Bókastaðir

Her byriaz saga fraa Samson hinum sterka domanda sunar (!) Manue ok af Dalida.

Maðr er næfndr Manve af þeirri borg er Saraa hæitir. hann var kominn af kyni Dán svnar Jacobs hins gamla. Manve var eiginkvændr. kona hans var vbyria oc er æigi nefnd. Sva bar til einn dag at engill drottins birtiz henne sva segiandi. þv hefir verit vbyria oc g ę tið enga erfingia við bonda þinvm her til. enn varaztv vin at drecka ǫða annan afeinginn dryck. oc æigi skalltv vhræint eta. þviat þv mant verða g ę tandi i kviði oc þann son f ę ða at hans hǫfvð skal harknifr alldri snerta. þiat hann man vera nazarevs domini. þat er gvði helgaðr allt fra moðvr kviði af barns alldri oc honvm merktr. hann man frelsa folk yðart oc allan Jsraels lyð af allri anavð Philistinorvm. Nv sem þessi kona koin til bonda sins segir hon sva. Ek hefi þer ny tiðendi at segia. Gvðs maðr kom at mer sa er hafði eingiliga asianv oc var miog ogvrligr. Sem ek eftir spvrða hverr hann veri ǫða hvaðan hann var ǫða hvat hann hieti. villdi hann eigi segia mer. nema enn helldr sagði hann sva. þv mant son geta oc fæða. oc þi bað hann mik eigi vin drecka ǫða styrkan dryck. oc æigi ne eitt ę ta vræint. at hann kvað þenna svæin verða mikinn fyrir ser snæmmendiss oc vera gvði helgaðan fra moðvr kviði allt til davðadags. þa hof Manve vpp bæn sina til drottins sva segiandi. Ek bið drottinn minn at sa hinn sami maðr er þv sendir til konv minnar komi ððrv sinni oc segi oss hvat ver skvlvm gera við svein þenna er f ę ddr man vera. Gvð hæyrði bǫn hans oc sendi eingil sinn til konv hans sem hon sat vti a akri ein saman. Oc þegar sem hon sa eingilinn rann hon sem skiotazt oc segir bonda sinvm. at nv birtiz henne sa hinn sami dræingr er hon hafði fyrr seeð. Manve spratt þegar vpp oc fylgði henne. oc er þav komv at einglinvm. mællti Manve til hans. Ert þv sa dreingr er komt fyrrvm oc talaðir við kono mina. Hann svaraði. Ek em sa hinn sami. Þa mællti Manve. Nv þa þann tima er þat kemr fram sem þv fyrir sagðir. hveria framferð skal sveinninn hafa eða við hverio skal hann viðrsia væita. Eingillinn andsvaraði. Eigi skal hann eta þat er vræint er oc ecki þat er i vingarði vex. oc halldi sik sva at ollo sem ek bavð konv þinni. Manve vissi enn eigi at eingill gvðs veri sa er hann talaði við oc mællti til hans. Bið ek felagi at þv biðir her meðan ec geng at matbva þer eitt kið af hiorð minni. Eingillinn svarar. Eigi man ek eta f ę ðv þina þo at þv skylldir mic til. enn ef þv vilt drottni f ę ra fornir æða offr þa mattv þat vel gera. Manve m ę llti. Seg mer nafn þitt. at ver megim þer makliga virðing veita. ef með framkv ę mð fyllaz orð þin. Hann svarar. Hvat þarft þv at spyria at nafni minv þviat þat er miog vndarlict. Manve rann nv skiott til hiarðar sinnar oc tok eitt kið. oc þar með aðra hlvti þa er hann villdi forna. oc er hann kemr aptr. setr hann niðr a eitt berg þat er hann for með. offrar hann drottni fyrir sin stormerki með þvi moti at þar spratt vpp logi or steininvm. oc brendi offrit [með þæima hætti. enn með ræyk er þar stoð af for engill gvðs til himins. Enn er þetta sa Manve oc hvsfrv hans. fiello þav til iarðar af hræðzlo. oc mællti Manve. Við manvm skiott dæyia er við höfvm seeð drottin likamligvm avgvm. Hon svaraði. [Til hvers veri drottni at hafa þegit ofr oc fornir af ockarri hendi. ok alldri hefði hann synt ockr þessa hlvti oc sagt fyrir þat er siðarr man fram koma ef hann villdi nv þegar drepa okr.

