Osið ferr i vilcinaland.
Nv riða þæir ivillcinaland við mikklu drambe ok hitta Osanctrix konong. konongr tækr val við sændemannum Atila konongs. þo at hann være ekki hans vin. Minnizt a at þat er ekki konongleect værk at spilla hofðingians sendemannum. þæim er bæra vaket ærænnde sins hærra. ok vill vita huat Atila konongr vill hanom. er hann sendir sva tigurlæga mænn til hans. Ok nv sægir Osið sin ærænde. at atila konongr vill fa hans dottor Erka. Osanctrix konongr svaraðe þæssom orðom. Atila konongr er ekki var vinr. ok ovingazt hævir hann við oss. ok mikin skaða hævir han gort villcinalandz mannvm. ok nu er þæss engi von at ek gifta hanum dottor mina. en væl skulu þer komner mæð oss. mæðan þer vilið dvalst hava. Osið for nu hæim ok sægir konongenom. sitt ærænde ok engi von er at Atila konongr fae dottor Osanctrix konongs. ok þæss gætr Osið at alldrigin sa hann sinum augum iamfriða mæy. sem Erka konongsdotter ok þar nest bærta en kurtæisa hænnar systir.
Vm margreiva Rodolf.
Borg æin hæitir bakalar þar ræðr firir æinn margræivi sa hæitir Roðolfr. mikill hofðingi ok vin Atila konongs. Nu sender atila konongr margræivanom orð. at hann skal koma afund hans ok sva kœmr hann. Atila konongr sægir at hann vill sænda hann ivillcinaland. at finna Osanctrix konong. mæð þæim hætte sem fyrr. sende hann osið frenda sinn. at hann biði dottor hans hanum til handa. Ok æf hann vill enn æigi var orð hæyra æða hælldr sviuirða þau sem fyrr. þa sægið hanom at hann bui sik ok allt sitt riki ok alla sina mænn ok monum ver koma a hans fund ok hæimta miskunar laust af hanom allt þat er ver bæiðumk. Margræivinn er nu buinn ok hans færð varð væglæga ræist. sem maklæct er engi matðr var sva lovaðr miok. iallu hunalande. vm allan riddaraskap ok hœværsku ok kurtæisi. Hann færr ok mæð hanom. lx. riddara. ok marga svæina. hann kom ivillcinaland. er hanom væl fagnat huær sem hann færr. Osanctrix konongr fretter til hans færðar ok lætr bua væizlu imot hanom. ok væl vill hann fagna þuilikum hofþingia. sem margræivinn er. ok þa væizlu þiggr hann mæð vinatto þægar er hann kœmr farande.
Vm greifa Rodolf.
Nv bær Margræivi roðolfr upp sin ærænde ok sægir at enn riki Atila konongr hævir hann þænneg sæntt ok vill hann at þer sendeð hanom yðra dottor ser til drottnengar ok mikinn soma mæð sem væra a mæð konongs barne. ok þæt ætlaðe atila konongr at ek mindi æigi invirðilæga hans ærænde frambæra ok ek mindi varla dirfð til hava. en þat skal þo æigi væra. Hann sagðe sva æf þer synið hanom hær nockors lutar i. þa man hann til koma mæð hær sinn. hann hævir mikinn styrk ok mikit riki. aflat mæð sinu sværði. ok væl hævir hanom allt tækizt ok er bættra viðr hann vinatto at æiga. en vanndræðom at skipta.
Osantrix konongr svarar margreifanom.
