Gud mællti þa uit Moysen. Biod þu sonum Jsrael. at þeir færi mer frumburdi allz fenadar. þeir (skulu) mer færa gull ok silfr. eir ok iacinctum. purpura ok tuilitadan guduef ok bissum. geitarhar ok hrutagærur raudar ok skinn iacinctina ok tre sethim ok uidsmior lios at kueikia. smyr (s) l ok smurning ok reykelsi gods ilms. steina onikilus ok gimsteina at pryda effod ok racionabile. Geri þeir mer sauaghus. ok mun ek byggia i midiu þeirra. geri þeir mer bygd eptir liking þeirrar er eg mun þier syna ok allra kera til embættis tialldbudarinnar. Gior þu mer aurk af triam sethim. Aurkin skal uera halfrar þridiu alnar laung. enn halfrar annarrar alnar breid ok halfrar annarar alnar ha. Gylla skaltu aurkina vtan ok innan. ok gera skaltu koronu yfir aurkina ok gylla skaltu hana. ok af gulli umhuerfis hana. iiii. gullhringa skaltu gera ok setia þa i. iiii. horn arkarinnar. þu skalt gera steingr af triam sethim ok bua þær allar med gulli ok stinga þeim i hringa erkrinnar. at hon berizt af þeim. Ok steingr skulu aavallt vera i hringum erkrinnar. Ok setia muntu uitni þau i orkinni er ek mun gefa. Gera skaltu skrifunarfiol af gulli hreinu halfrar þridiu alnar langa ok halfrar annarrar alnar breida. ok þar skaltu aa skrifa. ii. eingla fylki sinu megin huort. ok skulu þau litazt til. ok yfir þeim mun ek vit þik mæla ok bioda þier þau bodord er þu skalt bioda Gydinga lyd. Bord skaltu giora af sithim alnar breitt ok tueggia alna langt. halfrar alnar hatt. bord skaltu bua allt med gulli. Aa bordinu skaltu gera uatzker ok þar yfir koronu. Fiora gullhringa skaltu gera ok bua ok setia i fiogur horn bordzins. ii. steingr skaltu gera af triam sethim ok bua med gulli. stinga þeim i hringa bordzins. suo at þat se aa staungum borit. Kerit skaltu gera af hreinu gulle i tabula ok fialar ok reykelsisker ok chiathos. i þeim fornir færa ok setia yfir bord i augliti minv iafnan. Gera skaltu kertistiku af hreinu gulli. A skapti hennar skulu uera ker ok knappar kalami ok lilii. Sex knappar skulu ut ganga af sidu kertastikunnar. iii. af huorri sidu. þriu ker uaxin sem hnot ok. iii. knappar skulu uera aa serhuerium kalamo. ok. iii. lilium. Siau lios skulu uera aa kertistikunni. Pund skal uega med aullum buningi sinum. Gera skaltu klofa af gulli lios at slockua.
Tialldbudina skaltu gera eptir þeirri er þier mun hier synd uera aa fiallinu. Tiu tiolld skaltu gera ofin af bisso ok purpura tuilitudum guduef. skrifut med ymsum litum. viii. alna ok. xx. skal uera huort tialldit langt enn. iiii. alna breitt. Fimm tiolld skulu vitfost. v. tiolldum. Kroka skaltu gera i iodrum ok endum tialldanna. at þau megi samanteingia þegar er uill. Fimmtigir kroka skulu uera i iodrum tialldzins. at krokr komi kroki i mot. Gior þu ok. l. hringa af gulli. med þeim skal segl tialldanna samanteingia at ein bud verdi allt. Þu skalt ok gera lata.. xi. harklædi at hylia med þak budarinnar.. xxx. alna skal vera huert harklædit langt. enn fiogra alna breitt.. v. harklædi skal uit fimm festa. ok hid sietta skal tuefallda framan firir budina.. l. kroka skulu uera i huerium iadri hartialldanna. at þau megi samteingia.. l. nista or eiri gior skulu uit teingiazt krokunum. at tiolldin megi samanteingiazt. Gera skaltu af hrutagærum raudum ok yfir utan af skinnum iacinctinis. þu skalt ok gera fialar þær er vppstandi i tialldbudina af tria (m) sithem alnar