Her er Samson feddr sun Manue. capitulum.

202. Nv kemr at þeirri stvndv er kona Manve f ę ðir son oc nefnir Samson. Þessi sveinn vox vpp með favðvr oc moðvr oc blezaði gvð hann. oc var styrkr andi drottins með honvm snemmendiss. Sva bar til einn tima þa er Samson var frvmvaxta at hann kom i riki Philistim i þann höfvðstað er het Thomnatha. oc sa þar konv eina þa sem honvm fiell vel i skap. Hon var af ætt Philistim. hann for hæim til favðvr sins oc moðvr oc segir sva til þeirra. Ek hefi litið konv þa af dötrvm Philistinorvm er ek vil fyrir hverinn mvn at ið fait oc fastnit mer til eiginkonv. þav svaraðv beði. Hvart er nv engi kona sv ær þer se ę igandi i varri ætt ę ða i ollv Gyðinga kyni. er þv vill fa þer konv af dótrvm Philistim þeirrar þioðar er ecki hefir vmskvrðar skirnn. Enn mælti Samson til favðr sins. Ecki likar mer annat enn þv fangir mer þessa konv til hvsfrv. þiat hon þocknaðiz vel minvm avgvm. Enn Manve oc kona hans vissv æigi at af gvðligri fyrirhyggiv myndi þetta kvanfang Samsons verða Philisteis til sva mikils tions oc tapanar. þiat i þann tima gæisaði sem mest ofsi Philistinorvm yfir Jsraels lyð. Nv fyrir bón Samsons oc aeggian fara þav með honvm i borg Thamnath.

Nv sem þav komv at vingavrðvm borgarinnar rann i mot þeim einn leo grimmr oc graðvgr þo at vngr veri hræðiliga r ę miandi. við þessa syn flyðv þav með mikilli hræðzlo Manve oc kona hans. en andi drottins kom yfir Samson með miklo kappi oc afli. Snyr hann þegar at dyrino sva at hann hafði ecki i hendi. hann ræðr a oc liggtir æigi fyrr enn hann hefir drepit dyrit. oc sva lamit oc smátt i svndr slitið sem hann hefði brytiað eitt kið til kietils. Siðan for hann at læita foðvr sins oc moðvr oc fann þav þar sem þav hofðv folgiz. enn eigi villdi hann þeim segia þetta þrekvirki er hann hafði vvnnit. Fara þau nv i Thamnath. oc tala þetta mal. oc var honvm heitið konv. Forv þav Manve þa hæim. Enn Samson dvalðiz þar eptir nockvra daga. oc sem hann for heim til hvs favðvr sins. veik hann af veginvm oc villdi sia hræ dyrsins. Ok er hann kom at sa hann at byflygi hafði borit hvnang æigi litið i mvnn dyrinv. hann tok hvnangit oc át enn svmt ferði hann hæim foðvr sinvm oc moðvr oc sagði þeim ecki til hvaþan honvm hafði komit.

