Bókastaðir

Josue let heingia konunga.

Nv frettir Josve at þeir. v. konvngar er fyrr vorv nefndir höfðv komiz brott or bardaga við Gabaon. oc læyndiz nv i helli ginvm miklvm við borg þa er Maceda heitir. Segir Josve þa sinvm felagvm.

Farit nv sem skiotazt oc velltit storv grioti fyrir hellismvnnann. þar er konvngar ero inni. oc setið siðan til vrvgga varðhallzmenn. at þeir komiz hvarki brottv með sinvm mætti ne annarra fvlltingi. Siðan er yðr enn ecki setvefni at sinni. helldr skvlvt þer sækia nv af nyio eftir yðrvm vvinvm vndan flyiondvm. Drepit æ þa af flottamonnvm sem siðarst fara oc yðr ero næstir. Farit nv hermannliga. geymit til oc gietit vendiliga. at engir þeir varir vvinir sem gvð gefr i vart valld nai sinvm borgvm ser til verndar ę ða viðrstöðv. þeir fara oc gera alla hlvti eptir boði Josve. sva at þeir drapv drivgvm allan her heiðingia. er dreifðz hafði her oc hvar. oc þeir æinir þagv lifit er með flotta komvz i styrkar borgir oc byrgðv sik þar. Siðan hverfa Gyðingar aftr oc finna Josve við Macedam. þiat hann hafði þagat flvtt meðan herbvðir sinar. Enn i öllvm þessvm socknvm. sem nv var fra sagt. var engi hans manna fallinn oc engi sarr vorðinn. siðan hinn vandi þiofr Achior var davðr. þorði nv engi at krytia ę ða kvæina moti Jsraels lyð. Eftir þetta bavð Josve sinvm monnvm at opna helli þann er konvngar varv byrgðir i oc læiða þa fyrir sik. Sem þat var gert. kallaði Josve saman allan lyð oc talar sva til allra höfðingia Gyðinga. Farit nv til oc fottroþit þessa konvnga oc gangit a þeirra halsa þeim til haðvngar. Sem þeir þetta giorðv. mællti Josve til sinna manna. Hirðit ecki at ottaz. styrkiz helldr oc verit vrvggir. þiat sva man drottinn gera við lyðra alla vvini. þa sem þer striðit dreingiliga i mot. Enn Josve barði þa oc bavð siðan vpp at festa þessa. v. konvnga. oc h ę ngv þeir allt til aptans. oc at solar setri eptir boði Josue voro þeir af galga teknir. oc dregin hre þeirra i helli þann sem þeir höfðv aðr læyndz i. baro siðan at stort griot oc kasvðv þa. oc sva velltv þeir storvm st ę invm fyrir hellissmvnnann. sem enn ma merki sia.

Her vinnr Josue borgirnar ok drepr folkit.

Eptir þetta settiz Josve með sinn her vm Macedam oc vann hana. drapv þeir konvng hennar oc slogv með sverði hvern mann er bygði borgina. sva konvr sem karla. Af Maceda for Josve með allan herinn til þeirrar borgar er heitir Lebna oc striddi a hana þar til er gvð gaf i hans valld borgina. drapv konvng hennar oc hvert mannz barnn a sömv leið sem i Maceda. Fra Lebna for hann með alltt Jsraels folk til þeirrar borgar er Lachis hæitir oc s ę tti þar herbvðir sinar vmhverfis oc barðiz þar a. ii. daga. feck þa vvnnit þa borg með gvðs fvlltingi. drap hann oc dæyddi hverna mann er i var borginni. sem hann hafði giort við Lebna.

Fra Jram konunge af Gaze.