langar. enn halfrar alnar breidar. ok greypa hueria vit adra. Skulu. x. vera firir sunnan i tialldbudinne ok. ii. knutar af silfri geruir undir enda huerrar fialarinnar. firir nordan i tialldbudinne skulu vera adrar. xx. fialer ok þar unndir. xl. knuta af silfri geruir. firir uestan i tialidbudinne skulu vera. vii. fialir. adrar. ii. þær er i hornum skulu upp reisazt. Allar fialir skulu samfastar vera fra nedanverdu ok i ofanuert. ok ein samfesting mun allar fialir samanhallda. þuilik stadfesting mun vardueitazt i. ii. fiolum þeim er i hornum ero vppreistar i tialldbudinne.. v. asa skaltu gera af triam sithim ok hallda saman fiolum firir sunnan i tialldbudinne. ok adrar. v. firir nordan. suo hid sama firir uestan. Allar fialir ok asa skaltu gulli bua. Gera skaltu hringa af gulli i fialer budarinnar. þar skulu asa (r) nir i gegnum ganga. er þa hallda saman. Budina skaltu gera eptir þui sem þier er synd aa fiallinu. Gera skaltu tialld af iacinctu ok purpura ok bissu snunu ofit med skrifsamligu uerki ok fogrum ymissleik. Fiora stolpa skaltu gera af triam cithim ok bua med gulli. hofud skulu uera af gulli gerr ok knutar af silfri gervir. þa stolpa skaltu setia i budina ok breida þar yfir tialldit ok greina suo ina ytri budina fra inne idri. Med hringum skal tialldit vppfesta. Aurkina skaltu setia inn i budinni. ok þar yfir skaltu setia skrifunarfiolina. Bord skal uera firir vtan tialldit ok firir nordan i budinne. enn kertistikan skal standa firir sunnan i budinne. Gera skaltu tialld at inngongo budarinnar af iacinctu ok purpura ok. ii. litudum guduef. þar skaltu gera. v. stolpa af triam cethim ok bua þa med gulli. firir vtan stolpana skaltu breida tialldit. aa stolpunum skulu uera hofud af gulli ok hnutar af eiri.
Gera skaltu alltara af triam cethim. v. alna langan. ok suo breidan at hann se ferskeyttr. ok. iii. alna hafan. Alltari skal med. iiii. hornum uera. þat skal med eiri bua. Gera skaltu katla ok lata auskur i teingr ok sodala ok elldaherbergit. Aull ker skaltu gera af eiri. Fiora hringa skaltu gera af eiri i fiogur horn altarans. Arin skaltu gera ur eiri yfir alltarann. Tvær steingr skaltu gera af cethim ok bua eiri ok stinga þeim i hringa alltaris. at þat se um staungum borit. Alltarid skal holt innan vera. suo sem er aa fiallinu synt. Gera skaltu ok gard um budina af bisso ofnu. Firir sunnan budina skulu uera tiolld. c. alna laung. ok þar undir. xx. stolpar med iafnmorgum knutum. a þeim stolpum skulu uera hofud af silfri giaur. Suo skal ok vera firir nordan i tialldbudar gardinum. c. alna laung tiolld. ok undir. xx. stolpar ok iammargir knutar. Firir uestan tialldbudina skulo uera tiolld. l. alna laung. ok þar undir. x. stolpar ok iammargir knutar. Suo skal ok uera firir austan tialldbudina tiolld. l. alna laung sem firir uestan i tialldbudar gardinum. Firir nordan ok sunnan skulo tiolld uera. xv. alna laung ok. ii. studlar ok iammargir knutar. J inngongu gardzins skal tialld uera. xx. alna langt ok þar undir. iiii. stolpar med iammorgum knutum. Tialldbudar gardrinn skal uera. c. alna langr en. l. alna breidr ok. v. alna har gior af bysso. Biottu sonum Jsraels. at þeir færi mier vilsmior hreint af vidsmiorstriam ok auallt hreint lios i tialldbudinne uppfest firir utan tialldit. þat skulu vardueita Aaron ok synir hans. at þat lysi i budinne hueria nott allt til morgins.