Þa svaraðe Osanctrix konongr. mikill hofðingi ert tu Margræivi ok miok ert tu lofaðr ok kurtæislæga flytr þu ærænde þins hærra. En undarlæg liz mer orðsendengen Atila konongs ok kynlæct er þat er hann þorer at bitðia dottor minnar. þar sem hann hævir sæzt i þat riki. er ek amæð retto til at kalla. ok af þui æinu hævir hann micklazt er Melias konongr atte minn magr. ok þo at vit værem osattir þa em ek þo skylldugr til at hæmna hans æf ek mætta. Enda er ok Atila konongr ekki sua mikillar ættar sem varir frendr ruzciamænn. Ok þat er hann het mer ofriði ok minum mannum þa ræðomk ek þat allz ekki. ok þo at hann hallde vandræðom við oss. þa munu aller sægia at hann hævir rangare ok at oflitlu hallde kœmr oss var enn mikkli styrkr. æf Atila konongr tækr af oss nauðgum þæt er hann bæiðizt. illa myndu þui varir ætmænn hyggia æf þæir vissi firir at sva skilldi fara. En væl skolu þer mæð oss komnir mæðan þer vilið dvæliazt. en ekki venter mik at yðart ærænde verðr þat sem þer vilið. Margræivin vil nu hæim fara. en Osanctrix konongr læiðir hann goðom giafum ibrott. Færr hann afund Atila konongs ok sægir hanom at engi von er at hann fae hans dottor.
Atila konongr svarar.
Ða svaraðe atila konongr læigiande. latvm hafa barn þat er bræckar hæyri aller minir mænn ekki skolum ver ræðazt at koma ivillcina land. ok huar ridare bui sik. ok skolu hynir nu freista sin. ok villcinamænn. skolu vita huart ver kvnum at lita var suærð ipæira bloðe. æða þola kolld iorn ivaro hollde. nv sem fyrmæir. ok þat boð skal koma ihuærs manz hus. aðr en hæim snvim ver. Nu samnazt saman mikill hær manna. ok er nu Atila konongr albuinn at riða i villcinaland a hændr Osanctrix konunge | ok hæfna þæirar suivirðingar er hann fær æigi dottor hans. Lyftir hann nu hærrenom ut af Susat ok hævir hann. vi. þushundrað riddara ok mikinn hærr þænn er særgænter hæita. Nu kœmr hann ivillcinaland ok brenner ok bæler. fær odde ok æggiu ivir allt landet. brytr kastala ok brenner tún.
Osantrix konongr spyr ofrið.
Osanctrix konongr spyrr nv þænna ofrið ok sendir boð isioland eptir skatkononge sinvm asplian ok hans bræðrom risunvm ok vill hann þa framme. hava mæðan hann byr sinn hærr. Ok nu mœtazt þæir ok værðr þar mikil orosta ok mannspæll. Asplian konongr hævir litit lið. en þo træystir hann þui val firir sakar brœðra sina. Viðolfe mittumstangan var nu lausum slægit. mæð sina mikklu iarnstong ok hann lystr abaðar hændr dræpr bæðe mænn ok hæsta ok mæiðir allt er firir værðr. Ok værða þæir nv ofliði borner ok flya liota þæir. en aðr hava þæir drepet. v. hundraðz riddara. æinsaman hævir viðolfr drepet. iii. hundrað. Ok nv rækr Atila konongr þænna flotta langa læið ok dræpr mikit af ok sva læypr viðolfr mikit. at engi hæstr fær tækit hann. lystr aftr stundum ok væitir margum skaða ok kœmr nv asplian konongr ok brœðr hans risarner afund Osanctrix konongs ok sægia hanom at þæir hava enga viðrstaðu mote Atila kononge firir fiolmænnez sakar liðs hans.
Osantrix konongr fer með her sinn moti Atila konongi.
Eftir þat fær Osanctrix konongr mæð mikin hær mote Atila kononge ok æigi hævir hann minna lið en. x. þushundrað riddara ok mikinn hærr annan. Nu hittazt konongarner. ok værðr þar orosta mikil ok manskœð ok gængr nv viðolfr mittumstangan. sua fram ok hans brœðr. at þæir læmia ok dræpa allt þat er firir værðr. ok nu liðr adagen ok værðr nu Atila konongr ofliði borenn ok flyr nu at kvælldi askog nokkorn ok ivir skogenn. En osanctrix konongr rækr flottann til skogsens en skogr er mikill ok er hann aflattr at riða. askogenn. anattarþele ok firir þui lætr hann ræisa landtiolld sin ok hærbuðir ok byr þar vm nottena. En Atila konongr liggr annanvæg skogsens mæð sin hær þann er vndan kom.