Fra andlati Helysevs.
J þenna tima tok hinn agiæti Helysevs spamaðr sott. þa er hann læiddi til bana. Joas konvngr af Samaria for þa at vitia hans. Hann sytti oc svarkaði miog fyrir honvm. Minn kæri faðir sagði hann. þar ferr nv styrkr ok stiorn Jsraels ef þv dæyr. Helysevs bað hann taka boga oc avrvar oc færa ser. Joas gerði sva. þa lagði konvngr sinar hendr a bogann. en Helysevs sinar hendr a hans hendr. oc bað hann opna glvgginn avstan a herberginv oc skiota þar vt avr af boganvm. Konvngr giðrði sva. þa mællti Helysevs. Skæyti drottins oc sigravr moti Syris. þv mannt striða a Syrland oc vinna borg Japhet. Tak enn avrvar oc skiot sem tiðaz iorðina vt i gegnvm glvgginn. Konvngr skavt þrim avrvm oc lætti þa af. Guðs manni mislikaði er hann villdi æigi længr skiota oc mællti til hans. Nv draptv mikinn sigr or hendi þer. hefðir þv sendt vt. v. skæyti ę ða. vi. ę ða öll. vii. þa mvndir þv fvllkomliga sigraz oc vinna Syriam allt vndir þik. Enn nv mant þv væita þrim sinnvm Syris mikinn slag. þi næst andaðiz hinn agæti Helysevs gvðs vin. oc væittv Gyðingar honom sømiligan gravft at sinvm sið. Enn miklv siðarr a þi sama ari heriaðv nockorir vikingar af riki Moab a Jsraelitas. þa tok sott æinn bondi i Samaria oc andaðizt. Enn frendr hans forv með likið oc ætlaðv at grafa. þa sa þeir vikingaliðil oc vvrðv sva hræddir. at þeir þorðv æigi at flytia likamann þangat sem þeir höfðv ætlat. ok kastoðv niðr i ę ina likagröf. er opin var fyrir þeim. oc gæymðv æigi hvat vndir var. Enn þar vorv fyrir bæin Helysei. Ok þegar sem likami hins andaða kom niðr oc snart bæin hins helga mannz. þa lifnaði bondi oc reis vpp alh ę ill af verðlæikvm Helysei.
Fra Amasias syni Joas. capitulum.
Azael Syrlandz konvngr kvalði akafliga Jsraels lyð alla daga Joachaz konvngs. sem fyrr var sagt. en siðan miskvnnaði drottinn þeim sakir sattmals þess er hann setti við fyrri feðr þeirra Abraham Ysaac oc Jacob. oc villdi æigi enn dreifa þeim ę ða með öllo af hendi kasta. Do þa Azael konvngr i Syria. enn Benadað son hans tok riki eftir hann. For þa Joas son Joachaz. iii. herfarar i Syrland oc barðiz við Benadað oc hafði i öllvm þeim sigr oc vann aftr vndir Jsrael af Benadað konvngi allar þær borgir. sem faðir hans hafði hertekið af Joachaz favðvr Joas.
A ðörv ari rikiss Joas sonar Joachaz konvngs Jsraels tok riki Juda Amasias. son Joas konvngs af Hiervsalem. Þa var hann halfþritogr at alldri oc rikti [. xx. oc. ix. ar i Hiervsalem. Amasias geck fram allan rettan veg i avgliti drottins oc þo æigi til fullz við dyrðarfvllan Dauid konvng. helldr fylgði hann fotsporvm feðr sins oc æigi eyddi hann hæða fornfæringvm. Oc þegar hann hafði öðlaz riki. tok hann af lifi þa vando svikara sem drepit höfðv favðvr hans. enn lifa liet hann sonv þeirra eftir. sem drottinn bavð i lavgmali Moysi. at æigi skylldi feðr dæyia fyrir syni oc æigi synir fyrir feðr helldr hverr sem einn i sialfs sins savk.
Amasias atti bardaga i riki Edom þar sem hæitir Vallis salinarvm. oc felldi af Jdvmeis. x. þvsvndir manna oc feck vvnnið berg eitt aggeta gott vigi. Þvi næst sendi hann orð Joas konvngi Jsraels. at hann skylldi koma til motz við hann. Enn Joas tok þi [helldr stykt oc storliga. hann sendi þess hattar haðvngarorð i moti. Þat vvirðvliga tre segir hann Libani er cardvvs heitir. þat kǫvllv ver þistil. sendi orð cedro Libani sva segiandi. Gief þv dottvr þina syni minvm til eiginkono. Enn öll skogdyr af Libano forv til at fottroða cardvvm. Nv veit ek. at þv sterisz i hiarta þino fyrir þat er þv hefir mikinn slag væitt Jdvmeis. enn ek ræð heillt. Vert þv hallzsamr þinni sömð oc sit kyrr i hvsi þino. eða hvat skaltv egna til illz oc hafa þik i haska oc allan lyð yðvarnn. Amasias gaf ser ecki vm orðsending Joas. Enn litlo siðarr for Joas með her i riki Jvda. oc fvnndvzt þeir Amasias þar sem heitir Bethsamis. oc reðv Jsraelite þegar a til bardaga. Enn allt lið flyði fra Amasia. þat er eigi var drepit. enn hann sialfr hanntekinn. oc flvtti Joas hann með ser til Jorsalaborgar. Joas barðiz a borgina oc bravt niðr mvr Hiervsalem vm. cccc. alna. Hann tok at herfangi allt gvll oc silfr oc öll ker i templo domini oc allar konvngs fehirðzlvr oc for við þat aftr i Samariam. Jeroboam het son Joas.