Aaron brodur þinn skaltu uigia ok sonu hans til kenaimanna. Gera skaltu heilog klædi. at þeir hafi þa er þeir þiona mer. racionali et superhumirali. linkyrtil þraunguan. koronu ok linda. Humerali skulu þier gera af gulli hreinu ok iacinctu purpura ok guduef ok bisso.. ii. skaut skulu aa uera. at þau megi samteingia. ii. steina onichulus skaltu þar aa setia ok grafa aa þeim nofn sona Jsraels. vi. aa hueriom steini. ok bua þa med gulli. Sett þa aa huoratueggiu sidu humirali i minning sona Jsrael. ok mun Aaron bera nofn þeirra firir drottni yfir huorutueggiu oxl i endrminning þeirra. Racionali skal ferskeytt uera lofa uitt aa alla uega ok tuefalt. ok aa þui skaltu setia. iiii. skipaner gimsteina. J fyrstu skipan skal vera steinn sardius ok topadius ok smaragdus. i annarri skipan skal uera carbunculus ok iaspis. i þridiu skipan skal vera ligucius ok agates ok amesticus. i fiordu skipan skal uera crisolitus ok onichulus ok berillus. A þeim steinum skal uera nofn sona Jsrael. med gulli skaltu um steinana bua. Tvo linda skaltu gera af gulli ok festa þar aa racionali ok. ii. gullhringa. med þeim skaltu festa racionali vit humerali. Gera skaltu ok kyrtil yfir humerali. a midium honum skal hauttr vera. aa innztum hlut klæda. enn aa aedanverdum kyrtlinum skaltu gera suo sem blalenzt epli af incincto ok purpura ok guduef tuilitudum. enn þar med festum biollum i midiu. suo at gullig bialla se i odrum huerium stad. en audrum mikit epli. Ok skrydizt þui Aaron guds þionostumadr. at hliomr heyrizt þa er hann gengr at ok inn i saunghus i augliti drottins. at eigi deyi hann. Gera skaltu ok spaung af gulli. ok grafa skaltu aa henne sanctum domino ok binnda hana med dregli iacinctam vit korono. at hon se aa enni byskups. Ok bera mun Aaron illzkur þeirra. þær er synir Gydinga færa til. at þeir er fornir færa i ollum giofum sinum. Gullspaung skal iafnan uera i enni byskups Aarons. at drottinn se honum iafnan sefadr. Coronan skal uera af bisso ger. Med þessum klædum skaltu skryda Aaron ok sonu hans ok uigia þa ok helga hendr þeirra. at þeir færi mer fornir. Gera skaltu þeim linbrækr. at hyli lendar þeirra ok lær ok allt holld liotleiks þeirra. J þeim linbrokum skal Aaron uera ok synir hans. þa er þeir ganga inn i tialldbudina eda til alltaris at þiona i helgum stad. at eigi dey (i) þeir sekir af illzku. Laugsamligt ok eilift mun þetta uera Aaroni ok kyni hans.
Þa er þu vigir Aaron. þa skaltu taka kalf af hiord ok hruta albuita tuo ok braud azimos. en dreg ok dreif af vitsmiorue. gera skaltu af braudi adzimos smurdu vitsmiorue ok hucitisalla. færi þat i forn sett i bolla. kalf ok. ii. hruta. Ok Aaron ok sonu hans skaltu leida til tialldbudarinnar. ok er þu hefir þuegit Aaron ok sonu hans. þa skaltu skryda þa klædum sinum. þat er linkyrtli ok humerali ok racionali. Ok setia skaltu coronu aa hofud Aarons ok gullspaung yfir coronuna. ok þa skaltu hella vidsmiorue yfir hofud hans. ok med þessum hætti skaltu uigia sonu hans. skryda skaltu þa linbrokum ok gyrda þa med belltum. Settu ok coronu aa hofud þeim. ok munu þeir vera minir kennimenn i eilift sidlæti. Eptir þat er þu hefir helgat hendr þeirra. skal leida kalfinn til tialldbudar dyranna. ok skal Aaron ok synir hans leggia hendr i haufud honum. ok skaltu þa sæfa kalfinn i drottins augliti vit dyrr tialldbudarinnar. þu skalt taka blod kalfsins ok rida þui yfir. iiii. horn alltarisins med fingri þinum. Enn þat er eptir er blodsins skaltu