Litlo siðarr for Manve i borg Thamnatha at bva brvllavp svnar sins. sem margtiðt er. Enn er þess staðar menn sa at Samson var famennr fengv þeir honvm til fylgðar. xxx. vngra manna. Samson talar sva til þessa svæina. Ek man bera vpp fyrir yðr eina litils hattar gatv. enn ef þer getið læyst innan þessa. vii. daga sem væizlan stendr. þa man ec gefa yðr. xxx. linklæða oc sva marga kyrtla. ef þer gi ę tið æigi gatv mina læyst sva at mer liki. þa skvlv þer gefa mer [. xxx. skyrtna oc. xxx. kyrtla. þeir baðv hann bera vpp gatvna. hann gerði sva oc mællti. Matr for vt af etanda oc af styrkvm stormikill sætlæikr. æigi er mæiri segir Samson min gata. þeir briotaz við oc giæta ecki at gert. Ok sem nalgazt hinn. vii. dagr væizlvnnar. tavlvðv þeir sva til brvðarinnar. Gior þik bliða við bonda þinn Samson oc locka hann sva at segia þer þessa gatv sem hann hefir vpp borit fyrir oss oc sva hvat hon merkir. Enn ef þv vill þetta æigi þa manvm ver þig inni brenna oc allt hyski favðvr þins. eða hafi þer þi boðit oss til væitzlo at þer villdit ræna oss varvm penningvm. Hon læitar eptir við Samson hvat þesse gata merkir. oc biðr með tarvm sva segiandi. Hatar þv mik enn elskar æigi. ef þv vill æigi skyra mer gatv þa er þv hefir vpp borit fyrir mina frendr. Samson svaraði. Ellar þv at ek mvna þer þat segia er ec villda hvarki favðvr minvm ne moðvr. En þo vm siðir a siavnda degi brvllavpsins sem hon gerir honvm allar vnaðir með akafligvm grati verðr þat at hann segir henne hvat gatan merkir. enn hon segir þegar sinvm borgarmonnvm. Oc a þeim sama degi fyrir solar setr ganga þeir fyrir Samson oc segia til hans. Hvat er sætara hvnangi oc hvat styrkara leone. Hann svaraði. Enn hafi þer æigi fvndit divpan grafning gatv minnar vtan þer hefðit arit til með minni kvigv. Endrnyiaz þa andi drottins i hans briosti honvm til styrktar. geck hann þegar i þa borg Philistinorvm er Aschalon hæitir oc drap þar. xxx. manna af hæiðingivm oc tok þeirra klæði þeim at gialda er gatvna hofðv græiðt. Varþ hann fyrir þetta fvrðvliga ræiðr Philisteis er honvm potti þeir hafa gabbat sik oc gint kono sina at segia þeim gatvna. ferðaðiz hann nv heim til föðvr sins. en hvsfrv hans dvaldiz eptir. Ok litlo siðarr tok hon ser annan mann einn af vinvm Samsons oc giptiz þeim at föðvr raði.

