Konongr hævir raðet firir RUZCIA lande iaustrriki. hann hæitir hærtniðs konongr hann var rikr konongr ok viðfrægr ok orosto matðr. En osætte gærðezt. amillim villcinus konongs ok hærtniðs konongs ok þa er villcinus konongr hævir raðet firir villcinalande. vm riðar saker. þa oroaðezt hugr hans. ok stæmnir ut ovigum hær ok otal riddara ok annara hærmanna. riðr nu i pulærna land. en þæt liggr til rikis hærtniðs konongs. ok aþær margar orostor ok storar. Hærtnið konongr hævir frett. at ofriðr er komenn i hans riki. ok byðr ut ovigan hærr af ruzcialande. hann hafðe mikit riki at stiorna. annat en ruzcia land. Hann amikit af girklande. ok vngaria lande ok nalæga hævir hann oll riki vnnit austr til hafs ok mikit firir austan haf. Hærtnið konongr a ok æinn broðor sa hæitir hirðer. Villcinus konongr amargar orostur ok storar. við hærtnið konong ok hans broðor. ok fær Villcinus konongr iamnan sigr a rruzcie mannvm ok æyðir allt land þæira. þar sem hann færr. ok oll sma lond hæriar hann ok æyðir. Ok þar æptir flytr hann hærrenn upp i rruzcia land ok vinnr þar margar storborger. þar vinnr hann ok þæssar borgir. smalizku kiu ok palltæskiu ok æptir þat riðr hann inn i hollmgard. er hafuðstaðr er hærtniðs konongs. Ok nv værðr horð orosta firir utan borgena þui at hærtnið konongr þœysir vt ovigum hær or borgenne. En Villcinus konongr tok amote ok hafðe sigr. sem fyrr. ok þær fællr hirðer broðer hærtniðs konongs ok mikill hærr af rruzcia mannvm. ok halldet til laustnar. ok vinnr hann nv borgena. ok þar tækr nv Villcinus konongr sva mikit gull ok silfr ok dyra gripi. at alldri fyrr. fæk hann þui likan sigr. iængri hærfærð. siðan er hann hæriaðe fyrsta sinn. sætt Vilcinus konongs ok hertnið konongs.
Nokkore stunndu siðar sættazt þæir Villcinus konongr ok hærtnið konongr. þui at hærtnið konongr þottezt þa væra afl litill. mote at standa Villcinus konunge. latet þa broðor sinn ok mikinn luta af eno bæzta liði sinu. Ok var mæð þæssomote sattmalet gort at hærtnið konongr skal sialfr hava riki sitt ok gællda Villcinus konunge skatta af. mæðan bæggia þæira lif være. Villcinus konongr færr ivir allt rruzcialand ok kannar landet ok tækr skatta ok læggr vndir sik.
Vm Nordian son Villcinvs konongs.
Villcinus konongr a æinn son sa hæitir Nordian hann er mikill maðr firir ser ok manna friðaztr ok stærkaztr. harðr ok grimr ok singærn af fe ok ovitr hia þui. er hans firirmænn hava veret. ok firir þa sok fæk hann ekki sua mikit lof sem hans faðer. Ok nv fysizt hann Villcinus konongr at fara hæim isitt land. ok liggr við land æitt sinni. aruzcia lande. ok gængr konongr upp aland fra skipum sinvm. æinnsamann. ok varð engi hans manna hia hanom staddr. næma hann æinn var þærr iskoge nockorum. Ok þa ser hann iskogenom æina kono ok syndizt hanom konan æinka frið. Konongenom rann hugr til hænnar. ok gæk þægat sem hon var firir. En þætta var æigi annur kona en þat sem kallat er sækonor. en þat a æðrli isio ok synizt alande sem konor. En villcinus konongr læggr hændr vm hals hænne ok kyssir hana ok kræistir. ok lægsk hann ihia hænne. Hans mænn foro at læita hans. þæir sem fylgia skylldu hanom. Ok þui næst kom hann til skipa ok sinna manna. Ok þægar er byr gæfr þa sigla þæir ihaf. ok þa er þæir varo langt ihaf fra lande. þa kœmr upp hia konongs skipinu æin kona ok tækr iskip...
Atte hæima liggiande. ok hann hafðe sparat við sina hofðingia ok riddara. ok ser hann nv. at tvæir koster ero firir hende annatvæggia at flyia rikit. æða fa osigr. Ok firir þa sok tækr hann þat rað. at hann gængr amiskvn hærtniðs konongs ok fællr til fota hanom ok aller hans mænn. Ok þa kallaðe hærtnið konongr alla raða mænn sina. atal viðr sik. ok taka aller villcina mænn ser grið. Ok nu mæler hærtnið konongr. Hinn riki villcinus konongr yðar faðer Nordian konongr gerðe miskunn viðr mik. en þo braut hann vndir sik vart riki ok atte þær margar orostor. ok let ek minn broðor firir hanom. ok komom ver ahans valld ok vart riki. sva sem nu ero þer avaro vallde. En nu firir þui at ver fængom þa grið ok sætter af hanom. þa skalum ver þer þat val launa. ok skallt tu grið hava. en allt yðart riki skal vndir oss luta. at lyðrni ok skattum. En þer skalvð oss æiða sværia ok hallda siðan mæðr trygð ok dræng-skap. þæsse sætt er fastlæga bundin. milli hærtniðs konongs ok Nordian konongs. Ok aðr en hærtnið konongr fare hæim or þæssare hærfor þa læggr hann vndir sik allt villcina land. En Nordian sættr hann konong ivir þui lande er ver kallum nu sioland. Ok ekki hævir hann mæira af sinu riki. ok a þæssa læið stændr rikit langa æve. Hærtnið konongr a. ii. svnu. hæitir en ælldri Osanctrix. en hinn yngri Valldemarr. ænn a konongren æinn son mæð frillu sinni. en sa er næmdr ilias. ok er sa friðr matðr ok kurtæislægr.