J þann tima samnaði Jram konvngr af Gazer at ser miklvm her. for siðan oc ætlaði at hialpa Lachis monnvm. Enn þat varð æigi sva. helldr hefir Josve af hans ætlan niosn. snyr þa i mot honvm. oc æiga orrosto beði langa oc harða striða oc stranga. sva at æigi liettir iyrr enn þar fellr konvngr Jram oc allr hans herr. sva at engi maðr var eptir vdrepinn af hans liði. Eptir þat for Josve með allan sinn her til þeirrar borgar er Eglon het. oc kringði þegar vm borgina með bardaga oc atsokn sva harðri. at hann vann hana a ginvm degi oc drap allt þat er þar var mannkyns. ok æyddi allt þat herað er þar la til borgarinnar. Af Eglon for hann i Ebron oc vann þa borg. oc æyddi allt þat riki er þangat la vndir. Þaðan for hann með allan sinn her i Dabir oc vann hana oc æyddi með eggiv öll þorp vmhverfiss. Sva gersamliga drap hann menn i öllvm þessvm borgvm. at æigi lifði æitt barn eptir. þiat sva hafði gvð boðit honvm. Alla konvnga oc riki þeirra eyddi hann með ginni enndalykt fra Chadesbárne. þeim stöðvm er sva hæita. allt til Gazeborgar. alla iorð Gesen til Gabaon. þiat gvð drottinn Jsraels barðiz fyrir hann. Siþan hvarf hann aftr fyrst at sinni til herbvða staðar i Galgala með allan sinn lyð.

Af Jabin konunge af Asor.

164. Sem Jabin konvngr af þi riki er heitir Asor hæyrir g ę tit bernaðar Josve. ę tlar hann at afla ser fregðar oc reisa her i mot Gyðingvm. Sendir hann þa orð Jobab konvngi Aðon oc öllvm þeim konvngvm er riktv norðr fra honvm vm fiallbygðir oc sliettlendi svðr fra Tenaroth oc a völlvm oc heroðvm Din allt til siafar. Hann kallar oc til sin kynsmenn Chanaan beði avstan oc vestan. sva oc allar þioðir er bygðv vndir fialli Hermon a iorðv Masphat. þegar sem þeim komo boð Jabins konvngs. for hverr konvngr sem hvatligazt til motz við annan með sinn her oc allan afla. þar til er allir þessir konvngar komv saman i einn stað. hverr með sina flocka oc fiolmenni. við vötn þav er Meron hæita. Var þar þa saman kominn sva margr lyðr sem siavar sanndr. þiat hestar þeirra oc kerrvr var sva mart at varla kom tölv a. þessi hinn mikli herr heiðingia biozt til bardaga moti Gyðingvm með ognar miklv harki oc harævsti. opi oc eggian. oc sva gnogvm gny oc vapnabraki at viða landz hæyrði. þa mællti drottinn til Josve. Ottazt þv ecki mikinn her hæiðingia. helldr bv þik oc þina menn til bardaga moti þeim hvglavsvm. oc ver orvggr. þiat a morgin miog i þenna tima dags man ek þa selia i yðart valld oc vapna. Mantv m ę iða vagna oc hamla hesta þeirra enn flesta drepa oc kerrvr a bali brenna. Josve vrvggr oc ottalavss af gvðligv fyrirhæiti k ę mr nv i mot heiðingivm með allan Jsraels lyð við vðtn Meron. fyrr enn þeir vissi ván. hlavpa þegar a þa með hǫggvm storvm oc stinnvm lǫgvm. sva at hæiðingiar vikna fyrir. slær þeim þa skiott skelk i bringo. þiat gvð gaf þa sem hann hafði hæitið i hendr Gyðingvm. Leggia hæiðingiar a flotta. þeir fyrst er fremstir stoðv. Enn Josve oc hans menn vissv þa hvat vinna skylldi. þiat þeir fylgðv flottamonnvm oc bæittv sverðvm a bak þeim er næstir vorv. sva at drivgvm fiell hverr vm þveran annan er vndan flyði. Forðaðvz þa allir fvnd Gyðinga sem þeir mattv mest. Josve oc hans herr fylgðv flottamonnvm allt til hinnar miklo borgar er Sidon hæitir oc til þeirra vatna er hæita Masserephot. oc allt elltv þeir þa a vǫllo Masphe. oc drapv sva vm siðir hvern mann af þeim mikla her. at eigi dro einn vndan. Nv gerði Josve sem gvð bavð honvm. mæiddi ę ða dæyddi hæsta heiðingia. enn bravt oc brendi kerrvr þeirra oc vagna.