Nv sem sa timi kom er menn skylldo skera hvæitiakra sina. þa for Samson oc ætlaði at vitia konv sinnar. Tok hann einn bvck fæitan at fera henne. Enn er hann kom at hennar herbergi oc ætlaði inn at ganga at vanda sem siðr var til. liet faðir hennar a þi engan kost oc sagði sva. Fimm ę r ætlvðvm at þv villdir fyrirlita hana oc lata æina. fyrir þi gipta ek hana einvm þinvm vin. Enn ef þer mislikar þetta þa skal ec þer skiott bóta. ek a aðra dottvr miklo yngri fegri oc friðari. oc gack þv nv þa at æiga. Samson svaraði. En ek ætla hitt nv rað at glæpaz ecki lengr i felagskap við Philistim. nema enn helldr vpp fra þeima degi skvlv þer til þess ætla at ec man gera yðr slict illt sem ec orka. Oc þegar for hann þar til sem hann vissi at refa vrð var. oc tok þar. ccc. refa oc let alla lifa. enn veitti þeim þess hattar vmbvð. at hann batt saman halana a hveriom tveimr. oc þar meðal batt hann loganda elldskið. Sem hann hafði sva vm bvit ligt lavsa alla refana senn. Enn þeir hliopv logandi higat oc þigat. komv niðr vm siðir i sæðvm Philistinorvm. lavst þa loganvm i hialma þeirra er þeir höfðv hlaðit saman hveiti sino. toc þa at loga hvat af öðrv sva at engv matti biarga þar til er vpp vorv brendir akrar þeirra allir oc vingarðar. olivatre oc alldinskogar. þa talaðv Philistei vin með ser hverr þeim myndi gerll hafa sva mikinn skaða. var þeim þa sagt at Samson magr höfðingians af Thamnatha hafði þetta gert fyrir þat er hann hafði tekit dottvr sina eiginkono Samsons oc gipt öðrvm manni. Við þessa sögv fyllaz Philistei vpp reiði. fara til sem skiotaz oc brenna inni kono þessa er Samson skylldi att hafa favðr hennar oc frendr hyski oc hæimamenn. Kemr þa Samson at i þvi oc mællti til þeirra. Nv þickiz þer vel hafa syst oc h ę fnt skaða yðars. enn þer manvt þo æigi lengi þessv fagna. þiat ek skal sannliga hefna yðr minnar sviviröingar. er þer hafit brent konv mina oc mag. enn siðan man ek sefaz oc læita þa enn ecki a yðr fyrrvin en þer synit yðr þa enn i nockorri vvisv við mig. Samson bra þa sverði sinv oc hio bæði hart oc titt oc væitti þeim sva harða hrið at allir þeir er þi komv við flyðv skialfandi oc felmsfvllir með sva skiotri ras sem fotr mattv þa mest bera. Nv dreifði hann sva hermonnvm Philistim. Segiz oc sva at i þesearri snerrv drap hann af þeim þvsvnd manna. sem æigi ma vndarlict þickia at þi sem eptir ferr at hann drepi mart manna með sinv sverði. þiat fyrir þa skylld var hann kallaðr Samson hinn sterki at sva miog eflldi hann andi drottins i hverri pravt at honvm varð til engiss lvtar aflfalt.

Fra þui er Samson drap þusund manna með asnakialka.

203. Eftir þenna atbvrð for Samson til eins helliss i biargi þi er Etham heitir. bioz hann þar vm oc bygði hellinn. Enn Philistei draga nv her saman at nyio oc fara i riki Jvða. setia sinar herbvðir i þeim stað er siðan hæitir Lehi ę ða Thei. þat er kinnarkialki at nor ę nv. þar coma til þeirra ættmenn Jvde oc eptir spyria hvi þeir hefði her samnat a hendr þeim. þeir svarvðv. Til þess ervm ver her komnir at taka Samson oc giallda honvm grimliga alla þa illa hlvti sem hann hefir oss gert. nv ef þer komit honvm bvndnvm i vara avgsyn þa manvm ver æigi yðr mæin gera. Jvðar völðv þa. iii. þvsvndir af sinvm monnvm. þeir forv til helliss Etham oc fvndv þar Samson oc savgðv sva til hans. Fyrir hvi hefir þv r ę tta Philisteos i mot oss sva at þeir ero nv komnir með mikinn her i vart riki oc ætla at eyða enn oss at drepa. Nv er þat vart ę rendi til þin at taka þik oc selia bvndinn i hendr Philisteis. Samson svaraði. þat skolo þer fyrir vist vita at ecki em ek einn vppnæmr fyrir yðr ðllvm. Enn til þess at ek spilla æigi minvm ættmonnvm. nema enn helldr ef gvð villdi tima til gefa mætti Jsraelite fyrir minar hendr frelsaz af vandv valldi sinna vvina. þa man ek kost þann gera yðr at þer bindit mik sem yðr likar oc f ę rit mik sva Philisteis at kavpa yðr frið oc frelsi oc ðllo yðro goðs ef þer vilit aðr h ę ita oc sveria vpp a trv yðra at þer skvlvt æigi drepa mik. þeir dvðlðv ecki þat at sveria at þeir skylldi hann æigi drepa helldr selia bvndinn i hendr vvinvm. Taka hann nv oc binda tvennvm hinvm styrkaztvm nyiom ræipvm. oc sva bvinn flvttv þeir hann oc ferðv brotto af biargi Etham. Enn er þeir nalgaz herbvðir hæiðingia [Philistinorvm. þa hlavpa þeir þegar i mot þeim með [miklo opi oc vapna braki. þa kemr enn [knyiandi styrktar andi drottins yfir Samson. hann sva miog eflandi at æigi sæinna slæit hann ðll i senn þav ræip sem hann var bvndinn með helldr enn akafr elldz logi brennir lim eða lavf af þvrrvm viði. Vorv þa þegar hans vvinir æigi iafnakafir at honvm at ganga er hann var lavs vorðinn. Nv sem Samson var vapnlavs fyrir sinvm vvinvm oc molstððvmonnvm svifz hann vm. gripr hann vpp einn asnakialka fornan er la i læirinv fyrir honvm. hlæypr þa þegar a alvapnaðan heiðingia her oc berr a tvær hendr sva at hann drepr af þeim þvsvnd manna með einvm asnakialka. enn allir flyðv þeir sem eftir lifðv. Samson lofaði gvð oc kastaði þa niðr kialkanvm oc kallaði þann stað Ramathehi. þat þyðiz vpptaka kinnarkialka. Samson var nv oc miog sva at þrotvm kominn af þorsta oc mikilli møði. sva at hann matti varla vppstanda. kallaði hann þa til drottins sva segiandi. þv minn herra gvð gaft þenna kinnarkialka i havnd mer þræli þinvm oc væittir mer styrk at sigra vvini mina með sva miklo stormerki. enn nv se ek at ek man dæyia oc sva i hendr falla hæiðingia vtan þv hialpir mer með þinni miskvnn oc milldi. Enn herra gvð hæyrði þegar bón hans oc hrærði einn iaxl i asnakialkanvm er hann hafði bariz með. oc fyrsti þar þegar vatn or sva gnogliga sem hann þvrfti at drecka. hrestizt Samson þa skiott oc toc all sitt. Oc til vitnis vm þetta halæita takn hæitir sa staðr brvnnr rennandi framkallaðr af asnakialka oc sva kallaz sa staðr enn i dag. Tokv nv Gyðingar Samson til höfðingia oc hertoga yfir sik at hallda strið oc hæyia bardaga við Philistim. dömði hann yfir allt Israels folk. xx. ár.

