður ok alla frendr. þa mindi hon fullgiœrla mik kænna. væra ek nu ok fullfus at þiona hans afspring ok yðare tign hælldr en engum hofðingia atðrum ok þæss villda ek guð bitðia. hærra sægir hann. at sua væreo margræivi Roðolfr komenn ayðart valld sem nu em ek komenn. ok at þer fengeð hanum ambunat sin svik ok illgærning.

Osantrix konongr tecr við sigvrði.

Þa mællte Osanctrix konongr. ek vennte goðr matðr sægir hann at græivi Roðolfr gæte sin firir þui at koma avarn fund. at sva bunu. En væl skallt tu hær komenn ok þær haf þu þok firir at þu draft mænn Atila konongs ok aller minir mænn skolu þer væl fagna. þa mællte Sigurðr æf yðrir mænn ero val viðr mik þa man mer þat gott þickia. ok val skal ek þæim þat launa. Nu duælsk Sigurðr par ihirð Osanctrix konongs tva vætr hann hævir siðan hott ok lezt miok væra oskygn. ok aþæssare stundu hævir hann ekki talat við junkfru. þat er hanom likar.

A þæssare stundu kœmr æinn konongr utan af Svauaralande sa hæitir Norðungr konongr. hann færr at bitðia dottor Osanctrix konongs þæirar er Erka hæitir ok hans mal flyttia margger goðer mænn. fram. junkfru sitr iæinvm kastala ok þar mæð hœnne systir hænnar bærta en kurtæisa ok margar aðrar tignarmæyiar mæð þæim ok æigi er karlmannum lofat til þæira koma. þa mællte Osanctrix konongr við Sigurð. þik hævi ek ræynt at goðom manne ok trulyndum. þik vil ek sænda ikastalan til junkfruar. at flyttia fram ærændi Norðungs konongs ok tala firir hœnne hans mal. kurtæislæga sem yðr skorter æigi kunnasto til. Sigurðr sægir at hann vill allt þat gera er konongr byðr hanom. Osanctrix konongr ok Norðungr konongr ganga utt aborgaruægenn.

Nv gængr Sigurðr afund konongsdottor ok biðr upplata kastalan firir ser. Ok er hon væit at hænnar faðer hævir hann þænneg sændan þa tækr hon val við hanom ok bað hann val komenn. ok erttu vitr matðr ok listugr. ok engi matðr kom sa fyr til mins faður. er sua listulæga hævir viðr ser faret sem þer. ok ekki foruitnazt þu flæira en þer er lofat. ok alldrigi komt þu fyrr avarn fund. þa svarar Sigurðr þat er ekki titt ivaro lande at matðr gange atal við junkfru næma konongr sialfr visi hanom sinna ærænda. ok ekki skolu utlænzker mænn tala við vngar mœiar ok þa hœværsko nam ek aunga alldre. En firir þui at konongren faðer yðar bauð mer læynt ærænde. við yðr at sysla. þa skolum vit nu talaz við. nockora stund.

Jvngfrv vill tala við Sigvrð.

Þa mællte jvnkfru. min sœta systir bærta. gak utt af kastalanom ok allar þer. ok skolum vit tvau æin inni væra ok skal hann sva sysla sitt ærænde. Sigurðr svarar takum vit annat rað. þat er kurtæislægra. gangu vit utt igrasgarð þinn ok latum alla sia mæga okkat viðrmæle. þa ma konongren sia ok aller aðrer huat vit hafumk at. en engan grunar huat vit ræðom ok engi væit huat rœt er. ok ængi matðr vil ek at illa mæle til yðar firir minar saker. af þui at marger ero illz fusir. til kvænna at mæla slættilæga ok værðr vannlæga at gæta sin firir illum tungum. Nu lætr junkfru taka tvau hœgende ok bæra utt igrasgarðenn ok mællte vist ert tu goðr drængr ok mikill skarungr ok hœvæskr matðr ok mikkla list namt þu aunga alldre. ok ganga nu utt igrasgarðenn ok sætiazt vndir æitt apalldrstré. þa var fagrt væðr ok solskinn blitt. Konongarner sitia aborgarvæggenom ok varo bliðir ok hyggr Norðungr konongr. at Sigurðr tale hans mal. en hann Sigurðr þikkizt æiga skylldare ærænde at sysla. ok værðr þui Norðungs konongs ekki getet.