Joas varð sottdavðr i Samaria oc þar grafinn hia konvngvm Jsraels. Enn Amasias lifði siðan. xv. ar. Hans son het Azarias eða Ozias. A. xv. ari rikis Amasie tok riki yfir Israel Jeroboam son Joas oc rikti i Samaria eitt ar oc. xl. oc var illr konvngr. A ofanverðvm davgvm Amasie konvngs barv borgarmenn i Hiervsalem ráð sin saman i mot honvm. enn konvngr flyði vndan i þann stað er Johis heitir. Þeir sendv þangat eptir honvm oc drapv hann þar. oc fluttv hann davðan a hestvm aptr i Hiervsalem oc grofv hia feðr sinvm i Dauids borg.
Drottinn sa nv mikla kvavl oc avðn Jsraels lyðs. er hann þolði af Syriss. Ok þi at drottinn gvð villdi eigi með ollo þat folk lata eyðaz. þa eflði hann Jeroboam son Joas konvngs af Samaria. þo at hann veri illr. sva at hann vann mikit riki með hernaði vndir Gyðinga allt fra Emath oc til eyðihafs hins mikla oc Damaschvm.
Er Ozias vard konungr yfir Israel.
At davðvm Amasia konvngi Jvda varð þat rað allra hofðingia Jvda með sampycki alþyðv at hafa til rikiss Oziam son Amasie. þat var a. vii. ari oc. xx. rikiss Jeroboam konvngs Jsraels er Ozias tok konvngdom. þa var hann. xviii. vetra. hann rikti i Hiervsalem. ii. ar oc. l. Moðir hans het Jecelia kynivð af Hiervsalem. Ozias var þeckr gvði. þi at hann geck fram i gvðs avgliti með goðvm verkvm allan feril feðr sins. enn þo nam hann eigi af enn. at lyðrinn fornferði i hæðvm borga. Hann vann vndir riki Jvda þa borg. er hæitir Ahila. ok ræisti hana vpp oc eflði. er aðr var niðr fallin. Jeroboam konvngr Jsraels son Joas varð sottdavðr a fyrsta ari hins fimta tigar rikiss sins oc var iarðaðr i Samaria hia konvngvn Jsraels. Hans son het Zacharias. Oziam konvng slo drottinn vanheilso. sva at hann var likþrar allt til davðadags. hafði hann þa ser einn herbergi. Enn Joathas son hans stiornaði holl oc hirð feðr sins oc domði allan lyð Jvða. A davgvm Ozie birtvz agietir spamenn Ysaias Osee Johel Amos Abdias Jonas Micheas.
A. viii. ari hins fiorða tigar rikiss Ozie tok konvngdom yfir Jsrael Zacharias son Jeroboam. oc rikti. vi. manaði i Samaria oc var slikt illr sem hans frendr oc forellrar. Einn af hans hofðingivm er het Sellvm reis vpp i mot honvm. Hann geck at opinberliga oc drap Zachariam oc settiz i rikit eftir. þi at nv var þat fyllt. sem drottinn hafði heitið Hiev. at hans kynsmenn myndi rikia yfir Jsrael til fiorðv ættar. Sellvm rikti einn manað i Samaria. þa kom sa maðr i Samariam. er Manahen (het) son Gaddi af Thersa. Manahen drap Sellvm i Samaria. Hann vann oc þa borg er het Tharsan oc drap hvert mannzbarn. sem i var borginni. sva vanhæilar konvr sem karla. þi at þeir villdo æigi lvka vpp borgina fyrir honvm. Hann tok riki yfir Jsrael i Samaria a. ix. ari hins. xl. Ozie. oc rikti. x. ar. Hann var illr oc vhlyðinn gvði sem Jeroboam forðvm son Nabath. er i synðvm hafði með ser allt Jsraels folk. J þann tima kom Phul Serkia konvngr með mikinn her i riki Jsrael. Enn Manahen gaf honvm til þvshvnd pvnda silfr. at hann veri honvm at fvllingi oc styrkti riki hans en heriaði æigi. Lagði Manahen þetta fegialld a alla höfðingia Jsrael oc ferika menn. at hverr þeirra skylldi greiða Serkia konvngi. l. skillinga silfrs. at þessv s ę ttvz þeir. Hvarf þa Phul aptr i Serkland oc dvalðiz ecki lengr i Gyðingalandi. Manahen varð sottdavðr. son hans h ę t Phæceia.
Fra Joathas syni Ozie.