Fra Samson ok hans sterkleika.

204. A nockorvm tima þa er Samson var staddr i borg þeirri er Gaza heitir. læit hann þar æina portkonv oc geck inn i hennar herbergi oc svaf þar vm nott. þetta fretta Philistei at Samson myndi vera innan borgar i Gaza. hlavpa þeir þegar saman. taka borgarhliðin lykia oc lesa ramliga. oc setia þar með varðhalldzmenn at engi skylldi vpp lvka. Siþan sla þeir mannhring vm herbergit er hann svaf i. biðv nv sva dags oc ætlaðv at væita honvm atgavngo þegar er hann gengi vt vm morgvninn oc drepa hann. þottvz þeir nv fvllkomliga hafa rað hans i hendi. Enn þeir höfðv hann einn sinna manna inni byrgt i borginni sva at hann matti með engo moti vt komaz. Samson svaf i naðvm allt til miðrar nqtr. Siþan reiss hann vpp oc geck vt ætlar nv a brott af borginni. varð hann varr við vmsatina. oc snyr vt at borgarhliði oc ser þat með styrkvm lasvm lvkt. hann gengr þo til oc faðmar portið með þi moti at hann tekr sinni hendi hvarvm megin oc spennir sva vm vndirstolpa hliðsins. en hann setr hals oc herðar vndir yfirportið. treystir a siðan þar til er losnar allt saman. kemz hann nv sva or klandi sinna motstoðvmanna. at hann berr þann allan borgarhliðs vmbvnað a avxlvm ser allt a ofanvert þat hið hæsta fiall er veit til Ebron. Philistei missa nv með þessvm hætti Samsons i Gaza vm morgvninn.

Her segir huersu prettafull Dalila sueik Samson sterka. capitulum.

