Bókastaðir

Her coma broðor synir Osantrix konongs til hirðar.

A þæssare tið koma til Osanctrix konongs tuæir vngir mænn hans broðor synir.

Synir Jlias jarls af Grecía. Hærtnið ok Osið. Hærnið var þa. xi. vættra. en Osið var. x. vættra. Hærtnið var allra manna kurtæisaztr ok bæzt mæntr vm allan riddaraskap sva vitt sem villcinaland er. Osanctrix konongr sætr hann hofðingia jnnan hirðar ok gaf hanom iarls nafn. sem Jlias faðer hans var. ok er nu hærtnið mikill matðr firir ser. ok fæk hanom mikit lén ivillcinalande.

Nu spyrr Osanctrix konongr at hans riddarar varo iiarn sættir ok nu a hann tal við sina hofðingia ok riðdara. Ok sægir huærsu sivirðlæga Melias konongr hævir tækit hans ærænde ok mænn hans sætta iiarn ok idyflizu. Sægir hann ser þat kærazt at fara a hændr Melias konscrete ok hæfna þæirar skæmdar. Þa svaraðe æinn vitr matðr konongenom hærra sægir hann. takum annat rað. væra kann at Melias konunge þætte æigi sva tigurlæger sendemænn. sem væra ætte. Sendeð til hans yðarn frenda Hærtnið iarl ok mæðr hanom Osið hans broðor ok marga aðra kurtæisa riddara mæð storom gærsimum ok mikklum fearlutt gulli ok silfri. ok þa mun hann þæim væl fagna.

Raðagerð Osantrix konongs.

Þæsso samþykkizt Osanctrix konongr ok ræðer hann þætta firir frenda sinum hærtnið ok sægir at hann vill sænda hann ihunaland afund Melias konongs. ok hann sægir sik buinn væra huart sem hann vill hann sænt hava. Nv lætr Osanctrix konongr bua færðena ahuærria læið er kurtæislægazt ma. þa lætr ok konongren Osanctrix bref rita mæð þæssom orðom. Osanctrix villcinalandz konongr sender orð Melias hunalandz kononge. þer haueð illa gortt ok oviröilæga tækit varom orðsendengom en þer mætteð sua hava gortt at huaromtuæggia være vægr at. ok tækit varom orðom val ok hofsamlæga. En nu hævir þu gortt oss skomm ok varom mannvm er þer sættuð þa iprisund. Nv sændom ver til yðar hærtnið iarll varn frenda ok mæðr hanom hans broðor Osið. mæðr samvm ærændom ok hinir foro. Takeð nu val við þema ok sendeð oss þat sem ver bæiðumk. Ok æf nockorn lut skorter a. þa æigu ver at hæfnazt ayðr ok vareð yðr ok buið sem bæzt borger yðrar ok kastala.

Hertnið kœmr ihvna land.

Fara þæir nu ok koma afund Melias konongs ganga firir konong bær hærtnið iarll fram ærændit ok talar langa talu ok morg fogr orð ok snioll. Konongren tækr þunglæga male hans. þa tækr hærtnið iarll æitt purpura klæðe ok tvau mikil borðkærr af rauðu gulli ok æitt mikit landtiælld gullsaumat ok sægir at Osanctrix konongr vill þæssa luti gæva hanom at þat verðe hans ærænde sem hann vill. þa svarar Mælias konongr Ambater minar sende ek hanom amote þæssom sendengom. en æigi venter mik at Osanctrix konongr fae mina dottor at fekaupum. Have hann mikla oþok firir sitt ærænde ok sva þu er frambart. lætr taka jarllenn ok Osið hans broðor ok sætia iiarn sem hina fyrri ok sægir at þaðan skolu þæir biða Osanctrix konongs.

Osantrix konongr lætr bva her i hvna land.

Nv spyrr Osanctrix konongr þæssi tiðænde. Hann lætr bva mikinn hær ok aðr en hann flyti þænna hær vtt af sinv riki. þa talar hann firir mannvm sinvm ok sægir at enn riki Melias konongr hævir tækit mina riddara ok sætta idyflizu. ok nv sænda ek tva Mina broðor syni til hans. ok gerðe hann slict hitt sama viðr þa. En huassu fæ æk þæssarar sivirðingar hæmt æða huassu vili þer nu mæð fara Minir vinir raðæð mer nu hæillt. Nu er Melias sua rikr ok mikill firir ser. at likare þikkir mer at ver faem engan sigr. næma ver sætim nockot rað firir. Nu svaraðu hans hofðingiar ok baðo hann sva firir sia sem bæzt byriaðe. en þæir sagðuzt hanom hæimilir ok fægnir vilia hanom fylgia iallar nanðsynniar huart er hann vill fara.

Osantrix konongr gerir boð eptir risvm.