Josue brendi borg Asor.

Eptir þetta sem Josve sneri aptr af þessvm flottarextri. tok hann borg Asor. hon var at fornv hin hæsta hǫfvðborg af þessvm öllvm rikivm. Drapv þeir þar hvern mann vngan oc gamlan sva konvr sem karla oc börn. enn rakv brottv kvikendi oc r ę nntv fe öllo. lögðv siðan elld i oc brendv vpp borgina at kǫlldvm kolvm. Ok með sama h ę tti eyddi Josve vmhverfiss allar borgir oc bði. kastala oc kavptvn. sem hinn dyrligi gvðs þionn Moyses meðan hann lifði hafði boðit honvm. vtan þær borgir er settar vorv a h ę ðvm ę ða hæiðvm. Enn Asor eina af þessvm borgvm er allra var mest oc styrkvzt brendi hann alla vpp. Nv at ǫllvm monnvm drepnvm oc dæyddvm skiptv Gyðingar með ser kvikfe af ǫllvm avði þeirra borga sem aðr var gi ę tið. Enn Josve framdi oc fvllgerði alla lvti. sem gvð hafði boðit Moysi enn Moysce Josve. sva at æigi eitt hit minzta liæt hann eftir liggia af gvðs boðorðvm. Nv þa skiott yfir at fara þa vann Josve vndir Jsraels folk alla iorð vpplægia i svðrætt oc allt riki Gessen oc iafnlændi til vestrs. fiall Jsraels með sinvm vǫllvm oc nǫckorvm lvt fiallz þess sem er at fara vpp til Seir allt til Baalgath. vm sliettv Libani fram vndir fiall Hermon. alla þa konvnga er þar riktv sem nv var talt vann Josve með herskap. Miog langan tima striddi Josve við þessa konvnga. oc var sv engi borg ę ða þioð er sialfkrafa giefiz vpp i hans valld vtan lyðr Evevs er bygðv i Gabaon oc þeim þrimr smaborgvm er þangat lagv vndir. Enn allar aðrar þioðir feck hann oc vann með bardavgvm. þiat þat var drottins atkvæði. at heiðingiar harðnaðv i hiortvm til obbelldiss at beriazt i moti Jsrael. oc þeir skylldi sva falla fyrir þeirra vapnvm. at þeir veri engrar vegðar verðir. oc sva fyrirferiz þeir vtan alla milldi oc miskvnn sva sem drottinn hafði boðit Moysi. J þæim tima kom Josve oc drap til davða alla þioð Anachim af fiallbygðvm Ebron oc Dabir oc Anab oc ǫllvm fiǫllvm Gyðinga landz. enn eyddi oc bravt borgir þeirra. sva at æigi liet hann nockvra eptir þa er kynsmenn Anachim bygðv a iorðv suna Jsraels. vtan i þessvm borgvm Gaza Geth oc Azoto i þeim liet hann lifa nockora ę tt kynsmanna Anachim. Hafði Josve nv vvnnit allar borgir oc heroð i Jvdea. er forðvm het Chananea enn ver kǫllvm Gyðingaland. oc hafði sigrað i þessvm bardavgvm sem nv var fra sagt vm hrið. ii. konvnga hins fiorða tigar. oc gaf riki þeirra til ę ignar Jsraels folki. Liætti þa af fyrirhæitz iorðv fyrst i stað ǫllvm vfriði oc orroslvm. oc gaf gvð sinvm lyð frið oc frelsi. For þa allr sa herr i orlofi Josve vt yfir Jordan. sem Moyses hafði þar riki gefit sem fyrr er getið. oc settiz hverr at sinni eign oc hlvtskipti.