205. Þesso næst lagði Samson ast við þa konv er bygði i ginvm afdal þeim er heitir Soreth. Philistei verða varir oc visir at Samson elskaði þessa konv. enn hon er nefnd r ę tto nafni Dalila þo at margir menn kalli hana Dalidam. fara höfðingiar þeirra at finna hana oc segia sva til hennar. Allz þv ert einkannliga vnnastza Samsons. þa vitvm ver at hann væitir þer allt þat er þv biðr hann. oc þi man hann segia þer sina alvðrv. Nv vilivm ver gera kavp við þik at þv komiz a sl ę glæiks mvni við Samson með þino bliðlæti oc klokskap. sva at þv verþir viss af honvm ens sanna hvaðan honvm k ę mr sva mikill mattr oc styrklæikr at honvm verðr til einkiss aflfáll. sva oc skaltv vis verða með hverio moti ver megim hann sigra oc sigraðan pina vegðarlavst. Enn ef þv k ę mr þessv a læið oc kannt oss at segia þessa alla hlvti sem nv hǫfvm ver tint oc tall. þa skalltv þetta æigi til eingiss vinna sem verðvgt er. helldr sva margir sem ver ervm hǫfðingiar Philistinorvm. skal hverr varr gefa þer. iii.. c. silfrpenninga. þesso iatar hon at gera. oc gera þeir þetta kavp statt við hana.

Nv sem þav Samson finnaz oc taka tal sin i milli segir sva Dalila til hans. Bið ek minn keri at þv segir mer i trvnaði hvaðan þv hefir sva mikinn styrklæik vmfram alla veralldar menn ę ða með hverio þik ma binda at þv megir æigi slita. Samson svaraði. Ef ek em bvndinn með siðfalldvm sinstreingivm hrablavtvm. þa em ec ecki sterkari enn aðrir menn. Litlo siðarr segir hon Philisteis. Enn þeir fa henne þegar þess hattar ræip. oc þar með bindr hon Samson sofanda. Enn Philistei læyndvzt i herbergino. þiat þeir villdo vita hverso feri með þeim. Nv sem hon hefir bvndit Samson sem hon kann kallar hon hált oc segir sva. Philistei taki þik Samson. Hann bregðr við hartt er hann hæyrði Philistim nefnda. slitr þegar bavndin af ser sem hann veri bvndinn með brvnnvm havrtygli. oc væit nv ecki giorr vm afl hans enn aðr. þa mællti Dalila sva sem með glænzi. Se nv hverso þv hæddir mik. ær þv sagðir mer æigi satt. Nv bót yfir við mik oc seg mer sannlæic af með hverio þik ma binnda altv slitir æigi. Hann svaraði. Ef ec em bvnndinn með skavrpvm ræipvm oc þo nyivm sva at til engrar vinnv hafi havfð verit oc æigi a klyf komit. þa verð ec vstyrkr sem aðrir menn. Dalila ræyndi enn oc batt hann með þesskonar ræipvm oc mællti siþan. Komi nv Philistei er læynaz i þesso herbergi oc handtaki þik Samson. Enn hann slitr af ser bǫndin æigi seinna enn einarðan vef. Oc enn mællti Dalila. Hvi villtv sva svikia mik at þv lygr æ at mer. Nv seg mer satt. iii. sinn með hverio þic skal mega binda. Samson svaraði. Ef þv tekr mina. vii. locka snyr saman með hardregli oc bindr ramliga við einn h ę l hafan oc setr h ę linn i iorð niðr. þa verð ek þegar vstyrkr sva at ek ma ecki at færaz. Oc sem Dalila hafði þetta gert við Samson sofanda. kallar hon hátt sva at hann vaknar við. Philistei hlavpa at þer Samson. segir hon. Hann bregðr þa enn við oc kippir vpp hælinvm þegar með harinv. þa mællti Dalila. Harðla miog hryggir mik þat er þv segiz elska mik. enn þat er þo ekki vtan hægomi þinn. þiat hvgr þinn er mer hvar fiarri. Nv hefi ek þrysvar ravn til gert hvernn trvnað þv villdir vndir mer eiga. oc hefir þv hverio sinni logit at mer enn viliat mer ecki satt fra segia vm þitt it mikla afl. Nv sem hon helldr æ a hinni samv bøn við hann oc gnaddar ið sama dag oc dægr. sva at hann ma hvarki fyrir henne hafa naðir nott ne dag. læiðiz honvm lox oc møðiz hvgr fyrir hennar vnaðvm. segir hann benni nv vm siðir sannlæik af þessv efni. Hann mællti þa til hennar. þat er mer skylldvliga boðit af gvði minvm at ec skal alldregi nockvrs konar iarn lata snerta höfvð mitt. þiat ec em nazarevs. þat er gvði helgaðr allt fra moðvr kviði. Ok fyrir því ef allt hár er rakat af höfði mér þa er brotið allt mitt afl oc verð ek þa ekki styrkari en einnhverr vbræytr maðr. því at þa man andi drottins flyia fra mer.

