Bókastaðir

Hertnið konongr skipar riki sinv sem hann vill at standi eftir sina daga.

Nv er hærtnið konongr gamall at alldre ok þungfœr. at stiorna riki. þa sætr hann Osanctrix son sin ivir allt villcina land ok gæfr hanom konongs nafn. Ilias syni sinum gæfr hann jarlsdom igrecia. Ilias iarll er rikr matðr ok mikill kappe. Nv fær hærtnið konongr sott ok iþæiri sott þa stæmnir hann þing af enom vittraztu mannum. hann skipar rikinv ok sægir hværsu standa skal eptir hans daga æf hann ma raða. Þa gæfr hann Valldemar syni sinum konongs nafn ok sætr hann konong ivir rvzcia land ok pulærna land ok nesta ræðr hann austrhalfum hæimsens flæst allum. Litlu siðar andaðez hærtnið konongr mæð fullum væg sinum. en synir hans stiorna rikinu langa æve.

Her segir ifra nordian konong oc hans svnvm allvm.

Nordian konongr er nu isiolande ok a fiora sunu. æinn hæitir Avæntroð en. ii. Etgæir ok enn. iii. Asplian. fiorðe Viðolfr. aller ero þæir risar. at afle ok æðrli. Ok þa er Norðian konongr fær bana sott ok Osanctrix konongr spyrr hans anlat til sanz. þa stæmnir hann svnum hans afund viðr sik ok lætr þa sværia ser æiða. ok siðan gæfr hann asplian enom ællzta bræðr þæira konongs nafn. ivir þui riki er att hafðe Nordian faðer þæira. ok þæsso allu vndu þæir bræðr. Viðolf er sva mikill orðen broðer þæira. at oxl hans bær æigi lægra. en annara risanna bræðra hans færr hafuðet. æinn er hann ok stærkare en tvæir aðrer risarner bræðr hans. Sua er hann illr viðrskiptis. at ænguetta þyrmir hann. Ok er asplian konongr broðer hans sa at hann var illr viðrskiptis. þa þottezt hann vita. at æigi minndi lyða at hann fœre sva laus vm allt. ok lætr sla jarnræckændr vm hals hanom ok fœtr. ok alldrigin skilldi hann laus væra næma ofriðr se æða til bardaga skyli fara. Konongren Asplian lætr sla hanom æina digra jarnstong ok mikla. ok þar fylgir æin mikil jarnfæstr. En Ætgæir ok Avæntroð bræðr hans skylldu bæra jarnstong hans. huært er hann færr. Ok alldrigi kœmr hann or sinvm bæivm. næma iorostom ok firir þui er hann kallaðr viðolfr mittvmstangan. Etgæir broðer viðolfs hævir ækki annat vapna næma atgæir digran slægin af jarne.

Nv ero þæir bræðr skattgilldir vndir Osanctrix konong ok hæimilir iallar nauðsyniar. Osanctrix konongr er kvangaðr ok hans drottneng hæitir Juliana. Hænnar faðer er sa konongr er Jran var kallaðr. hann reð firir þæim landum er annat het skrottan en annat brittan þat er nv kallat England ok Skotland. Dottor atto þau Osanctrix konongr ok Juliana. hon het Bærta en kurtæisa. Jvliana fær bana sott ok harmaðe þat huar matðr.

Her segir fra melias konongi.

Melias het konongr hann reð firir hunalande. hann var allra manna rikaztr ok milldaztr ok mikilataztr. Han a æina dottor er hæitir Oda hon var allra mæyia friðazt ok hœværskazt. ok hænnar hafðu beðet hinir rikazto konongar ok hærtogar. ok konongren faðer hænnar ann mæynni sva mikit at engum manne vill hann hana gipta. Osanctrix konongr er nv kvanlaus ok vill nu firir læitazt. hann hævir spurn af þæssom rika konovge Melias ok hans dottor. Nv sendir Osantrix konongr. xii. riddara sina væl buna ok fæk þæim ihændr bref mæð jnsigli. ok þætta stoð arítinu. Osanctrix konongr villcinalandz sendir orð Melias konovge enom rika ok hinum skæggsiða. Sact er oss af yðru riki ok frett hafum ver af yðare dottor. at hon er allra mæyia friðazt. Nu vilium ver bitðia hænnar oss til æiginnar kono. ok sænd mæð hænne sva mikit fe sem hænne sœmer. ok mer sænd þu gull ok dyra gripi til sœmdar. Haveð þok af oss ef sva gere þer. Ok æf þer afrœkezt varar orðsenndingar. þa munu þer fræista huarer. ver æða þer. æigum mæira afl.

Her segir fra sendimannvm Osantrix konongs.

Þæsser riddarar koma ihuna land ok þui nest iborg þa er Melias konongr var i ok ahans fund. Syna hanom bref ok jnnsigli. Ok hann tækr við ok ser ivir ok þikkir vndarlæct er Osanctrix konongr hævir hanom bref sentt er mæð ængri vinatto hafðu þæir jarðtæignir gortt sin amilli. las bref ok mællte siðan. Undrumk ek þæsse orð. Osanctrix konongs at ek muna mina dottor sænda hanom er æigi villda ek gifta enom rikazto konongom æða hærtogom. þæim er æigi hafðu minna riki en hann. ok mællto til litilatlæga ok kurtæislæga ok synniaðom ver þæim. Nv mæler Osanctrix konongr til þæssa raðs mæðr drambe ok hygs hann munu skælva oss mæð hær sinum. En mæiri von þikkir mer at hanom bere fyrr annat til handa. en þat. ok lætr taka sendemænnena ok kasta idyflizu ok sægir at þæðan skolu þæir biða Osanctrix konongs.