359. A fimtoganda ari rikiss Ozie konvngs rikti Ph ę ceia son Manahen. ii. ar i Samaria yfir Jsrael. oc var slikt illr sem faðir hans. Einn hans hertogi er nefndr Phace son Romelie. þess mannz er sva het. Phace r ę isti strið i mot Pheceia konvngi oc drap hann i Samaria i hæsta tvrn konvngs herbergia. oc með honvm. l. rikissmanna af Galaath. Phace son Romelie tok riki yfir Jsrael a. ii. ari hins setta tigar rikiss Ozie konvngs af Hiervsalem. A þi ari andaþiz Ozias leprosvs konvngr Jvda oc var iarðaðr hia frendvm sinvm i borg Dauids. Eftir hann tok riki yfir Jvda Joathas son Ozie. þa var Joathas halfþritogr. Hann rikti. xvi. ar i Hiervsalem. Moðir hans het Hiervsa. hennar faðir Sadoch. Joathas geck fram eftir folsporvm feðr sins at goðlæik i gvðs avgliti. enn æigi nam hann af. at folkit fornferði a hæðvm. Hann ligt halæitliga bva vm dyrr mvsteris drottins. A hans davgvm tokv at ganga a riki Jvda Rasyn konvngr Syrie oc Phace konvngr son Romelie. Joathas konvngr andaðiz a. xvi. ari rikis sins. oc var grafinn hia konvngvm Jvda i Dauids borg. Son hans het Achaz. Phace son Romelie rikti i Samaria yfir Jsrael. xx. ar. hann var i alla staði slikt illr sem Jeroboam son Nabath ę ða aðrir hans eftirkomendr. A davgvm Phace konvngs Jsraels kom Theglathphalassar konvngr af Serklandi. hann rak hernað vm Maacha oc Galaath oc Galileam. oc allt riki Neptalim vann hann oc herlæiddi i Serkland. þa ræis oc vpp i mot Phace oc væitti honvm vinsat sa maðr er het Osee son Hela. A. xvii. ari rikis Phace tok Achaz son Joathe konvngdom yfir Jvda. þa var hann. xx. at alldri. hann rikti i Hiervsalem. xvi. ar. Hann villtiz af r ę ttvm vegvm Dauids konvngs oc gerði æigi sva at gvði likaði. helldr geck hann villistiga eftir vandvm vegvm Jsraels konvnga. oc vmfram þat er enn var verra blotaði hann syni sinvm oc brendi hann fyrir skvrðgoðvm at hæiðinna manna sið. Hann eflði blot a hverri h ę ð oc halsi oc vndir hverio blomgvðv tre.
Fra Achaz ok Rasyn konungi.
J þann tima forv þeir Rasyn Syrlandz konvngr oc Phace konvngr Jsrael at beriaz a Jorsalaborg. Enn Achaz varðiz harðliga. Enn þvi at þeir gatv æigi sigrat hann. þa settiz Rasin konvngr vm borg Ahilam. er Ozias konvngr hafði vvnnið af Syriss oc vppr ę ista oc eflda. þessa borg vann Rasin nv aptr vndir Syros oc rak brotto alla Gyðinga enn skipaði sinvm monnvm staðinn. oc hafa Syri eignaz þa borg iafnan siþan. þvi næst sendi Achaz menn a fvnd Theglathphalassar Serklandz konvngs með þessvm orðvm. Ek em þinn son. oc enn helldr þegn oc þionn. fyrir þi kom til með þinn styrk oc stavck a brottv þessvm konvngvm Rasin oc Phace. er mer þravngva fast oc minv riki. Her með sendi hann Serkia konvngi at giof allt lavsafe. þat er hann feck i templo domini oc konvngs fehirðzlvm. Serkia konvngr þa giasir hans oc for þegar i Syriam til Damaschv borgar oc vann hana oc herlæiddi allan borgarlyðinn enn drap Rasin konvng. Achaz konvngr for þa til motz við Serkia konvng i Damaschvm. Enn er Achaz sa alltarit i höfvðhofi Damaschv borgar. þa gerði hann alla mynd þess alltaris oc sendi i Hiervsalem Vrie kennimanni. Enn Vrias smiðaði þegar alltarit eftir allri þeirri skipan sem konvngr bavð. oc l ę t sva standa þar til er Achaz kom heim i Hiervsalem. Ok þegar sem hann sa alltari þetta. lavt hann þvi oc f ę rði þar yfir ofr oc fornir. Enn hann flvtti brot ę iralltarit or templo domini. Hann bavð Vrie byskvpi at fera allar fornir yfir þat mikla alltari. sem hann hafði gera latið. Vrias gerði alla lvti eptir hans boði. Achaz li ę t oc taka enevm mare af sinvm vmbvnaði oc setia a bert steingolfit. oc alla pryði mvsterissins li ę t hann svivirða. oc allt þetta sakir Serkia konvngs. A þeim tima veitti Osee. sem fyrr var getið. með raði Serkia konvngs vmsatir Phace konvngi oc drap hann. enn settiz i rikit eptir oc rikti i Samaria. ix. ar. Achaz hinn illi konvngr varð sottdavðr a. xvi. ari rikis sins oc var grafinn þo at vverþvgr hia frendvm sinvm i borg Dauids.