Nv sem Dalila sa at Samson bar satt vpp fyrir hana. sendir hon þegar til allra hofðingia Philistinorvm með þeim ę rendvm at hon bað þa enn vm sinn koma með vapnvðv liði. sagði nv Samson hafa fvllkomliga birt ser sina alvðrv. þeir bvaz sem skiotaz fara oc fram koma með vapnvðv liði til hvsa Dalile. hafa nv með ser oc fe þat er þeir höfðv hæitið. Enn sv bannsætta oc bitra naðra er alla vega var vtan a at sia tigvrlig oc tillystilig. þiat hon var friðvzt allra kvenna synvm. enn innan liot oc læiðilig fvll æitrs oc vlyfians. plagar sik nv alla vega viðr skravt oc skart. klæðiz hinni bæztv gangverio oc öllvm hinvm fegrsta bvnaði. gengr siðan inn fyrir Samson. byrlar oc bærr honvm hinn styrkazta dryck oc lockar hann miog til at drecka með bliðvm halsföngvm oc blavtligvm kossvm. Með þeima h ę tti sem nv megi þer hæyra svæik oc sigraði þessi prettafvll pvta með æitri sinnar illzkv þann agæta kappa sem alldri aðr varð yfirstiginn af sinvm vvinvm. Nv sem Dalila ser at dryckr møðir Samson oc svæfn sigr a hann. sættiz hon niðr hia honvm oc læggr hann sitt höfvð i kne henne. sofnar bæði skiott oc fast. Nv helldr hon þann hertekinn með sinni illzkvfvllri vndirhyggiv. er hvarki matti aðr sem þer hafit hæyrt hallda bavnd ne borgir. Hon kallar til sin einn raxtrmann oc at hennar bæiðni fer hann henne enn hvassazta harknif oc rakar hon af Samson. vii. hans locka. Siþan skræiðiz hon vndan hofði honvm oc kallar þa hátt sva segiandi. Philistim yfir þik Samson. Hann vaknaði oc ræis vpp skiott oc mællti i hvg ser. Ek man enn vt ganga sem ek hefi fyrr gert oc man ek æigi mæira við þvrfa at hræða hæiðingia enn hrista mik at eins. Ok þvi sagði hann sva at hann var nyvaknaðr oc visse æigi hversv hæðiliga hann var læikinn. enn drottins andi oc allr hans styrkr var fra honvm horfinn. Philistei lavpa nv til ok handtaka hann. beria oc bæysta oc blinda hann baðvm avgvm. Siðan fiotra þeir hann oc føra til borgar Gaze. byrgðv hann þar i dyflizv oc liætv hann mala korn. Var hann sva þiaðr mörgvm harmkvælvm þar til er lockar hans tokv at vaxa. Þat höfðv Philistei oc iafnan til skemtanar at samkvnndvm eða þa er þeir helldo hatið guða sinna at Samson skylldi læika fyrir þæim. oc brosoðv sva sigri sinvm er þeir höfðv hann feingit.