hella nidr vit alltarann. þa skaltu taka alla feiti þa er idrin hylr ok netiu lifrarinnar ok. ii. nyru ok þa feiti er yfir þeim er. ok skaltu færa þa hluti brenda i forn yfir alltara. Enn holld kalfsins ok hud ok myki skaltu brenna firir utan herbudir. þuiat þat er firir synnd fært. Einn hrut skaltu vpp taka. ok skal Aaron ok synir hans leggia hendr yfir hofud hans. ok þa skaltu sæfa hrutinn ok hella blodi hans umhuerfis alltarann. enn sialfan hrutinn skaltu snida i stycki. idr hans ok fætr skaltu leggia yfir styckin ok yfir hofud hans. ok skaltu færa allann hrutinn i forn brenda yfir alltarann. er hann drottni ilmr enn sætazti tafn guds. Þa skaltu taka annan hrut. ok skal Aaron ok synir hans leggia hendr sinar yfir hofud honum. ok sidan skaltu sæfa hann ok rida blodi hans yfir innzta hlut eyra Aarons ok sona hans. ok yfir þumalfingr innar hægri handar huers þeirra ok þumalta ena hægri fota þeirra. ok hella blodinu yfir alltaran ok stockua vitsmiorue smurningar Aaron ok klædi hans. yfir sonu hans ok klædi þeirra. Ok at þeim vigdum ok klædum þeirra taktu feitina af hrutinum. hala ok hiartmor ok net lifrar. ok tuo nyru. ok þa feiti er þar er um. ok enn hægra bog. þuiat hann er vigsluhrutr. ok einn braudleif ok stycki dreipt med olio. laganum aa bolla azimorum þat er sett er i augliti drottins. þa hluti alla skaltu setia yfir hendr Aarons ok sona hans. ok skaltu helga þa vpphefiandi firir drottni. Ok þa skaltu taka þessa hluti alla ur hondum þeirra ok brenna yfir alltaran i forn ok sætum ilm i augliti drottins. þuiat þeir hlutir ero hans forn. Þu skalt ok taka bringu af hrutinum þeim er vpphafidr er. ok helgadu hana upphafda firir drottni. Helga skaltu bringu ok bog af hrutinum. ok munu þeir hlutir falla til Aaroni ok sonum hans. Eptir þat skaltu taka vigsluhrutinn ok sioda holld hans i helgum stad. ok skal Aaron ok synir hans eta hrutinn. þeir skulu ok eta braud þat er i bollanum er i skrudhusi tialldbudarinnar. at hann se sefanlig forn ok helgiz hendr fornfærandi. Eigi fædizt af þui utlendr madr. þuiat þeir hlutir ero helgir. Ef nockut er eptir af hrutinum eda braudi. þa skal þat i elldi brenna enn eigi eta. þuiat þeir hlutir ero helgadir. Þessa hluti alla sem ek baud þier skaltu suo gera yfir Aaroni ok sonum hans. Færa skal huern dag kalf i forn firir þa ok hreinsa þa af synd. þa skal ok hreinsa alltara. þa er þu færir fornir hreinsanar. ok smyria skaltv þat i helgan. Siau daga skaltu hreinsa alltaran. ok mun þat vera heilagt heilagra. ok huerr sa er þat ner mun helgazt. Þu skalt taka. ii. lomb huern dag þeirra siav daga ok færa þau i forn. eitt lamb um morgininn. enn annat vm aptanin skaltu i forn færa. ok tiunda hlut hueitissalla dreift med olio hreinu. þat hafdi mæling enn fiorda hlut hin. ok uin at drecka med enni saumu mæling med einu lambi. Annat lamb skaltu i forn færa at apni. vit þann hatt sem þu færdir um morgininn. ok eptir þui sem uer hofum sagt þer. Ok vin sætleiksforn drottni med eilifv embætti vit dyrr uitnisbudarinnar firir drottni. þar mun ek vit þik mæla. Ok þar mun ek bodord bioda sonum Israel. ok þar mun helgazt alltari mitt i dyrd minne. Helga mun ek saattmalsbud med alliara ok Aaron ok sonu hans. at þeir neyti minum kennimannzskap. ok mun ek byggia mitt i medal sona Jsrael. ok gud mun ek uera þeim. Ok uita munu þeir. at ek er drottinn gud þeirra. sa er þa leiddi aa brutt af Egiptalandi. at ek skal medal þeirra drottinn gud þeirra (vera).