Þa gerir Osanctrix konongr boð isioland til Asplians konongs ok mællte at hann skilldi sænda hanom sina brœðr þria Etgæir ok Avæntroð ok vidolf mittvmstangan ok alla þa mænn er hann mætte. Osanctrix konongr færr við hærrenn ok þæir komo til hans þa risarner brœðr Asplians konongs ok mikit lið annat. Etgæir ok Avæntroð læiddu viðolf mittumstangan ok baro þa ena digru jarnstong ok jarnfæsti huart sem þæsse hærr fluttiz.

Osantrix konongr kœmr i hvnaland.

Osanctrix konongr bað alla sina mænn kalla sik friðrik konong ok alla biðr hann læyna sinv retto namne ok sva gæra þæir ok nu biðr hann þa vœra friðrsama ok ængu granda þo at þæir kome iovina sinna land. ok þæsso værðr fylgt. þæir koma nu ihuna land ok flytiazt þæir ivir landet. mæðr þæim friði. at engi er sua litill firir ser ok fakunnigr ok sœker hann afund þæssa ens uttlænzka hofðingia. at hann man æi til goðra lycta læiða hans mal. Ok viðr þætta værðr hann vinsæll ok ris af hanom gott orð. ok huær er frægn til hans þa fær ahans fund at føra hanom vistir ok vín. en hann gæfr huærivm halfu mæira firir en vært se. Hann sæker til borgar þæirar er hæitir villcina borg. þat var hafuðstaðr Melias konongs. þa sende friðrik konongr fram orð firir ser. til Melias konongs ok vill uita. æf hann vili læyfa þæim at riða inn istaðen. ok sægir at þæsse hærr er komen af spania lande. ok þæir vilia niga ok þiona Melias konønge.

Vm viðræðo Osantrix konongs oc Melias konongs.

Melias konongr svarar ok sægir. at han kvaz ræðazt sva mikit lið at þæir muni suikia hann. Friðrik konongr svaraðe at þæir munv þat þui siðr gæra at suikia hann. at hann lezk buinn at læggia sit lif ok sinna manna við konongsens lif. Nv mæla þætta marger mænn firir Melias konønge. huassu væl hann hævir flutt hær iammikinn iokvnnu lande ok huassu margir mænn hafðu sott a hans fund ok huassu val hann hafðe við alla gortt. ok leto þæss mæstar vaner at Melias konønge minnde mikill styrkr at hanom væra. En hann tok miok tomlæga ok let miok tortryglæga.

Borgar menn sialvir lova Osantrix inn at riða i staðinn.

Borgar mænn sialver æigu tal sin amilli ok sægia at staðr þæira mun ækki væslaz við. at iamgoðr hofðingi kœme i hælldr margum lut at rikare. Ok at raðfysi sialfra borgarmannana. riðr friðræk. inn istaðen. ok þa er Melias konongr ser þætta lið. þa ottazt hann miok ok villdi mykklu hælldr at æigi hæfði sia hærr komet innan borgar. Friðrik konongr riðr til konongs hallar ok aller hans mænn. Þa mæler friðrik konongr til Etgæirs ok Avæntroð at þæir skylldu gæta viðolfs mittumstangan ok bað þa vti standa firir hollenne. Friðrik konongr gængr inn ihollena ok margum riddarom atðrum mæðr hanom ingangande kœmr hann firir hasæte Melias konongs ok fællr til fota hanom ok mællte. Þu enn riki Melias konongr gær sva væl firir þinn konongdom tak við mer. ok vil ek gærazt þin matðr. Ok þui sotta ek a yðarn fund. langa læið væstan af spania. at ek vill bioða yðr mina þionosto.

Vm viðrœðor þeirra Melias konongs oc Osantrix konongs.

Melias konongr svaraðe otryglæg lizt mer þin þionosta ok hana vil ek æigi þiggia. ok opok have þer firir þat. at þer þæystuð sva mikklum hærr ivarn stað. þa mællte Friðrik konongr at læyfi borgarmanna ræið ek iborgena. ok þat hugða ek at yðr firir þœtte æigi var hingatkvama. ok æigi hæfða ek hingat komet æf ek vissa at yðr þœtte værr. Ok ængum villda ek at mæin stœðe af vare kvamo hær æf ver mættem sialver raða. Gær nu sva væl goðe hœrra. at tak mik upp hæðan sem ek ligg. ok aller minir mænn skalu yðr þiona. þa mællte Melias konongr vist man ek æigi taka við þer. Ef þer ok mer værðom osatter ok skil oss a. þa er sva mikit yðart fiolmænne komet ivarn stað ok ække late þer yðart mal firir oss. ok ma ek firir þui æigi trua þer ok æigi vil ek þin orð længr hæyra.